Yi xtxꞌolol Ẍep xoꞌl yi wutzicyꞌ faraón
41
1 Itzun bantz te yi nsken wiꞌt el cobix yob yi bajeꞌn yi xtxolbilaꞌseꞌj nintzun witzcyꞌaj faraón yi choꞌn txiclij iꞌ stziꞌ jun chin tzanlaꞌ yi na biꞌaj Nilo. 2 Ej nin te yi txiclij stziꞌ yi jun tzanlaꞌaꞌtz nin ben tilol yi chijeꞌn tzaj juk wacẍ yi chin chiyubeꞌn nin, nin chin chilaneweꞌn nin. Nin eꞌ baj bentz tan bajseꞌn yi txaꞌx chꞌim yi at xoꞌl aj. 3 Wutz chicoc yi jukaꞌtz xomcheꞌeꞌn tzaj jukt wacẍ yi chin ẍtow nin eꞌ, nin chin juntlen nin chiyubil. Choꞌn tzun cyoponeꞌn stziꞌ aꞌ chinakaꞌjil yi juk balaj wacẍaꞌtz. 4 Cyoqueꞌn tzun yi juk wacẍaꞌtz yi chin ẍtow nin eꞌ tan chibajseꞌn yi jukt yi chin chilaneweꞌn nin.Eleꞌn nintzun ban watl faraón te yi jun tkujaꞌtz. 5 Poro tajeꞌn tzun subij junt tir faraón tan watl, nin oc ẍchajol tib junt wutzicyꞌ swutz. Nin til yi jeꞌn muleꞌn jun wiꞌ triw yi baj eluꞌl juk bakaj wutz teꞌj, yi chumbalaj nin. 6 Poro i teꞌn nin te yi jun tkujaꞌtz yi eꞌ eltuꞌl te iteꞌn nin wiꞌ triwaꞌtz jukt bakaj triw yi chin matzꞌ nin wutz nin chin tzꞌeꞌnak nin. 7 Ej nin yi juk bakaj wutz triwaꞌtz yi chin matzꞌ nin, eꞌ oc tan chibajseꞌn yi juk bakaj yi chin balaj nin.
Eleꞌn nintzun ban watl faraón nin el xtxumtz tetz yi wutzicyꞌ na ban. 8 Itzun yi tuleꞌn skil le junt eklok wiꞌnin txumuꞌn atit cuꞌn tan paj yi wutzicyꞌ, nintzun cawunintz tan quicyꞌleꞌn tzaj cyakil yi eꞌ nachol yi ateꞌ Egipto tan xtxꞌolcheꞌn xoꞌl yi wutzicyꞌ. Toqueꞌn tzun faraón tan xtxoleꞌn yi wutzicyꞌ iꞌ scyetz. Poro cyaꞌl nin jun xcyeꞌ tan talcheꞌn tetz yi mbi na elepont yi wutzicyꞌ. 9 Beneꞌn tzun tlol yi cyajcawil yi akꞌol tcꞌaꞌ faraón tetz:
—Max cꞌuꞌluꞌ taꞌ, poro jalcuꞌn ja ul txꞌakx tincꞌuꞌl yi kil yi kajuchnak swutzuꞌ, yi in wetz tu yi kꞌajtzun cyajcawil yi eꞌ bnol pamuꞌ. 10 Yaꞌstzun ẍchiꞌcheꞌn cꞌuꞌluꞌ skeꞌj nin choꞌn tzun oꞌ beneꞌntz tanuꞌ xetzeꞌ, xe caꞌl yi wiꞌtz ajcaw squibaj yi eꞌ qꞌuicyꞌlom pres. 11 Ej nin te yi atoꞌ xetzeꞌ nintzun oc ẍchajol tib jun wutzicyꞌ swutz yi cyajcawil yi bnol pam. Ej nin nchaꞌtz in wetz at jun inwutzicyꞌ ban. Apartchk len ekaꞌn tan yi jujun kawutzicyꞌaꞌtz. 12 Ej nin tul yi amaꞌlaꞌtz kale atoꞌt xetzeꞌ at jun xicy attz yi hebrey iꞌ, jun ẍchakum yi wiꞌtz ajcaw scyeꞌj qꞌuicyꞌlom pres. Choꞌn tzun katxolil yi kawutzicyꞌ te yi jun xicyaꞌtz nin xcyeꞌ iꞌ-tz tan xtxꞌolcheꞌn xoꞌl yi mbi na elepont. 13 El cunintz teꞌj quib yi baj tlol iꞌ sketz. Yi in wetz in noꞌc junt tir te wakꞌuneꞌj. Ma yi junt je nin chꞌimbaꞌn teꞌtz tcyaꞌj jalen cuꞌn quimeꞌn, stzun iꞌ bantz tetz faraón.
14 Yi tbital faraón yi xtxolbilaꞌtzeꞌj nintzun cawunin tan ẍchakleꞌn Ẍep. Lajkeꞌl tzun teleꞌn tzaj quicyꞌaltz xetzeꞌ. Ma Ẍep ninin octz tan telseꞌn jakꞌ wiꞌ, nin tan xtxꞌixpeꞌn beꞌch tetz. Kalenaꞌs tzun tocoponeꞌn swutz faraón. 15 Jiloneꞌn tzun faraón tetz. Itzun taltz:
—At jun inwutzicyꞌ mban, poro cyaꞌl nin jun yi jak xcyeꞌ tan xtxꞌolcheꞌn xoꞌl. Poro ja wit yi aẍatz yi na awit jun kawutzicyꞌ na cxcyeꞌ tan xtxꞌolcheꞌn xoꞌl.
16 —Taꞌ nkꞌeꞌtz bin in wetz na txꞌolon xoꞌl, stzun Ẍep. —Ma na Ryos xtxꞌolonk xoꞌl teruꞌ, iluꞌ jun cꞌoloj inrey.
17 Sajeꞌn tzun xtxolil faraón yi wutzicyꞌ tetz Ẍep. Itzun taltz:
—Yi inwutzcyꞌaj iꞌtz, yi choꞌn txiclchin stziꞌ aꞌ Nilo. 18 Nin jalt cuntunin nwilnin yi nchijeꞌul juk wacẍ yi chin chicꞌatzaj nin, nin chin chiyubeꞌn nin. Yi nchijeꞌul nin nchoꞌc tan bajseꞌn chꞌim yi at txoꞌl aj. 19 Wutz chicoc yi jukaꞌtz xomcheꞌeꞌn tzaj jukt wacẍ yi quiꞌc nin chiyubil nin chin ẍtow nin eꞌ. Qui cunin otojt na wil wacẍ tzoneꞌj Egipto chi quitaneꞌn yi eꞌ wacẍaꞌtz yi nwil yi quiꞌc nin chiyubil. 20 Itzun yi juk wacẍaꞌtz yi chin ẍtow nin eꞌ nin nchoꞌc tan chibajseꞌn yi juk yi chin chicꞌatzajweꞌn nin. 21 Yi nwiꞌt baj yi jukaꞌtz cyakꞌun iẍnin chiẍtowil mban quentz. Eleꞌn nintzun mban jun rat inwatltz.
22 ”Ma yi nchinwit junt tir nin mmoꞌct ẍchajol tib junt wutzicyꞌ tzinwutz. Nin ja wil yi njeꞌul jun wiꞌ triw. Nin te yi jun wiꞌ triwaꞌtz ja cheluꞌl juk bakaj wutz yi chin yubeꞌn nin. 23 Ej nin taꞌsteꞌn nin te yi jun wiꞌ triwaꞌtz ja wil yi chibaj eluꞌl jukt bakaj triw yi chin matzꞌ nin. 24 Itzun yi juk bakaj wutz triwaꞌtz yi chin matzꞌ nin, nin nchoꞌc tan bajseꞌn yi jukt bakaj wutz triw yi chumbalaj nin. Ja intxol scyetz yi eꞌ nachol, poro cyaꞌl nin jun yi nink nxcyeꞌ tan xtxꞌolcheꞌn xoꞌl swetz yi mbi na elepont.
25 Jiloneꞌn tzaj tzun Ẍep tetz faraón. Itzun taltz:
—I cob wutzicyꞌ yi nẍchaj tib swutzuꞌ taꞌ, jun ntziꞌ xtxolbil na ẍchaj. Na tzan Ryos tan talcheꞌn teruꞌ yi mbi cuꞌn sbneꞌ iꞌ tzoneꞌj Egipto. 26 I yi juk wacẍ yi chin chicꞌatzaj nin na ẍchaj juk yob. Nchaꞌtz yi juk bakaj wutz triw yi chumbalaj nin iteꞌn nin yi juk yobaꞌtz na ẍchaj. Yi cob wutzicyꞌuꞌ na ẍchaj iteꞌn nin xtxolbilaꞌs. 27 Ma yi juk wacẍ yi chin ẍtow nin na ẍchaj juk yob. Nchaꞌtz yi juk bakaj wutz triw yi chin matzꞌ nin iteꞌn nin yi juk yob na ẍchaj. Yi juk yobaꞌtz na ẍchaj juk yob weꞌj. 28 Tan yi xtxolbileꞌj, na tzan Ryos tan ẍchajleꞌn teruꞌ yi mbi sbneꞌ iꞌ tzoneꞌj Egipto. 29 At juk yob balaj cosech sbneꞌ swutz cyakil yi luwar cwent Egipto. 30 Yil jepon tampuj yi juk yob balaj cosechaꞌtz, xomt tzaj tzun jukt yob yi ploj cosech sbneꞌ. Nin copon jun chin wutzileꞌn weꞌj. Cyaꞌlt nin jun yi nink ltzꞌult txꞌakxuj tcꞌuꞌl yi eꞌch balaj cosech yi sjalok cyen, na i yi jun chin wutzileꞌn weꞌjaꞌtz yaꞌstzun ltzꞌocsan yab twiꞌ cyakil yi tnum Egipto. 31 Chin wutzileꞌn nin sbneꞌ yi jun chin weꞌjaꞌtz, na sicyer nink lcyaj cyen senil yi balaj cosech yi sjalok. 32 Cob tir nẍchaj tib iteꞌn nin wutzicyꞌaꞌtz swutzuꞌ taꞌ na ja wiꞌt bixeꞌ tan Ryos tan teleꞌn cuꞌn teꞌj nin sbnixok chan taꞌn. 33 Chaꞌstzun te iluꞌ jun cꞌoloj karey, baꞌn tcuꞌn yi nink ljoyuꞌ jun yaj yi chin list nin, nin yi at tajtzaꞌkl tan toqueꞌn iꞌ tetz ajcaw tibaj cyakil yi tnum Egipto. 34 Iluꞌ jun cꞌoloj karey, je ltulejuꞌ jeꞌj: Cheꞌ bixbajuꞌ cobox gobernador, tan chibeneꞌn tulak yi eꞌchk luwar cwent Egipto tan molcheꞌn yi toꞌiꞌn part tetz yi balaj triw yi sjalok tul yi juk yob balaj cosech. 35 Choꞌkentz tan molcheꞌn yi balaj triw yi sjalok tul yi balaj tiemp yi tzꞌul. Nin baꞌn lchimoltz tul jun amaꞌl tan toqueꞌn tcwentuꞌ iluꞌ karey. Nin baꞌn lchicoltz tulak jujun tnum, bantz jaleꞌn chiwaꞌ yi eꞌ wunak tzantzaj. 36 Tan yi xtxolbileꞌj scolxok wiꞌnin triw tetz cyakil yi eꞌchk tnum tcwent Egipto bantz qui chiquimeꞌn yi eꞌ wunak tan weꞌj tul yi juk yob weꞌj yi copon, stzun Ẍep bantz.
Yi toqueꞌn Ẍep tetz gobernador Egipto
37 Baꞌn tzun bantz ẍchiwutz faraón scyuchꞌ yi eꞌ mas ajcaw yi ateꞌ-tz xlaj. 38 Chaꞌstzun te talol faraón scyetz:
—Chinch wetz quil jal junt yaj kaꞌn yi niꞌcuꞌn iꞌ tu yi jun yajeꞌj, yi xomij yi espíritu Ryos teꞌj. 39 Beneꞌn tzun tlol faraón tetz Ẍep:
—Cyaꞌl nin junt yi chin list nin, nin chin tzꞌaknak cuꞌnk tzawutz, na Ryos mmaꞌlon cyakil yi xtxolbileꞌj tzatz. 40 Ma jaluꞌ, cẍocopon tetz caꞌp ajcaw tzinxlaj. Nin cyakil wunak chocopon tzakꞌ acaꞌwl. Cyaꞌl jun yi atk mas kꞌej sbneꞌ tzawutz ma na ntin cuꞌn in, na in yi rey. 41 ¡Bit tzaj Ẍep! in nchincawun tan awoqueꞌn tetz caꞌp ajcaw tibaj cyakil Egipto, stzun faraón bantz.
42 Yi wiꞌt tlol yi xtxolbileꞌj, nintzun ben faraón tan telseꞌn tzaj yi xmalkꞌab yi at wi kꞌab, tu yi sey iꞌ, nin cu tkꞌol yi xmalkꞌab wi kꞌab Ẍep. Nchaꞌtz tulej yi sey, nin cu cotbaltz skul Ẍep. Nin lajkeꞌl nin cawuneꞌn nintz tan toqueꞌn takꞌleꞌn eꞌchk balaj beꞌch tetz Ẍep yi lino cuꞌn, nin tan cweꞌn cotbaꞌn jun balaj uwaj yi or cuꞌn skul. 43 Yi wiꞌt wekxeꞌn Ẍep kalenaꞌtz tzun jeꞌn nintz tan yi faraón tul yi jun balaj careꞌt yi cyakil nin tir choꞌn na xomnin wutz coc yi tetz careꞌt. Nin cawun nintz scyetz eꞌ ẍchakum tan chibajxeꞌn tbeꞌ swutz Ẍep yi na xon tul careꞌt, tan talcheꞌn scyetz cyakil yi eꞌ wunak yi ateꞌ-tz tan chijeꞌn tbeꞌ. Yaꞌstzun bantz yi bixeweꞌn Ẍep tetz caꞌp ajcaw tibaj Egipto.
44 Beneꞌnt tzun tlol faraón tetz Ẍep:
—Yi in wetz, in yi wiꞌtz ajcaw tzoneꞌj, poro cyaꞌl nin jun yi nink scaw cuꞌn tib tan banleꞌn jun takleꞌn yi ko nkꞌeꞌtz aẍ cawunin teꞌj.
45 Nintzun oc tkꞌol yi faraón jun biꞌ Ẍep tetz Zafnat-panea. Iꞌtz jun biꞌaj yi choꞌn na xcon ẍchixoꞌl yi eꞌ aj Egipto. Nchaꞌtz nin eꞌ cu tokꞌbel faraón yi Ẍep tu Asenat, yi meꞌl Potifera yi jun wiꞌtz paleꞌ le tnum On. Yaꞌstzun bantz yi toqueꞌn cyen Ẍep tetz caꞌp ajcaw tibaj Egipto.
46 At tzun Ẍep tul junaklaj yob yi toponeꞌn ticyꞌleꞌntz swutz faraón. Yi teleꞌn tzaj iꞌ swutz faraón nintzun bentz tan xajseꞌn cyakil yi luwar cwent Egipto. 47 Wiꞌnin tzun cosech bantz tul yi juk yob balaj tiempaꞌtz. 48 Nintzun oc Ẍep tan molcheꞌn cyakil yi triw yi jaltz Egipto tul yi juk yobaꞌtz. Nin baj cyen cololtz tulak yi jujun tnum. Cyakil yi triw yi baj mololtz wutzak yi eꞌch cojbil, choꞌn baj cyajeꞌn cyen cololtz tulak yi eꞌch tnum yi ateꞌ-tz nakaꞌj. 49 Choꞌn cunin ban triw yi baj molol Ẍep chi taneꞌn yi samlicyꞌ tzi mar. Tan paj yi wiꞌnin triw opontz swutz Ẍep qui nin xcyeꞌ iꞌ tan ticyꞌleꞌn nin tajlal. Chaꞌstzun te teleꞌn stzakpul yi maꞌleꞌn yi triw yi na opon.
50 Te yi ntaxk xeꞌtij yi juk yob weꞌj, yaꞌstzun eꞌ jaleꞌn yi cob cyꞌajl Ẍep te yi txkel yi na biꞌaj Asenat. 51 Yi bajx cyꞌajl yi itzꞌij nin oc tkꞌol yi biꞌ-tz tetz Manasésa, na nin taltz: “Ryos meꞌlsan te incꞌuꞌl cyakil yi sotzaj cꞌuꞌlal. Nin nchaꞌtz quiꞌt na chuꞌl txꞌakxuj inxonl tincꞌuꞌl.” 52 Ma yi caꞌp yi itzꞌij nin oc tkꞌol yi biꞌ tetz Efraínb, na nin taltz: “Ryos nchijalsan innitxaꞌ tzoneꞌj tul yi jun tnumeꞌj kale intijnakwit wiꞌnin qꞌuixcꞌuj.”
53 Yi ticyꞌeꞌn poneꞌn yi juk yob balaj cosechaꞌtz Egipto, 54 xeꞌteꞌn nintzun ban yi jukt yob weꞌj quib yi talnak Ẍep. Nchaꞌtz wiꞌnin weꞌj ban tulak eꞌchk mas tnum.c Ntin cuꞌn Egipto qui nchiquim tan weꞌj na at cyetz chiwaꞌ colij cyaꞌn. 55 Ma yi bajeꞌn chiwaꞌ yi eꞌ aj Egipto yi colij cyaꞌn xeꞌak chipach nintzun eꞌ bentz swutz faraón tan jakleꞌn chiwaꞌ. Itzun taltz scyetz:
—Quiloꞌkwok swutz Ẍep, nin tzibanwok taneꞌn yi mbil tal iꞌ tzitetz, stzun faraón bantz.d
56 Itzun yi beneꞌn loꞌon yi weꞌj tulak yi eꞌchk tnum cwent Egipto nintzun baj je jakol Ẍep cyakil yi eꞌchk cuꞌlbil triw tan cꞌayeꞌn scyetz eꞌ aj Egipto, na maxeꞌn nin ban yi weꞌj. 57 Nchaꞌtz eꞌ baj sajleꞌn wunak tulak eꞌchk nación tan lokꞌcheꞌn triw tetz Ẍep, na quiꞌc chiwaꞌ jaltz tulak cyetz chitanum.