Tsiq eeq 143
Neema gaq bhaq nail lavqkhoel nee gul nail daoqsel
1 Heeqphaq Miqyail-ol
ngaq-i mail hal nail geeqlaoq hal daoq bhai
gaiq khi nal daiq lavq yaoq.
Saljial ivq nail phaq khi
tsaq nail daol nail phaq aol nail khe-ai
ngaq bhai ge kovq lavq yaoq.
2 Naoq nail yaqkav pevq nail ngaq bhai
yalkhaq thaq dal lavq.
Khul khi mail dai ngal-aq neq
aqdoevq doevq nail tsaol-aq juq
naoq nail sivtavq bhai oeqbal maq aol nail
teevq gaq iqsanl maq jaol ail.
3 Nee jiav jiav nail juq
ngaq bhai the kheel lee khi
miltsaq bha tuv dai
naoq thaiq lavq-a nail ngaol.
Aqyu juq ngaq bhai aqnav nail lavqkhoel-ai
bhi jaol lavq-a nail ngel-i mail
ngal neq, aq-u nee sil-ai thaq nail
tsaol-aq khe-ai dul nail ngaol.
4 Al heel ngel-i mail
ngaq nail neema gaq bhaq khi
gee sil dee dee nail ngaol.
5 Jel lal-a nail aqn aqyanq bhai
noeq moel lal ail nial.
Naoq-i mail nl jel hal jel lavq-a nail juq bhai
ngal noeq daiq khi
naoq nail aqlavq-i mail
nl-a nail ganl juq bhai iqsanl
saol-nvq pov thail thaiq nail ngaol.
6 Ngaq nail aqlavq bavq dil khi
naoq bhai hal nail ngaol.
Miltsaq aqgee ulcuvq moevq nail khe-ai
ngal naoq bhai moevq thail thaiq nail ngaol.
7 Heeqphaq Miqyail-ol
niil aq-il ngaq-i mail hal nail daoq bhai
nal daiq lavq yaoq.
Ngaq nail neema gaq bhaq thail thaiq nail ngaol.
Naoq nail maivphaoq
haoqnaol phao thaq tsiq phaol lavq.
Al hai tsiq phaol lavq haq neq
ngal sil nail milkhaoq bhai
ail nail tsaol-aq khe-ai dul nail ngaol.
8 Nqhao navq mav-ail
naoq-i mail gaoq haq goil gaiq-a nail ganl
bhi gaiqlaq yaoq.
Ngal naoq bhai neema thaq tsaol nail ngaol.
Ngaq-i mail ya tsao nail gailkhaol bhai
cavq naq lavq yaoq.
Khul khi mail dai ngal-aq
ngaq nail neema naoq bhai av bhiq nail ngaol.
9 Heeqphaq Miqyail-ol
ngaq bhai neejiav jiav nail juq nail
aqlavq lavqkhoel nee hevq dov lavq yaoq.
Ngal naoq bhai tsaoq uvq nail ngaol.
10 Naol neq, ngaq nail Miqyail pevq nail ngaol.
Naol neema tsaq nail khe-ai nl kivq dai
ngaq bhai saol lavq yaoq.
Naoq nail meeq nail Aqhaqlal
ngaq bhai gailkhaol aqdaol cavq naq lavq yaoq.
11 Heeqphaq Miqyail-ol
naoq nail aqmil bhai juq khi
ngaq bhai aqdoevq bhi doevq lavq yaoq.
Naol tsaq nail daol nail khe-ai
ngaq bhai haq nail aoq nail lavqkhoel nee
hevq dov lavq yaoq.
12 Naoq-i mail
gaoq haq goil gaiq-a nail bhaq da nee
ngaq bhai neejiav jiav nail juq bhai
lav cov bhiq yaoq.
Ngal naoq nail yaqkav pevq nail khe-ai
ngaq bhai khoeq lal jiovq lal nail juq bhai iqsanl
lav luq lav seil bhiq yaoq.