Tsiq eeq 146
Hevq kovq nail gaq pevq nail Heeqphaq Miqyail bhai tsiq eeq yaoq
1 Haq leiq lul yaq.
Ngaq nail nee ma-ol
Heeqphaq Miqyail bhai tsiq eeq yaoq.
2 Ngal aqdoevq khal doevq-u kev dai
Heeqphaq Miqyail bhai tsiq eeq nail ngaol.
Ngaq nail teevq yeel Miqyail bhai tsiq eeq khi
daoqsel gul naol.
3 Heeqphaq juq nee danq khi
maq hevq kovq nia nail tsaol-aq yaq bhai thaq juq.
4 Aqyu juq neq
doevq nail aqhaqlal dov ail khi
miltsaq bhai gaoq aol kovq-ail nail ngaol.
Aq-u n-gaol nee
aqyu juq-i mail lainq-ai thaq nail phaq
luq ail seil ail gil nail ngaol.
5 Yaqkov nail Miqyail-i mail
tsao jao-ai bhiq nail juq khi
yovqgavq nail Heeqphaq Miqyail bhai
noeq thunq nail juq neq
geeqlaoq eeq nail ngaol.
6 Aivq neq, nqtavq, miltsaq, iqyaq iqma khi mail
khal jiav nail phaq iqsanl bhai teivq-a nail ngaol.
Aivq neq, khaq mao iqsanl ivq nail ngaol.
7 Bhi khoeq bhi jiovq nail juq bhai
tsaq nail daol nail lavqkhoel nee
tsao jao-ai bhiq khi
moevq nail sivq nail juq bhai
bhi jaq bhi daol bov nail nee ovqtavq
phee thaiq-ai thaq nail juq bhai iqsanl
phaiq bhiq nail ngaol.
8 Heeqphaq Miqyail neq
maiv peivq peivq nail juq bhai
gaoq bhi moel nia lal khi
yu-i mail bhi doeq thaiq-ai thaq nail juq bhai iqsanl
tsiq thul bhiq nail ngaol.
Heeqphaq Miqyail
tsaq nail daol nail juq bhai gaiq-a nail ngaol.
9 Heeqphaq Miqyail neq
daq-i juq bhai hel daiq phail bhiq khi
miqtsiq miqma khi aqbhu aqma
maq jaol nail juq bhai iqsanl
tsao jao-ai bhiq nail ngaol.
Thail hai ngaol-aoq
haqeiv nail juq nail gailkhaol bhai neq
lavq govq bhi govq ail nail ngaol.
10 Yeiqlulsaqlaiq meenq-ol
naoq nail Heeqphaq Miqyail neq
teevq yeel nee teevq uv thaiq nail ngaol.
Haq leiq lul yaq.