Tsiq eeq 145
Tsiq eeq nail daoqsel
1 Ngaq nail Heeqphaq Miqyail-ol
naoq bhai tsiq eeq nail ngaol.
Nq maq maq luv hal yeel
naoq nail aqmil bhai geeqlaoq bivq nail ngaol.
2 Naoq bhai yaoq n yaoq n nee
maq ceiv lai dai, geeqlaoq bivq khi
nqmaq maqluv halyeel
naoq nail aqmil bhai tsiq eeq nail ngaol.
3 Heeqphaq Miqyail-ol, naol neq
eeq dee heel dee dee khi
tsiq eeq geel-nvq nail gaq pevq nail ngaol.
Naoq-i mail eeq nail heel nail phaq bhai
maq tsao the gil tsaol-ail.
4 Naoq-i mail nl-a nail ganl juq bhai
teevq yeel nee teevq yeel tsiq eeq khi
naoq nail bhaqaoq eeq nail ganl juq bhai iqsanl
ge gaiq bhiq nail ngaol.
5 Ngal iqsanl, naoq nail eeq dee heel dee dee nail
seiqleiq khaoqsail bhai maqkhaiq
noeq-u maq dov nail ganl juq bhai maqkhaiq
saol-nvq nail ngaol.
6 Tsaol-aq yaq juq neq
naoq-i mail nl-a nail noeq-u maq dov nail
bhaqaoq eeq nail ganl juq bhai ge khi
ngal iqsanl, naoq nail
eeq dee heel dee dee nail ganl bhai
ge gaiq bhiq nail ngaol.
7 Aqyu juq neq, naoq nail
meeq dee bhee dee dee nail phaq bhai ge gaiq khi
naoq-i mail tsaq nail daol nail phaq bhai iqsanl
lavqkhiq teevq tsail daoqsel gul nail ngaol.
8 Heeqphaq Miqyail neq
gaoq haq nail phaq maqkhaiq
gaiq-a nail phaq maqkhaiq
bhee lovq khi neema maq phail dai
ol tsaol nail nee ovqtavq
gaoq haq goil gaiq-a nail ngaol.
9 Heeqphaq Miqyail neq
yaoq gaq yaoq-ao nee bhai
aqmeeq phaq nl bhiq movq khi
aivq-i mail teivq-ai thaq nail
yaoq phaq yaoq-ao nee bhai
gaoq haq nail ngaol.
10 Heeqphaq Miqyail-ol
naoq-i mail khal teivq-a nail
yaoq phaq yaoq-ao nee iqsanl
naoq bhai tsiq eeq khi
naoq bhai saljial ivq nail tsaol-aq juq iqsanl
naoq bhai geeqlaoq bivq nail ngaol.
11 Naoq nail milkhaoq nail
seiqleiq khaoqsail bhai maqkhaiq
bhaqaoq bhai maqkhaiq
aqyu juq ge gaiq bhiq nail ngaol.
12 Al heel ngel-i mail
naoq-i mail nl-a nail
bhaqaoq eeq nail ganl juq khi
naoq nail milkhaoq nail
eeq dee heel dee dee nail
seiqleiq khaoqsail nail ganl juq bhai
tsaol-aq yaq juq ya heeq nia nail ngaol.
13 Heeqphaq Miqyail-ol
naoq nail milkhaoq neq
nqmaq maqluv halyeel ivq nail milkhaoq pevq khi
uv thaiq nail phaq iqsanl
teevq yeel nee teevq yeel
nqmaq maqluv halyeel ivq nail ngaol.
Heeqphaq Miqyail neq
aivq nail ganl iqsanl bhai saljial ivq khi
aivq-i mail saljial
khal jaq-ai thaq nail khe-ai, nl nail ngaol.
14 Aivq neq
ga tsuq ail-a nail juq bhai he thul bhiq khi
yu-i mail bhi doeq thaiq-ai thaq nail juq bhai
tsiq thul bhiq nail ngaol.
15 Aq doevq khal doevq nail iqsanl mail
aivq bhai hel daiq gil haq neq
aqyanq tsaq lal-u phao
aivq aqyu juq bhai bhi jaq bhi daol nail ngaol.
16 Aivq aqlavq gaol phai khi
al juq iqsanl bhai bhi bhee lovq lal nail ngaol.
17 Heeqphaq Miqyail neq
aivq nail ganl juq bhai saljial ivq khi
aivq-i mail saljial
khal jaq-ai thaq nail khe-ai, nl nail ngaol.
18 Heeqphaq Miqyail neq
aivq bhai maldil tsaq nail lavqkhoel nee
geeqlaoq hal nail juq nail aqjail bhai jaol nail ngaol.
19 Aivq bhai gee sil khi ev nail juq-i mail
khal loq nail phaq
teevq bhee teevq lovq bivq nail nee ovqtavq
aqyu juq-i mail gul nail aqthel bhai iqsanl gaiq khi
hevq kovq bhiq nail ngaol.
20 Aivq neq
aivq bhai gaiq-a nail juq iqsanl bhai
hel daiq phail bhiq khi
haqeiv nail juq bhai neq
lav luq lav seil bhiq nail ngaol.
21 Ngaq nail moeqthaoq
Heeqphaq Miqyail bhai
tsiq eeq nail daoq ge nail ngaol.
Tsaol-aq yaq yaoq gaq yaoq-ao nee mail
aivq nail meeq nail haol nail aqmil bhai
nqmaq maqluv halyeel geeqlaoq bivq dei-eiq.