Dov-ail 2
Maolseiq doevq lee-a nail ganl
1 Aq yanq al yanq bhai, Leiqbhil nail jeq-e pevq nail yaqyov-aq teevq gaq neq, Leiqbhil nail jeq-e yaqmai-aq teevq gaq bhai hevq-a nail ngaol.
2 A bhai nee ngal-aq, aivq nail khaqma yaq ceiv lai khi yaqyov teevq gaq ya-a nail ngaol. Yaqyov al gaq neq, al jaiq-ail meeq nail bhai, aivq nail aqma ya moel-u phao, bhala hail heeq bhee dai, tsiq uvq-a nail ngaol.
3 Aivq nail aqma neq, yaqyov al gaq bhai maq tsiq-uvq nia nail, kev lal-a nail bhaq da nee, neeqkeiv-i mail kavjiav teevq jiav jievq khi, teivqnav dai khi, aqbhaol khaqjiq-i mail leivq tsoiq-a nail ngaol. A bhai nee ngal-aq, yaqyov al gaq bhai kavjiav nail lavqkhoel bhai tsiq bhoel khi, Nal-eil laoljaol daolbhaq khe doevq nail lunl aqkhaoq doevq nail bha tsiq thaq-ai lai-a nail ngaol.
4 Yaqyov al gaq nail al-ivq neq, mao-ail maq eq nail aqduq bhai jaol khi yaqnoil al gaq bhai khul pevq lal nail meeq dai, hel daiq-a nail ngaol.
5 A bhai nee ngal-aq, Phaqlaol nail yaqmiq neq, aqmaol jiivq nail dai khi, laoljaol bha yavq kha lee-a nail ngaol. Aivq nee teevq gaq khe-ai lee thaq nail, aivq bhai hel daiq phail nail yaqkav juq neq, daolbhaq bhai gailkhaol tsao tsao-ail, aivq bhai daonq nail ngaol. Phaqlaol nail yaqmiq al gaq lunl aqkhaoq nail gaoltsi khe jiav nail kavjiav bhai ya moel-u phao, aivq nail yaqkav yaqmai-aq teevq gaq bhai khoel khi bhi he dov lai-a nail ngaol.
6 Phaqlaol nail yaqmiq kavjiav al jiav bhai phao daiq-u phao, yaqbeiv teevq gaq nioil thail thaiq nail bhai, ya moel-a nail ngaol. Al heel ngel-i mail aivq yaqbeiv al gaq bhai gaoq haq nail lavqkhoel nee, "Niil neq, mal dil Heiqbhail nail tsaol-aq nail yaqbeiv teevq gaq nial" dai, ge-a nail ngaol.
7 Aq-u phao, yaqbeiv al gaq nail al-ivq neq, Phaqlaol nail yaqmiq nail aqjail bha jiiv bal laivq khi, "Naoq nail haqbhoil Heiqbhail nail yaqmai-aq teevq gaq aivq bhai bhi tsu nail galduq, ngal ya hal pov naol laiq" dai, nal daiq bhiq-a nail ngaol.
8 Phaqlaol nail yaqmiq iqsanl, "Oeq, khul-ail yaoq" dai, ge bhiq-a nail ngaol. A bhai nee ngal-aq, al-ivq al gaq, ail khi mail, yaqbeiv al gaq nail aqma khul lavq bhiq-a nail ngaol.
9 Aq-u phao, Phaqlaol nail yaqmiq neq, "Yaqbeiv niil gaq bhai ngaq nail haqbhoil aqtsil bhi cuvq yaoq. Ngal naoq bhai aqphoiq bivq naol" dai, yaqbeiv nail aqma bhai, ge bhiq-a nail ngaol. Al heel ngel-i mail, aqma al gaq yaqbeiv al gaq bhai ilkhaol bha tsiq kol laivq khi, aqtsil bhi cuvq-a nail ngaol.
10 Yaqyov al gaq yovkav micil eeq lal-u phao, aivq nail aqma neq, Phaqlaol nail yaqmiq nail aqlavq bhai av bhiq khi aivq nail yaq bhi pevq ail-a nail ngaol. "Ngal neq, aivq bhai ulcuvq nee tsiq dov bhiq-a nail ngaol" dai, Phaqlaol nail yaqmiq ge khi yaqyov al gaq bhai Maolseiqa dai, mil bhiq-a nail ngaol.
Maolseiq Iljiltuv nee mail tsaoq dov-a nail ganl
11 Aqkovq mao dai maoq lal khi, Maolseiq yovkav eeq lal-u phao, aivq nail tsaol-aq jaol nail bha nalga lai khi aqyu juq nl kav khoeq dee dee nail bhai hel daiq-a nail ngaol. Aq-u phao, Iljiltuv nail tsaol-aq teevq gaq-i mail, aivq nail jeq-e pevq nail Heiqbhail nail tsaol-aq teevq gaq bhai deeq bhiq nail bhai iqsanl, ya moel-a nail ngaol.
12 Al heel ngel-i mail, aivq neq, a phao nia phao hel daiq khi teevq gaq iqsanl mail maq moel nail ngel-i mail, Iljiltuv nail tsaol-aq al gaq bhai deeq heivq khi tsalhail-i mail bheq pheeq-ail ceevq-a nail ngaol.
13 Haoqnao n n-gaol teevq n aivq-i mail gaoq tsao dol leevq-u phao, Heiqbhail nail tsaol-aq nvq gaq deeq pheel jaq nail bhai ya moel-a nail ngaol. Aivq neq, iqmoeq deeq thaq nail gaq bhai, "Khul khi mail yovqgavq nail tsaol-aq aqtsaoq bhai deeq bhiq nail-aiq" dai, nal daiq bhiq-a nail ngaol.
14 Aq-u phao, tsaol-aq al gaq, "Nv juq nail ganl bhai yalkhaq dal dai, khaq sil gaq naoq bhai ganl bivq-ai lavq thaq nail-aiq. Naoq-i mail Iljiltuv nail tsaol-aq heivq-a nail khe-ai, ngaq bhai gail, gaoq heivq movq nail laiq" dai, ge kovq bhiq-a nail ngaol. A bhai nee ngal-aq, Maolseiq neq, aivq-i mail nl-a nail ganl yu heeq nia gil-aoq thaq nial dai, noeq khi gee sil lal bhiq-a nail ngaol.
15 Phaqlaol neq, ganl al ganl bhai ya gaiq-u phao, Maolseiq bhai heivq nail dai khi mail, lai jai-a nail ngaol. Thail hai ngaol-aoq, Maolseiq neq, Mildeiqanq nail milkhaoq bhai jaol-ail nail dai khi, Iljiltuv milkhaoq nee mail tsaoq dol aivq-a nail ngaol. A bhai kev ail-u phao, lovduq teevq duq nail aqjail bhai jaol deel khi jaol-a nail ngaol.
16 Aq-u phao, Mildeiqanq nail milkhaoq bhai jaol nail philma teevq gaq nail yaqmiq sivq gaq neq, aivq nail aqbhu nail yaol khi mail civqmeiv bhai ulcuvq bhi daol nail galduq laoqkhaiq bhai ulcuvq keivq bhee lee-a nail ngaol.
17 Thail hai ngaol-aoq, yaol lovq nail teevq pav ga nav juq neq, yaqmiq al juq bhai the dov bhiq thaq nail ngaol. Aq-u phao, Maolseiq neq, thul lal khi yaqmiq al juq phao jaol nail lavqkhoel, yaol dai khi civqmeiv bhi daol nail haqbhoil aivq ulcuvq iqsanl keivq khi mail, bhi daol-a nail ngaol.
18 Yaqmiq al juq aivq nail aqbhu Leiqyuqlavb jaol nail bha kovq kev lai-u phao, aqyu juq nail aqbhu, "Yaq n n-gaol neq, khul khi mail ilkhaol bha nav mav-ail kovq kev lal-a nail-aiq" dai, nal daiq bhiq-a nail ngaol.
19 Yaqmiq al juq ge nail: "Iljiltuv nail tsaol-aq teevq gaq nv juq bhai, yaol lovq nail juq nail aqlavq nee bhi jel-ail lavq-a nail nee ovqtavq, yaol dai khi civqmeiv bhi daol nail haqbhoil nv juq bhai ulcuvq iqsanl keivq lavq-a nail ngaol" dai, ge kovq bhiq-a nail ngaol.
20 Aq-u phao, aqyu juq nail aqbhu Leiqyuqlav ge nail: "Tsaol-aq al gaq niil aq-il khaq bha jaol nail-aiq. Khul khi mail aivq bhai bhi jaol-ail ceevq-a nail-aiq. Ngadao nee aoq bhi jaq tavq nail galduq, aivq bhai khul-ail yaoq" dai, ge bhiq khi khoel gai aivq-a nail ngaol.
21 A bhai nee ngal-aq, Maolseiq neema tsaq nail lavqkhoel philma al gaq nee mail jaol lee khi, aivq nail yaqmiq Siqphaollav bhai bhi hevq-a nail ngaol.
22 A bhai nee ngal-aq, Siqphaollav neq, yaqyov teevq gaq tsiq-a nail ngaol. Aq-u phao, Maolseiq ge nail: "Ngal neq, yu nail milkhaoq bha daq-i pevq nail ngaol" dai, ge khi, aivq nail yaqyov bhai Geiqlaqsonqc dai, mil bhiq-a nail ngaol.
23 Mee nia kovq jel ail-u phao, Iljiltuv nail heeqphaq al gaq sil-a nail ngaol. Thail hai ngaol-aoq, Ilsaqleiqlav nail tsaol-aq neq, yaqkav ya jiovq-ai haq nail ngel-i mail, meel-ai haq nail ngaol. Aqyu juq yaqkav ya jiovq nail doevqyeel nee mail, ya jel-ail nail galduq, aqyu juq-i mail gul nail aqthel neq, Miqyail jaol nail bha kev lai-a nail ngaol.
24 Miqyail neq, aqyu juq-i mail meel nail aqthel bhai ya gaiq-u phao, Aqbhaqlaqhaq, Ilcav khi mail Yaqkov nee mail jaq-ai thaq nail daoqma saljial bhai noeq moel lal bhiq-a nail ngaol.
25 Ilsaqleiqlav nail tsaol-aq juq-i mail ya daq nail bhi khoeq bhi jiovq-a nail phaq bhai aivq moel khi khul ya nl nail dai, heeq nia-a nail ngaol.