37
1 Ma yi Jacow choꞌn tzun cyajeꞌn cyentz le amaꞌl cwent Canaán, kale najeweꞌt yi taj chi awer nak tuꞌ bantz. 2 Ma jaluꞌ katxumeꞌ yi mbi banakeꞌ yi eꞌ najal Jacow.Ẍep scyuchꞌ yi eꞌ stzicy
Itzun bantz yi at tzaj Ẍep tul juklaj yob, nintzun octz tan pstoreꞌn cneꞌr chi quitaneꞌn eꞌ stzicy. Choꞌn tzun xomeꞌn quen iꞌ-tz tan pstoriꞌn scyeꞌj yi eꞌ tal Bilha tu Zilpa, yi eꞌ caꞌp txkel Jacow taneꞌn. Ilenin tzun na xochon Ẍep tetz yi taj te yi eꞌchk takleꞌn cachiꞌ yi na chiban yi eꞌ stzicy.
3 Inti wutzileꞌn Israel mas tcunin peꞌk iꞌ teꞌj Ẍep ẍchiwutz yi eꞌ mas cyꞌajl, na sken biꞌẍin iꞌ yi titzꞌeꞌn. Chaꞌstzun te bnixeꞌn jun chum balaj beꞌch tetz Ẍep taꞌn. 4 Ma yi teleꞌn chitxum yi eꞌ stzicy tetz, yi mas tcunin na peꞌk chitaj teꞌj Ẍep wiꞌnin tzun ẍchiꞌcheꞌn chicꞌuꞌl bantz. Nin quiꞌt na chitziwuntz tetz.
5 Itzun bantz nin oc ẍchajol tib jun wutzicyꞌ swutz Ẍep, nin octz tan xtxoleꞌn scyetz yi eꞌ stzicy. Ma yi quibital, mas tcunin ẍchiꞌcheꞌn chicꞌuꞌl bantz teꞌj. 6 Na je tal iꞌeꞌj:
—Eꞌuꞌ wutzicy, quibit tzajuꞌ. Intxoleꞌ jun inwutzicyꞌ scyeruꞌ yi mmoꞌc ẍchajol tib tzinwutz maꞌs. 7 Yi inwutzicyꞌ iꞌtz: Choꞌn atoꞌ scyuchꞌuꞌ wi cojbil tan cꞌalcheꞌn xe cꞌuꞌl triw. Jalt cuntunin njeꞌ txiclok yi wetz intriw yi nsken cꞌalxij xe cꞌuꞌl waꞌn. Ma yi cyeruꞌ yi nsken cꞌalxij xe cꞌuꞌl cyanuꞌ nin nchibaj opon chitxolil quib solteꞌj yi wetz. Ej nin nchibaj cuꞌn chꞌuylok tan takꞌleꞌntz kꞌej yi wetz,a stzun Ẍep scyetz.
8 Sajeꞌn tzun chitzaꞌwel yi eꞌ stzicy. Itzun cyaltz:
—I bin yi awajbil iꞌtz tan awoqueꞌn tetz kareyil nin tan acawuneꞌn skibaj, cheꞌch yi eꞌ stzicy.
Mas tcunin tzun ẍchiꞌcheꞌn chicꞌuꞌl bantz teꞌj tan paj yi wutzicyꞌ nin tan paj yi puntil yi ban iꞌ tan xtxoleꞌn scyetz.
9 Yi xoneꞌn tiemp nintzun oc ẍchajol tib junt wutzicyꞌ swutz Ẍep nintzun xtxoltz scyetz yi eꞌ stzicy. Itzun taltz:
—Quibit tzajuꞌ at junt inwutzicyꞌ mban. Ja ẍchaj tib yi kꞌej tu yi xaw scyuchꞌ junlaj tkan txꞌuml tzinwutz. Ej nin ja chibaj octz tan takꞌleꞌn inkꞌej, stzun Ẍep bantz scyetz.
10 Itzun yi wiꞌt xtxolil Ẍep yi junt wutzicyꞌaꞌtz nintzun oc yi taj tan yajleꞌn nin tan makleꞌn stziꞌ.
—¿Mbi tzun na eleponeꞌt yi jun ara wutzicyꞌaꞌtz? ¿I peꞌ awajbil yil mejeꞌ cuꞌn atxuꞌ scyuchꞌ eꞌ awutzicy nin yi in wetz tzawutz? stzun taj Ẍep bantz.
11 Wiꞌnin tzun chixcyꞌaklineꞌn yi eꞌ stzicytz teꞌj.b Ma yi taj, wiꞌnin txumuꞌn at cuꞌntz tan yi eꞌchk wutzicyꞌ Ẍep.
Yi beneꞌn cꞌayiꞌn Ẍep
12 Itzun bantz, at jun tir yi choꞌn ateꞌ opon yi eꞌ stzicy Ẍep jalen Siquem tan chicꞌaꞌcheꞌn yi eꞌ tawun chitaj. 13 Beneꞌn tzun tlol Israel tetz Ẍep:
—Bit tzaj yaj, yi eꞌ awutzicy choꞌn ateꞌ jalen Siquem tan chipstoreꞌn kawun. Ma jaluꞌ yi wajbil iꞌtz yil cẍben tan quilweꞌn.
—Cu taꞌ, list in tan imbeneꞌn, chij Ẍep tetz taj.
14 —Ma jaluꞌ bin je amantareꞌj: Quiloꞌk tan tilweꞌn yi ko baꞌn ateꞌt awutzicy scyuchꞌ yi eꞌ kawun. Ntin cheꞌ ben axmayeꞌ tzaj ko baꞌn ateꞌt. Ej nin cẍpakxij lajkeꞌl tan talcheꞌn stziblal swetz, stzun Israel bantz.
Choꞌn tzun ticyꞌponeꞌn Ẍeptz tan Israel le jocoꞌj cwent Hebrón tan toponeꞌn jalen Siquem.
15 Itzun te yi toponeꞌntz Siquem nintzun octz tan chijoyleꞌn yi eꞌ stzicy. Inin tzun na el yabtz tan chijoyleꞌn yi nojeꞌn cyen jun yaj teꞌj nintzun ben jakol yi yajaꞌtz tetz:
—¿Mbi na ajoy tzoneꞌj?
16 —Na chintzan tan chijoyleꞌn yi eꞌ wutzicy. ¿Qui peꞌ na til teruꞌ na ateꞌt tan chipstoreꞌn yi eꞌ kawun? stzun Ẍep bantz.
17 —Choꞌn bin ateꞌ tzoneꞌj, poro ja wiꞌt chicyꞌt. Nwit nin tuꞌ scyeꞌj yi choꞌn nchibent jalen Dotán, stzun yi yajaꞌtz bantz tetz Ẍep.
Beneꞌn nintzun ban Ẍeptz tan chijoyleꞌn yi eꞌ stzicy. Choꞌn tzun eꞌ jaleꞌntz taꞌn jalen Dotán. 18 Yi quilolnin yi eꞌ stzicy Ẍep yi txant tan tuleꞌn scyeꞌj cyoqueꞌn tzuntz tan xtxumleꞌn yi ẍeꞌn chiban tan biyleꞌn cuꞌn.c 19 Chijiloneꞌn tzuntz squibil quib. Itzun cyaltz:
—Ilwoknin, je nocx aj wutzicyꞌinl tzꞌul. 20 Or kabiyeꞌ cuꞌnx, nin kayokꞌeꞌ cuꞌnx tul jun jul. Ej nin skaleꞌ yi iꞌtz jun smaron txuc yi mbajsan. Skileꞌ tzun ko tzꞌelpon kꞌab yi wutzicyꞌx teꞌj quib yi talnakx sketz, cheꞌch bantz.
21 Itzun yi beneꞌn tbital Rubén yi chitxumuꞌn nin octz tan joyleꞌn puntil tan colcheꞌn chikꞌab. Itzun taltz:
—Quil tzibiy cuꞌn. 22 Ma na cun cꞌoxwok tul yi jun jul yi at tziꞌneꞌj kale quiꞌcleꞌt wunak. Poro quil cxoꞌcwok tan biyleꞌn, stzun Rubén bantz.
Ja tal Rubén yi xtxolbileꞌj na yi tajbil iꞌ iꞌtz tan claxeꞌn kloꞌ Ẍep chikꞌab nin tan toponeꞌnt te yi taj.
23 Poro itzun yi toponeꞌn Ẍep kale ateꞌt yi eꞌ stzicy nintzun eꞌ baj bentz tan stzꞌamleꞌn nin el chikꞌolpil yi tal beꞌch tetz.d 24 Ej nin eꞌ bentz tan cꞌoxleꞌn tul yi jun julaꞌtz yi nsken skej aꞌ tul. 25 Kalenaꞌs tzun eꞌ baj cweꞌn cꞌolchok tan waꞌaꞌn.
I nintzun na chitxꞌujtijtz tan waꞌaꞌn yi beneꞌn quilol jun chin txol aj pyaj yi choꞌn chisajeꞌn Galaad. Eꞌ cuꞌn xonl Ismael. Cyꞌaꞌn len chicamey cyaꞌn. Ej nin teꞌjak chicamey cyꞌaꞌn eꞌchk kꞌolil tzeꞌ cyaꞌn yi chin cꞌoꞌc nin. Choꞌn at chibembil yi eꞌ aj pyajaꞌtz tan cꞌayeꞌn jalen Egipto. 26 Beneꞌn tzun tlol Judá scyetz:
—¿Mbil katxꞌac teꞌj kol kabiy cuꞌn yi kitzꞌun nin lkoꞌc tan joyleꞌn puntil tan teweꞌn cuꞌn yi ẍeꞌn nquim kaꞌn? 27 Baꞌn tcuꞌn kacꞌayeꞌ nin scyetz yi eꞌ xonl Ismael yi chuꞌl tziꞌneꞌj, swutz yi nink lkabiy cuꞌn. Na yi mero bintzi kitzꞌun kutzicy kib tuchꞌ, stzun iꞌ bantz scyetz.
Baꞌn tzun ban yi xtxumuꞌn Judá ẍchiwutz. 28 Itzun yi quicyꞌeꞌn cuꞌn yi eꞌ aj pyajaꞌtz yi eꞌ aj Madiáne ẍchinakaꞌjil, nintzun eꞌ bentz tan jeꞌseꞌn tzaj Ẍep tjul nin ben chicꞌayiltz scyetz tan junak piẍ sakal.f Yaꞌstzun bantz yi beneꞌn quicyꞌal Ẍep jalen Egipto.
29 Itzun yi toponeꞌn Rubén tan xmayeꞌn yi jul, nin yi tilol yi quiꞌct Ẍep at, nintzun octz tan katzleꞌn yi beꞌch tetz tan ẍchajleꞌn yi na bisun. 30 Lajkeꞌl nintzun sajeꞌntz kale ateꞌt yi eꞌ titzꞌun nintzun taltz scyetz:
—¡Quiꞌct Ẍep at tjul! ¿Ma jaluꞌ ẍeꞌn tzimban?
31 Chibeneꞌn tzuntz tan ticyꞌleꞌn tzaj tal beꞌch tetz Ẍep, nin oc chisukꞌul yi ẍchꞌel jun tal neꞌẍ chiw teꞌj yi nsken wiꞌt quim cyaꞌn. 32 Nintzun eꞌ saj chichakol cobox ẍchixoꞌl tan ẍchajleꞌn tetz yi chitaj. Nin saj cyalol scyetz: “Je tzitaleꞌj: Til tzajuꞌ yi jeꞌj. Tilcunuꞌ. ¿Nkꞌeraꞌtz poloꞌ yi beꞌch tetz yi cyꞌajluꞌ?”
33 Itzun yi cweꞌn techal wutzileꞌn Jacow wutz yi beꞌch tetz yi cyꞌajl, nintzun taltz: “Iꞌtz. Yaꞌstzun beꞌch tetz yi tal incyꞌajl. Alonin bin scyetz smaron txuquilaꞌtz mbajsan tal incyꞌajl,” stzun wutzileꞌn Jacow bantz. 34 Toqueꞌn tzun iꞌ-tz tan katzleꞌn yi beꞌch tetz, nin oc tkꞌol yi beꞌch tetz teꞌj yi na xcon yi na quim jun wunak. Wiꞌnin tzun tiemp okꞌ Jacowtz tan paj yi quimeꞌn yi cyꞌajl. 35 Eꞌ joy puntil yi eꞌ cyꞌajl scyuchꞌ yi eꞌ meꞌl tan mayseꞌn iꞌ. Poro quinin na cujijtz yi na choꞌc tan mayseꞌn cꞌuꞌl. Ma na mas tcunin na okꞌtz tan yi cyꞌajl. Itzun na taltz: “Quil tzꞌel yi incyꞌajl teꞌj incꞌuꞌl, jalen cuꞌn yil chinquim nin wilt wutz iꞌ ẍchixoꞌl almaꞌ.”
36 Ma tetz Ẍep choꞌn beneꞌn cꞌayiꞌn cyakꞌun yi eꞌ aj Madián jalen le tnum Egipto. Choꞌn beneꞌn cꞌayiꞌn tetz jun yaj yi na biꞌaj Potifar. Yi jun yajaꞌtz iꞌ jun ajcaw xlaj faraóng yi rey tetz Egipto nin iꞌ jun capitán ẍchiwutz jun cꞌoloj sanlar, yi qꞌuicyꞌlom tetz rey.