Tsiq eeq 141
Nqkiv phao khe geeqlaoq hal daoq
1 Heeqphaq Miqyail-ol
ngal naoq bhai gul nail ngaol.
Niil aq il nee lavqtsail mail tsao jao-ai lavq yaoq.
Ngal naoq bhai gul-u phao, nal daiq lavq yaoq.
2 Ngaq nail geeqlaoq hal daoq neq
tovq-ai thaq nail huqbhiq nil nail phaq bhai
hav bhoel lavq nail khe-ai maqkhaiq
ngaq-i mail aqlavq bavq dil nail phaq neq
nqkiv phao khe laol bhiq nail phaq bhai
hav bhoel lavq nail khe-ai maqkhaiq
hav bhoel lavq yaoq.
3 Heeqphaq Miqyail-ol
haqeiv nail daoq maq ya ge dai
ngaq nail moeqthaoq bhai hel daiq phail lavq yaoq.
Ngaq nail moeq kov bhai iqsanl
hel daiq phail lavq yaoq.
4 Haq eiv nail phaq bhai gaiq-a nail neema
maq ya aol lal dai maqkhaiq
aqdoil phaq nl nail juq nee teevq gaq khe-ai
haqeiv nail phaq nl movq nail neema
maq ya aol lal dai maqkhaiq
ngaq bhai bhi jel-ail lavq yaoq.
Tsaol-aq al juq nail kovqkhail bhai iqsanl
maq ya jaq tavq daol tavq dai
hel daiq phail lavq yaoq.
5 Tsaq nail daol nail gaq-i mail
cavq lavq cov lavq-a nail daoq neq
geeqlaoq bhao khi
khaq lavq nail daoq iqsanl
ngaq nail uqhuq bhai leivq lavq-a nail
aqtseel khe-ai dul nail ngaol.
Al hai gaoq nl lavq khi ngaol-aoq
ngal maq jil ha-ail.
Thail hai ngaol-aoq
haqeiv nail tsaol-aq juq-i mail nl nail phaq
ngal jaol nail bha maq ya kev lee dai
geeqlaoq hal thail thaiq nail ngaol.
6 Aqyu juq bhai aqivq jiovq nail juq
lovphail nee mail bhi liv kha-u n-gaol
aqyu juq juq ngaq-i mail ge nail daoq
tsaq lao thaq nial dai heeq nia lal nail ngaol.
7 Miltsaq bhai
miqjaq cevq pav cevq sav-ai thaq nail khe-ai
luqdaol bhai aqyu juq nail haqeeq juq
aq pav aq sav ail ga nail ngaol.
8 Thail hai ngaol-aoq
Heeqphaq Miqyail-ol
ngaq nail Heeqphaq-ol
ngal naoq bhai
hel daiq cov-ai thaq khi juq nail ngaol.
Ngaq nail doevqyeel bhai thaq khaonq ha lavq.
9 Ngaq nail haqbhoil
haqeiv nail tsaol-aq juq-i mail
khail-ai thaq nail lavq phee nee bhi jel-ail lavq yaoq.
10 Ngaq bhai haq nail aoq nail phaq maq jiav dai
lavq phee nee bhi jel-ail lavq dei-eiq.
Thail hai ngaol-aoq
haqeiv nail tsaol-aq juq bhai neq
aqyu juq nail lavq phee bhai
aqyu juq bhi ga bhoel ail yaoq.