Yi ticyꞌeꞌn Isaac tan toponeꞌn Gerar
26
1 Itzun bantz te yi tiempaꞌtz nintzun cuꞌ jun chin wutzileꞌn weꞌj tul cyakil yi luwar kale najlcheꞌt Isaac. Nimteꞌn cunin ban yi jun weꞌjaꞌtz swutz yi jun yi cuꞌ te yi tiemp yi at tzaj kꞌajtzun Abraham. Chaꞌstzun tej quicyꞌeꞌnt Isaac tul yi luwaraꞌtz tan cyoponeꞌn le tnum Gerar, kale najleꞌt Abimelec, yi chireyil yi eꞌ filistey. 2 Choꞌn tzun ẍchajol tib Kataj swutz Isaac le amaꞌlaꞌtz. Itzun taltz tetz: “Quil cẍben jalen Egipto, ma na baꞌn cẍcyaj tul yi amaꞌl yi swaleꞌ tzatz. 3 Poro baꞌn cẍcyaj cobox kꞌej tzoneꞌj le yi luwareꞌj, na snaꞌtok tzaweꞌj, nin swakꞌeꞌ imbanl tzawibaj, na choꞌn swakꞌeꞌ tzatz scyuchꞌ yi eꞌ axonl cyakil yi luwareꞌj. Yaꞌtz tzimbneꞌ tan weleꞌn cuꞌn te yi inyol yi insuknak tetz kꞌajtzun ataj Abraham. 4 Ej nin chijepon impucꞌsal yi tajlal yi axonl. Niꞌcuꞌn sbneꞌ cyajlal chi taneꞌn cyajlal yi eꞌ txꞌuml. Nin swakꞌeꞌ cyakil yi luwareꞌj scyetz. Nchaꞌtz, tantuꞌ eꞌ ljaleꞌt chibanl cyakil jilwutz wunak beneꞌn tziꞌn wi munt.a 5 Yaꞌstzun sbneꞌtz tantuꞌ cꞌulutxumil kꞌajtzun ataj Abraham na ja ban taneꞌn cyakil yi walnak tetz. Nchaꞌtz ja ban taneꞌn cyakil yi weri incaꞌwl, tu yi inchusuꞌn yi wakꞌnak tetz,” stzun Ryos bantz tetz Isaac.6 Choꞌn nintzun cyajeꞌn cyen Isaac tan najeweꞌn le tnum Gerar. 7 Yi chinajeweꞌn le jun luwaraꞌtz, nintzun eꞌ oc yi eꞌ wunak tan jakleꞌn tetz Isaac yi ko txkel iꞌ yi Rebeca. Nintzun tal yi tanub tuꞌ iꞌ,b na nin xobtz tan talcheꞌn yi mero bintzij, na nin oc tan xtxumleꞌn yi copon biyij tan paj yi yubel Rebeca.
8 Itzun bantz yi teleꞌn tiemp yi chinajeweꞌn tul yi jun luwaraꞌtz, choꞌn tzun na xmayinin Abimelec le wentanuꞌil tetz caꞌl. Nin ben xmayiltz yi na chikꞌal quib Isaac tu Rebeca yi txkel. 9 Beneꞌn tzun mantar Abimelec tan ticyꞌleꞌn Isaac. Itzun taltz tetz:
—I bin jaluꞌ Isaac, yi xnaꞌn yi xomij tzaweꞌj, chinch wetz iꞌtz mero awuxkel. Ma jaluꞌ ¿mbi tzun xac na awaltz sketz yi awanub tuꞌ?
—Qui nin nwal yi mero bintzij na nin intxum yi qui cunin batz chincopon biyij tampaj yubil yi wuxkel, stzun Isaac bantz tetz rey.
10 Talol tzun Abimelec:
—¿Mbi xac maban yi jun ajtzaꞌklaꞌtz skeꞌj? Yi quiꞌk nlajluchax skawutz, al peꞌk scyetz jun ẍchixoꞌl yi eꞌ yaj yi ateꞌ tzoneꞌj le intanum njeꞌ peꞌk tuchꞌlel yi awuxkel. Nin tan yi xtxolbileꞌj, apaj kloꞌ yi nkajuch kil, stzun Abimelec bantz.
11 Cawuneꞌn nintzun Abimelec tan chimolcheꞌn cyakil yi eꞌ wunak. Itzun taltz scyetz:
—Alchok scyetz yil sban cyen jun eꞌchk takleꞌn cachiꞌ te yajeꞌj nin te txkel, junawes squimok teraꞌtz.
12 Itzun te yi tiempaꞌtz, nin tawaj Isaac wiꞌnin ujul. Ej nin chin balaj nin ban yi cosech iꞌ-tz, na nin takꞌ Kataj Ryos banl tibaj. 13 Chin ric nin ban iꞌ, nin jal wiꞌnin meꞌbiꞌltz. 14 Eꞌ jal wiꞌnin cneruꞌ tu wiꞌnin wacẍ. Nchaꞌtz eꞌ jal wiꞌnin mos iꞌ. Tan tuꞌ cyakil yi meꞌbiꞌl iꞌ yi njal, wiꞌnin tzun ẍchiꞌcheꞌn chicꞌuꞌl yi eꞌ filistey teꞌj. 15 Chin juntlen nin eꞌ, na te yi itzꞌ tzaj yi taj Isaac nin ocnak yi eꞌ mos iꞌ tan kopleꞌn cobox julil aꞌ. Poro yi quimeꞌn Abraham nin eꞌ oc yi eꞌ filisteyaꞌtz tan nojseꞌnt cuꞌn tan txꞌotxꞌ.
16 Itzun bantz yi tilol Abimelec yi nsken riquin Isaac, tlol tzun iꞌ-tz tetz:
—Cawleꞌn skaxoꞌl tzoneꞌj, na mas tcunin ja cẍriquin skawutz ketz.
17 Eleꞌn nintzun ban Isaac le luwaraꞌtz. Choꞌn tzun toponeꞌn tan najeweꞌn tul jun jocoꞌj cwent nin yi tnum Gerar. 18 Yi chinajeweꞌn tul yi jun luwaraꞌtz, nintzun oct Isaac tan kopleꞌnt yi eꞌchk julil aꞌ yi cuꞌnak cyen kopol yi kꞌajtzun taj. Na nsken wiꞌt baj chinojsal yi eꞌ filistey. Iteꞌn nin chibiꞌ yi eꞌchk julil aꞌaꞌtz octz taꞌn quib yi chibiꞌ yi ocnakt cyen takꞌun yi kꞌajtzun taj. 19 Itzun bantz te yi na chitzan yi eꞌ mos Isaac tan kopleꞌn jun julil aꞌ tul yi jun jocoꞌjaꞌtz, jalt cuntunin quilol yi jeꞌn muleꞌn mulkꞌuj yi aꞌ ẍchiwutz, nin xon. 20 Ma yi eꞌ pstor cwent Gerar, scyuchꞌ eꞌ pstor Isaac choꞌn tzun toqueꞌn majoꞌn ib te yi jun aꞌaꞌtz. Na nin cyal eꞌ pstor cwent Gerar yi cyetz. Chaꞌstzun te yi toqueꞌn biꞌ yi jun aꞌaꞌtz tan Isaac tetz “Oyintziꞌ”, tantuꞌ yi toqueꞌn majoꞌn ib teꞌj. 21 Pontzaj tlen cyoqueꞌn yi eꞌ mos Isaac tan kopleꞌn junt julil aꞌ. Poro iteꞌn nin eꞌ banaꞌs tan oyintziꞌ teꞌj. Chaꞌstzun te yi toqueꞌn biꞌ yi junt julil aꞌaꞌtz tan Isaac tetz “Chiꞌch Cꞌuꞌlal”.
22 Eleꞌn tzaj nintzun eꞌ ban Isaac tul yi jun luwaraꞌtz nin eꞌ eltz joylaj len. Choꞌn tzun cyoqueꞌntz tan kopleꞌn junt julil aꞌ. Yi jaleꞌn cyaꞌn cyaꞌl nin jun octz tan oyintziꞌ teꞌj. Chaꞌstzun te toqueꞌn biꞌ yi junt aꞌaꞌtz taꞌn tetz “Ja Keꞌl Liwr” na nin tal Isaactz: “Ja takꞌ Kataj Ryos puntil sketz tan kariquineꞌn.”
23 Yi teleꞌn tiemp icyꞌeꞌn nintzun eꞌ ban junt tir Isaac swutz yi luwaraꞌtz. Choꞌn tzun cyoponeꞌntz jalen Beerseba. 24 Ninin tzun te yi akꞌbalaꞌtz, ẍchajolt tib Kataj swutz iꞌ. Itzun taltz tetz:
“I inaꞌtz yi Ryosil kꞌajtzun ataj Abraham.
Quil cxob, na atin nintz tzaweꞌj.
Tantuꞌ yi mbi banak inchakum, kꞌajtzun ataj,
swakꞌeꞌ imbanl tzawibaj,
nin chijepon impucꞌsal yi tajlal axonl.”
25 Taꞌtz teꞌn nintzun oqueꞌt Isaac tan nucꞌleꞌn jun patbil xtxꞌixwatz, nin octz tan naꞌwseꞌn biꞌ Kataj. Choꞌn tzun cyaꞌteꞌntz tul yi jun luwaraꞌtz. Ej nintzun eꞌ oc yi mos iꞌ tan kopleꞌn junt julil aꞌ.
Yi bnixeꞌn chitrat Abimelec tu Isaac
26 Yi nsken wiꞌt el tiemp yi cyoponleꞌn Isaac Beerseba, icyꞌpontzaj nintzun Abimelecc jalen Gerar tan yol tetz Isaac. Xomcheꞌ cob tamiw teꞌj yi na chibiꞌaj Ahuzat tu Ficol. Yi Ficolaꞌtz yaꞌstzun ajcaw squibaj cyakil yi eꞌ sanlar Abimelec. 27 Yi cyoponeꞌn nintzun tal Isaactz scyetz:
—¿Mbi na chijoyuꞌ tzoneꞌj? Na qui bin na chipekꞌuꞌ sweꞌj, na ja bin neꞌl tzaj chilajuluꞌ swutz yi chitxꞌotxꞌuꞌ. ¿Mbi tzun na cyajuꞌ swetz jaluꞌ?
28 —Max cꞌuꞌluꞌ Taꞌ, poro ja el katxum tetz nin na kil, yi mero bintzij xomij Ryos teꞌjuꞌ. Chaꞌstzun te nkatxum tan kuleꞌn teꞌjuꞌ tan bixbajeꞌn jun katrat tuchꞌuꞌ. Je yi na kaj yil bixeꞌ skaxoꞌleꞌj: 29 Quiꞌk tzꞌocuꞌ tan banleꞌn jun eꞌchk takleꞌn cachiꞌ skeꞌj, na yi oꞌ ketz cyaꞌl cunin nkoqueꞌt tan banleꞌn jun eꞌchk takleꞌn cachiꞌ teꞌjuꞌ, na yi teleꞌn tzajuꞌ skaxoꞌl, pe cunin skꞌil yi teleꞌn tzajuꞌ kaꞌn. Poro yi jaluꞌ, na kil yi na tzan Kataj Ryos tan takꞌleꞌn banl tibuꞌ.
30 Yi wiꞌt tbital Isaac yi chiyol, nintzun bnix jun chin wutzileꞌn waꞌaꞌntz taꞌn. Nin eꞌ baj wan len cunintz. 31 Ma le junt eklok chin jalchan cunin tzun eꞌ baj cꞌaseꞌntz, nin baj chisukil chiyoltz tan qui chibanol jun eꞌchk takleꞌn cachiꞌ squibil quib. Chin cyamiw nin quib eꞌ bantz yi chipaxul quib. Ajeꞌn nintzun eꞌ ban Abimelec.
32 Itzun te yi iteꞌn nin kꞌejaꞌtz, cyuleꞌn tzaj yi eꞌ mos Isaac tan talcheꞌn stziblal tetz, yi nsken wiꞌt jal aꞌ cyaꞌn tul yi jul yi na chitzan tan kopleꞌn. 33 Oqueꞌn nintzun ban biꞌ yi jun aꞌaꞌtz tan Isaac tetz Seba. Chaꞌstzun te Beersebad biꞌ jun luwaraꞌtz jaluꞌ.