Yi cyokꞌbel quib Abraham tu Cetura
25
1 Itzun bantz yi xoneꞌn tiemp nintzun oc junt txkel Abraham, yi na biꞌaj Cetura. 2 Jaleꞌn nintzun ban nitxajil Abraham te junt txkelaꞌtz. Ej nin yi chibiꞌ iꞌtz: Zimram, Jocsán, Medán, Madián, Isbac nin Súa. 3 Ma Jocsán yaꞌstzun chitaj Seba tu Dedán. Ej nin yi eꞌ xonl Dedán ban iꞌtz yi eꞌ Asur, yi eꞌ letuseo scyuchꞌ yi eꞌ leumeo.4 Ma yi eꞌ tu Madián, yaꞌstzun Efa, Efer, Hanoc, Abida nin Elda. Nin yi jun cꞌoloj wunakaꞌtz, eꞌ cuꞌn xonl naꞌ Cetura, yi caꞌp txkel Abraham. 5-6 Poro ntin takꞌ Abraham muꞌẍ tal te yi tetz meꞌbiꞌl scyetz yi eꞌ nitxajilaꞌtz yi nchijal te yi eꞌ mas txkel iꞌ. Ej nin nchaꞌtz, te yi ntaxk tijin cꞌuꞌl, nin eꞌ el jatxoltz yi eꞌ mas cyꞌajl iꞌ, joylaj len te Isaac. Choꞌn tzun chibeneꞌn ẍchakol jalen lilen tziꞌn. Ma cyakil meꞌbiꞌl Abraham choꞌn tzun cyajeꞌn tkꞌol tetz Isaac, yi jun tal cyꞌajl yi jal te Sara.
Yi quimeꞌn Abraham
7 Aꞌtij tzun Abraham jun cient tu ox cꞌal tu oꞌlaj yob. 8 Quimeꞌn nintzun ban tantuꞌ yi nsken tijin cunin cꞌuꞌl. Choꞌn tzun toponeꞌn yi talmaꞌ teꞌj kꞌajtzun taj tu kꞌajtzun xtxuꞌ. 9 Ma yi wankil choꞌn tzun mukxeꞌn cyaꞌn Isaac tu Ismael le jun picy yi na biꞌaj Macpela. Yi jun picyaꞌtz choꞌn at xlajlen Mamre, tul yi luwar Efrón yi cyꞌajl Zohar, yi eꞌ xonl Het. 10 Yaꞌstzun yi luwar yi lokꞌnak Abraham scyetz yi eꞌ xonl Het.a Choꞌn tzun mukxeꞌn yi wankil xlaj kꞌajtzun Sara yi txkel. 11 Itzun te yi nsken wiꞌt quim, tkꞌol tzun Ryos banl tibaj Isaac. Choꞌn tzun cyajeꞌn iꞌ tan najeweꞌn le yi amaꞌl yi na biꞌaj “Aꞌ tetz yi jun yi itzꞌ, nin na koꞌ til.”
Yi eꞌ xonl Ismael
12 Je chibiꞌ yi eꞌ nitxajil Ismael yi cyꞌajl Abraham, yi jal te Agar, yi aj Egipto, yi mos Sara. 13 Je bin chibiꞌeꞌj: yi bajx na biꞌaj Nebaiot, xomcheꞌtzaj Cedar, Adbeel, Mibsam, 14 Misma, Duma, Massa, 15 Hadar, Tema, Jetur, Nafis tu Cedema. 16 Yaꞌstzun chibiꞌ yi coblaj nitxajil Ismael yi eꞌ jal. Xomcyentuꞌ chibiꞌ yi jujun teꞌak yi chiluwar. Nin ẍchijunaleꞌn eꞌ cawuntz squibaj yi chiwunakil.
17 At tzun Ismael tul jun cient tu junak juklaj yob yi quimeꞌn. Choꞌn tzun toponeꞌn talmaꞌ-tz scyeꞌj kꞌajtzun taj tu kꞌajtzun xtxuꞌ. 18 Cyakil yi eꞌ xonl iꞌ choꞌn chinajeweꞌn tul yi luwar xoꞌl Havila tu Shur, swutzeꞌl tzaj Egipto, xlaj yi beꞌ yi na opon le amaꞌl Asiria. Nin nchaꞌtz wiꞌnin chilab quib bantz scyuchꞌ yi eꞌ mas chixonl.
Yi quitzꞌeꞌn Jacow tu Esaú
19 Je yi xtxolbileꞌj tetz Isaac yi cyꞌajl Abraham. 20 At tzaj tzun Isaac tul caꞌwunak yob yi cyokꞌbel quib tu Rebeca, yi meꞌl Betuel yi arameo, yi najlij Padan-aram. Ej nin yi Rebeca-aꞌtz, yaꞌstzun tanub Labán. 21 Quiꞌc nintzun tal Rebeca na jaltz, chaꞌstzun te toqueꞌn Isaac tan cuꞌswutzil tetz Kataj tan jaleꞌn talbil Rebeca. Yi tbital Kataj yi oración Isaac ninin tzun tekaj Rebeca pwokil cob niꞌ. 22 Itzun te yi ateꞌ yi cob niꞌaꞌtz twankil Rebeca, tzaꞌj nin tzun oyintziꞌ ateꞌ cuꞌntz. Toqueꞌn tzun Rebeca tan xtxumleꞌn. I tzun taltz tcꞌuꞌl cuntuꞌ: “Yi ko yaꞌtz nin tunin tzimbantzeꞌj ¿mbi xac mas ankꞌiꞌn swetz?” Beneꞌn nintzun bantz tan jakleꞌn tetz Kataj Ryos yi mbi tzuntz yi na chibiy quib yi cob niꞌaꞌtz twankil iꞌ. 23 Jiloneꞌn tzaj tzun Kataj tetz. Itzun taltz:
“Quil cẍbisun, na yi cob niꞌaꞌtz
yi ekaꞌn pwokil awaꞌn, iꞌtz
cob chin wutzileꞌn nación yi na
choyintzin te yi ntaxk chuꞌl itzꞌok.
At jun yi mas cham sbneꞌ swutz yi junt,
nin yi bajx tzꞌocopon tzakꞌ yi caꞌwl
yi caꞌp.”b
24 Ma yi toponeꞌn yi kꞌejlal tan tuleꞌn yos tu Rebeca, eꞌ cuꞌn yoẍ ban yi tal iꞌ. 25 Chin ẍeẍ nin, nin chin pay nin teꞌj yi bajx yi titzꞌeꞌn, nin oc biꞌ-tz cyaꞌn tetz Esaú.c 26 Uleꞌn nin ban itzꞌok yi caꞌp. Tzꞌamij yi ẍchuꞌs tkan yi stzicy taꞌn, yi tuleꞌn itzꞌok. Chaꞌstzun te toqueꞌn yi biꞌ-tz cyaꞌn, tetz Jacow.d At tzaj tzun Isaac tul oxcꞌal yob yi tuleꞌn yos tu Rebeca scyuchꞌ yi cob niꞌ-tz.
Yi ticyꞌeꞌn cꞌayil Esaú yi kꞌej tetz Jacow
27 Chꞌuyeꞌn nintzun eꞌ ban yi cob xicyaꞌtz. Yi bajx yi na biꞌaj Esaú nin oc tetz jun balaj akꞌunwil wi cojbil. Nin nchaꞌtz iꞌ jun balaj aj txuquinl bantz. Ma yi Jacow, apart nin tetz xtxumuꞌn bantz. Chin tajbil nin iꞌ yi na cyaj cyen xe chipach yi tal mantial tuꞌ. Nin chin cꞌulutxum nin iꞌ, qui tu na tzantuꞌ. 28 Mast cunin tzun na pekꞌ Isaac te Esaú, na chin tajbil nin iꞌ bajseꞌn yi eꞌchk tꞌimbil yi na bnix tan Esaú te eꞌchk smaron txuc yi na chiloꞌon taꞌn xoꞌl tzeꞌ. Ma tzun tetz Rebeca mast cunin na pekꞌ tetz te Jacow.
29 At tzun jun tir yi na tzan cunin Jacow tan skꞌajseꞌn jun chin balaj tꞌimbil yi tuleꞌn tzaj Esaú tan akꞌun wi cojbil. Nsken tzun nkꞌeꞌxij iꞌ. 30 Yi tuleꞌn tzaj nintzun ben jakol tetz Jacow. Itzun taltz:
—Banaj pawor swetz yaj, tzawakꞌ muꞌẍ tal wetz te yi ara tꞌimbil cyakeꞌj, yi ja wiꞌt bnix awaꞌn, na na chin tzajk nin tan jun chin weꞌj.
(Chaꞌstzun te toqueꞌn junt biꞌ Esaú tetz Edom.)e
31 —Cuj, stzun Jacow —poro ko bajx tzawakꞌ arakꞌej swetz, tan woqueꞌn tetz axel, chi ink bajxk cyꞌajol sban.f
32 —Quiꞌc bin na ban, yi ko yaꞌtz awajbil. Na yi wetz inkꞌej quiꞌc xac swetz, ntin akꞌtzaj inwaꞌ, na na chin quim tan weꞌj, stzun Esaú.
33 —Ma jaluꞌ, alaj bin yi mero bintzij swetz: ¿Jun cunin peꞌ ayol? ¿Nkꞌeꞌtz peꞌ tzantzaj tlen tzatxꞌixpuj awajtzaꞌkl? stzun Jacow bantz.
—Jun cunin yol na walnin tzatz, nin sak swutz Ryos, stzun Esaú bantz.
Tan yi xtxolbileꞌj icyꞌ cꞌayil Esaú yi tetz kꞌej tetz bajx cyꞌajol.g 34 Yi talol Esaú yi xtxolbilaꞌseꞌj, beneꞌn tzun tkꞌol Jacow pam tu jun chin lak tꞌimbil te yi nsken bnix taꞌn. Yi wiꞌt bnixeꞌn Esaú tan waꞌaꞌn eleꞌn tzaj nin bantz. Sicyer nin oc tan xtxumleꞌn yi nsken wiꞌt icyꞌ cꞌayil yi tetz kꞌej tetz bajx cyꞌajol tetz titzꞌun.