Yi toponeꞌn Jacow Harán
29
1 Icyꞌeꞌn nintzun ban Jacow, nin icyꞌ tcyꞌaj yi beꞌ yi na opon kale najlcheꞌt yi eꞌ aj teleꞌn tziꞌn.2 Yi toponeꞌn le yi jun amaꞌlaꞌtz, nin ben tilol jun julil aꞌ yi jukꞌlcheꞌ ox kꞌuꞌj cneruꞌ nakajil. Na choꞌn cuꞌn na chucꞌaꞌ cyakil yi eꞌ cyawun yi eꞌ aj pstorinl te yi jun aꞌaꞌtz. Ej nin stziꞌ yi jun julil aꞌaꞌtz ateꞌn jun chin wutzileꞌn cꞌub tan jopleꞌn. 3 Jalen cunin tzun na chimol quib yi eꞌ pstor tan takꞌleꞌn quicꞌaꞌ yi eꞌ cyawun kalenaꞌtz tzun na el yi cꞌub cyaꞌn. Ma yi na wiꞌt chucꞌaꞌ yi eꞌ cyawun nintzun na chijopt cyen junt tir stziꞌ yi jul. 4 Beneꞌn tzun jakol Jacow scyetz yi eꞌ pstor yi nsken wiꞌt chopontz:
—¿Naꞌ tzun nchisajeꞌt cyeruꞌ eꞌuꞌ wamiw? stzun iꞌ bantz.
—Oꞌ bin aj Harán ketz, cheꞌch tetz.
5 —¿Cyajskeꞌn peꞌuꞌ wutz yi jun yaj yi na biꞌaj Labán, yi cyꞌajl Nacor? stzun Jacow scyetz:
—Kajskeꞌn wutz, cheꞌch.
6 Toqueꞌn nintzun Jacow chꞌinchꞌuj tan jakleꞌn tkanil Labán, itzun taltz:
—¿Baꞌn peꞌ wutz iꞌ? ¿Quiꞌc peꞌ yab?
—Baꞌn, quiꞌc yab iꞌ, cheꞌch eꞌ pstor. —Xmayninuꞌ tziꞌneꞌj, tzꞌul yi meꞌl iꞌ yi Raquel biꞌ tan takꞌleꞌn quicꞌaꞌ yi cneruꞌ.
7 Beneꞌn tzun tlol Jacow scyetz yi eꞌ pstoraꞌtz, itzun taltz:
—At tzaj nin tan cweꞌn kꞌej, ¿mbi tzuntz yi chin junyeꞌneꞌt nin na chilam cyenuꞌ yi cyawunuꞌ? ¿Mbi tzuntz yi nink lchucꞌaꞌ chan cyanuꞌ, bantz chibeneꞌnuꞌ tan chicꞌaꞌcheꞌn junt tkuj?
8 —Quiꞌc cuj teꞌj, cheꞌch. —Na tajweꞌn cunin kachꞌiw yil chimol quib cyakil yi eꞌ pstor scyuchꞌ cyawun. Baꞌn tzun tzꞌel yi cꞌub kaꞌn. Ej nin kalenaꞌtz tzun lchucꞌaꞌ yi eꞌ kawun, cheꞌch tzun bantz.
9 I nin na tzan Jacow tan yol scyetz yi eꞌ pstoraꞌtz, yi toponeꞌn Raquel scyuchꞌ yi tawun, na iꞌ pstor cyetz. 10 Yi beneꞌn tilol Jacow yi nsken wiꞌt ul Raquel scyuchꞌ yi tawun Labán yi xibin yi xtxuꞌ, beneꞌn tzun iꞌ-tz tan telseꞌnlen yi cꞌub yi at tan jopleꞌn stziꞌ yi julil aꞌaꞌtz. Ucꞌaꞌeꞌn nin eꞌ bantz yi tawun Labánaꞌtz. 11 Nchaꞌtz beneꞌn nin bantz tan kꞌaleꞌn Raquel, nin bentz tan stzꞌubleꞌn xak stziꞌ. Oꞌkl nin bantz tan yi tzatziꞌn yi at cuꞌntz.
12 Ma yi tbital Raquel tetz Jacow, yi tetz xtxuꞌ iꞌtz tanub Labán, lajkeꞌl nintzun beneꞌntz tan talcheꞌn tetz taj iꞌ.
13 Yi wiꞌt tbital Labán stziblal Jacow, yi iꞌ tal yi tanub, lajkeꞌl nintzun teleꞌn tzajtz tan cꞌulcheꞌn. Beneꞌn nin bantz tan ẍchajleꞌn tetz yi wiꞌnin tzatzineꞌn teꞌj. Nin bentz tan kꞌaleꞌn nin jeꞌ stzꞌubul yi xak stziꞌ. Ej nin ben tcyꞌaltz xe cꞌal. Yi cyoponeꞌn xe caꞌl xeꞌteꞌnin ban Jacow tan xtxoleꞌn tetz Labán yi mbicunin bajij teꞌj iꞌ. 14 Sajeꞌn tzun tlol Labán tetz: “Aẍ cunin witzꞌun, na junit kaẍchꞌel tzawuchꞌ,” stzun Labán bantz.
Cyajeꞌn cyen nin ban Jacow tuchꞌ Labán tetz jun xaw.
Yi takꞌujeꞌn Jacow tan xtxꞌacleꞌn yi txkel
15 Yi jeꞌn poneꞌn yi jun xawaꞌtz tan Jacow, nintzun tal Labán tetz:
—Nkꞌeꞌtz tan paj yi jun cunin oꞌ tzawuchꞌ oy tunin tzunk cẍakꞌujeꞌt, ma na alaj swetz yi nicyꞌnaꞌ na awaj yil tzinchoj teꞌj akꞌej, stzun Labán bantz.
16 Ateꞌ tzun cob meꞌl Labán, yi bajx na biꞌaj Lea, ma yi caꞌp na biꞌaj Raquel. 17 Yi bajx meꞌal yi na biꞌaj Lea, ntin tal bakꞌ wutz tuꞌ na yub. Ma yi Raquel, yi caꞌp meꞌal, chin yubeꞌnt cunin cyakil yi wankil iꞌ. 18 Chaꞌstzun te mast cunin na peꞌk quen Jacowtz teꞌj. Nin nsken wiꞌt ben tcyꞌal yi xtxumuꞌn. Chaꞌstzun te ben tloltz tetz Labán:
—Yi nink ltakꞌuꞌ yi meꞌluꞌ swetz, yi na biꞌaj Raquel, baꞌn lnakꞌuj juk yob tuchꞌuꞌ tan ẍchojleꞌn.
19 Sajeꞌn tzun tlol Labán, itzun taltz:
—Baꞌn tcuꞌn yi choꞌn lwakꞌ yi inmeꞌl tzatz, swutz yi choꞌnk lben tkꞌab jun awer nak. Baꞌn bin, baꞌn ẍcyaj cyen swuchꞌ tan akꞌun.
20 Yaꞌstzun bantz yi cyajeꞌn cyen Jacow juk yob tan akꞌun tuchꞌ Labán tan xtxꞌacleꞌn yi txkel. Qui tunin kꞌusij ban yi juk yobaꞌtz swutz Jacow, tantuꞌ yi wiꞌnin na peꞌk iꞌ teꞌj Raquel.
21 Yi jeꞌmponeꞌn yi juk yob tan Jacow tan akꞌun nintzun taltz tetz Labán:
—Takꞌeꞌuꞌ yi wuxkel tan kokꞌbel kib tuchꞌ, na ja wiꞌt jeꞌul yi juk yob akꞌun waꞌn yi insuknak teruꞌ tan ẍchojleꞌn meꞌluꞌ.
22 Cheꞌ bajeꞌn tzun xtxocol Labán cyakil yi eꞌ wisintz tan cyoponeꞌn te yi jun chin umleꞌnaꞌtz yi bnix taꞌn. 23 Itzun yi toqueꞌn akaleꞌn, nin yi toponeꞌn oril yi umleꞌn nintzun ben tcyꞌal Labán yi bajx meꞌl yi na biꞌaj Lea, tan cyokꞌbel quib tu Jacow. Okꞌbeꞌn ib nintzun eꞌ bantz. 24 Nchaꞌtz takꞌ Labán jun scyeri mos tetz Lea yi na biꞌaj Zilpa, tan xconeꞌn tetz iꞌ.
25 Itzun le junt eklok yi cꞌaseꞌn Jacow kalenaꞌtz tzun teleꞌn xtxum tetz yi nkꞌeraꞌtz yi txkel iꞌ akꞌlij, ma na choꞌn cꞌaseꞌn iꞌ teꞌj Lea, yi bajx meꞌal. Beneꞌn tzun iꞌ-tz teꞌj Labán, itzun taltz:
—¿Mbi ekaꞌn tan yi tajtzaꞌkluꞌ yi ncuꞌ nucꞌuluꞌ sweꞌj? ¿Nkꞌeꞌtz peꞌ katrat tan wakꞌujeꞌn tuchꞌuꞌ tan wetzal Raquel? Ma jaluꞌ ¿mbi tzuntz mmoꞌcuꞌ tan insubleꞌn?
26 Sajeꞌn tzun stzaꞌwel Labán, itzun taltz:
—Nkꞌeraꞌtz ketz kacstumbr tzoneꞌj, yi bajxk ltzꞌoc chmil yi caꞌp meꞌal swutz yi bajx. 27 Ma jaluꞌ bin caleꞌn cuꞌn teꞌj yi jun sman kꞌejeꞌj te yi i umleꞌn tu Lea, kalenaꞌs tzun lwakꞌ Raquel tzatz. Yi ko yaꞌtz awajbil, baꞌn. Ntin ko list aẍ tan awakꞌujeꞌn jukt yob swuchꞌ.
28 Nintzun cuꞌ-tz swutz Jacow, quib yi tal Labán tetz. Nin yi jeꞌn poneꞌn yi jun sman kꞌej te yi umleꞌn, kalenaꞌtz tzun tkꞌol Labán yi Raquel tetz caꞌp txkel Jacow. 29 Nchaꞌtz takꞌ Labán jun mos tetz Raquel yi na biꞌaj Bilha tan xconeꞌn tetz. 30 Okꞌbeꞌn ib nintzun eꞌ ban Jacow tu Raquel. Poro mast tcunin tzun pekꞌeꞌn Jacow te Raquel swutz Lea. Quiꞌt nin octz tan xtxumleꞌn yi stzꞌakꞌujk jukt yob tan paj.
Yi eꞌ nitxajil Jacow
31 Itzun bantz yi tilol Kataj Ryos yi qui na peꞌk Jacow teꞌj Lea, nintzun takꞌ amaꞌltz tan jaleꞌn cobox tal iꞌ, ma yi Raquel nin cuꞌ makol yi talbiltz. 32 Jeꞌn tzun tekal Lea pwokil jun niꞌ. Ma yi tuleꞌn itzꞌok yi jun niꞌaꞌtz, nin oc tkꞌol yi biꞌ-tz tetz Rubén.a
33 Yi xoneꞌn tiemp tekal tzun Lea pwokil junt niꞌ. Ej nin yi biꞌ tulej iꞌtz Simeón.b Ej itzun taltz: “Ja tbit Wajcaw yi na tzan telseꞌn inkꞌej, chaꞌstzun te ja takꞌ iꞌ junt wal.”
34 Nin yi teleꞌn mas tiemp tekal tzun Lea pwokil yi toxeꞌn niꞌ. Nin yi tuleꞌn itzꞌok yi toxeꞌn niꞌaꞌtz nin oc tkꞌol yi biꞌ tetz Leví.c Nin tal iꞌ: “Ma jaluꞌ spekꞌok wuchmil sweꞌj chinch wetz, na oxix wal cheꞌ walaj taꞌn.”
35 Ej nin tekal Lea pwokil junt niꞌ. Yaꞌstzun cyajeꞌn tal iꞌ. Nin yi biꞌ tulejtz iꞌtz Judá.d Ej nin yi ntaxk ul itzꞌok nintzun tal Lea: “Swakꞌeꞌ inkꞌajsbil tetz Wajcaw jaluꞌ.” Yaꞌstzun taltz yi tuleꞌn itzꞌok yi cyajiꞌn niꞌ. Poro yaꞌstzun wiꞌtzbil tal Lea njal, na makxeꞌn nin ban yi talbil iꞌ tan Ryos.