Tsiq eeq 147
Bhaq aoq eeq nail Heeqphaq Miqyail bhai tsiq eeq yaoq.
1 Haq leiq lul yaq.
Ngadao nail Miqyail bhai
tsiq eeq nail daoqsel gul nail neq
kha dai meeq nail ngel-aiq.
Aivq bhai tsiq eeq nail neq, nee sal ya khi
nl heeq phaq-ail tsaq nail ngaol.
2 Heeqphaq Miqyail neq
Yeiqlulsaqlaiq meenq bhai cov meeq khi
eqyal bha tsaoq pav tsaoq sav gil-a nail
Ilsaqleiqlav nail tsaol-aq bhai
gaoq bhi kovq jil lal-a nail ngaol.
3 Neema tsaoq pav ail-a nail juq bhai
nee sal bhi ya khi
aqyu juq nail mal yal bhai
lav meeq bhiq-a nail ngaol.
4 Aivq neq
aqgil kha dai heeq
ya bhi bhee nail dai, heeq nia khi
yaoq heeq yaoq-ao nee bhai
aqmil bivq-ai thaq nail ngaol.
5 Ngadao nail Heeqphaq Miqyail neq
eeq dee heel dee dee khi bhaqaoq eeq nail ngaol.
Nee noeq nee kha iqsanl
teevq thal-iq maq gil lai nia-ail.
6 Aivq neq
neema nee nuq nee beiv aol nail juq bhai
tsiq thul bhiq khi
haqeiv nail juq bhai neq
miltsaq bhai bhi ga tsuq ail nail ngaol.
7 Heeqphaq Miqyail bhai
daoqsel gul khi tsiq eeq yaoq.
Dil-nvq deeq khi
ngadao nail Miqyail bhai daoqsel gul gil yaoq.
8 Aivq neq
nqtavq bha nqdil-i mail bhi uv thaiq khi
miltsaq nail haqbhoil neq
maoq-aol lainq lavq-a nail nee ovqtavq
gaoqjaoq nail kovtavq bhai neq
moeqgaq bhi doevq lal-a nail ngaol.
9 Aq jal meel jaq nail ov ngavq aqyaq nee danq khi
jaiqyaq juq iqsanl bhai
bhi jaq bhi daol-a nail ngaol.
10 Aivq neq, moeqphaq nail gaq khi
tsaol-aq yaq-i mail lav nail phaq bhai
neekhaol sil duq maq jiav ail.
11 Thail hai ngaol-aoq
Heeqphaq Miqyail neq
aivq bhai gee sil nail lavqkhoel nee ev nail juq khi
aivq-i mail gaoq haq goil gaiq-a nail phaq bhai
noeq thunq nail juq bhai neq
neekhaol sil nail ngaol.
12 Yeiqlulsaqlaiq meenq-ol
Heeqphaq Miqyail bhai tsiq eeq yaoq.
Yeel ovq meenq-ol
naoq nail Miqyail bhai tsiq eeq yaoq.
13 Khul khi mail dai ngal-aq
aivq neq, naoq nail lolgov bhai bhi ivq lavq khi
naoq nail meenq yaq juq iqsanl bhai
geeqlaoq bivq lavq nail ngaol.
14 Naoq nail milkhaoq aqjail
aq thao bha kev dai, nee sal bhi ya khi
meeq dee dee nail gov-i mail
naoq bhai teevq bov bhi jaq lavq nail ngaol.
15 Aivq miltsaq bhai daoq bivq-u phao
daoq al lavqtsail mail kev ail nail ngaol.
16 Aivq neq, tsaiqbhaiq bhai
yaol nail aqmevq khe-ai bhi ga lee khi
khaqlail khe-ai yaoq dao yaoq-ao nee
bhi kev ail-a nail ngaol.
17 Aivq-i mail ollov aqheeq lov ma
haiq kha-ai leevq nail khe-ai
haiq kha-ai leevq-u phao
aq coevq coevq nail phaq bhai
khaq sil gaq daq tsaol heeq.
18 A bhai nee ngal-aq
aivq daoq gaoq bivq-u phao
ollov phaq lai gil khi
lilmoel bhi bhoe lal-a nail ngel-i mail
ulcuvq il khal aivq-a nail ngaol.
19 Aivq nail daoq
Yaqkov nail jeq-e jaq-a juq bhai maqkhaiq
aolthaq kovqthaq khi
ya tsao the nail phaq bhai neq
Ilsaqleiqlav nail tsaol-aq juq bhai maqkhaiq
phao daiq bhiq-a nail ngaol.
20 Yu nail jeq-e jaq-a bhai neq
al hai maq nl bhiq al.
Aol thaq kovq thaq bhai aqyu juq maq heeq nia ail.
Haq leiq lul yaq.