Yi chibansal quib Jacow tu Esaú
33
1 Yi beneꞌn tilol Jacow yi txant tan tuleꞌn Esaú tu yi cyaj cient ẍchakum, nintzun cu jatxol yi eꞌ cyꞌajl chikꞌab Lea tu Raquel scyuchꞌ yi cob chimos. 2 Ej nin oc tan chitxoleꞌn cuꞌn. Eꞌ bajx cuꞌn yi cob chimos scyuchꞌ yi cyal taꞌn. Xomt nin Lea scyuchꞌ yi tetz tal. Wiꞌtzbil tlen xomt nin Raquel tu Ẍep yi tal iꞌ. 3 Ma iꞌ tetz, nin bajx cuꞌn ẍchiwutz tan cꞌulcheꞌn Esaú. Nin yi txant tan chicꞌulul quib nin cu jokloktz jalen cuꞌn cweꞌn poneꞌn lajpuj yi wutz plaj wuxtxꞌotxꞌ. Juk tzun tir bantz jalen cuꞌn chicꞌulul quib tu Esaú. 4 Ma yi Esaú lajkeꞌl tzun beneꞌntz tan cꞌulcheꞌn Jacow. Nin bentz tan kꞌaleꞌn nin tan stzꞌubleꞌn xlajak stziꞌ. Ej nin eꞌ baj okꞌ cuꞌntz chicabil.5 Itzun yi beneꞌn tilol Esaú yi eꞌ xnaꞌn scyuchꞌ yi eꞌ nitxaꞌ yi xomcheꞌ teꞌj Jacow nintzun ben jakoltz tetz:
—¿Naꞌ cyaw yi cobox xnaꞌneꞌj scyuchꞌ yi eꞌ nitxaꞌ yi xomcheꞌ scyeꞌj?
—Eꞌ cuꞌn wetz, ma yi eꞌ nitxaꞌeꞌj eꞌ cuꞌn incyꞌajl yi Ryos makꞌon swetz, stzun Jacow bantz.
6 Chisajeꞌn tzun chiẍkansal quib yi cob mos scyuchꞌ cyal nin eꞌ baj cuꞌn joklok swutz Esaú jalen cuꞌn cweꞌn poneꞌn yi wutz chiplaj wuxtxꞌotxꞌ. 7 Nchaꞌtz ban Lea scyuchꞌ tal, eꞌ baj ul chiẍkansal quibtz nin eꞌ baj cu jokloktz swutz Esaú. Wiꞌtzbil tlen cyuleꞌn Ẍep tu Raquel nin eꞌ cu jokloktz swutz.
8 —¿Ma jaluꞌ mbiꞌtz yi atxumuꞌn scyeꞌj yi jujun kꞌuꞌj awawun yi nchibaj incꞌulul?
—Iꞌtz jun oy teruꞌ taꞌ, tan stzatzineꞌnuꞌ sweꞌj, stzun Jacow bantz.
9 —Quiꞌ, aẍ jun cꞌoloj witzꞌun, at wiꞌnin wetz wawun, stzun Esaú bantz.
10 Poro chin chꞌinchꞌuj nintzun ban Jacowtz tan chisukeꞌn. Itzun taltz:
—Baneꞌuꞌ pawor swetz taꞌ, yi ko bintzij nin na tzatzinuꞌ sweꞌj, stzꞌameꞌuꞌ yi oyeꞌj. Na tantuꞌ yi na tzanuꞌ tan ẍchajleꞌn yi balajiluꞌ swetz, niꞌcuꞌn chi nak chintzan tan tilweꞌn wutz Ryos. 11 Na cuꞌ inwutz teruꞌ taꞌ tan stzꞌamoluꞌ yi jun oyaꞌtz yi ja ul waꞌn teruꞌ na Ryos mmakꞌon inriquil nin quiꞌc tajweꞌn swuchꞌ.
Tantuꞌ yi chin chꞌinchꞌuj nin ban Jacow tan sukeꞌn yi oy, baj nintzun cꞌuꞌl Esaú yi stzꞌamol. 12 Beneꞌn tzun tlol Esaú:
—Quin bin. Kicyꞌokt. Chimbajxok cuꞌn tziwutz.
13 —Max cꞌuꞌluꞌ taꞌ, iluꞌ jun cꞌoloj wutzicy, poro na tiluꞌ yi eꞌ nitxaꞌ quil chitxꞌaj xoꞌn lajkeꞌl. Ej nin nchaꞌtz yi eꞌ tal cneruꞌ scyuchꞌ inwacẍ yi at len cyal yi quil chitxꞌaj xoꞌn. Kol chikꞌeꞌxij, qui cunin batz tul jun ntziꞌ kꞌej ẍchiquimok tircuꞌn. 14 Max cꞌuꞌluꞌ wajcaw, baꞌn tcuꞌn yi nink lbajxijuꞌ skawutz. Cheb cuntuꞌ kaxomtnin ketz wutz chicocuꞌ, quib yi chixon yi eꞌ wawun scyuchꞌ eꞌ nitxaꞌ. Choꞌn kilt kib jalen Seir kale najleꞌtuꞌ, stzun Jacow tetz Esaú.
15 —Cuj, chij Esaú. —Poro baꞌn chicyaj cobox inchakum tetz ixkꞌajlab.
—Quiꞌ loꞌ taꞌ, quil bisunuꞌ skeꞌj. Kopon ketz.
16 Iteꞌn nintzun kꞌejaꞌtz cweꞌn Esaú tbeꞌ tan jeꞌn poneꞌn jalen Seir. 17 Ma Jacow qui nin xom nintz wutz coc ma choꞌn tajeꞌn cuꞌntz Sucot. Yaꞌs bnixeꞌt jun tetz caꞌl taꞌn. Nchaꞌtz bnix cobox scabteꞌ scyetz eꞌ tawun. Chaꞌstzun te toqueꞌn biꞌ yi jun amaꞌlaꞌtz taꞌn tetz Sucot.a
18 Baꞌn cuntuꞌ muꞌl Jacow Canaán jetz yi teleꞌn tzaj jalen Padan-aram. Ej nin choꞌn jeꞌn bnol yi tal pach iꞌ yi mantial tuꞌ swutz len yi tnum Siquem. 19 Ej nin lokꞌ iꞌ jalaj txꞌotxꞌ scyetz xonl Hamor yi taj Siquem. Jun cient pwok lokꞌwit iꞌ yi jalaj txꞌotxꞌaꞌtz. Ej nin yaꞌstzun luwar kale jeꞌt bnol yi tal pach.b 20 Yi xoneꞌn tiemp nin bnix jun patbil xtxꞌixwatz taꞌn. Nin oc tkꞌol yi biꞌ tetz El-Elohe-Israel.c