Yi ẍeꞌn cuꞌn ban mukxeꞌn Sara
23
1 Itzun bantz, aꞌtij Sara jun cient tu junak juk yob wuxtxꞌotxꞌ. 2 Choꞌn quimeꞌn iꞌ-tz le amaꞌl Quiriat-arba, nka Hebrón cwent amaꞌl Canaán. Ma yi Abraham wiꞌnin tzun bisuneꞌn teꞌj Sara, nin wiꞌnin tokꞌeꞌn iꞌ yi quimeꞌn. 3 Teleꞌn tzaj tzuntz le amaꞌlaꞌtz kale atit wankil yi kꞌajtzun txkel. Beneꞌn tzun iꞌ-tz tan talcheꞌn scyetz yi eꞌ xonl Het yi najlcheꞌ le jun luwaraꞌtz. Itzun taltz scyetz:4 —Ibin jaluꞌ tan peꞌ in tuꞌ jun awer nak ẍchixoꞌluꞌa ntin na waj tzincꞌuch jun pawor scyeruꞌ. Yi nink chicꞌayuꞌ jalaj intxꞌotxꞌ kale tzinmukwit yi wankil kꞌajtzun wuxkelb na ja quim iꞌ, chij Abraham scyetz.
5 Sajeꞌn tzun cyalol yi eꞌ xonl Het tetz Abraham. Itzun cyaltz:
6 —I bin jaluꞌ taꞌ Abraham bneꞌuꞌ pawor. Tbitzajuꞌ kayol, cheꞌch tzun bantz. —Iluꞌ jun wiꞌtz ajcaw skaxoꞌl, nin txaꞌijtuꞌ tan Ryos. Baꞌn smukuꞌ yi txkeluꞌ le mukbil almaꞌ yi mas balaj tcuꞌn ẍchixoꞌl yi ketz, nin cyaꞌl nin jun skaxoꞌl yi nink scabej cꞌuꞌl tan tkꞌol jun amaꞌlaꞌtz teruꞌ.
7 Jeꞌn tzun txiclok Abraham, nin kꞌajlan nin iꞌ scyetz tan takꞌleꞌn chikꞌej eꞌ xonl Hetaꞌtz. Itzun ben tlol scyetz:
8 —Yi ko mero bintzij na cyajuꞌ yi choꞌn tzinmuk cyen wankil yi prow wuxkel tzoneꞌj, chibneꞌ binuꞌ pawor swetz. Tan imbiꞌ chijakquenuꞌ tetz Efrón yi cyꞌajl Zohar, 9 yi qui pel scꞌay iꞌ jun picy swetz yi na biꞌaj Macpela yi choꞌn at tul yi xtxꞌotxꞌ iꞌ. Baꞌn tzinchoj jamel nicyꞌnaꞌ ljak iꞌ teꞌj. Bantz wetzal jun picyaꞌtz tetz mukbil kꞌajtzun wuxkel scyuchꞌ eꞌ inxonl.
10 At cuꞌn tzun Efrón ẍchixoꞌl eꞌ xonl Hetaꞌtz. Jiloneꞌn tzaj tzuntz tetz Abraham ẍchiwutz cuꞌn eꞌ wunak yi ateꞌ-tz bantz quibital yi yol iꞌ nin nchaꞌtz ẍchiwutz eꞌ yi wiꞌnin cyoqueꞌn nin wiꞌnin cyeleꞌn tzaj stzi puertil yi tnum. Itzun taltz:
11 —¡Quiꞌ loꞌ taꞌ! Bneꞌuꞌ pawor, tbitzajuꞌ in yoleꞌj: Swoyeꞌ yi jalaj txꞌotxꞌaꞌtz teruꞌ tuml yi picy yi at nintz le luwaraꞌtz. Ẍchiwutz cuꞌn eꞌ intanumeꞌj yi swoyeꞌ teruꞌ nin eꞌ cuꞌn stiw teꞌj. Baꞌn bin smukuꞌ yi kꞌajtzun prow txkeluꞌ le luwaraꞌtz, stzun Efrón tetz Abraham.
12 Poro nin aj junt tir Abraham tan kꞌajlaꞌn tan takꞌleꞌn chikꞌej eꞌ wunakaꞌtz yi ateꞌ le luwaraꞌtz. 13 Jiloneꞌn tzun Abraham tetz Efrón ẍchiwutz cuꞌn eꞌ wunak yi ateꞌ-tz. Itzun taltz:
—Bneꞌuꞌ pawor swetz tbitzajuꞌ inyol, na cuꞌ inwutz teruꞌ yi na waj yi stzꞌamuꞌ jamel yi txꞌotxꞌaꞌtz tan qui imbisuneꞌn, nin kalenaꞌs tzun tzinmukcuꞌn wankil kꞌajtzun wuxkel, stzun Abraham bantz tetz. 14 Beneꞌn tzun tlol Efrón tetz Abraham. Itzun taltz:
15 —Iluꞌ jun cꞌoloj taꞌ Abraham, yi jamel yi txꞌotxꞌeꞌj iꞌtz cyaj cient piẍ sakal. Baꞌn tcuꞌn quil koꞌc tan xtxumleꞌn jamel yi txꞌotxꞌ, ma na baꞌn tcuꞌn benkuꞌ tan mukleꞌn wankil kꞌajtzun txkeluꞌ.
16 Ej nintzun cujij Abraham tan ẍchojleꞌn yi jamel yi nsken tal Efrón ẍchiwutz eꞌ mas xonl Het. Nin ẍchoj iꞌ cyaj cient piẍ sakal yi tzꞌaknak cuꞌn, chi yi cꞌuch Efrón tetz. 17 Tan yi xtxolbilaꞌseꞌj, yi xtxꞌotxꞌ Efrón yi at xlajlen Mamre, kale atit yi jun picy Macpelaꞌtz, scyuchꞌ cyakil tzeꞌ yi at swutz yi txꞌotxꞌaꞌtz, 18 tetz cunin tzun Abraham bantz tircuꞌn. Ej nin eꞌ cuꞌn stiw ban cyakil yi eꞌ wunak, scyuchꞌ yi eꞌ yi wiꞌnin cyoponeꞌn stziꞌ puertil yi tnum.
19 Itzun bantz yi wiꞌt bnixeꞌn eꞌch xtxolbilaꞌseꞌj, kalenaꞌs tzun cweꞌn mukul Abraham yi wankil kꞌajtzun Sara tcꞌuꞌl jun picyaꞌtz yi na biꞌaj Macpela, yi choꞌn at xlajlen Mamre, yi nchaꞌtz na biꞌaj Hebrón, cwent Canaán. 20 Chaꞌstzun te cyakil yi txꞌotxꞌaꞌtz kale atit yi jun picyaꞌtz tetz cuꞌn Abraham ban. Eꞌ cuꞌn xonl Het cꞌayin tetz nin xcontz taꞌn tetz mukbil almaꞌ.