Yi banleꞌn ruinl te Dina
34
1-2 At tzun jun ajcaw te yi tnum Siquemaꞌtz yi na biꞌaj Hamor yi heveo. Ej nin at jun cyꞌajl iꞌ yi na biꞌaj Siquem. Itzun bantz nin ben Dina, yi meꞌl Jacow teꞌj Lea tan chixajseꞌn yi eꞌ xun yi najlcheꞌ tul yi jun tnumaꞌtz. Poro yi beneꞌn tilol Siquem nin tzun octz tan banleꞌn ruinl tetz. 3 Poro tan paj yi wiꞌnin pekꞌeꞌn quen iꞌ teꞌj Dina, nin octz tan tocseꞌn cꞌuꞌl tan cyokꞌbel quib tuchꞌ. 4 Ej nin nchaꞌtz tal iꞌ tetz taj:—Baneꞌuꞌ pawor taꞌ, benkuꞌ sweꞌj tan jakleꞌn yi jun xuneꞌj, na na waj kokꞌbej kib tuchꞌ.
5 Yi teleꞌn xtxum Jacow tetz yi nsken wiꞌt ban Siquem ruinl te yi meꞌl, qui nin tal jun yol, tan paj yi quibeꞌ cyꞌajl iꞌ xe caꞌl. Na choꞌn cuꞌn ateꞌ joylaj tan chiwateꞌn cyawun. Nintzun ẍchꞌiw iꞌ jalen yi baj cyuleꞌn. 6 Te yi na tzan Jacow tan chichꞌiweꞌn yi eꞌ cyꞌajl oponeꞌn nin ban Hamor yi taj Siquem tan jakleꞌn Dina.
7 Itzun yi chipakxeꞌn tzaj yi eꞌ cyꞌajl Jacow tan chiwateꞌn yi cyawun nin yi quibital yi mbi cuꞌn bajij, nintzun saj jun chin chiꞌch cꞌuꞌlal scyetz, na chin txꞌixwil nin scyetz yi eꞌ xonl Israel yi toqueꞌn Siquem tan banleꞌn ruinl te yi meꞌl Jacow.
8 Ma Hamor, nintzun opon junt tir tan yol scyetz Jacow tu eꞌ cyꞌajl. Itzun taltz:
—Wiꞌnin na peꞌk yi incyꞌajl Siquem te cyeruꞌ cyanubuꞌ. Max chicꞌuꞌluꞌ, chibneꞌuꞌ jun pawor sketz. Qui peꞌl cyakꞌuꞌ amaꞌl tetz cyanubuꞌ tan cyokꞌbel quib tu wetz incyꞌajl. 9 Ej junit tzun lkaban scyuchꞌuꞌ. Nin baꞌn tzun lcyokꞌbej kib yi ketz kacyꞌajl scyuchꞌ yi cyeruꞌ chimeꞌluꞌ. Nchaꞌtz lchiban yi cyeruꞌ chicyꞌajluꞌ, baꞌn lcyokꞌbej quib scyuchꞌ yi ketz kameꞌl. 10 Ej nin ban chinajeꞌuꞌ skuchꞌ. Na je katnumeꞌj. Baꞌn lchijoyuꞌ naꞌl chinajeweꞌtuꞌ. Baꞌn lchinegosinuꞌ skaxoꞌl, nin baꞌn lchilokꞌuꞌ chitxꞌotxꞌuꞌ skaxoꞌl, stzun Hamor bantz.
11 Nchaꞌtz Siquem nin taltz tetz taj Dina scyuchꞌ eꞌ xibin:
—Na cu inwutz scyeruꞌ yi nink cu yi jun inyoleꞌj ẍchiwutzuꞌ. List in tan takꞌleꞌn nicyꞌnaꞌ cuꞌn lchijakuꞌ swetz. 12 Quiꞌc na ban kol chijakuꞌ mas swutz yi kacstumbr tzoneꞌj. Max chicꞌuꞌluꞌ, cyakꞌeꞌuꞌ amaꞌl sketz tan kokꞌbel quib tu cyanubuꞌ.
13 Ma yi eꞌ cyꞌajl Jacow nin eꞌ octz tan chisubleꞌn Siquem tu yi taj tan paj yi nsken wiꞌt ban Siquem ruinl tetz Dina. 14 Itzun cyaltz:
—Quiꞌc rmeril tan kakꞌol yi kanub tetz jun yaj yi nkꞌeꞌtz circuncidado, na chin txꞌixwil nin tetz ketz. 15 Cuj kaꞌn, poro ntin yi ko list eꞌuꞌ tan chibnol circuncidar quibuꞌ chi kutaneꞌn ketz. Poro nchaꞌtz tajweꞌn tan chibajeꞌn circuncidar cyakil yi eꞌ yaj yi ateꞌ ẍchixoꞌluꞌ. 16 Baꞌn tzun cyokꞌbej quib yi eꞌ kameꞌl scyuchꞌ cyeruꞌ chinitxajiluꞌ. Ej nin nchaꞌtz oꞌ ketz, baꞌn lkokꞌbej quib scyuchꞌ cyeruꞌ chimeꞌluꞌ. Skanajank tzun ẍchixoꞌluꞌ nin junit lkaban scyuchꞌuꞌ. 17 Poro ko quil cu ẍchiwutzuꞌ tan chibanoluꞌ circuncidar quibuꞌ, kicyꞌtpon tzun ketz tzoneꞌj nin mben kucyꞌal yi kanub skeꞌj, cheꞌch yi eꞌ xibin Dina bantz.
18 Nintzun cu ẍchiwutz Hamor tu Siquem mbi cuꞌn aꞌlchij scyetz. 19 Lajkeꞌl nintzun toqueꞌn Siquem tan joyleꞌn puntil tan banol circuncidar tib na wiꞌnin pekꞌeꞌn iꞌ te meꞌl Jacow. Nin tan tuꞌ yi chumbalaj nin tajtzaꞌkl yi jun xicyaꞌtz ẍchiwutz cyakil wunak, 20 eꞌ beneꞌn tzun tu taj tan yol scyetz wunak stzi puertil yi tnum na yaꞌstzun yi luwar kale na bnixeꞌt eꞌchk contrat. Itzun cyaltz scyetz eꞌ aj tnum:
21 —Yi eꞌ wunak yi nchuꞌl skaxoꞌl, eꞌ cuꞌn kamiw. Ẍchinajank nin ẍchinegosink skaxoꞌl tzoneꞌj, na at wiꞌnin txꞌotxꞌ tzoneꞌj tetz ketz, nin tetz cyetz. Nchaꞌtz baꞌn lkokꞌbej kib scyuchꞌ yi cyetz chimeꞌl. Ej nin yi eꞌ cyetz chicyꞌajl baꞌn lcyokꞌbej quib scyuchꞌ yi ketz kameꞌl. 22 Poro tan koqueꞌn junit scyuchꞌ, nin tan chinajeweꞌn skaxoꞌl, ntin at jun xtxolbil yi tajweꞌn tan kabnol taneꞌn. Iꞌtz yi tajweꞌn tan kabnol circuncidar kib ketz, chi na chiban cyetz. 23 Kol kacujij yi chiyol, ketz tzun sbneꞌ cyakil chimeꞌbiꞌl scyuchꞌ cyakil yi cyawun. Ntin na taj yil kal cuj. Ej nin ẍchicyajk tzuntz skaxoꞌl.
24 Cyakil tzun eꞌ yaj yi ateꞌ-tz, yi nsken wiꞌt opon chitiemp tan chixconeꞌn tetz sanlar, oc chicuj teꞌj yi mbi cuꞌn cyal Hamor tu Siquem. Ninin tzun eꞌ bajij circuncidar.
25 Itzun bantz, le toxiꞌn kꞌej yi nsken wiꞌt chiban circuncidar quib, nin te yi atit yi ẍchꞌonal scyeꞌj, nintzun eꞌ ben Simeón tu Leví tnum. Ej nintzun eꞌ octz tan chibiyleꞌn cuꞌn yi eꞌ yaj tan spar. Na quiꞌct rmeril tan chicolol quib tan paj yi ẍchꞌonal yi chiwankil. Yi Simeón tu Levíjaꞌtz, eꞌ cob scyeri yi eꞌ cyꞌajl Jacow. Ej nin eꞌ xibin Dina. 26 Nchaꞌtz Hamor tu Siquem yi cyꞌajl, eꞌ baj quim cyaꞌn tan spar. Ej nin eltzaj quicyꞌal Dina xe caꞌl Siquem, nin aj quicyꞌaltz scyeꞌj. 27 Nchaꞌtz eꞌ baj opon len yi eꞌ mas cyꞌajl Jacow. Ej nin eꞌ icyꞌtz ẍchixoꞌl eꞌ almaꞌ tan talkꞌeꞌn tzaj cyakil yi mbi cuꞌn attz tnum. Yaꞌstzun eꞌ bantz tan quicyꞌsal chicꞌuꞌl scyeꞌj, tan paj yi bnol Siquem ruinl te cyanub. 28 Baj el quicyꞌal cyakil cneruꞌ tu wacẍ scyuchꞌ cyakil eꞌ buruꞌ. Ej nin baj el quicyꞌal cyakil yi at tnum tu yi at solteꞌj len. 29 Nchaꞌtz eꞌ baj oc xeꞌak caꞌl tan talkꞌeꞌn cyakil yi attz. Ej nin baj ben quicyꞌal yi eꞌ nitxaꞌ scyuchꞌ yi eꞌ xnaꞌn tan chixconeꞌn tetz chimos.
30 Yi tbital Jacow yi mbi cuꞌn bajij nin tzun taltz tetz Simeón tu Leví:
—Atin wutz peꞌm tan yi xtxolbileꞌj, na cyakil yi eꞌ wunak yi najlcheꞌ tzoneꞌj, yi eꞌ aj Canaán scyuchꞌ yi eꞌ ferezeo, ẍchiꞌchok chicꞌuꞌl sweꞌj. Tan paj yi xtxolbileꞌj, tzꞌul chimolol quib tan oyintziꞌ sweꞌj. Ẍchinquimok cyaꞌn scyuchꞌ innajal na quiꞌc mas kawunakil tan oyintziꞌ.
31 Sajeꞌn tzun chitzaꞌwel Simeón tu Leví:
—¿Nxac moꞌc Siquem tan banleꞌn ruinl te kanub? ¿Wiꞌtz bnol tetz peꞌ kanub swutz iꞌ? cheꞌch bantz.