Iqmoeq 50
1 Yaolsai neq, aivq nail aqbhu nail aqmaol kovtavq bhai laiq thaiq khi maivphaoq bhai moeqsaol saol saol-ail nioil-a nail ngaol.
2 A bhai nee ngal-aq, aivq nail yaqkav pevq nail jagaq yal nail tsaol-aq bhai, aivq nail aqbhu nail aqmaol bhai mao dai dal lai nia dai, jagaq deev nail galduq, daoq bivq-a nail ngaol.
3 Al heel ngel-i mail, aqyu juq, aivq nail aqmaol bhai 40 n bhee dai, jagaq deev-a nail ngaol. Iljiltuv nail tsaol-aq juq neq, Yaqkov nail haqbhoil 70 n bhee dai, nioil khaoq khaoq bhiq-a nail ngaol.
4 Nioilkhaoq khaoq nail aqn jel ail-u phao, Yaolsai neq, Phaqlaol nail haol khe aqivq aqtsu juq bhai: "Nul juq ngaq bhai noeq meeq haq neq, ngaq nail haqbhoil, Phaqlaol jaol nail bha niail hai ge gaiq lai lavq yaoq.
5 'Ngaq nail aqbhu maq sil ceiv nail iqmoeq bhai, aivq nail haqbhoil duq-ai thanq nail Khaqnanq milkhaoq khe jiav nail, luqdaol bhai duq pheeq lavq-o dai, saljial bhi jaq lavq-a nail ngaol. Al heel ngel-i mail, aqbhu nail maoldoiq bhai duq pheeq nail haqbhoil, Khaqnanq milkhaoq bha lai khi bhi duq pheeq lai lavq-o dai, hal nail ngaol. Duq pheeq gaq haq neq, Iljiltuv nail milkhaoq bha gaoq lee nail ngaol' dai, bhi ge bhiq lai-a nail ngaol.
6 Yaolsai-i mail ge nail khe-ai, aqivq aqtsu al juq, Phaqlaol bha ge bhiq lai-u phao, Phaqlaol ge nail: "Naoq nail aqbhu bhai saljial jaq-ai thaq nail khe-ai lai khi, naoq nail aqbhu nail maoldoiq duq pheeq lai yaoq" dai, ge kovq bivq-a nail ngaol.
7 Al heel ngel-i mail, Yaolsai neq, aivq nail aqbhu bhai duq pheeq lai nail galduq, lai-a nail ngaol. Phaqlaol nail lavqsaov maqkhaiq, haol khe aqivq aqtsu juq maqkhaiq, Iljiltuv milkhaoq khe jaol nail aqivq aqtsu juq iqsanl mail maqkhaiq, Yaolsai nee mail teevq gaq khe-ai, tsao thel laivq-a nail ngaol.
8 Yaolsai nail phaqyaq ma yaq, aivq nail aqivq jaqbheq juq dai khi aqyu juq nail phaqyaq ma yaq juq gail, lai-a nail ngaol. Aqyu juq nail yaqnoil juq dai khi, jaiqyaq juq taivq-ail Gaolsinq miltsaq bhai bhi jaol-ail ceevq-a nail ngaol.
9 Moeqphaq lavlaoq the nail juq dai khi, moeqphaq jeeq nail juq gail lal-a nail ngel-i mail, Yaolsai nee mail lai-a nail tsaol-aq juq neq, al jaiq-ail mao nail ngaol.
10 Aqyu juq neq, Yaoldaq laoljaol nail aqjail bhai jiav nail Aqtav nail daiyal khe gov deeq nail aqduq bhai kev lai-u phao, nioilkhaoq khaoq dee dee-a nail ngaol. Jaolduq al dao bhai, Yaolsai neq, aivq nail aqbhu nail galduq 7 n bhee dai nioilkhaoq khaoq nail aqbhee lav sav-a nail ngaol.
11 Jaolduq al dao bhai jaol nail Khaqnanq nail tsaol-aq juq neq, Aqtav nail daiyal khe gov deeq nail aqduq bha, tsaol-aq juq nioilkhaoq khaoq dee dee nail aqthel bhai ya gaiq ya moel-u phao, "Iljiltuv nail tsaol-aq juq neq, neema noeq niil nail lavqkhoel, jaoq gaoq mil dee dee-ai bhiq-il" dai, ge nail ngaol. Al heel ngel-i mail, Yaoldaq laoljaol nail aqjail khe jiav nail jaolduq al duq bhai neq, Aqbheiqlaq Milsaqleiqa dai, khul dov bhiq-a nail ngaol.
12 Yaqkov nail yaqyov juq neq, aqbhu-i mail ge-ail ceevq-a nail khe-ai,
13 aqbhu nail maoldoiq bhai Khaqnanq milkhaoq bha bal laivq khi, Hiltiv nail jeq-e pevq nail Eilphaqloq khe, Aqbhaqlaqhaq-i mail ul-a nail Manqleiq aqbhaol bhaol ma doevq nail aqjail bhai jiav nail Maqpeiqlav lovphail khaoqbhaoq bhai duq pheeq bhiq-a nail ngaol.
14 Yaolsai neq, aivq nail aqbhu bhai duq pheeq gaq-al nee ngal-aq, aivq nail mailnail juq dai khi, khal tsao thel lavq-a nail yaoq gaq yaoq-ao nee mail teevq gaq khe-ai, Iljiltuv nail milkhaoq bha kovq ail-a nail ngaol.
15 Yaqkov sil gaq-al nee ngal-aq, Yaolsai nail algao juq neq, "Ngadao khal hai khi heeq. Yaolsai nail neema lavqkhoel bhai noeq thaq-ai thaq lao haq neq, ngadao juq bhai gaoq nl kovq lal nail jao-aq" dai, teevq gaq nee teevq gaq ge pheel jaq nail ngaol.
16 Al heel ngel-i mail, Yaolsai jaol nail bha daoq cavq niail hai bhi cavq gaiq ail-a nail ngaol. "Naoq nail aqbhu maq sil nail iqmoeq bhai ganl niil ganl nv juq bhai ge-ail ceevq lavq-a nail ngaol.
17 Aivq ge nail: 'Nul juq Yaolsai bhai niail hai ge bhiq yaoq: "Naoq nail algao juq-i mail nl laiq lavq-a nail phaq bhai, oeqbal phaiq bhiq yaoq" dai, ge bhiq lai yaoq dai, ge lavq-a nail ngaol. Al heel ngel-i mail, naoq nail aqbhu nail Miqyail nail yaqkav pevq nail nv juq bhai, oeqbal phaiq lavq yaoq" dai, bhi cavq gaiq lai-a nail ngaol. Ganl al ganl bhai Yaolsai ya gaiq-u phao, nioil-a nail ngaol.
18 A bhai nee ngal-aq, Yaolsai nail algao juq neq, aivq jaol nail bha aol lai-a nail nee ovqtavq, aqyu juq nail maivphaoq miltsaq bha gaol beiv khi ge nail: "Nv juq neq, naoq nail yaqkav juq pevq nail ngaol" dai, ge bhiq-a nail ngaol.
19 Thail hai ngaol-aoq, Yaolsai neq aqyu juq bhai niail hai ge bhiq-a nail ngaol: "Thaq gee sil. Ngal neq, yalkhaq dal nail Miqyail maq ngel.
20 Nul juq neq, ngaq bhai aqdoil phaq nl lavq khi ngaol-aoq, Miqyail neq, ngaq bhai aqmeeq phaq bhi pevq lal nail ngaol. Al ovqtavq, tsaol-aq yaq juq ya jel-ail dai iqsanl, lainq lavq-a nail ngaol.
21 Thaq gee sil. Ngal nul juq dai khi, nul juq nail yaqmiq yaqyov juq bhai hel daiq phail bhiq nail ngaol" dai, Yaolsai al hai aqmeeq-ai ge bhiq khi, gaq bhiq-a nail ngaol.
Yaolsai sil-a nail ganl
22 Yaolsai dai khi mail aivq nail aqbhu nail ildaoq juq neq, Iljiltuv milkhaoq bhai gaoq jaol dal laivq-a nail ngaol. Yaolsai neq, 110 kovq doevq-a nail ngaol.
23 Aivq neq, Eilphaqlaqyinq nail aqjievq liilheel juq bhai, ya moel-a nail ngaol. Maqnaqseiq nail yaqyov Maqkhillav nail yaq juq bhai iqsanl, aivq nail peevqceevq kovtavq bhai tsiq dav khi, aivq nail yaq khe-ai ya tsuq-a nail ngaol.
24 Yaolsai neq, aivq nail aqivq jaqbheq juq bhai, "Ngal ya sil-aiq nail ngaol. Thail hai ngaol-aoq, Miqyail neq, nul juq bhai maldil tsao jao-ai lavq nail ngaol. Nul juq bhai milkhaoq niil khaoq nee mail bhi dov lai lavq khi, Aqbhaqlaqhaq, Ilcav, Yaqkov bhai bivq naol dai, saljial jaq-ai thaq nail milkhaoq bhai hel laivq lavq nail ngaol" dai, ge bhiq-a nail ngaol.
25 A bhai nee ngal-aq, Ilsaqleiqlav nail tsaol-aq juq bhai, "Miqyail neq, nul juq bhai tsao jao-ai khi, milkhaoq al khaoq bha hevq bhoel laivq lavq-u phao, ngaq nail haqeeq bhai iqsanl oil laivq nail ngaol dai, saljial jaq lavq yaoq" dai, ge bhiq khi saljial bhi jaq-a nail ngaol.
26 Yaolsai neq, aivq nail aqkovq 110 kovq bhai sil-a nail ngaol. Aq-u phao, Yaolsai nail aqmaol bhai mao dai dal lai nia nail haqbhoil ja gaq-i mail deev khi Iljiltuv nail milkhaoq bhai doiq pheq-ai, bavq bhoel gai-a nail ngaol.