Yaolsuv 1

Yaolsuv 1

Heeqphaq Miqyail Yaolsuv bhai khoel-a nail ganl

1 Heeqphaq Miqyail nail yaqkav Maolseiq sil gaq-al nee ngal-aq, Heeqphaq Miqyail neq, Maolseiq nail lavqsaov pevq nail Nunq nail yaqyov Yaolsuv bhai niail hai ge bhiq-a nail ngaol:

2 "Ngaq nail yaqkav Maolseiq sil-aoq nail ngaol. Naol dai khi Ilsaqleiqlav nail tsaol-aq juq neq Yaoldaq laoljaol ceiv lai khi ngaq-i mail nul juq bhai bivq nail milkhaoq bha aol lai nail galduq lainq thaq gai yaoq.

3 Maolseiq bhai ngaq-i mail saljial jaq-ai thaq nail khe-ai nul juq-i mail aqkhil khal naoq nail miltsaq yaoq dao yaoq-ao nee mail, nul juq bhai ngal bivq nail ngaol.

4 Nul juq nail miltsaq neq, tsalhail daikav nee mail Leiqbhaqnonq gaoqjaoq juq bha kev dai maqkhaiq, Pheqlaqtaq laoljaol nee mail nlma ga khoeq phao jiav nail Meildiqtiqlav iqyaq iqma bha kev dai maqkhaiq, eeq nail ngaol. Al ovqtavq, Hiltiv nail miltsaq iqsanl a bhai aol nail ngaol.

5 Naol aqdoevq khal doevq-u phao kev dai, khaq sil gaq gail naoq bhai maq gaq lal nia-ail. Khul khi mail dai ngal-aq, ngal neq, Maolseiq nee mail teevq gaq khe-ai jaol-a nail khe-ai, naoq-ai nee mail iqsanl teevq gaq khe-ai jaol nail ngaol. Naoq bhai teevq thal-iq maq pav-ail. Teevq thal-iq maq khaonq ha-ail.

6 Naol gaq hal dov khi nl tseq hal tseq nail neema aol yaoq. Khul khi mail dai ngal-aq, naol neq, aqyu juq bhai aqivq jiovq khi mail, aqyu juq nail aqphiq aqbhal juq bhai "Ngal bivq naol" dai, saljial jaq-ai thaq nail milkhaoq bhai ya hevq bhoel laivq khi aqyu juq nail haqbhoil jaiqbhoil bhi pevq yaoq.

7 Naol gaq hal dov khi nl tseq hal tseq dee dee nail neema taivq-ail aol yaoq. Ngaq nail yaqkav Maolseiq bhai bivq-a nail aolthaq kovqthaq iqsanl bhai aqmeeq-ai tsao the yaoq. Lavqtsel lavqmal phao gailbheeq thaq bheeq-ail. Al hai tsao the haq neq, naoq-i mail khal nl nail iqsanl mail pevq lai nail ngaol.

8 Aolthaq kovqthaq gevq-ai thaq nail haoqgavq bhai khaq mao gail ya ge nail ngaol. Aolthaq kovqthaq al iqsanl bhai tsao the kivq nail haqbhoil, nqkiv n-gaol maq ceiv lai dai, ya noeq daiq ya dul daiq nail ngaol. Al hai nl haq neq naoq-i mail khal nl nail iqsanl mail pevq lai khi bhao lee ya lee nail ngaol.

9 Al heel ngel-i mail ngaq-i mail naoq bhai daoq bivq-a nail khe-ai, gaq hal dov khi nl tseq hal tseq nail neema aol yaoq. Thaq gee sil. Neema thaq cov. Naoq nail Heeqphaq Miqyail pevq nail ngal neq, naoq-i khal ail nail bha naoq-ai nee mail teevq gaq khe-ai jaol nail ngaol" dai, ge bhiq-a nail ngaol.

Ilsaqleiqlav nail tsaol-aq juq bhai Yaolsuv daoq bivq-a nail ganl

10 A bhai nee ngal-aq, Yaolsuv neq, Ilsaqleiqlav nail aqivq aqtsu juq bhai khul jil khi, daoq niail hai bivq-a nail ngaol:

11 "Nul juq nail tsaol-aq juq-i mail jaol nail haqphal saiqgov doi dai ail khi niail hai ge bhiq ail yaoq: "Loq nail yalkav juq oil jil thaq gai yaoq. Khul khi mail dai ngal-aq, niai nee pultavq hail n n-gaol nul juq nail Heeqphaq Miqyail-i mail, nul juq bhai bivq lavq nail milkhaoq bhai uv thaiq lai nail galduq, Yaoldaq laoljaol ya ceiv lai nail ngaol" dai, daoq bhi bivq ail-a nail ngaol.

12 Thail hai ngaol-aoq, Yaolsuv neq, Lulbheiq nail jeq-e, Gavq nail jeq-e dai khi Maqnaqseiq nail jeq-e teevq pav bhai niail hai ge bhiq-a nail ngaol:

13 "Yaoldaq laoljaol niil niai khe jiav nail miltsaq bhai nul juq ya jaol nail galduq, 'Nul juq nail Heeqphaq Miqyail neq, nul juq bhai bivq naol' dai, aivq nail yaqkav Maolseiq-ai ge-ail ceevq-a nail bhai, thaq nioil peivq.

14 Al heel ngel-i mail nul juq nail khaqma dai khi yaq juq maqkhaiq, jaiqyaq juq maqkhaiq, niai bhi jaol-ail ceevq khi nul juq nail lavqkhoel khe genl dev nail khenkha-ao bavq nia nail yaqyov-aq juq yaoq gaq yaoq-ao nee mail neq, Ilsaqleiqlav nail jeq-e yaoq jeq-e yaoq-ao nee bhai tsaojao-ai nail haqbhoil, Yaoldaq laoljaol bhai lavqtsail mail iqmoeq ya ceiv lai nail ngaol.

15 Nul juq nail Heeqphaq Miqyail-i mail bivq lavq nail milkhaoq, aivq maq bivq lavq-u kev dai, aqyu juq bhai ya tsao jao-ai bhiq nail ngaol. Ilsaqleiqlav nail jeq-e yaoq jeq-e yaoq-ao nee mail nul juq khe-ai aqjieiv jieiv dai jaol nia lal khi jaiqbhoil ya khi mail pultavq, nul juq neq Heeqphaq Miqyail nail yaqkav Maolseiq-i mail bivq lavq-a nail nul juq nail miltsaq Yaoldaq laoljaol nail nl ma dov khoeq phao jiav nail niil nia kovq lal khi ya uv thaiq lal nail ngaol" dai, ge bhiq-a nail ngaol.

16 Aqyu juq ge nail: "Nv juq neq, naoq-i mail khal ge lavq nail khe-ai, nal daiq khi naoq-i mail khal bhi ail lavq nail bha ail nail ngaol.

17 Maolseiq nail daoq juq iqsanl mail bhai nal daiq-a nail khe-ai naoq nail daoq nal daiq nail ngaol. Nv juq hal movq nail teevq phaq jiav-ail teevq-eel ngaol. Al neq, naoq nail Heeqphaq Miqyail neq, Maolseiq nee mail teevq gaq khe-ai, jaol-a nail khe-ai, naoq-ai nee mail iqsanl, teevq gaq khe-ai, bhi jaol dei-eiq.

18 Naoq bhai lav tsoiq nail gaq dai khi naoq nail daoq bhai maq nal daiq nail khul gaq maqkhaiq, sil nail phaq ya daq nail ngaol. Al heel ngel-i mail gaq hal dov khi nl tseq hal tseq nail neema taivq-ail aol yaoq" dai, ge kovq bhiq-a nail ngaol.