Dov-ail 3
Heeqphaq Miqyail Maolseiq bhai tsel-a nail ganl
1 Maolseiq neq, aivq nail tsaolmaoq Mildeiqanq nail philma pevq nail Yeiqdaqlaol nail civqmeiv khi yaol juq bhai lovq lovq-ail jaol-u phao, haqtsoiq haqyal nee thel laiq khi Haolleiqbhaqa dai, khul nail Miqyail nail gaoqjaoq bha thel kev laivq-a nail ngaol.
2 Jaol duq al duq bhai, Miqyail nail nqtavq gaqkhoel neq, jiavbuv nail gaoltsi bhai miqjaq bhaol nail lavqkhoel nee, Maolseiq bhai bhi moel-a nail ngaol. Jiavbuv al neq, miqjaq bhaol khi mail ngaol-aoq, maq poiv col laivq nail bhai, Maolseiq ya moel-a nail ngaol.
3 Al heel ngel-i mail, aivq neq: "Ngal aqjail bhai jiiv bal laivq khi, noeq-u maq dov nail al phaq, khul khi mail maq poiv jal laiq nial nail meeq dai, hel daiq lai la" dai, noeq-a nail ngaol.
4 Maolseiq aqjail-ai jiiv bal lavq nail bhai Heeqphaq Miqyail moel nia-u phao, jiavbuv gaoltsi nee mail, "Maolseiq-ol, Maolseiq-ol" dai, khul-a nail ngaol. Aq-u phao Maolseiq neq, "Ngal niai jaol naol" dai, ge kovq bhiq-a nail ngaol.
5 Miqyail ge nail: "Aqjail bhai thaq jiiv bal lavq. Naoq-i mail thul phaol-nq thaq nail miltsaq neq, meeq nail haol nail ngel-i mail, naoq nail saiqnaov loev yaoq.
6 Ngal neq, naoq nail aqbhu nail Miqyail, Aqbhaqlaqhaq nail Miqyail, Ilcav nail Miqyail dai khi Yaqkov nail Miqyail pevq nail ngaol" dai, ge bhiq-a nail ngaol. Al hai ge nail daoq bhai Maolseiq ya gaiq-u phao, Miqyail bhai maq hel daiq tseq nail ngel-i mail, aivq nail maivphaoq bhai daq tsoiq-a nail ngaol.
7 Heeqphaq Miqyail aivq bhai gaoq ge bhiq-a nail: "Ngaq nail tsaol-aq juq, Iljiltuv milkhaoq bhai khoeq nail jiovq nail-ai ya daq nail bhai, ngal mal dil ya moel-aoq nail ngaol. Aqyu juq, Iljiltuv nail aqivq juq-i mail khoeq nail bhai ya daq-a nail bhaq da nee, aqyu juq-i mail gul gul-ail hal nail aqthel bhai, ngal ya gaiq-ao nail ngaol. Al ovqtavq, ngal aqyu juq-i mail haq nail aoq nail phaq bhai, heeq kivq nail ngaol.
8 Iljiltuv nail tsaol-aq juq nail aqlavq lavqkhoel nee, aqyu juq bhai hevq dov khi, miltsaq mil meeq pevq nail nee ovqtavq, miltsaq gaoq-an nail aqduq bhai ngal hevq kev bhiq nail galduq, ngal yavq kha lee-aoq nail ngaol. Jaol duq al dao neq, niaoqnel aqtsil dai khi bhaiqtsil bhaiqeel il nail aqduq pevq nail ngaol. Al ovqtavq, a bhai neq, Khaqnanq nail jeq-e, Hiltiv nail jeq-e, Aqmaolliv nail jeq-e, Pheiqliqsil nail jeq-e, Hilwil nail jeq-e dai khi Yeiqbhulsil nail jeq-e juq jaol nail ngaol.
9 Ilsaqleiqlav nail tsaol-aq juq-i mail gul nail aqthel bhai ngal ya gaiq-ao nail ngaol. Aqyu juq bhai Iljiltuv nail tsaol-aq-i mail aqkav kav dai, khoeq bhiq jiovq bhiq nail bhai gail, ngal ya moel-aoq nail ngaol.
10 Al heel ngel-i mail, ail yaoq. Ngaq nail tsaol-aq pevq nail Ilsaqleiqlav nail tsaol-aq juq bhai, Iljiltuv milkhaoq nee hevq dov nail galduq, naoq bhai heeqphaq Phaqlaol jaol nail bha ngal khoel gai aivq naol" dai, Maolseiq bhai ge bhiq-a nail ngaol.
11 Thail hai ngaol-aoq, Maolseiq neq, Miqyail bhai gaoq ge bhiq-a nail: "Ngal neq, khal heel nail tsaol-aq ngel-i mail, Phaqlaol jaol nail bha bhi ail lavq khi Ilsaqleiqlav nail tsaol-aq bhai Iljiltuv milkhaoq nee mail ya hevq dov-ail nail-aiq" dai, ge kovq bhiq-a nail ngaol.
12 Miqyail ge nail: "Ngal naoq-ai nee mail jaol nail ngaol. Ngal neq, naoq bhai khoel gai aivq-a nail gaq pevq nail ngaol dai, salkhil dov lal dai, naol tsaol-aq al juq bhai, Iljiltuv milkhaoq nee hevq dol lavq gaq haq neq, nuljuq gaoqjaoq niil jaoq-ai ngaq bhai uqhuq ya thaoq lal nail ngaol" dai, ge bhiq-a nail ngaol.
13 Maolseiq gaoq ge nail: "Ngal neq, Ilsaqleiqlav nail tsaol-aq juq jaol nail bha gaoq kev-ail khi, 'Nul juq nail aqphiq aqbhal nail Miqyail neq, ngaq bhai nul juq jaol nail bha bhi lee lavq-a nail ngaol' dai, gaoq ge bhiq ail khi ngaol-aoq, aqyu juq 'Miqyail al gaq nail aqmil neq, khaq sil gaq' dai, ngaq bhai gaoq nal daiq lavq-u phao, ngal khal hai ya ge kovq bhiq nail-aiq" dai, Miqyail bhai nal daiq bhiq-a nail ngaol.
14 Miqyail gaoq ge nail: "Ngal pevq nail khe-ai, ngal pevq nail ngaol. 'Ngal neq, ngal pevq nail ngaol dai, mil-ai thaq nail gaq neq, ngaq bhai nul juq jaol nail bha bhi lee lavq-a nail ngaol' dai, Ilsaqleiqlav nail tsaol-aq juq bhai ge bhiq yaoq" dai, Maolseiq bhai ge bhiq-a nail ngaol.
15 Teevq pov Miqyail gaoq ge nail: "Ilsaqleiqlav nail tsaol-aq juq bhai niail hai ge bhiq yaoq: 'Ngal neq, nul juq nail aqphiq aqbhal juq nail Miqyail, Aqbhaqlaqhaq nail Miqyail, Ilcav nail Miqyail, Yaqkov nail Miqyail dai ge nail Yaweib dai khul nail Heeqphaq Miqyail neq, ngaq bhai nul juq jaol nail bha bhi lee lavq-a nail ngaol.
Yawei dai khul nail aqmil al neq,
khaq mao kev dai,
ngaq nail aqmil pevq nail ngaol.
Teevq yeel nee teevq yeel
ngaq nail aqmil bhai
al hai ya khul nail ngaol' dai, ge bhiq yaoq.
16 Naol ail khi, Ilsaqleiqlav nail tsaol-aq juq nail aqivq aqtsu juq bhi jil lal gaq haq neq, aqyu juq bhai niail hai ge bhiq yaoq: 'Nul juq nail aqphiq aqbhal juq nail Miqyail, Aqbhaqlaqhaq nail Miqyail, Ilcav nail Miqyail, Yaqkov nail Miqyail dai ge nail Heeqphaq Miqyail neq, ngaq bhai bhi moel lavq khi niail hai ge lavq-a nail ngaol: "Ngal nul juq jaol nail bha hel daiq kev lee-u phao, Iljiltuv nail tsaol-aq nul juq-ai khal hai nl bhiq-a nail ganl bhai, ya moel-a nail ngaol.
17 Iljiltuv milkhaoq bhai ya daq nail haq nail aoq nail nee ngal hevq dov khi, Khaqnanq nail jeq-e, Hiltiv nail jeq-e, Aqmaolliv nail jeq-e, Pheiqliqsil nail jeq-e, Hilwil nail jeq-e, Yeiqbhulsil nail jeq-e niil juq nail jaol duq pevq nail niaoqnel aqtsil dai khi bhaiqtsil bhaiqeel il nail aqduq bhai, hevq thaq-ail nail galduq, ngal saljial jaq naol" dai, Miqyail ngaq bhai ge lavq-a nail ngaol' dai, aqyu juq bhai ge bhiq ail yaoq.
18 Ilsaqleiqlav nail aqivq aqtsu juq naoq nail daoq bhai nal daiq nail lavqkhoel nee, aqyu juq nee mail, Iljiltuv nail heeqphaq jaol nail bha aol lai khi, 'Nv juq neq, Heiqbhail nail tsaol-aq juq nail Heeqphaq Miqyail nv juq bhai bhi moel lavq-a nail ngaol. Al heel ngel-i mail, aivq bhai laol bhiq lai nail galduq, haqtsoiq haqyal bha hail n bhee dai, bhi dov lai lavq yaoq' dai, hal lai yaoq.
19 Thail hai ngaol-aoq, Iljiltuv nail heeqphaq neq, aivq nee maq tsil gaq kav jaiq nail gaq-i mail maq khal nl bhiq-u kev dai, nul juq bhai maq bhi dov lai lavq-ail dai, ngal heeq kivq nail ngaol.
20 Al heel ngel-i mail, ngaq nail aqlavq bavq dil khi, noeq-u maq dov nail phaq nl nail lavqkhoel, Iljiltuv nail milkhaoq yaq juq bhai ngal deeq bhiq nail ngaol. Aq-u pultavq Iljiltuv nail heeqphaq neq, nul juq bhai bhi ail lavq nail ngaol.
21 Iljiltuv tsaol-aq juq Ilsaqleiqlav nail tsaol-aq juq bhai neema tsaq dai, ngal nl bhiq nail ngel-i mail, aqyu juq dov ail-u phao, khul maq oil dai, aqnieivq nieivq kav-ail maq ya dov-ail.
22 Ilsaqleiqlav nail yaqmai-aq juq yaoq gaq yaoq-ao nee, yovqgavq nail il-uvq iltavq dai khi yovqgavq nail ilkhaol bhai dav lee-a nail daq-i yaqmai-aq juq khe, phul heel goe nail phaq dai khi, aqgaq aqdoi juq hal yaoq. Nul juq neq, nul juq nail yaqmiq yaqyov juq bhai, phul, heel, goe nail phaq dai khi aqgaq aqdoi juq bhi doi nail bhaq da nee, Iljiltuv meenq yaq juq nail ildaoq maoqgaiq juq bhai nul juq tsai kha-a nail pevq nail ngaol" dai, Maolseiq bhai ge bhiq-a nail ngaol.