Tsiq eeq 142
Heeqphaq Miqyail bhai gul nail ganl
1 Ngal Heeqphaq Miqyail bhai
"Tsao jao-ai lavq yaoq" dai
aqthel aqkav kav-ai, gul nail ngaol.
2 Ngaq-i mail neema cov nail phaq iqsanl khi
haq nail aoq nail phaq iqsanl mail
aivq bhai ge dov bhiq nail ngaol.
3 Ngal neema gaq bhaq-u phao
ngaq-i mail ya ail nail gailkhaol bhai
aivq heeq nia nail ngaol.
Ngaq-i mail tsao nail gailkhaol bhai
neejiav jiav nail juq
lavq phee khail-ai thaq nail ngaol.
4 Lavq mal phao hel daiq-u phao
ngaq bhai tsao jao-ai lavq nail
teevq gaq-ail maq jaol ail.
Juq duq maq jiav nail nee ovqtavq
hel daiq nul nail gaq maq jaol ail.
5 Heeqphaq Miqyail-ol
ngal naoq bhai niail hai gul nail ngaol:
"Naol neq, ngaq nail juq duq khi
ngaq nail yeel lavqkhoel bhai
khal loq nail gaq neq, naol ngaol"
dai, gul nail ngaol.
6 Ngaq-i mail gul nail aqthel bhai nal daiq lavq yaoq.
Khul khi mail dai ngal-aq neq
ngal haq dee aoq dee dee ail nial.
Ngaq-ai nee maq tsil gaq kav nail
neejiav jiav nail juq nail aqlavq lavqkhoel nee
hevq dov lavq yaoq.
7 Ngal naoq nail aqmil bhai tsiq eeq kivq dai
ngaq bhai thaonq khe-ai dul nail aqduq niil duq nee
bhi jel-ail lavq yaoq.
Naol ngaq bhai al hai geeqlaoq nl lavq haq neq
tsaq nail daol nail tsaol-aq juq
ngal jaol nail bha lal nail ngaol.