Yi tkꞌol Isaac banl tibaj Jacow
27
1 Itzun bantz te yi nsken biꞌẍin Isaac, nin yi quiꞌt na aꞌw wutz, nintzun saj ẍchakol iꞌ yi Esaú yi bajx cyꞌajl, nin ben tloltz tetz:—¡Aẍ jun cꞌoloj incyꞌajl!
—¿Mbiꞌ taꞌ? chij Esaú.
2 —Na awil yi ja wiꞌt chimbiꞌẍin. Ej nin qui cunin batz na xontzaj yi quimichil tzinwutz tetz ek caꞌp. 3 Chaꞌstzun te na waj yil cẍben xoꞌl tzeꞌ. Cyꞌajweꞌ nin yi amaꞌcl tetz txuquiꞌn nin cun joy jun inchib. 4 Yil tzꞌul yi txuc awaꞌn, nintzun tzaban cuꞌn jun chin intꞌimbil yi chumbalaj nin chi yi wetz yi na chimpekꞌ teꞌj. Yil bnix awaꞌn baꞌn tzun tzꞌul tzinwutz tan bajeꞌn waꞌn. Kalenaꞌtz tzun lwakꞌ cyen imbanl tzawibaj jalen peꞌk yi ntaxk chinquim.
5 Ma yi Rebeca, atequen tzun iꞌ-tz tan tbiteꞌn yi mbi cuꞌn na tzan nin Isaac tan talcheꞌn tetz Esaú. Yi tilol iꞌ yi nsken wiꞌt ben Esaú tan txuquiꞌn xoꞌl tzeꞌ, 6 lajkeꞌl nintzun beneꞌn tan talcheꞌn tetz Jacow, yi caꞌp chinitxaꞌ, yi mbi cuꞌn baj tlol Isaac tetz Esaú, itzun taltz:
—Aẍ jun cꞌoloj wal, je mbaj tlol ataj tetz awutzicyeꞌj: 7 “Quiloꞌk xoꞌl tzeꞌ tan txuquiꞌn. Cun joy jun inchib. Ma yi ljaltzaj awaꞌn, nintzun tzaban jun chin balaj intꞌimbil teꞌj. Kalenaꞌs tzun lwakꞌ cyen imbanl tzawibaj jalen peꞌk te ntaxk chinquim,” stzun ataj mban tetz. 8 Ma jaluꞌ bin aẍ jun cꞌoloj wal, bit tzaj cunin yi xtxolbil yi swaleꞌ tzatz: 9 Quiloꞌk jalcuꞌn kale ateꞌt yi eꞌ kawun, nin joyweꞌ eꞌl tzaj cob tal chiw yi baꞌnt eꞌ tetz chibaj, nin tzimbneꞌ yi tꞌimbil chi na peꞌk ataj teꞌj. 10 Yil bnix yi jun balaj tꞌimbilaꞌtz waꞌn, nintzun tzacyꞌaj nintz swutz ataj tan waneꞌn iꞌ teꞌj, bantz cyajeꞌn tkꞌol yi banl tzawibaj te yi ntaxk quim, chij Rebeca bantz tetz Jacow.
11 Sajeꞌn tzun stzaꞌwel Jacow yi yol xtxuꞌ:
—Naꞌ, poro yi Esaú, chin pay nin teꞌj wankil, ma yi wetz quiꞌ. 12 Ko tzun lben intaj tan inmacleꞌn, tzꞌelpon xtxum swetz nin tzꞌocopon tan xtxumleꞌn yi na chintzan tan telseꞌn kꞌej iꞌ. Ej nin qui cunin batz tzꞌelepon inkꞌej taꞌn. Wech na imbanl kloꞌ na lwaj cyen tetz.
13 Sajeꞌn tzun stzaꞌwel yi xtxuꞌ:
—Aẍ jun cꞌoloj wal, baꞌn tcuꞌn yi in wetz noꞌc cyen tzakꞌ awil. Ntin banaj quib yi nwalnin tzatz. Cun cyꞌaj yi cob chiw yi nwal.
14 Beneꞌn nintzun ban Jacow tan quicyꞌleꞌn tzaj yi cob tal chiwaꞌtz nin eꞌ oc tkꞌoltz tkꞌab yi xtxuꞌ. Eꞌ cweꞌn tzun biyol Rebeca nin octz tan banleꞌn jun balaj tꞌimbil chi yi na peꞌk Isaac teꞌj. 15 Sajeꞌn tzun tcyꞌal Rebeca yi balaj beꞌch tetz Esaú yi colijcheꞌ, nin oc tkꞌoltz teꞌj Jacow. 16 Nin oc tkꞌol Rebeca yi stzꞌuml chiw teꞌj kꞌab nin teꞌj kul Jacow. 17 Yi wiꞌt toqueꞌn yi beꞌch tetz Esaú tu stzꞌuml chiw teꞌj Jacow, kalenaꞌs tzun beneꞌn tkꞌol Rebeca yi jun balaj tꞌimbilaꞌtz tetz tan beneꞌn tan takꞌleꞌn tetz Isaac, yi taj.
18 Yi tocomponeꞌn Jacow kale atit yi taj, nintzun tziwun nintz tetz. Itzun taltz:
—Quech taꞌ. Ja nuꞌl.
—¿Naꞌj scyetz aẍ? ¿Aẍ peꞌ Esaú, nka aẍ Jacow? chij Isaac ban nintz.
19 —In Esaú yi bajx cyꞌajluꞌ, chij Jacow. —Ja bnix yi tajbiluꞌ waꞌn yi njakuꞌ swetz. Or cꞌolekeꞌnuꞌ. Wankuꞌ te yi tꞌimbil yi ja bnix waꞌn teꞌj yi txuc yi nẍimbiyeꞌ, bantz tkꞌoluꞌ yi banluꞌ swetz, stzun Jacow ban.
20 Nin ben jakol Isaac tetz Jacow:
—¿Jalcunin petzun njal txuc awaꞌn?
—Jalcuꞌn taꞌ, na i yi Ryosiluꞌ mmoꞌc tan wuchꞌeyeꞌn tan joyleꞌn, chij Jacow bantz.
21 Beneꞌn tzun tlol Isaac tetz:
—Ẍkansoꞌc tzaj bin awib tzinwutz, na swileꞌ ko bintzi nin i aẍaꞌtz yi incyꞌajl Esaú.
22 Toqueꞌn tzun ẍkansal tib Jacow swutz yi taj tan tilol iꞌ yi ko i nin iꞌ-aꞌtz Esaú. Ma yi toqueꞌn macol Isaac teꞌj kꞌab Jacow, nintzun taltz:
—Yi wiꞌ tan yol icunin iꞌ-aꞌtz Jacow, poro yi teꞌj kꞌab, icunin iꞌ-aꞌtz Esaú.
23 Qui nin tzun el xtxum Isaac tetz yi ko iꞌtz Jacow, na niꞌcuꞌn taneꞌn payil teꞌj kꞌab Jacow chi taneꞌn tetz Esaú. 24 Itzun yi ntaxk takꞌ Isaac yi banl tetz Jacow nintzun jak iꞌ junt tir tetz Jacow, itzun taltz:
—¿Bintzij nin peꞌ i aẍaꞌtz Esaú?
—I inaꞌtz Esaú taꞌ, chij Jacow.
25 —Akꞌtzaj bin yi intꞌimbil, nin inwaꞌ. Chinwank jun te yi intꞌimbil yi ja bnix awaꞌn. Kalenaꞌtz tzun lwakꞌ imbanl tzawibaj, stzun.
Beneꞌn tzun tkꞌol Jacow yi waꞌ Isaac. Nchaꞌtz takꞌ iꞌ win tetz tcꞌaꞌ. 26 Yi wiꞌt waneꞌn nintzun taltz:
—¡Catzam! aẍ jun cꞌoloj incyꞌajl. Tzꞌubeꞌn xak intziꞌ.
27 Yi tocomponeꞌn Jacow tan stzꞌubleꞌn xak stziꞌ yi taj, nin oc sakol Isaac te yi beꞌch tetz Esaú yi at teꞌj Jacow, nin takꞌ iꞌ banl tibaj. Nin jeꞌj yol tal Isaac:
“Yaꞌstzun cꞌoꞌcal yi incyꞌajl. Niꞌcuꞌn cꞌoꞌcal tu jalaj luwar yi na acꞌ tan aꞌbal tan Kataj Ryos.
28 Lok skoj tzaj Kataj aꞌbal tibaj yi atxꞌotxꞌ. Lok jal balaj acosech taꞌn. Lok jal wiꞌnin triw nin wiꞌnin loꞌbaj uva tzawuchꞌ.
29 Ẍchijalok wiꞌnin wunak yi chocopon tetz amos. Yi eꞌ wunak yi ateꞌ beneꞌn tziꞌn wi munt ẍchimejek tzawutz nin ẍchiwutz axonl. Aẍ ajcaw sbneꞌ, squibaj yi eꞌ awitzꞌun nin ẍchimejek tzawutz. Ej nin yi eꞌ yil choꞌc tan telseꞌn akꞌej tzꞌakꞌlok cyetz chicawsaꞌtz. Ma yi eꞌ yil tzꞌakꞌon akꞌej stzꞌakꞌlok cyetz chibanlaꞌtz,”a stzun Isaac bantz tetz.
30 Yi tkꞌol Isaac yi banl tibaj, eleꞌn tzaj nin ban Jacow. Watok cunin tzun el tzaj Jacow swutz yi taj, yi pakxeꞌn tzaj Esaú tan txuquiꞌn. Cyꞌaꞌn jun txuc taꞌn tetz ẍchib yi taj. 31 Nchaꞌtz nin octz tan banleꞌn jun balaj tꞌimbil te yi txuc yi ul taꞌn. Yi wiꞌt bnixeꞌn taꞌn nin ben tcyꞌaltz swutz yi taj. Nin tal iꞌ-tz:
—Cꞌolekeꞌn tzajuꞌ taꞌ. Wankuꞌ. Je yi tꞌimbiluꞌeꞌj yi ja bnix waꞌn te yi txuc yi ja quim waꞌn, bantz tkꞌoluꞌ yi banluꞌ swibaj.
32 Beneꞌn tzun jakol Isaac tetz:
—¿Naꞌ tzun scyetz aẍ?
—I inaꞌtz in Esaú taꞌ, yi bajx cyꞌajluꞌ, stzun Esaú bantz.
33 Eleꞌn tunin yab Isaac yi jiloneꞌn cyen Esaú tetz. Xeꞌteꞌn nintzun bantz tan lucneweꞌn. Nin ben tloltz tetz Esaú:
—¿Naꞌ tzun scyetz iꞌ yi jun yi muꞌlak sweꞌj? na ja tal iꞌ swetz yi ja xaꞌk tan txuquiꞌn nin ja ul yi intꞌimbil taꞌn. Nin ja baj cunin waꞌn te yi ntaxk cẍuꞌl atz, nin ja wiꞌt wakꞌ yi imbanl tibaj.
34 Yi wiꞌt tbital Esaú yi yol yi taj, sajeꞌn tzun buꞌk jun chin oꞌkl te talmaꞌ. Ej nin chin wiꞌ nin bantz tan sichꞌ. Itzun taltz:
—Nchaꞌtz in taꞌ, takꞌuꞌ muꞌẍ banluꞌ swibaj.
35 —Quiꞌc rmeril yaj, na ja wiꞌt ulak yi awitzꞌun nin ja xcyeꞌ iꞌ tan insubleꞌn, na ja el tcyꞌal iꞌ yi imbanl yi awetz kloꞌ mban.
36 —¡Ah! qui bin tulej yi toqueꞌn biꞌ-x tetz Jacow,b chij Esaú. —Na yaꞌstzun cobix tir ocx tan insubleꞌn. Bajx teleꞌn tcyꞌal iꞌ yi inkꞌej tetz bajx cyꞌajol.c Ma jaluꞌ ja elt majol yi imbanl yi at akꞌbil swetz. ¿Poro qui pel scꞌuluꞌ yi nink ltakꞌuꞌ sicyer muꞌẍ tal yi banluꞌ swibaj taꞌ?
37 —Bitzaj, ja wiꞌt wakꞌ amaꞌl tetz Jacow tan toqueꞌn tetz ajcaw tzawibaj, nin ja wiꞌt wakꞌ amaꞌl tetz tan cawuneꞌn squibaj cyakil yi eꞌ tetz xonl. Nin ja wakꞌ amaꞌl tetz tan cawuneꞌn squibaj cyakil yi eꞌ axonl, nin ja wiꞌt wakꞌ banl iꞌ tan jaleꞌn wiꞌnin triw nin wiꞌnin loꞌbaj uva tuchꞌ. Ma jaluꞌ aẍ jun cꞌoloj incyꞌajl, ¿ẍeꞌn tzimban tzaweꞌj?
38 —Poro taꞌ, ¿quiꞌt peꞌ scꞌuluꞌ yi nink takꞌuꞌ muꞌẍ tal banluꞌ swibaj? ¿Qui pel tzꞌokꞌ cꞌuꞌluꞌ sweꞌj? ¡Nink ltakꞌuꞌ muꞌẍ tal banluꞌ swibaj!
Xeꞌteꞌn nin tzuntz tan oꞌkl. Chin wiꞌ nin ban.d
39 Jiloneꞌn tzaj tzun Isaac tetz Esaú itzun taltz:
“Choꞌn bin ẍnajank atz joylaj len
te yi eꞌchk balaj txꞌotxꞌ,
nin kale quiꞌcleꞌt mas aꞌbal.
40 Tajweꞌn bin yi tzacol awib achuc
tu yi aspar, nin cẍocopon
tetz xconsbeꞌtz yi awitzꞌun.
Poro yil cẍquiwix atz, cẍelepon
liwr tzakꞌ cawl iꞌ.”e
Yi teleꞌn ojkuj Jacow swutz Esaú
41 Jetzaꞌtz tzun jaleꞌn chiꞌch cꞌuꞌlal tetz Esaú te Jacow tantuꞌ yi tkꞌol Isaac yi banl tibaj iꞌ. Toqueꞌn tzun Esaú tan xtxumleꞌn yi txant tan quimeꞌn yi taj. Ej nin taltz: “Yil quim intaj copon imbiyol yi witzꞌun,” stzun Esaú bantz. 42 Yi tbital Rebeca yi mbiꞌtz xtxumuꞌn Esaú, beneꞌn tzun mantar iꞌ-tz tan ticyꞌleꞌn Jacow. Nintzun taltz tetz:
—Wal, je jun yoleꞌj, tzꞌocopon Esaú tan abiyleꞌn cuꞌn chij. 43 Chaꞌstzun te aẍ jun cꞌoloj wal, ok cuꞌn te awiꞌ yi swaleꞌ nin tzatz: Kaleꞌn ojkuj nin quiloꞌk teꞌj inxibin yi choꞌn najlij jalen Harán. 44 Baꞌn cẍaꞌtij cobox tiemp teꞌj jalen cuꞌn yil tzꞌel awil tu yi chiꞌch cꞌuꞌlal te cꞌuꞌl awutzicy. 45 Kalenaꞌs tzun tzꞌopon stziblal waꞌn tawiꞌ tan awuleꞌn junt tirt tzoneꞌj. Na qui na waj jun ntziꞌ-k kꞌej chiquimeꞌt cob wal.
46 Chaꞌstzun te beneꞌn Rebeca tan yol tetz Isaac. Itzun taltz tetz:
—Ja baj incꞌuꞌl tan chipaj yi cob txkel Esaú yi eꞌ awer nak. Nin yi ko choꞌn sjoy Jacow yi tetz txkel ẍchixoꞌl eꞌ wunak tzoneꞌj Canaán, baꞌn tcuꞌn yi nink chinquim.