Tsiq eeq 144
Genl dev nail gaq lai-a nail ngel-i mail heeqphaq-i mail tsiq eeq-a nail daoqsel
1 Ngaq nail lovphail pevq nail
Heeqphaq Miqyail bhai
geeqlaoq bivq dei-eiq.
Aivq ngaq nail aqlavq bhai
genl khal hai ya dev nail dai
cavq naq lavq-a nail nee ovqtavq
genl dev gaq kivq dai, saol lavq-a nail ngaol.
2 Aivq neq, ngaq bhai gaoq haq gaiq-a nail gaq
ivq nail tsaoq-uvq duq
ngaq nail tavq
ngaq bhai hevq kovq nail gaq
ngaq-i mail juq nail doeq daq duq pevq nail ngaol.
Aivq neq, jeq-e jaq-a iqsanl mail
ngaq nail kov-uvq bhai bhi jaol-a nail ngaol.
3 Heeqphaq Miqyail-ol
tsaol-aq yaq nail haqbhoil
saol-nvq heeq phaq-ail
tsaol-aq yaq neq, khul pevq nail-aiq.
Aqyu juq bhai noeq moel heeq phaq-ail
aqyu juq neq, khul pevq nail-aiq.
4 Tsaol-aq yaq neq, aqhaq khe-ai dul nail ngaol.
Aqyu juq nail aq nv juq neq
jel-ail nia nail aq haiq khe-ai dul nail ngaol.
5 Heeqphaq Miqyail-ol
naoq nail nqtavq kovtavq he phao khi
yavq kha lee yaoq.
Gaoqjaoq juq bhai thoiq tsi khi
miq khoiq bhi dov lal yaoq.
6 Nq meivq bhi meivq lal khi
neejiav jiav nail juq bhai
bhi tsaoq peiv bhi tsaoq leiv gil yaoq.
Heeq nav bev khi aqyu juq bhi suq saq yaoq.
7 Daq moe nee aqlavq
gaol tsaoq-ai leevq lavq khi
ngaq bhai he dov lavq yaoq.
Ulcuvq navq dee dee nail nee maqkhaiq
yu nail jeq-e jaq-a nail
aqlavq lavqkhoel nee maqkhaiq
hevq kovq lavq yaoq.
8 Aqyu juq nail moeqthaoq neq
goiqbhaoq bhaoq nail daoq ge khi
yalkhaq dal-u phao iqsanl
maq tsaq nail salkhil khanl nail ngaol.
9 Miqyail-ol, ngal naoq bhai
daoqsel aqsivq gul nail nee ovqtavq
neeqtsaq tsel deeq covq nail dil-nvq deeq khi
tsiq eeq nail daoqsel iqsanl gul nail ngaol.
10 Naol neq, heeqphaq juq bhai
gaq lai nail phaq bivq khi
naoq nail yaqkav Daq bhil bhai
iqsanl haqeiv nail phaq nee bhi jel-ail nail ngaol.
11 Yu nail jeq-e jaq-a nail aqlavq nee
ngaq bhai he dov khi hevq kovq lavq yaoq.
Aqyu juq nail moeqthaoq neq
goiqbhaoq bhaoq nail daoq ge
yalkhaq dal-u phao iqsanl
maq tsaq nail salkhil khanl nail ngaol.
12 Nv juq nail yaqyov juq neq
Yaq khaq yaq uv ail jiav-u nee
eeq dal lavq nail aqbhaol juq khe-ai maqkhaiq
yaqmiq juq neq
heeqphaq nail haol nail jioivq loiv khe
lovmav ilkhel khe-ai maqkhaiq
bhi pevq lavq dei-eiq.
13 Nv juq nail gov jil bhai
jaq nail daol nail phaq
teevq bhee teevq lovq bhi bhee lavq dei-eiq.
Dai khaoq aqsal bhai
gav jaq thail thaiq nail yaol juq
aqhinl aq meel-nvq maol nee bhi bhao lavq dei-eiq.
14 Niaoqnel juq iqsanl bhi kav lal dei-eiq.
Meenq nail khainl bhai
yu nail jeq-e jaq-a aol lal nail phaq maqkhaiq
aqyu juq-i mail bhi nieivq-ai nail phaq maqkhaiq
gailkhaol juq bhai
nioil khaoq khaoq nail phaq maqkhaiq
thaq bhi jiav lavq dei-eiq.
15 Al hai jaol nail tsaol-aq juq neq
geeqlaoq eeq nail ngaol.
Heeqphaq Miqyail neq
aqyu juq nail Miqyail pevq nail ngel-i mail
aqyu juq geeqlaoq eeq nail ngaol.