Judá tu Tamar
38
1 Itzun bantz te yi tiempaꞌtz nin el jatxol tib yaj Judá scyeꞌj eꞌ stzicy tu yi eꞌ titzꞌun. Choꞌn tzun beneꞌntz tan najeweꞌn tu jun aj Adulam yi na biꞌaj Hira. 2 Choꞌn tzun tajskel Judá wutz yi meꞌl Súa yi aj Canaán. Okꞌbeꞌn ib nintzun eꞌ bantz tuchꞌ. 3 Itzun yi cyokꞌbel quib nin tekaj yi txkel Judá pwokil jun niꞌ. Ej nin yi tuleꞌn itzꞌok yi niꞌaꞌtz xicy tzun bantz. Nintzun oc tkꞌol yi biꞌ-tz tetz Er. 4 Yi xoneꞌn tiemp nintzun jal junt chinitxaꞌ yi xicy. Ej nin oc tkꞌol yi biꞌ yi niꞌaꞌtz tetz Onán. 5 Nchaꞌtz jaleꞌn nin ban yi toxiꞌn chinitxaꞌ nin oc tkꞌol yi biꞌ tetz Sela. Yi jun xicyaꞌtz, itzꞌij nicyꞌ yi at tzaj Judá le tnum Quezib.6 Itzun yi nsken wiꞌt yajin Er, yi bajx cyꞌajl, nintzun joy Judá txkel. Tamar biꞌ yi txkel iꞌ ban. 7 Poro quim Er, tan paj yi qui nin tzatzin Kataj Ryos te yi tajtzaꞌkl.a 8 Beneꞌn tzun tlol Judá tetz Onán:
—Baꞌn tzitokꞌbej itib tu txkel yi kꞌajtzun awutzicy,b tan abnol taneꞌn yi kacstumbr, bantz tan aẍ jaleꞌt xonl kꞌajtzun awutzicy.
9 Poro yi Onán elnak xtxum tetz yi nkꞌeꞌtz nitxajil iꞌ ẍchibneꞌ yi eꞌ niꞌ yi ẍchitzꞌok te yi txkelbeꞌn yi stzicy. Chaꞌstzun te ilenin joy iꞌ puntil tan qui toqueꞌn lacꞌpuj jun niꞌ teꞌj yi xnaꞌnaꞌtz bantz quil jal xonl yi kꞌajtzun stzicy. 10 Qui nintzun peꞌk Kataj Ryos te yi tajtzaꞌkl Onán. Chaꞌstzun te quimeꞌn iꞌ-tz tan Ryos.
11 Yi quimeꞌn Onán nintzun tal Judá tetz Tamar yi tlib:
—Ma jaluꞌ ja cẍcyaj tul xmaꞌlcaꞌnil. Baꞌn tcuꞌn cẍaꞌj tu ataj jalen peꞌk yil chꞌuy Sela yi junt incyꞌajl. Kalenaꞌs tzun tzitokꞌbej itib tuchꞌ. Yaꞌstzun tal Judá tetz yi tlib tan mayseꞌn cꞌuꞌl. Poro yi mero bintzi iꞌtz, yi ja xob Judá, na le wutz tetz tajtzaꞌkl nchaꞌtz Sela squimok chi nchiban yi eꞌ stzicy. Chaꞌstzun te tajeꞌn Tamar tan najeweꞌn tuchꞌ yi taj.
12 Itzun bantz yi teleꞌn tiemp, quimeꞌn nintzun ban yi txkel Judá yi meꞌl Súa. Ma yi teleꞌn yi bis te cꞌuꞌl Judá, nintzun bentz le tnum yi na biꞌaj Timnat kale ateꞌt yi eꞌ mos iꞌ yi na chitzan tan telseꞌn xiꞌil yi eꞌ tawun. Nintzun ben xomok yi jun tamiw iꞌ teꞌj yi na biꞌaj Hira yi aj Adulam. 13 Itzun yi tbital Tamar, yi nsken wiꞌt ben yi tlib iꞌ le tnum Timnat tan telseꞌn xiꞌil yi eꞌ tawun, 14 nintzun el xtxꞌixpul yi beꞌch tetz yi na ẍchaj yi quimnak yi chmil. Ej nin je tkꞌol jun suꞌt twiꞌ tan teweꞌn wutz, bantz cyaꞌl jun tzꞌechan wutz iꞌ. Choꞌn tzun cꞌoleweꞌn cuꞌntz juꞌ tnum Enaim yi at xlaj beꞌ yi na opon Timnat. Yaꞌstzun tulej iꞌ-tz na elnak xtxum tetz yi nsken yajin Sela poro qui nin na takꞌoꞌk Judá amaꞌl tetz tan cyokꞌbel quib tuchꞌ.
15 Itzun yi beneꞌn xmayil Judá yi cꞌolchij yi jun xnaꞌnaꞌtz stzi beꞌ nintzun xtxumtz yi iꞌ jun wiꞌtz bnol tetz, na jopij wutz tan suꞌt. 16 Nintzun el jatxol tibtz te yi beꞌ yi cyꞌaꞌn taꞌn tan toponeꞌn kale cꞌolcheꞌt yi xnaꞌn. Qui nin el xtxum tetz yi ko iꞌtz yi tlib. Beneꞌn tzun jakoltz tetz:
—¿Cuj peꞌ awaꞌn yi nink kawitbej kib tzawuchꞌ?
—Cuj, ¿poro mbi ltakꞌuꞌ swetz kol kawitbej kib?
17 —Tzꞌul akꞌol tetz jun atz scyeri eꞌ tal inchiw.
—Baꞌn, chij xnaꞌn bantz. —Poro na waj yil cyaj cyen jun prent jalen cuꞌn tzꞌul yi inchiw tanuꞌ.
18 —¿Mbi na awaj yil wakꞌ cyen tetz prent? stzun Judá.
—Takꞌ cyenuꞌ yi teruꞌ seyuꞌ yi cotlij skuluꞌ tuml yi txꞌamij yi cyaꞌn tanuꞌ, stzun yi xnaꞌn bantz tetz Judá.
Beneꞌn tzun tkꞌol Judá yi sey tu yi xtxꞌamij tetz. Kalenaꞌtz tzun chiwitbej quib tuchꞌ. Ej ninin tekaj Tamar pwokil jun niꞌ tan paj. 19 Yi chijatxol quib tu Judá nintzun ben Tamar tan xtxꞌixpeꞌn beꞌch tetz nin el tcyꞌal yi jun suꞌt yi je tkꞌol twiꞌ, nin oct tkꞌol yi tetz beꞌch tetz teꞌj yi na ẍchaj yi quimnak yi tetz chmil.
20 Yi toponeꞌn Judá kale ateꞌt yi tawun nintzun saj ẍchakol yi tamiw, yi aj Adulam tan takꞌleꞌn yi tal chiw tetz yi jun xnaꞌnaꞌtz nin tan chicolpeneꞌl tzaj yi eꞌchk prent yi cyaj tkꞌol. Poro qui nin jal yi jun xnaꞌnaꞌtz tan yi tamiw iꞌ. 21 Toqueꞌn tzun yi tamiw Judá tan jakleꞌn scyetz cyakil yi eꞌ wunak yi najlcheꞌ tul jun luwaraꞌtz.
—¿Naꞌ atiteꞌt yi jun xnaꞌn aj Enaim yi wiꞌtz bnol tetz yi cꞌolchij tzi beꞌeꞌj?
—Quiꞌc jun xnaꞌn wiꞌtz bnol tetz skaxoꞌl ketz tzoneꞌj, cheꞌch yi wunakaꞌtz bantz.
22 Pakxeꞌn nintzun ban yi tamiw Judá nin taltz tetz:
—Taꞌ, quiꞌt njal yi xnaꞌn wakꞌun. Nchaꞌtz ja baj injakol scyetz cyakil wunak yi ateꞌ-tz. Nin ja cyal swetz yi quiꞌc jun xnaꞌn wiꞌtz bnol tetz ẍchixoꞌl cyetz.
23 —Pues ja bin cyaj cyenxaꞌtz tuchꞌ yi eꞌchk intakleꞌnaꞌtz, bantz quil choꞌc wunak tan kaxbajtziꞌeꞌn. Poro ntin, ja nin bin cẍaꞌk tan takꞌleꞌn kloꞌ yi tal chiw, poro qui bin njal awaꞌn. Quiꞌc ketz kapaj teꞌj, stzun Judá bantz.
24 Itzun yi teleꞌn ox xaw, nintzun ul stziblal twiꞌ Judá yi nsken wiꞌt tekaj yi tlib iꞌ pwokil jun niꞌ, tan paj yi na witbej tib scyeꞌjak yaj.
—Ko yaꞌtz, stzun Judá —or teleꞌn tzaj ticyꞌleꞌn, nin cuk patiꞌn.
25 Poro te yi na chitzan tan telseꞌn tzaj Tamar nintzun saj alol tetz, tan talcheꞌn tetz yi tlib:
—Taꞌ, je yol Tamar yi nsaj tlol swetzeꞌj: “Yi taw yi eꞌchk takleꞌneꞌj, yaꞌstzun jun yi nkawitbej kib tuchꞌ, nin tetz iꞌ yi niꞌ yi ekaꞌn pwokil waꞌn. Tilcunuꞌ, ko pel techuꞌ wutz naꞌ taw yi jun seyeꞌj tu yi jun txꞌamijeꞌj,” stzun iꞌ, chij yi alol tetz bantz.
26 Yi cweꞌn techal Judá wutz, yi tetz iꞌ yi eꞌchk takleꞌnaꞌtz nintzun taltz: “Baꞌn atit tajtzaꞌkl Tamar. In teꞌtz yi cachiꞌ wajtzaꞌkl, na qui nin wakꞌ amaꞌl tan cyokꞌbel quib tu incyꞌajl Sela,” stzun Judá bantz. Jetzaꞌtz tzuntz, quiꞌt nchiwitbej quib junt tir.
27 Itzun yi toponeꞌn kꞌejlal tan tuleꞌn yos tu Tamar, eꞌ tzun yoẍ ban yi eꞌ tal. 28 Ej nin te yi jun tkuj yi at Tamar swutz qꞌuixcꞌuj tan tuleꞌn yos tuchꞌ at tzun jun scyeri yi eꞌ niꞌ yi bajx teleꞌn muleꞌn yi kꞌab. Yi tilol yi xeꞌiyum nin oc cꞌalol jun nokꞌ cyak te kꞌab. Itzun taltz: “Yi juneꞌj yaꞌstzun yi bajx nak.” 29 Poro iteꞌn nin tkujaꞌs tajeꞌn quen tcyꞌal yi niꞌ yi kꞌab. Ej itzun yi junt, itzꞌij bajx. Chaꞌstzun te toqueꞌn tkꞌol yi xeꞌiyum biꞌ yi niꞌ tetz Faresc na nin taltz “ẍeꞌn jakxij beꞌ awaꞌn.” 30 Ma yi titzꞌeꞌn yi junt xicy, yi cꞌalij yi nokꞌ cyak te kꞌab, nintzun oc tkꞌol yi biꞌ tetz Zara.d