Iqmoeq 49

Iqmoeq 49

Yaqkov nail haoqnao naosaq khe daoq cavq

1 Yaqkov neq, aivq nail yaqyov juq bhai khul khi niail hai ge bhiq-a nail: "Ngaq nail aqjail bha jiil lavq yaoq. Nul juq nail ganl sivtavq phao pevq lal nail phaq bhai ngal ge lavq bhel.

2 'Yaqkov nail yaqyov juq-ol,

lal khi nal daiq lal yaoq.

Nul juq nail aqbhu Ilsaqleiqlav nail

daoq bhai, nal daiq lal yaoq.

3 Lulbheiq-ol, naol neq,

ngaq nail yaqyov aqivq ivqsaq gaq pevq nail ngaol.

Ngaq nail gaq, ngaq-i yaqnoil ail jiav-u phao,

ya-a nail yaqyov pevq nail nee ovqtavq,

yu nee maqtsil,

seiqleiq khaoqsail ya duq dai khi

bhaqaoq pevq nail ngaol.

4 Thail hai ngaol-aoq, naol neq,

ulcuvq eeq-u phao, eelkhaol thaoq nail

khe-ai dul khi

seiqleiq khaoqsail teevq peiv iqsanl

maq jiav yaoq-ao

Khul khi mail dai ngal-aq, naol neq,

naoq nail aqbhu nail khaqma nee mail

iq thaiq-a nail ngel-i mail,

naoq nail aqbhu nail bhai

aqjiivq aqcavq lav cavq-a nail ngaol.

5 Silmiqoq dai khi Leiqbhil neq,

aqivq dai khi jaqbheq pevq nail ngaol.

Aqyu nvq gaq nail thaoma neq,

yu bhai heivq nail

khenkha-ao pevq nail ngaol.

6 Aqyu nvq gaq neq neema phail nail lavqkhoel

tsaol-aq bhai heivq khi

niaoqnel laqsil nail aqkhil bhai

lavqkhiq tsail nail galduq

deeq khoi-a nail ngel-i mail,

ngal neq, aqyu nvq gaq-i mail

oil uvq khi nl-a nail bhai maq kheq-ail.

Aqyu nvq gaq-i mail maoqbhaoq nl nail bhai gail

ngal maq aol lai-ail.

7 Aqyu nvq gaq neema al jaiq-ail dav khi

neema phail nail bhaq da nee maqkhaiq,

neema phail nail lavqkhoel nee,

haqeiv nail phaq nl-a nail bhaq da nee maqkhaiq,

ivqkhail yavq nail phaq kev lee dei-eiq.

Ngal neq, aqyu juq bhai

Yaqkov nee yavq kha lee thaq nail

yaq juq nail lavqkhoel nee,

bhi tsaoq pav bhi tsaoq sav gil khi,

Ilsaqleiqlav nail milkhaoq doi dai,

bhi tsaoq pav gil-aivq nail ngaol.

8 Yuldav-ol,

naoq nail aqivq jaqbheq juq neq

naoq bhai tsiq eeq lal nail ngaol.

Naol neq,

naoq bhai neejiav jiav nail juq nail

leelkhaol bhai nieivq thaiq thaq khi

naoq nail aqivq jaqbheq juq neq

naoq bhai uqhuq ya thaoq nail ngaol.

9 Ngaq nail yaqyov Yuldav-ol, naol neq,

jaiqyaq bhai keivq heivq khi

aivq nail jaolduq bhai aol kovq lal thaq nail

al laq jaq sil khe-ai

aivq nail aqmaol he jai he jai-ail

iq thaiq nail ngaol.

Khaq sil gaq gail aivq bhai

lav noeq lai tseq nail-aiq.

10 Yuldav neq,

heeqphaq nail joiqniaoq bhai ya bavq nail ngaol.

Joiqniaoq nail aqheel gaq

maq lee kev-u kev dai,

Yuldav nee mail yavq kha lee thaq nail

yaq juq nail lavqkhoel bhai

uv thaiq nail gaq, khaqmao gail jaol nail ngaol.

Aqheel al gaq kev lee haq neq,

jeq-e jaq-a juq iqsanl mail

aivq nail daoq bhai nal daiq nail ngaol.

11 Aivq neq,

aivq nail moeqphaq laljieiv maol yaq bhai

khal meeq jaiq nail aqheeq tsilju nail aq jiav bhai

phee thaiq-ai thaq nail ngaol.

Aivq neq

aivq nail aqgaq aqdoi bhai

aqheeq tsilju nail ullul-i mail laiq tsiq khi

phailkhaoq heel ma bhai iqsanl,

aqheeq tsilju nail ullul aqsivq-i mail

laiq tsiq nail ngaol.

12 Aivq nail maivneev neq,

aqheeq tsilju nail ullul nee maqtsil

nav nail ngaol.

aivq nail aqhaoq iqsanl

niaoqnel aqtsil nee maqtsil

phul nail ngaol.

13 Seiqbhullonq neq,

iqyaq iq ma nail daolbhaq bhai jaol khi

aivq nail aqduq neq,

laovq laovq ma naq nail aqduq

pevq lal nail ngaol.

Aivq nail miltsaq neq

Sildoq meenq bha kev dai, gaoq-an nail ngaol.

14 Ilsaqkhaq neq

jinq daqiq nail gaiqlaq bhai iq thaiq nail

gaq kav nail moeqphaq laljieiv nee mail

maq jaiq-ail.

15 Aivq neq, aivq-i mail naq nail aqduq

meeq-ai nial dai maqkhaiq,

jaol nail miltsaq iqsanl,

aqsal sal-ail nial dai maqkhaiq,

ya moel-a nail ngaol.

Al heel ngel-i mail, aivq neq,

yalkav aqliq phi nail galduq

aqjiovq gaol khu khi

yaqkav khe-ai

yu-i mail khoel nail bhai ya daq nail ngaol.

16 Danq neq,

Ilsaqleiqlav nail jeq-e yaoq jeq-e yaoq khe-ai,

yovqgavq nail tsaol-aq bhai

aqtsaq aqdaol daol dai,

yalkhaq dal bhiq nail ngaol.

17 Al ovqtavq, aivq neq,

gailkhaol gail bhaq khe

leel kovq-ai thaq nail eellel dai khi

gailkhaol aqjail bhai jaol nail

dovq kav nail eellel khe-ai dul nail ngaol.

Aivq neq, moeqphaq nail aqkhil pavq nevq bhai

tov nail bhaq da nee,

moeqphaq jeeq nail gaq bhai

haoqnaol phao bhi ga tsuq-ail nail ngaol.

18 Heeqphaq Miqyail-ol, ngal neq

naoq-i mail hevq kovq lavq nail bhai

daonq nail ngaol.

19 Gavq neq,

khoiqbhaoq tsaolpheel juq-i mail

nl lal nail bhai ya daq nail ngaol.

Thail hai ngaol-aoq,

yovqgavq-ai nl lal nail juq bhai

the khi, gaoq nl kovq bhiq nail ngaol.

20 Aqseiqlav nail miltsaq nee mail

bhee lovq dee dee nail jaq jaq daol daol juq

dov lal nail ngaol.

Heeqphaq juq iqsanl

jaq nia nail jaq jaq daol daol neq,

aivq nail miltsaq nee dov lal nail ngaol.

21 Naqtaqlil neq

bhi phaiq dov khi tev nail ceiv aqma

khe-ai dul nail ngaol.

Hel daiq meeq nail

ceiv aqyaq juq bhai bhao nail ngaol.

22 Yaolsai neq,

ulcuvq laolduq aqjail bhai doevq nail

aqheeq mao dai heeq lee nail

aqheeq tsil juq nail aqbhaol

khe-ai dul nail ngaol.

Aivq nail lavqmeiv juq iqsanl

khainl nail lavqniil phao, ya dov-ail nail ngaol.

23 Heeqnav bev nail juq neq,

aivq bhai genl dev lal khi,

neejiav jiav nail lavqkhoel nee

heeqnav-i mail bev nail ngaol.

24 Thail hai ngaol-aoq

Yaqkov-i mail uqhuq thaoq nail

bhaqaoq eeq nail Gaq nail

aqlavq-i mail maqkhaiq,

Ilsaqleiqlav nail lovphail pevq nail

yaol lovq aqheel Gaq-i mail

tsao jao-ai bhiq nail ngel-i mail maqkhaiq,

aivq nail heeqnav neq

ivqdao dai jiav khi aivq nail aqlavq neq,

gaq aol nail ngaol.

25 Naoq nail aqbhu nail Miqyail neq,

naoq bhai tsao jao-ai lavq khi,

iqsanl nail kovtavq bhai uv thaiq nail

bhaqaoq eeq nail Gaq neq,

naoq bhai geeqlaoq bivq nail ngel-i mail,

nqtavq khe ga lee nail maoq-aol khe-ai dul nail

geeqlaoq bhai maqkhaiq,

miltsaq khe dov lal nail ulcuvq khe-ai dul nail

geeqlaoq bhai maqkhaiq,

jaiqyaq juq dai khi yaqmiq yaqyov juq

bhao nail geeqlaoq bhai maqkhaiq,

naol ya nail ngaol.

26 Naoq nail aqbhu-i mail

bivq nail geeqlaoq neq,

mil nee uq nee neejiav nail gaoqjaoq khe geeqlaoq,

nqmaq maqluv halyeel ivq nail

gaoqjaoq khe geeqlaoq nee maqtsil,

eeq jaiq nail ngaol.

Geeqlaoq niil juq iqsanl mail neq

aivq nail mailnail juq nail kovtavq bhai

heeqphaq pevq nail Yaolsai nail

kovtavq bhai kev ail dei-eiq.

27 Bheinqyaqminq neq,

tsai jaq nail haqtsoiq kheeq khe-ai

dul nail ngaol.

Nqhao phao neq

jaiqyaq bhai keiv heivq jaq khi

nqkiv phao neq,

jaiqyaq nail haqjoil al bhai,

bhoil pav jaq nail ngaol" dai,

ge bhiq-a nail ngaol.

28 Niil juq neq, Ilsaqleiqlav nail jeq-e 12 jeq-e pevq nail ngaol. Aqyu juq nail aqbhu neq aqyu juq, teevq ga teevq gaq tavq lai nail geeqlaoq bivq-a nail daoq juq pevq nail ngaol.

Yaqkov sil khi duq pheeq-a nail ganl

29 A bhai nee ngal-aq, Yaqkov aqyu juq bhai ge bhiq-a nail: "Ngaq nail aqphiq aqbhal juq jaol nail bha ngal ya lai-aiq nail ngaol. Hiltiv nail jeq-e Eilphaqloq nail miltsaq bhai jiav nail lovphail khaoqbhaoq-ai, ngaq nail aqbhu khi aqbhal, aqyu juq nee mail teevq gaq khe-ai, ngaq bhai duq pheeq ail lavq yaoq.

30 Luq daol al neq, Khaqnanq milkhaoq Manqleiq aqbhaol bhaol ma doevq nail aqjail bhai jiav nail Maqpeiqlav nail miltsaq-ai Aqbhaqlaqhaq neq, aivq nail luqdaol lav sav nail galduq miltsaq al bhai Hiltiv nail jeq-e Eilphaq loq khe ul-a nail luqdaol pevq nail ngaol.

31 Luqdaol al bhai neq, ngaq nail aqbhal Aqbhaqlaqhaq dai khi aqphiq Saqlal bhai duq pheeq-a nail ngaol. Ngaq nail aqbhu Ilcav dai khi aqma Leiqbhailkavq gail, duq pheeq-a nail ngaol. Al ovqtavq, Leiqaq bhai gail, ngal duq pheeq-a nail ngaol.

32 Miltsaq dai khi lovphail khaoqbhaoq bhai Hiltiv nail jeq-e khe ul-a nail ngaol" dai, ge bhiq-a nail ngaol.

33 Yaqkov neq, aivq nail yaqyov juq bhai daoq ge gaq-al nee ngal-aq, aivq nail aqkhil iljial kovtavq bhai bavq dav-a nail nee ovqtavq, haoqnao nao saq nail aqhaq gaol khi, aivq nail aqphiq aqbhal juq nee mail jaol lai-a nail ngaol.