Yi tuleꞌn Esaú tan cꞌulcheꞌn Jacow
32
1 Icyꞌeꞌn nintzun eꞌ ban Jacow. Poro te yi na chixon tbeꞌ nin eꞌ chaj quib jun cꞌoloj ángel tetz Ryos swutz. 2 Yi chibeneꞌn xmayil, nintzun taltz: “Jun cuꞌn yol yi jun cꞌolojeꞌj, eꞌ cuꞌn sanlar tetz Ryos.” Chaꞌstzun te toqueꞌn biꞌ yi jun amaꞌlaꞌtz taꞌn tetz Mahanaim.a 3 Cheꞌ beneꞌn tzun ẍchakol Jacow cobox ẍchakum, jalen le yi luwar yi na biꞌaj Seir, cwent Edom, tan talcheꞌn stziblal tetz Esaú yi stzicy yi at topombil iꞌ. 4 Nin je ben tloltz scyetz yi eꞌ ẍchakum: “Quibeneꞌnk wok nin alwok cyen tetz wutzicy Esaú: ‘Tzꞌul Jacow yi titzꞌunuꞌ, nin list iꞌ tan banleꞌn taneꞌn cyakil yi tajbiluꞌ. Nin je nsaj tlol iꞌ teruꞌeꞌj: Ja chinnajeꞌ jun cꞌoloj tiemp tu Labán. 5 Nin jaluꞌ ja chijal inwacẍ, ja chijal imburuꞌ, ja chijal wiꞌnin incneruꞌ. Nchaꞌtz ja chijal wiꞌnin yaj tu xnaꞌn tetz inmos,’ ẍchijwok sban tetz wutzicy. Alwok quen yi xtxolbileꞌj tetz, na na waj yil tzꞌopon yi intziblal twiꞌ tan mayseꞌn cꞌuꞌl iꞌ, nin baꞌnk sban swutz.”
6 Itzun yi chipakxeꞌn tzaj yi eꞌ mos Jacow te yi chimantar, nintzun cyaltz tetz:
—Ja wiꞌt xkaꞌktzaj te yi stzicyuꞌ Esaú, nin xomtzaj iꞌ wutz kacoc tan cꞌulcheꞌnuꞌ. Xomcheꞌ cyaj cient yaj teꞌj, cheꞌch yi eꞌ ẍchakum Jacow bantz.
7 Yi tbital Jacow yi xtxolbileꞌj, nintzun saj jun chin xoꞌwtz teꞌj, nin octz tan xtxumleꞌn. Toqueꞌn tzuntz tan chijatxleꞌn cuꞌn cyakil yi eꞌ wunak yi xomcheꞌ-tz teꞌj. Cob cuntunin eꞌ eltz taꞌn. Nchaꞌtz eꞌ tulej yi eꞌ cneruꞌ tu yi eꞌ wacẍ scyuchꞌ eꞌ camey. 8 Na nin octz tan xtxumleꞌn: “Yi kol tzꞌoc Esaú tan oyintziꞌ scyeꞌj yi bajx kꞌuꞌj yi bajxcheꞌ, baꞌn tzun lcheꞌl ojkuj yi caꞌp kꞌuꞌj yi xomcheꞌt nin.” 9 Xeꞌteꞌn nintzun bantz tan nachleꞌn Kataj. Itzun taltz: “Wajcaw, iluꞌ Ryosil incyꞌeꞌx Abraham nin iluꞌ Ryosil intaj Isaac. Iluꞌ bin aꞌlon swetz tan impakxeꞌn tzaj tul yi intanum, nin tan woponeꞌnt scyeꞌj intaj intxuꞌ. Nin nchaꞌtz taluꞌ swetz yi baꞌn cuntuꞌ sbneꞌ yi impyaj. 10 Quiꞌc muꞌẍ tal ekaꞌn waꞌn taꞌ, poro ja takꞌuꞌ yi banluꞌ swibaj, nin ja elcuꞌnuꞌ te yi suknakuꞌ swetz. Quiꞌc cyꞌaꞌn waꞌn yi wicyꞌeꞌn tibaj yi jun tzanlaꞌeꞌj yi na biꞌaj Jordán. Ntin jun intxꞌamij cyꞌaꞌn waꞌn yi wicyꞌeꞌn tzaj, poro jaluꞌ xomcheꞌ cob chin wutzileꞌn kꞌuꞌj wunak tu cob kꞌuꞌj wawun sweꞌj. 11 I bin jaluꞌ taꞌ, bneꞌuꞌ pawor swetz, chin coleꞌuꞌ tkꞌab wutzicy Esaú. Jun cuꞌn yol na chinxob tetz na quicunin batz tzꞌul iꞌ tan oyintziꞌ sweꞌj. Nin lcheꞌ biycuꞌn yi eꞌ wuxkel scyuchꞌ yi eꞌ tal innitxaꞌ yi xomcheꞌ sweꞌj. 12 Ma jaluꞌ bin taꞌ, chincoleꞌuꞌ. Na clarcunin talnakuꞌ swetz yi baꞌn cuntuꞌ sbneꞌ yi impyaj tanuꞌ. Ej nin talnakuꞌ swetz yi quinin ajlbeꞌn cyetz sbneꞌ cyajlal yi eꞌ inxonl. Ej nin talnakuꞌ yi choꞌn sbneꞌ cyajlal chi taneꞌn yi samlicyꞌ yi at stzi mar yi qui nin ajlbeꞌn tetz,”b stzun Jacow bantz tetz Ryos.
13 Taꞌsteꞌn nintzun cyaj cyent Jacow tan watl te yi jun akꞌbalaꞌtz nin octz tan xtxaꞌleꞌn balaj oytz ẍchixoꞌl cyakil yi cyꞌaꞌntz taꞌn tan takꞌleꞌn tetz Esaú. 14 Eꞌ jeꞌ xtxaꞌol cob cient chiw yi eꞌ cuꞌn tij, tu junak mam, nin eꞌ jeꞌ xtxaꞌol cob cient cneruꞌ yi eꞌ cuꞌn tij, tu junak mam. 15 Nchaꞌtz eꞌ jeꞌ xtxaꞌol junaklaj tij camey yi acꞌaj cunin baj cuꞌ yi cyal, nin eꞌ baj ben xomok yi cyal scyeꞌj. Nchaꞌtz eꞌ jeꞌ xtxaꞌol caꞌwunak tij wacẍ tu lajuj tor. Wiꞌtzbil tlen cyeleꞌn tzaj xtxaꞌol junak tij buruꞌ tu lajuj mam. 16 Nintzun eꞌ baj nin jatxoltz scyetzak yi eꞌ ẍchakum. Ej ben jatxol yi jun kꞌuꞌj chiw scyetz cobox ẍchakum. Ej nin ben tkꞌol yi jun kꞌuꞌj cneruꞌ scyetz coboxt ẍchakum. Nchaꞌtz eꞌ tulej yi eꞌ mas tawun. Nintzun ben tloltz scyetz eꞌ ẍchakumaꞌtz:
—Baꞌn cẍbajxij wok nin baꞌn lchꞌuy muꞌẍ ixoꞌl yi jujun kꞌuꞌj axwok scyuchꞌ yi eꞌ awun.
17 Ej nin ben cawultz yi bajxom te yi bajx kꞌuꞌj. Itzun taltz tetz:
—Yil tzicꞌul cuꞌn itib tu wutzicy Esaú, nin yil sjaktzaj tzatz naꞌ scyetz iꞌ yi apatrón, nin naꞌ ncẍbeneꞌt, nin naꞌ cyaw yi awun yi cyꞌaꞌncheꞌ itaꞌn, 18 baꞌn tzawal tetz: “Yi jeꞌj iꞌtz jun oy teruꞌ, taꞌ Esaú. Kawutzileꞌn Jacow, yi xconsbeꞌtzuꞌ, mmakꞌon tzaj tetz teruꞌ. Choꞌn xomtzaj iꞌ tetz jalen wutz kacoc,” ẍchij wok sbantz tetz, stzun Jacow bantz tetz yi ẍchakum.
19 Nchaꞌtz taltz tetz yi caꞌp nin yi toxiꞌn scyuchꞌ cyakil yi eꞌ yi eꞌ ben ẍchakol scyuchꞌ yi jujun jilwutz awun.
—Yil tzicꞌulwok yi wutzicy Esaú, iteꞌn nin tzital woktz tetz. 20 Nchaꞌtz alwok tetz: “Yi wutzileꞌn taꞌ Jacow yi xconsbeꞌtzuꞌ xomt tzaj jalen wutz kacoc,” ẍchij wok sban.
Yaꞌstzun tulej Jacow, na nin octz tan xtxumleꞌn: “Tan yi eꞌchk oy yi lbajxopon waꞌn swutz, xcyek tan xiteꞌn yi ẍchiꞌcheꞌn cꞌuꞌl sweꞌj, te yi ntaxk kacꞌul kib tuchꞌ. Nin quicunin batz stzatzink sweꞌj yil kacꞌul kib.” 21 Beneꞌn nintzun eꞌ ban yi mos scyuchꞌ yi jujun jilwutz oy yi ben quicyꞌal. Ma Jacow, nin cyajtz. Choꞌn tzun witeꞌntz le amaꞌlaꞌtz scyuchꞌ yi eꞌ mas yi xomcheꞌ teꞌj.
Yi toqueꞌn Jacow tan pil ib tu jun ángel
22 Iteꞌn nin akꞌbalaꞌtz oc Jacow tan chichakleꞌn cyꞌen yi cob txkeltz tu yi cob chimos, scyuchꞌ yi junlaj cyꞌajl. Choꞌn tzun quicyꞌeꞌntz taꞌn tibaj yi jun tzanlaꞌ yi na biꞌaj Jaboc. 23 Nchaꞌtz eꞌ baj ben xomok cyakil yi eꞌ yi xomcheꞌtz teꞌj. 24 Itzun te yi cyajeꞌn cyen Jacow ẍchuc, nin oc jun yaj tan pil ib tuchꞌ. Ul cunin skiltz cyaꞌn tan pil ib. 25 Ma yi tilol yi jun yajaꞌtz yi quiꞌc nin rmeril tan xcyeweꞌn teꞌj Jacow, nin bentz tan xtxakꞌleꞌn yi xtxoꞌ cyꞌach Jacow. Ej ninin tzun el jiẍpuj yi bakil yi cux Jacow taꞌn. 26 Jiloneꞌn nin tzun yi jun yajaꞌtz tetz. Itzun taltz:
—Chin atzakplen, na tzan tuleꞌn skil, stzun iꞌ-tz tetz Jacow.
—Yi ko quil takꞌcyenuꞌ yi imbanl, quil tzintzakplenuꞌ, stzun Jacow tetz.
27 —¿Mbi tzun abiꞌ? stzun yi yaj tetz Jacow.
—Jacow bin wetz imbiꞌ, stzun iꞌ ban.
28 Beneꞌn tzun tlol yi yajaꞌtz tetz:
—Ma jaluꞌ, nkꞌeꞌtz Jacow sbneꞌ abiꞌ ma na Israelc sbneꞌ ara biꞌ, na ja abuch awib tan jakleꞌn abanl tetz Ryos nin scyeꞌj wunak nin ja ẍcyeꞌ-tz.
29 —Ma jaluꞌ bin, taleꞌuꞌ swetz, ¿mbi tzun teruꞌ biꞌuꞌ? stzun Jacow banintz tetz yi jun yajaꞌtz.
Sajeꞌn tzun stzaꞌwel yi jun yajaꞌtz:
—¿Mbi xac na ajak tzaj swetz yi imbiꞌ? stzun iꞌ bantz.
Ej nin taꞌtz teꞌnin bentz tan takꞌleꞌn yi banl tibaj Jacow. 30 Nintzun oc tkꞌol Jacow biꞌ yi jun luwaraꞌtz tetz Penuel,d na nin tal iꞌ-tz: “Ja wil wutz Ryos, poro ntyoẍ tetz iꞌ yi itzꞌineꞌt.”
31 Itzun yi jeꞌn muleꞌn yi kꞌej icyꞌeꞌn atit Jacow le yi jun luwaraꞌtz yi na biꞌaj Penuel. Coꞌxiꞌn na xon tan paj yi qꞌuixpnak yi xtxoꞌ cux. 32 Chaꞌstzun te jaluꞌ, cyakil yi eꞌ xonl Israel, qui na baj yi ibotxꞌ cyaꞌn yi at te yi bakil yi cux na yaꞌstzun elsawutzil te yi bakil Jacow yi loꞌon, nin yi el tzaj jiẍp, nicyꞌ yi chipilul quib tu Ryos.