Dov-ail nail haoqgavq
Dov-ail 1
Iljiltuv milkhaoq bhai Ilsaqleiqlav nail tsaol-aq-i mail khoeq nail jiovq nail phaq ya daq-a nail ganl
1 Yovqgavq nail miqyaq khaqma juq hevq khi, Yaqkov nee mail Iljiltuv milkhaoq bhai ail-a nail Yaqkov nail yaqyov juq neq, niil juq ngaol:
2 Lulbheiq, Silmiqonq, Leiqbhil, Yuldav,
3 Ilsaqkhaq, Seiqbhullonq, Bheinqyaqminq,
4 Danq, Naqtaqlil, Gav khi mail Aqseiqlav ngaol.
5 Yaqkov nail yaqmiq yaqyov juq dai khi aqjievq lilheel juq neq, iqsanl mail 70 gaq bhee nail ngaol. Aivq nail yaqyov juq nail iqmoeq nee mail Yaolsai neq, Iljiltuv milkhaoq lavqkhoel bhai jaol thail thaiq nail ngaol.
6 Aqkovq allav maoq lal-u phao, Yaolsai maqkhaiq, aivq nail mailnail juq maqkhaiq, aqyu juq nee mail teevq tsaoq pevq nail juq maqkhaiq, sil gil-a nail ngaol.
7 Thail hai ngaol-aoq, aqyu juq nee mail yavq kha lee thaq nail yaq juq pevq nail Ilsaqleiqlav nail tsaol-aq juq neq, jeq lal el lal khi, mao dee dee lal-a nail ngel-i mail, Iljiltuv milkhaoq lavqkhoel bhai jaol bhee gil-a nail ngaol.
8 Aq-u phao, Yaolsai bhai maq heeq nia nail Phaqlaol dai gaoq khul nail heeqphaq aaqsivq teevq gaq Iljiltuv milkhaoq bhai uv thaiq lal-a nail ngaol.
9 Heeqphaq al gaq, aivq nail tsaol-aq juq bhai ge bhiq-a nail: "Ilsaqleiqlav nail tsaol-aq niil juq neq, ngadao juq nee maq tsil tsaol-aq mao jaiq khi, gaq kav jaiq nail ngaol.
10 Al heel ngel-i mail, genl dev nail phaq pevq lal haq neq, ngadao juq bhai neejiav jiav nail tsaol-aq juq nee mail, aqyu juq jil lai khi ngadao juq bhai genl dev lal nail jaol-aq. Al ovqtavq, milkhaoq niil khaoq nail lavqkhoel nee iqsanl dov-ail lavq nail khul-il. Al bhaqda nee, ngadao juq teevq phaq ga nav ya nl nail ngaol" dai, ge bhiq-a nail ngaol.
11 Al bhaq da nee, Ilsaqleiqlav nail tsaol-aq juq bhai, ganl mail ma-ail bhi nl nail lavqkhoel nee, maq bhi dov-ail nail dai khi, yaqkav juq ganl nl nail bhai hel daiq nail tsaol-aq juq nail aqlavq lavqkhoel bhai av bhiq-a nail ngaol. Aq-u phao, Phaqlaol nail yalkav oil thaq nail haqbhoil, Philthonq nail meenq khi mail Laqmaqsail nail meenq, aqyu juq ya cov-a nail ngaol.
12 Thail hai ngaol-aoq, Iljiltuv nail tsaol-aq juq-i mail Ilsaqleiqlav nail tsaol-aq juq bhai, niavq-al khoeq bhiq jiovq bhiq haq neq, Ilsaqleiqlav nail tsaol-aq juq niavq-al jeq-ail el-ail khi, Iljiltuv nail milkhaoq doi dai, jaol bhee gil-a nail ngaol. Aq-u phao, Iljiltuv nail tsaol-aq juq Ilsaqleiqlav nail tsaol-aq juq bhai gee sil lal bhiq-a nail ngaol.
13 Al heel ngel-i mail, aqyu juq, Ilsaqleiqlav nail tsaol-aq juq bhai, iqmoeq-u nee maq tsil ganl aqkav bhi nl-a nail ngaol.
14 Ilsaqleiqlav nail tsaol-aq juq bhai maq gaoq haq bhiq dai, ilkhaol cov nail bhai maqkhaiq, daiyal nl nail bhai maqkhaiq, ganl aqkav bhi nl dee dee-a nail ngaol.
15 A bhai nee ngal-aq, Heiqbhail nail tsaol-aqb yaqmai-aq juq, yaq tsiq-u phao, lav sav bhiq nail yaqmai-aq nvq gaq pevq nail Siqphaqlaq khi mail Phul-aq bhai Iljiltuv nail heeqphaq-i mail khul khi, daoq niail hai bivq-a nail ngaol:
16 "Heiqbhail nail tsaol-aq yaqmai-aq juq, yaq tsiq nail bhai nul nvq gaq lav sav bhiq-u phao, yaqyov doevq lee haq neq, lav heivq yaoq. Thail hai ngaol-aoq, yaqmiq doevq lee haq neq, maq lav heivq dai, bhi jel-ail yaoq" dai, daoq bivq-a nail ngaol.
17 Thail hai ngaol-aoq, yaqmai-aq al nvq gaq, Miqyail bhai gee sil khi ev nail ngel-i mail, heeqphaq-i mail daoq bivq-a nail khe-ai, maq nl dai, doevq lee-a nail yaqyov juq bhai iqsanl, maq lav heivq mail, bhi jaol-a nail ngaol.
18 Aq-u phao, yaqmai-aq al nvq gaq bhai heeqphaq-i mail bhi khul-ail khi, "Nul nvq gaq khul khi mail thail hai nl-a nail-aiq. Khul khi mail yaqyov juq bhai maq lav heivq dai, bhi doevq-a nail-aiq" dai, nal daiq bhiq-a nail ngaol.
19 Yaqmai-aq al nvq gaq ge nail: "Heiqbhail nail jeq-e yaqmai-aq juq neq, Iljiltuv nail jeq-e yaqmai-aq juq khe-ai, maq dul-ail. Aqyu juq yaq tsiq nail neq, khul maq haq nail ngel-i mail, nv nvq gaq maq-ail kev-u nee mail, yaq bhao gaq nail ngaol" dai, ge kovq bhiq-a nail ngaol.
20 Al heel ngel-i mail, yaq tsiq-u phao, lav sav bhiq nail al nvq gaq bhai, Miqyail geeqlaoq bivq nail lavqkhoel nee, Ilsaqleiqlav nail tsaol-aq juq gaoq jeq gaoq el-ail, dee dee-a nail ngaol.
21 Yaqmai-aq al nvq gaq, Miqyail bhai gee sil khi ev nail ngel-i mail, aqyu nvq gaq bhai iqsanl, Miqyail yaq mao dai, bhi jaol lee-a nail ngaol.
22 A bhai nee ngal-aq, heeqphaq Phaqlaol daoq niail hai bivq-a nail ngaol: "Khal doevq lee nail Heiqbhail nail jeq-e yaqyov juq bhai Nal-eil laoljaol bha, bhi liv puvq-a nail ngaol. Thail hai ngaol-aoq, yaqmiq juq bhai neq, bhi doevq yaoq" dai, aivq nail tsaol-aq juq bhai daoq bivq-a nail ngaol.