Yi toyil kloꞌ Abraham yi jun tal ẍutuj cyꞌajl tetz Ryos
22
1 Itzun bantz yi nsken wiꞌt bnix eꞌchk takleꞌneꞌj nintzun oc Ryos tan pileꞌn Abraham tan tilol yi ko bintzi nin kꞌuklij cꞌuꞌl iꞌ. Jiloneꞌn tzaj tzun Ryos tetz Abraham. Itzun taltz:—¡Abraham! ¡Abraham!
—¿Mbiꞌ Taꞌ?
2 —Cyꞌaj nin yi jun tal ẍutuj acyꞌajl yi wiꞌnin na cẍpekꞌ teꞌj. Quiloꞌk jalen le luwar cwent Moriah. Ej nin yil cẍopon wi jun scyeri wutz yi tzinchajeꞌ tzatz, baꞌn tzapat yi acyꞌajl tetz jun atxꞌixwatz tzinwutz.
3 Chin jalchan cunin tzun cꞌaseꞌn Abrahamtz nin oc tan wekleꞌn jun buruꞌ tan ticyꞌleꞌn nin cyektz. Nchaꞌtz eꞌ ben stzocꞌol cobox siꞌ tan pateꞌn yi xtxꞌixwatz. Nchaꞌtz ben tcyꞌal cob mos tu Isaac yi cyꞌajl. Beneꞌn nintzun eꞌ bantz tan cyoponeꞌn le amaꞌl yi tal Ryos tetz. 4 Itzun le toxiꞌn kꞌej chibeꞌ, nintzun ben xmayil Abraham yi amaꞌl yi tal Ryos tetz. 5 Beneꞌn tzun tlol Abraham scyetz yi eꞌ mos yi xomcheꞌ teꞌj:
—Ncyeꞌn tu wok tzoneꞌj tu yi kaburuꞌ na yi oꞌ ketz tu incyꞌajl nkaben ketz tziꞌneꞌj tan cꞌuꞌlajeꞌn Ryos. Ej nin kapakxok chan.
6 Sajeꞌn tzun tcyꞌal Abraham yi siꞌ nin je tkꞌol wutz coc Isaac. Ma iꞌ tetz nin ben tcyꞌal yi cchiluꞌ tu yi kꞌakꞌ. Nin eꞌ bentz. 7 Nsken wiꞌt chixon jun tkuj yi beneꞌn jakol Isaac tetz taj:
—Taꞌ.
—¿Mbi na awaj aẍ jun cꞌoloj incyꞌajl? stzun Abraham tetz Isaac.
—¿Lok tzun jun tal cneruꞌ tetz katxꞌixwatz? Cyꞌaꞌn siꞌ kaꞌn nin cyꞌaꞌn kꞌakꞌ kaꞌn tu yi cchiluꞌ. Poro ¿lak tzun jun tal cneruꞌ tetz katxꞌixwatz?
8 —Ryos tzꞌakꞌon sketz, stzun Abraham tetz Isaac te yi na chixon tan cyoponeꞌn le amaꞌlaꞌtz.
9 Ma yi cyoponeꞌn le amaꞌl yi tal Ryos tetz, nintzun oc Abraham tan wekleꞌn jun patbil xtxꞌixwatz. Ma yi nucꞌxeꞌn taꞌn nintzun baj je tkꞌol yi siꞌ tibaj. Kalenaꞌtz tzun beneꞌntz tan cꞌalcheꞌn cuꞌn Isaac nin je tkꞌoltz tibaj yi patbil xtxꞌixwatz.a 10 Beneꞌn nintzun bantz tan ticyꞌleꞌn yi cchiluꞌ tan biyleꞌn cuꞌn yi cyꞌajl. I cunin tzun kloꞌ na bentz tu yi cchiluꞌ tan biyleꞌn cuꞌn, 11 yi jiloneꞌn tzaj yi ángel tetz Ryos jalen tziꞌn tcyaꞌj. Itzun taltz:
—¡Abraham! ¡Abraham!
—Je ineꞌj Taꞌ stzun Abraham bantz.
12 —Qui bin tzabiy cuꞌn yi acyꞌajl nin quil tzaban jun eꞌch takleꞌn teꞌj, na na el intxum tetz yi bintzinin na awek ẍchiꞌ Ryos, na qui nin macabej acꞌuꞌl teꞌj yi mawakꞌ kloꞌ yi jun tal ẍutuj acyꞌajl swetz, stzun yi ángel tetz Ryos bantz.
13 Xmayineꞌn nintzun Abraham wutz coc nin ben tilol jun tal cneruꞌ yi ẍoplij cyen yi tucꞌ xoꞌl cobox kꞌab tzeꞌ. Beneꞌn tzun Abraham tan telseneꞌl tzaj. Ej nin te yi teleꞌn tzaj taꞌn, nin takꞌtz tetz xtxꞌixwatz tetz xel yi cyꞌajl.b 14 Oqueꞌn cyen nintzun ban biꞌ yi jun wutzaꞌtz tan Abraham tetz “Ryos tzꞌakꞌon”. Chaꞌstzun te jaluꞌ na aꞌlchij tetz jun luwaraꞌtz: “Yi wiꞌwtz tetz Kataj kale tzꞌakꞌleꞌt katxꞌixwatz.”
15 Itzun yi wiꞌt tkꞌol Abraham yi xtxꞌixwatz jiloneꞌn tzaj tzun junt tir yi ángel tetz Kataj tetz. 16 Itzun taltz:
—Abraham, je yol Ryoseꞌj: “Tantuꞌ yi qui nin macabej acꞌuꞌl tan awakꞌol yi jun tal ẍutuj acyꞌajl swetz, ja tzun aban taneꞌn incaꞌwl. Ma jaluꞌ jun cuꞌn yol na walnin tzatz:c 17 Swakꞌeꞌ wiꞌnin imbanl tzawibaj na chijepon impucꞌsal yi tajlal yi axonl. Niꞌcuꞌn sbneꞌ cyajlal chi taneꞌn tajlal yi eꞌ txꞌuml yi ateꞌ tcyaꞌj nka chi taneꞌn tajlal yi samlicyꞌ yi at tziꞌak mar. Ej nin nkꞌeꞌtz ntinaꞌtz ma na nchaꞌtz chixcyek scyeꞌj cyakil chicontr. 18 Ej nin tan tuꞌ yi eꞌ axonl, sjalok chibanl cyakil eꞌchk jilwutz wunak beneꞌn tziꞌn wi munt. Yaꞌstzun sbajok tan tuꞌ yi maban yi wetz wajbil,”d stzun ángel tetz Ryos bantz.
19 Yi nsken wiꞌt bnix yi xtxolbilaꞌseꞌj nintzun pakxij Abraham le amaꞌl Beerseba. Choꞌn tzun najeweꞌn Abraham tetz coboxt tiemp le jun amaꞌlaꞌtz.
Yi eꞌ cyꞌajl Nacor
20 Itzun bantz yi teleꞌn tiemp yi bajeꞌn cyakil yi xtxolbilaꞌseꞌj, nintzun opon stziblal twiꞌ Abraham yi nsken jal chinitxajil Nacor yi titzꞌun. 21 Yi bajx yi mitzꞌij iꞌtz Uz, yi caꞌp iꞌtz Buz. Ej nin yi toxiꞌn iꞌtz Kemuel yi taj Aram. 22 Pontzaj tlen quitzꞌeꞌn Quesed, Hazo, Pildas, Jidlaf tu Betuel. 23 Yi jun Betuelaꞌtz yaꞌstzun yi taj Rebeca. Cyakil yi biꞌajaꞌtz yaꞌstzun yi waxak cyꞌajl Nacor yi titzꞌun Abraham yi eꞌ itzꞌij teꞌj Milca. 24 Nchaꞌtz eꞌ jal chinitxaꞌ Nacor tu Reúma, yi caꞌp txkel iꞌ. Yi chibiꞌ yi chinitxaꞌ eꞌ jal iꞌtz: Teba, Gaham, Tahas tu Maaca.