Yi tkꞌol Ryos banl tibaj Jacow le amaꞌl Betel
35
1 Itzun bantz nintzun jilon Ryos tetz Jacow. Itzun taltz: “Ma jaluꞌ Jacow quiloꞌk jalen Betel,a nin baꞌn cẍnajeꞌ choneꞌj. Ej nin tul yi jun amaꞌlaꞌtz baꞌn tzaban jun patbil atxꞌixwatz tan incꞌuꞌlajeꞌn. Yi in wetz, in yi Ryos yi inchaj wib tzawutz nicyꞌ yi aweleꞌn tzaj ojk swutz awutzicy Esaú.” 2 Beneꞌn tzun tlol Jacow scyetz cyakil yi najal scyuchꞌ cyakil yi eꞌ wunak yi xomcheꞌ-tz teꞌj:—Or teleꞌn tzaj itcyꞌal cyakil yi eꞌchk iryosil yi colij itaꞌn. Ej nin or txꞌajwok itib, nchaꞌtz txꞌixpwok len beꞌch itetz. 3 Na choꞌn kaben jalen Betel, nin choꞌn sbnixok jun patbil txꞌixwatz wakꞌun tan takꞌleꞌn kꞌej yi inRyosil yi ocnak tan wuchꞌeyeꞌn nicyꞌ yi na sotz tzaj incꞌuꞌl. Ej nin iꞌ yi jun yi xomquen tunin sweꞌj alchok tunin na naꞌj nint.
4 Baj sajeꞌn tzun chikꞌoltz tetz Jacow cyakil yi eꞌchk chiryosil. Nchaꞌtz baj saj chikꞌol yi eꞌchk tcꞌuꞌl chiẍchin. Beneꞌn tzun Jacow tan mukleꞌn xe jun wiꞌ bakch yi attz nakajil Siquem. 5 Itzun te yi cyeleꞌn tzaj Jacow, nin saj jun chin xoꞌw tan Ryos scyeꞌj cyakil yi eꞌ wunak yi najlcheꞌ-tz tulak yi eꞌchk tal tnum yi ateꞌ-tz nakajil Siquem. Chaꞌstzun tej qui nin chinimsaj chicꞌuꞌl tan chisajeꞌn tan chitzꞌamleꞌn nin tan chibiyleꞌn cuꞌn Jacow scyuchꞌ yi eꞌ nitxajil.
6 Choꞌn tzun cyoponeꞌn Jacowtz scyuchꞌ cyakil yi eꞌ yi xomcheꞌ teꞌj le tnum yi na biꞌaj Luz. Yi jun tnumaꞌtz nchaꞌtz na biꞌaj Betel. Nin choꞌn attz cwent Canaán. 7 Itzun te yi wiꞌt baj cyoponeꞌntz le jun tnumaꞌtz nintzun oc Jacow tan banleꞌn jun patbil xtxꞌixwatz, nin oc tkꞌol yi biꞌtz tetz El-betel,b yaꞌstzun tulejtz na i yi nicyꞌ yi teleꞌn ojkuj swutz yi stzicy, choꞌn ẍchajol tib Ryos swutz le jun amaꞌlaꞌtz. 8 Nchaꞌtz tul yi jun amaꞌlaꞌtz, choꞌn quimeꞌn yi jun xnaꞌn yi na biꞌaj Débora yi mos Rebeca. Choꞌn tzun mukxeꞌntz cyaꞌn tzakꞌ jun wiꞌ bakch yi attz nakajil Betel. Nin oc tkꞌol Jacow yi biꞌ yi jun amaꞌlaꞌtz tetz “Yi jun wiꞌ bakch kale bajeꞌt bis oꞌkl.”
9 Itzun nicyꞌ yi teleꞌn tzaj Jacow Padan-aram, nin yi nicyꞌ yi na xon iꞌ tbeꞌ, nin ẍchaj tib Ryos swutz, nin takꞌ yi banltz tibaj. 10 Na je tal iꞌeꞌj:
“Yi ara biꞌ iꞌtz Jacow,
poro sbneꞌ opon tunintz
nkꞌeꞌtz Jacow sbneꞌ,
ma na Israel sbneꞌ.”c
“I inaꞌtz yi Ryos yi na chin xcyeꞌ
tan kojleꞌn nin yi imbanl tibaj jun.
Ẍchijalok tzun wiꞌnin anitxaꞌ.
Nin ẍchijalok wiꞌnin axonl.
Nin tan aẍ ljaleꞌt wiꞌnin nación,
nin chin wutzileꞌn nin ẍchibneꞌ eꞌchk naciónaꞌtz.
Nchaꞌtz ẍchijalok rey ẍchixoꞌl yi eꞌ axonl.
12 Ej nin cyakil yi luwar yi wakꞌnak
tetz Abraham nin tetz Isaac.
Nchaꞌtz swakꞌeꞌ tzatz.
Ej nin yil ẍquim atz
swakꞌeꞌ scyetz yi eꞌ axonl.”d
13 Itzun yi wiꞌt jiloneꞌn Ryos tetz Jacow tul yi luwaraꞌtz ajeꞌn nin bantz. 14 Beneꞌn tzun Jacow tan ticyꞌleꞌn tzaj jun cꞌub, nin cu tawaltz. Txicl tzun tulejtz chi na ban tawleꞌn jun tkan caꞌl. Choꞌn tzun cweꞌn tawaltz le amaꞌl kale jiloneꞌt Ryos tetz. Beneꞌn nin bantz tan xanseꞌn yi jun cꞌubaꞌtz nin baj jeꞌ kojol aceit tu win tibaj. 15 Nchaꞌtz nin oc tkꞌol biꞌ yi jun amaꞌlaꞌtz tetz Betel.e
Yi quimeꞌn Raquel
16 Icyꞌeꞌnt nintzun eꞌ bantz swutz yi jun amaꞌlaꞌtz yi na biꞌaj Betel. At tzaj nintzun muꞌẍt yi chibeꞌ tan cyoponeꞌntz jalen Efrata yi tuleꞌn yos tu Raquel. Chin qꞌuixcꞌuj nin bantz yi tuleꞌn yos tuchꞌ. 17 Itzun te yi at Raquel swutz yi wiꞌtzbil qꞌuixcꞌuj tan tuleꞌn yos tuchꞌ, jiloneꞌn tzaj tzun yi xeꞌiyum tetz. Itzun taltz: “Quil cxob na yi niꞌ, iꞌtz jun awal xicy.” 18 Poro jalt cuntunin tan quimeꞌn Raquel tan biꞌl yi qꞌuixcꞌuj. Pentlen tunin tzun na molneꞌ yi talmaꞌ Raquel, yi toqueꞌn cyen yi biꞌ yi niꞌ taꞌn, nin oc tkꞌol tetz Benoni.f Ma yi Jacow nin oc tkꞌol yi biꞌtz tetz Benjamín.g
19 Yaꞌstzun bantz yi quimeꞌn Raquel. Choꞌn mukxeꞌn cyentz cyaꞌn tbeꞌ nicyꞌ yi na chixon tan cyoponeꞌn Efrata. Yi jaluꞌ yi jun tnumaꞌtz na biꞌaj Belén. 20 Yi wiꞌt mukxeꞌn Raquel nintzun je cyen banol Jacow jun nich tibaj yi muꞌẍ amaꞌl kale mukxeꞌt. Yaꞌstzun yi jun nichaꞌtz yi na chajon yi amaꞌl kale mukxeꞌt Raquel.
21 Nintzun eꞌ cuꞌ Israel junt tirtz tbeꞌ. Choꞌn tzun cyoponeꞌntz swutz len yi Torre cwent Edar.
22 Itzun te yi chinajeweꞌn tul yi jun luwaraꞌtz nintzun eꞌ witbej quib Rubén tu Bilha. Yi jun Bilha-aꞌtz iꞌ jun caꞌp txkel yi taj taneꞌn. Yi tbital Jacow, yi taj Rubén, yi xtxolbileꞌj wiꞌnin tzun ẍchiꞌcheꞌn cꞌuꞌl bantz.
Yi eꞌ cyꞌajl Jacow
Coblaj cuꞌn tzun cyꞌajl Jacow bantz. 23 Yi eꞌ cyꞌajl Jacow yi eꞌ jal teꞌj Lea iꞌtz: Rubén yi bajx cyꞌajol, Simeón, Leví, Judá, Isacar tu Zabulón. 24 Ma eꞌ yi eꞌ jal teꞌj Raquel iꞌtz: Ẍep tu Benjamín. 25 Nin eꞌ yi eꞌ jal te Bilha, yi mos Raquel iꞌtz: Dan tu Neftalí. 26 Nin eꞌ yi eꞌ jal teꞌj Zilpa, yi mos Lea, iꞌtz: Gad tu Aser. Yaꞌstzun yi eꞌ cyꞌajl Jacow yi eꞌ itzꞌij nicyꞌ yi ateꞌ tzaj Padan-aram.
Yi quimeꞌn Isaac
27 Beneꞌn tzun Jacow jalen Mamre tan tilweꞌn yi wutzileꞌn taj. Yi jun tnumaꞌtz nchaꞌtz na biꞌaj Arba nka Hebrón. Yaꞌstzun yi tnum kale najeweꞌt Abraham, nin kale najleꞌt Isaac yi taj Jacow.h 28 At tzun Isaac tul jun cient tu jun mutxꞌ yob yi quimeꞌn. 29 Nsken nintzun biꞌẍin Isaac yi quimeꞌn. Yi quimeꞌn, choꞌn tzun toponeꞌn talmaꞌ kale opnakeꞌt yi cyalmaꞌ eꞌ tacyꞌeꞌx iꞌ. Mukxij tzun yi wankil cyaꞌn Esaú tu Jacow yi cob cyꞌajl iꞌ.