Ẍep tu yi txkel Potifar
39
1 Itzun bantz yi toponeꞌn Ẍep jalen Egipto, nintzun cꞌayij iꞌ-tz tetz jun yaj aj Egipto yi na biꞌaj Potifar. Choꞌn lokꞌol Potifar yi Ẍepaꞌtz scyetz yi eꞌ xonl Ismael, yi oponsan Egipto. Yi jun Potifaraꞌtz iꞌ jun ajcaw xlaj faraón. Nchaꞌtz iꞌ capitán squibaj yi eꞌ sanlar yi qꞌuicyꞌlom tetz faraón. 2 Quinin tzun cyaj cyen Ẍep ẍchuc ma na xomquen tunin Ryos teꞌj tan ẍchꞌeyeꞌn.a Chaꞌstzun te baꞌn mban Ẍep nicyꞌ yi najlij iꞌ xe caꞌl yi patrónaꞌtz. 3 Nchaꞌtz el xtxum yi patrón tetz yi xomij Ryos teꞌj Ẍep, na cyakil eꞌchk takleꞌn yi na ban, baꞌn na ban tircuꞌn. 4 Chaꞌstzun te wiꞌnin stzatzineꞌn Potifar teꞌj nin octz taꞌn tetz martomaꞌ xe caꞌl iꞌ. Nin cyaj cyen tkꞌol cyakil yi meꞌbiꞌl tkꞌab Ẍep tan jeꞌn juꞌ taꞌn. 5 Yi cyajeꞌn cyen Ẍep tetz bajx martomaꞌ yaꞌstzun yi xeꞌteꞌn Ryos tan takꞌleꞌn banl tibaj Potifar tu cyakil yi meꞌbiꞌl. 6 Tantuꞌ yi toqueꞌn cyen Ẍep tetz martomaꞌ, quiꞌt nin tzun na bisun Potifar te yi meꞌbiꞌl. Ma na jaltnin waꞌaꞌn na xtxumtz.Itzun Ẍep, chin yubeꞌn nin iꞌ, nin chin elsbil almaꞌ nin. 7 Chaꞌstzun te, yi teleꞌn tiemp yi tponleꞌnix Ẍep tu Potifar, nintzun elquen talmaꞌ yi txkel Potifar teꞌj iꞌ. Itzun taltz:
—Aẍ jun cꞌoloj Ẍep, kawitok tzawuchꞌ, stzun xnaꞌn tetz Ẍep.
8 Poro qui nin cujij Ẍep, na nin taltz tetz:
—Qui peꞌ na el xtxumuꞌ tetz, yi cyajnak cyen tkꞌol yi chmiluꞌ cyakil eꞌchk meꞌbiꞌl tincwent. Ej nin tantuꞌ yi at cyakil cuꞌn tincwent quiꞌt na bisun iꞌ te yi meꞌbiꞌl. 9 In nin ajcaw tibaj cyakil eꞌchk takleꞌn yi at xe chinajbiluꞌ. Quiꞌc jun eꞌchk takleꞌn yi quiꞌk cuj tan xconeꞌn waꞌn, ma na jatxijt tinkꞌab tan impatrón. Ntin cuꞌn iluꞌaꞌtz yi quiꞌc nin wocleꞌn teꞌjuꞌ, na iluꞌ txkel impatrón. Chaꞌstzun te quiꞌc rmeril tan imbnol jun takleꞌnaꞌtz yi chin cachiꞌ nin, na kol tzimban, tzinjucheꞌ wil swutz Ryos,b stzun Ẍep tetz.
10 Poro cyakil nin kꞌej na oc yi txkel Potifar chꞌinchꞌuj tan moxeꞌn Ẍep tan chiwitbel quib tuchꞌ. Poro qui nin takꞌ Ẍep amaꞌl tetz. 11 Itzun bantz at tzun jun tir yi ntin txkel Potifar at cyen nicyꞌ yi tocomponeꞌn Ẍep tan akꞌun xe caꞌl. 12 Ej nin tan paj yi cyaꞌl at xe caꞌl toqueꞌn tzun yi xnaꞌnaꞌtz tan stzꞌamleꞌn cuꞌn Ẍep nin tan moxeꞌn tan chiwitbel quib tuchꞌ. Itzun taltz:
—Aẍ jun cꞌoloj Ẍep, kawitbej kib tzawuchꞌ.
Nintzun oc tan stzꞌamleꞌn beꞌch tetz Ẍep. Lajkeꞌl nintzun teleꞌn tzaj ojkuj Ẍep swutz. Poro tan paj yi ojkeꞌl, nintzun cyaj kinol xnaꞌn yi xbuꞌk Ẍep. 13 Yi tilol xnaꞌn yi nsken cyaj cyen yi beꞌch tetz Ẍep tkꞌab nintzun octz tan chichakleꞌn tzaj yi eꞌ mos yi na chakꞌuj xe caꞌl. 14 Itzun taltz scyetz:
—Ilwok tzajeꞌj, yi wuchmil ulsan jun hebrey xe kacaꞌl, poro yi jaluꞌ yi tajbil yi jun hebreyaꞌtz iꞌtz tan telseꞌn katxꞌix, na ja ocpon iꞌ sweꞌj xe caꞌl, nin yi tajbil iꞌ iꞌtz yi nink kawitbej kib tuchꞌ. 15 Poro tan paj yi chin wiꞌ nin imban tan sichꞌ nintzun meꞌl tzaj ojkuj. Ncyaj cyen tu tilol iꞌ yi beꞌch tetzeꞌj, stzun iꞌ bantz. 16 Beneꞌn nintzun bantz tan colcheꞌn yi beꞌch tetz Ẍep jalen yi toponeꞌn yi chmil xe caꞌl.
Itzun yi toponeꞌn yi chmil nintzun ẍchaj tetz. 17 Iteꞌn nin xtxolbilaꞌtz taltz tetz chi yi mbaj xtxolil scyetz yi eꞌ mos. Itzun taltz:
—I jun amos yi hebrey yi ul acyꞌal tzoneꞌj xe kacaꞌl, ja ocopon iꞌ sweꞌj maꞌs xe incuart. Nin yi tajbil iꞌ, iꞌtz kloꞌ tan banleꞌn ruinl swetz. 18 Poro tan paj yi ja chinẍchꞌin, nin chin inwiꞌ nin imban tan sichꞌ, chaꞌstzun te yi mmeꞌl ojk nin ncyaj cyen tuꞌ tkꞌol yi beꞌch tetzeꞌj le incuart. 19 Yaꞌstzun ban yi amos sweꞌj, stzun yi xnaꞌn bantz.
Wiꞌnin tzun ẍchiꞌcheꞌn cꞌuꞌl yi patrón teꞌj Ẍep tantuꞌ tbital yi xtxolbilaꞌseꞌj. 20 Nintzun cawunintz tan stzꞌamleꞌn Ẍep, nin tan tocseꞌn xetzeꞌ, kale ateꞌt cyakil yi eꞌ pres yi juchij quil cyaꞌn swutz yi rey. 21 Nintzun oc cyen Ẍep xetzeꞌ. Poro at nin Ryos teꞌj, na nin takꞌ iꞌ banl tibaj, na tantuꞌ porer Ryos ja jal yi balajil iꞌ swutz yi wiꞌtz qꞌuicyꞌlom pres.c
22 Itzun yi qꞌuicyꞌlom presaꞌtz cyajeꞌn cyen tzun tkꞌol yi eꞌ mas pres tcwent Ẍep. Ẍep tzun na akꞌon yi eꞌchk ort te yi mbi cuꞌn yi tajweꞌn tan chibnol cyakil yi eꞌ mas pres. 23 Ma yi wiꞌtz qꞌuicyꞌlom pres, quiꞌc nin na tajquentz tan jakleꞌn cwent te cyakil yi at tkꞌab Ẍep, na chin tzꞌaknak cunin iꞌ tan akꞌun na baꞌn na ban cyakil yi eꞌchk takleꞌn yi na bnix taꞌn na ilenin xomij Ryos teꞌj tan ẍchꞌeyeꞌn.