Yi toqueꞌn Ẍep tan xtxꞌolcheꞌn xoꞌl cob wutzicyꞌ
40
1 Itzun yi xoneꞌn tiemp nintzun cu juchul yi kꞌol tcꞌaꞌ faraón jun til swutz. Nchaꞌtz yi banol pam faraón cu juchul tiltz. 2 Wiꞌnin tzun ẍchiꞌcheꞌn cꞌuꞌl faraón scyeꞌj yi cob ẍchakumaꞌtz. 3 Ej nintzun cawunin iꞌ-tz tan cyoqueꞌn xetzeꞌ. Choꞌn tzun eꞌ beneꞌntz taꞌn xeꞌ caꞌl yi wiꞌtz ajcaw squibaj yi eꞌ sanlar yi eꞌ qꞌuicyꞌlom rey,a na choꞌn at yi xetzeꞌ kale najleꞌt iꞌ. Ej nin taꞌtz teꞌn nin atiteꞌt Ẍep pres. 4 Yi cyoponeꞌn yi cob yajaꞌtz xetzeꞌ choꞌn tzun cyoqueꞌn tkꞌol yi wiꞌtz ajcaw tkꞌab Ẍep tan chiqꞌuicyꞌleꞌn. Nim tzun tiemp eꞌ bantz xetzeꞌ.5 At tzun jun akꞌbal, nin oc ẍchajol tib jujun chiwutzicyꞌ yi cob presaꞌtz yi akꞌol tcꞌaꞌ tu yi bnol pam yi rey. Apartchk len ban chiwutzicyꞌ. 6 Chin jalchan cunin tzun toponeꞌn Ẍep tan quilweꞌn, nin yi tocomponeꞌn scyeꞌj wiꞌnin chibisuneꞌntz. 7 Nintzun ben jakoltz scyetz:
—¿Mbi tzun na ibislej?
8 —At bin jun ketz kawutzicyꞌ mban maꞌs, poro cyaꞌl nin jun at tan xtxꞌolcheꞌn xoꞌl sketz yi mbi na elepont,b cheꞌch tzun bantz tetz Ẍep.
—Qui peꞌ na el itxum tetz yi ntin Ryos na xcyeꞌ tan xtxꞌolcheꞌn xoꞌl yi eꞌchk wutzicyꞌ. Or alwok tzaj swetz mbi i ilaꞌtz yi iwutzicyꞌ, stzun Ẍep scyetz.
9 Xeꞌteꞌn nintzun ban yi chibajxom yi akꞌol tetz tcꞌaꞌ yi rey tan xtxoleꞌn yi wutzicyꞌ iꞌ tetz Ẍep. Itzun taltz:
—Tul yi wetz inwutzicyꞌ ja wil jun wiꞌ uva, yi at ox kꞌab, 10 nin yi jun wiꞌ uvajaꞌtz wiꞌnin sajeꞌn xlumil nin wiꞌnin jaleꞌn xuꞌm, nin yi xuꞌmilaꞌtz yi nchibaj jal, wiꞌnin cyoqueꞌn tetz jujun jutuj loꞌbaj uva. 11 Ma yi in wetz, tzꞌamij yi cuꞌlbil tcꞌaꞌ yi rey waꞌn nin ja noꞌc tan chitzutleꞌn tzaj yi jujun jutuj uva nin na inyutz cuꞌntz le yi cuꞌlbil tcꞌaꞌ yi rey. Nin in teꞌn nintz na chin bentz tan takꞌleꞌn tkꞌab, stzun yi jun yajaꞌtz bantz.
12 Jiloneꞌn tzaj tzun Ẍep. Itzun taltz:
—I na elepont yi teruꞌ wutzicyꞌuꞌ iꞌtz: Yi ox kꞌab uva yi ntiluꞌ, na ẍchaj ox kꞌej. 13 Ej nin chwaꞌnin le oxt kꞌej, tzꞌocopont yi rey tan xtxumleꞌn yi tiluꞌ, poro quil bisunuꞌ, na tzꞌocoponuꞌ junt tir te yi takꞌunuꞌ. Tzꞌocoponuꞌ junt tir tan takꞌleꞌn quen yi tcꞌaꞌ rey chi sajleꞌnuꞌ. 14 Yil tzꞌeluꞌ tzoneꞌj, nink lnuꞌl txꞌakx tcꞌuꞌluꞌ. Nink lbanuꞌ pawor swetz tan yol tetz yi faraón tan welseꞌn tzoneꞌj xetzeꞌ. Elk kꞌajabuꞌ sweꞌj nink lnuꞌl txꞌakx tcꞌuꞌluꞌ. 15 Yi mero bintzi quiꞌc wetz wil. Alakꞌ tuꞌ nchinsiteꞌt wetz chixoꞌl eꞌ intanum yi oꞌ hebrey. Ej nin quiꞌc xeꞌ wil yi atin tzoneꞌj xetzeꞌ, stzun Ẍep bantz.
16 Ej itzun yi tbital yi chibajxom yi eꞌ banol pam tetz rey, yi baꞌn elponeꞌt yi wutzicyꞌ yi tuchꞌ yi baj xtxꞌolol Ẍep xoꞌl. Itzun taltz:
—Ma yi in wetz je inwutzicyꞌ mbaneꞌj: Ja inwutzcyꞌaj yi uskꞌuꞌn ox miꞌt pam waꞌn. 17 Itzun yi toxiꞌn miꞌt nojnak tan alaꞌ jilwutz balaj pam, yi tetz cuntuꞌ faraón. Poro ja wil yi ja chibaj ul jun cꞌoloj chꞌuꞌl tan bajseꞌn yi balaj pamaꞌtz yi uskꞌuꞌn waꞌn, stzun bnol pam tetz Ẍep.
18 Jiloneꞌn tzaj tzun Ẍep. Itzun taltz:
—Yi na elponeꞌt yi teruꞌ wutzicyꞌuꞌ iꞌtz: Yi ox miꞌt pam yi uskꞌuꞌn tanuꞌ na ẍchaj ox kꞌej. 19 Ej nin chwaꞌnin le oxt kꞌej tzꞌocopon faraón tan xtxumleꞌn junt tir yi tiluꞌ. Poro jepon chꞌimbanuꞌ tzakꞌ jun wiꞌ tzeꞌ. Ej nin chuꞌl cyakil kuꞌs tan bajseꞌn wankiluꞌ, stzun Ẍep bantz tetz yi bnol pam.
20 Itzun le toxiꞌn kꞌej yaꞌstzun yi wutz kꞌej faraón, nintzun xtxum jun balaj waꞌaꞌn scyetz cyakil yi eꞌ yi na chakꞌuj xlaj. Ẍchiwutz cunin tzun yi eꞌ xtxocum iꞌ yi beneꞌn mantar tan cyelseneꞌl tzaj yi chibajxom yi eꞌ akꞌol tcꞌaꞌ tuml chibajxom yi eꞌ banol pam. 21 Yi chibajxom yi eꞌ akꞌol tcꞌaꞌ iꞌ, nin oct junt tirt taꞌn te yi tetz takꞌun. Toqueꞌnt tzun iꞌ-tz tan takꞌleꞌn tcꞌaꞌ faraón chi sajleꞌn nin. 22 Ma yi chibajxom yi eꞌ bnol pam nin cawunin faraóntz tan jeꞌn chꞌimbaꞌn tzakꞌ jun wiꞌ tzeꞌ, quib yi tal Ẍep tetz. 23 Inti yi chibajxom yi eꞌ akꞌol tcꞌaꞌ faraón quiꞌt nintzun ul txꞌakx Ẍeptz tcꞌuꞌl.