Dov-ail 4
Maolseiq neq, noeq-u maq dov nail phaq nl nail bhaqaoq ya-a nail ganl
1 Maolseiq ge nail: "Aqyu juq neq, ngaq bhai neema maq thaq tsaol-ail, ngaq nail daoq bhai maq nal daiq dai, jaol nail nee ovqtavq, 'Naol neq, Heeqphaq Miqyail nee moel-a naol dai, ge nail neq, maq pevq nia-ail' dai, ge lal haq neq, ngal khal hai ya khi nail-aiq" dai, Miqyail bhai ge bhiq-a nail ngaol.
2 "Naoq nail aqlavq bhai khul jiav nail-aiq" dai, Heeqphaq Miqyail nal daiq bhiq-u phao, "Joiqniaoq jiav nail ngaol" dai, Maolseiq ge kovq bhiq-a nail ngaol.
3 Heeqphaq Miqyail neq, "Miltsaq bhai liv kha gai-aivq yaoq" dai, daoq bivq-a nail ngaol. Al heel ngel-i mail, liv kha gai aivq-u phao, joiqniaoq al khaoq neq, eellel pevq-ail khi, Maolseiq tsaoq-a nail ngaol.
4 Aq-u phao, Heeqphaq Miqyail neq, "Naoq nail aqlavq gaol tsaoq khi, aivq nail daoqmiq bhai nieivq thaiq yaoq" dai, ge bhiq-a nail khe-ai, Maolseiq gail, nieivq thaiq khi, aivq nail aqlavq bhai kev lal-u phao neq, joiqniaoq gaoq pevq ail-a nail ngaol.
5 Heeqphaq Miqyail gaoq ge bhiq-a nail: "Al hai nl bhiq yaoq. Nl haq neq, aqyu juq nail aqphiq aqbhal juq nail Miqyail pevq nail Aqbhaqlaqhaq nail Miqyail, Ilcav nail Miqyail, Yaqkov nail Miqyail bhai, naol mal dil moel thaq nial dai, aqyu juq neema thaq tsaol lal nail ngaol" dai, ge bhiq-a nail ngaol.
6 A bhai nee ngal-aq, Heeqphaq Miqyail neq, "Naoq nail aqlavq, naoq nail neema khe phailkhaoq kov-uvq bhai gaoq bhoel yaoq" dai, ge bhiq-u phao, aivq nail aqlavq tsaoq bhoel khi gaoq dov-u phao, ngail khe-ai phul-nq phul-nq dai, niaoqbhaoq daol lal bhiq-a nail ngaol.
7 Miqyail neq, "Naoq nail aqlavq, naoq nail neema khe phailkhaoq lavqkhoel bhai gaoq tsaoq bhoel yaoq" dai, gaoq ge bhiq-a nail ngaol. Maolseiq gail, aivq nail aqlavq neema bhai gaoq bhoel khi gaoq tsaoq dov-u phao, aqlavq neq, aqlil khe-ai gaoq pevq lal bhiq-a nail ngaol.
8 Heeqphaq Miqyail gaoq ge nail: "Ilsaqleiqlav nail tsaol-aq juq neq, naoq bhai neema maq thaq tsaol dai, naoq-i mail, iqmoeq khe pov bhi heeq bhi moel nail salkhil bhai, maq hav bhoel haq neq, haoqnao khe pevq lal-a nail bhi heeq bhi moel nail phaq bhai, neema thaq tsaol lal-ail jaol-aq.
9 Thail hai maq ngel mail, bhi heeq bhi moel-a nail al nvq phaq bhai, neema maq thaq tsaol, naoq nail daoq bhai maq nal daiq mail gaoq jaol haq neq, Nal-eil laoljaol khe ulcuvq micil keivq khi, miltsaq aqgee bhai hoel dav yaoq. Ulcuvq al neq, miltsaq aqgee bhai aqsivq pevq-ail nail ngaol" dai, ge bhiq-a nail ngaol.
10 Thail hai ngaol-aoq, Maolseiq Heeqphaq Miqyail bhai gaoq ge bhiq-a nail: "Heeqphaq-ol, ngal neq, daoq ge nail phao, gaq bhaq nail ngaol. Gaq-u nee mail gail, ge tseq thail tseq nail maq jiav. Naol ngaq bhai ge lavq khi ngaol-aoq, niil aq-il gail, maq jiav-ai haq-al. Ngal neq, moeqthaoq moevqlal aqliq liq khi, daoq ge nail theq dee dee nail gaq pevq nail ngaol" dai, ge bhiq-a nail ngaol.
11 Aq-u phao, Heeqphaq Miqyail aivq bhai ge bhiq-a nail: "Tsaol-aq yaq bhai daoq bhi ge nia dai maqkhaiq, maq bhi ge nia dai maqkhaiq, khaq sil gaq-i mail nl-a nail-aiq. Naqkhaol gaiq nia dai maqkhaiq, maq gaiq nia dai maqkhaiq, khaq sil gaq-i mail nl khi, maivneev moel nia dai maqkhaiq, maq moel nia dai maqkhaiq, khaq sil gaq-i mail nl-a nail-aiq. Heeqphaq Miqyail pevq nail ngaq-i mail nl-a nail maq ngel-ail laiq.
12 Naol niil aq-il, ail yaoq. Naoq-i mail khal ge nail nee teevq gaq khe-ai, ngal jaol nail ngaol. Naol khul dai ya ge nail dai, ngal cavq bhiq cov bhiq jaol nail ngaol" dai, ge bhiq-a nail ngaol.
13 Thail hai ngaol-aoq, Maolseiq neq, "Heeqphaq-ol, ngaq bhai maq ngel nail, yu teevq gaq gaq bhai bhi ail yaoq" dai, thaoq hal-a nail ngaol.
14 Aq-u phao, Heeqphaq Miqyail Maolseiq bhai neema phail lal bhiq khi ge nail: "Naoq bhai Leiqbhil nail jeq-e pevq nail naoq nail algao Aqlonq jaol nail maq ngel-ail laiq. Aivq neq, daoq aqmeeq-ai ge nia nail teevq gaq pevq nail dai, ngal heeq kivq nail ngaol. Aivq neq, lavqkhiq tsail nail lavqkhoel, naoq-ai nee ya moel dai, nia lal thail thaiq nail ngaol.
15 Naoq-i mail ya ge nail daoq, aivq bhai ge bhiq yaoq. Ngal nul nvq gaq-i mail ge nail daoq nee mail teevq gaq khe-ai jaol khi, nul nvq gaq khul ya nl nail dai, cavq bhiq cov bhiq nail ngaol.
16 Aqlonq neq, Ilsaqleiqlav nail tsaol-aq bhai ge bhiq heeq phaq-ail tsaq nail bhai naoq nail jiq dan aivq ge nail ngaol. Aivq neq, naoq nail moeqthaoq nail jiq dan pevq khi, naoq-i mail khal ge nail iqsanl mail bhai, Miqyail nail daoq khe-ai hav bhoel nail ngaol.
17 Joiqniaoq thoil khaoq, naoq nail aqlavq bhai banvq thaq gai yaoq. Ngaq-i mail naoq bhai khal ge nail khe-ai, joiqniaoq thoil khaoq-i mail noeq-u maq dov nail phaq ya nl nail ngaol" dai, ge bhiq-a nail ngaol.
Iljiltuv nail milkhaoq bhai Maolseiq kovq lal-a nail ganl
18 A bhai nee ngal-aq, Maolseiq neq, aivq nail tsaolmaoq Yeiqtaqlaol jaol nail bha kovq lai khi, "Iljiltuv nail milkhaoq bhai jaol nail ngaq nail aqivq jaqbheq juq aqdoevq doevq-ai haq-al meeq dai, hel daiq-ail nail galduq, ngaq bhai bhi ail lavq yaoq" dai, hal lai-u phao, Yeiqtaqlaol neq, "Neesal ovq nail lavqkhoel nee ail yaoq" dai, ge bhiq-a nail ngaol.
19 Mildeiqanq milkhaoq nee mail, Maolseiq maq dov-ail nail iqmoeq bhai, Heeqphaq Miqyail aivq bhai ge bhiq-a nail: "Iljiltuv milkhaoq bha kovq-ail yaoq. Naoq bhai heivq movq-ai bhiq nail juq iqsanl mail, sil gil-aoq nail ngaol" dai, ge bhiq-a nail ngaol.
20 Al heel ngel-i mail, Maolseiq neq, aivq nail khaqma dai khi yaqyov juq bhai moeqphaq laljieiv nail kovtavq bhai bhi jeeq-a nail nee ovqtavq, aivq nail aqlavq bhai neq, Miqyail nail joiqniaoq bavq khi Iljiltuv nail milkhaoq phao dov ail-a nail ngaol.
21 Heeqphaq Miqyail neq, Maolseiq bhai niail hai ge bhiq-a nail ngaol: "Naol Iljiltuv nail milkhaoq bhai kovq kev ail-u phao, Phaqlaol jaol nail bha lai khi, ngaq-i mail naoq bhai bhaqaoq bivq-a nail khe-ai, noeq-u maq dov nail phaq iqsanl mail, nl bhiq yaoq. Thail hai ngaol-aoq, ngal aivq bhai neema bhi gaol nail ngel-i mail, aivq Ilsaqleiqlav nail tsaol-aq bhai maq bhi dov-ail lavq-ail.
22 Aq-u phao, naol neq, Phaqlaol bhai niail hai ge bhiq yaoq: 'Heeqphaq Miqyail ge nail: Ilsaqleiqlav nail tsaol-aq neq, ngaq nail uqbhao yaqyov ya pevq nail ngaol.
23 Ngaq nail uqbhao yaqyov khe-ai dul nail ngaq nail tsaol-aq juq ngaq bhai uqhuq thaoq nia dai, bhi dov-ail nail galduq, ngal daoq bivq khi mail ngaol-aoq, naol neq, maq bhiq dov ail-al. Al heel ngel-i mail, ngal neq, naoq nail uqbhao yaqyov bhai ya heivq naol' dai, ge bhiq-ail yaoq" dai, ge bhiq-a nail ngaol.
24 Maolseiq aqyu phaqyaq Iljiltuv nail milkhaoq bhai ail thail thaiq-u phao, nqkiv livma gaq naq naq nail aqduq bhai, Heeqphaq Miqyail neq, Maolseiq nee mail moel khi, aivq bhai heivq nail dai khi, nl bhiq-a nail ngaol.
25 Aq-u phao, Maolseiq nail khaqma Siqphaollav neq, lovmav jiailbav-i mail, aivq nail yaqyov nail bavkov uqjaq oev bhiq-a nail nee ovqtavq, bavkov uqjaq al-i mail, Maolseiq nail aqkhil bhai leivq khi, ge bhiq-a nail: "Niil aq-il naol neq, aqsivq nee tavq nail ngaq nail yovjil ngaol" dai, ge bhiq-a nail ngaol.
26 Al heel ngel-i mail, Heeqphaq Miqyail neq, Maolseiq bhai phaiq bhiq-a nail ngaol. "Aqsivq nee tavq nail ngaq nail yovjil pevq lal-a nail" dai, Siqphaollav-i mail ge-a nail ganl al neq, bavkov uqjaq oev nail ganl nee tavq nail ngaol.
27 A bhai nee ngal-aq, Heeqphaq Miqyail, Aqlonq bhai, "Maolseiq nee moel lai nail galduq, haqtsoiq haqyal bha lai yaoq" dai, ge bhiq-a nail ngaol. Al heel ngel-i mail, Miqyail nail gaoqjaoq bha aivq Maolseiq bhai ya moel-u phao, phal thaiq khi mail moeq saol saol bhiq-a nail ngaol.
28 Maolseiq neq, aivq bhai khoel-ai lee lavq-a nail Heeqphaq Miqyail-i mail bhi ge lavq-a nail phaq dai khi, bhi nl lavq-a nail noeq-u maq dov nail phaq iqsanl mail, Aqlonq bhai ge bhiq gil-a nail ngaol.
29 A bhai nee ngal-aq, Maolseiq khi mail Aqlonq neq, Iljiltuv nail milkhaoq bhai kovq-ail khi, Ilsaqleiqlav nail aqivq aqtsu juq bhai khul jil-a nail ngaol.
30 Aqlonq neq, Heeqphaq Miqyail-i mail Maolseiq bhai daoq bivq-a nail iqsanl mail, Ilsaqleiqlav nail aqivq aqtsu juq bhai ge bhiq khi, Maolseiq neq, noeq-u maq dov nail phaq aqyu juq nail sivtavq bhai nl daiq bhiq-u phao,
31 aqyu juq Maolseiq khi mail Aqlonq bhai, Heeqphaq Miqyail-i mail bhi lee thaq nial dai, neema thaq tsaol lal-a nail ngaol. Heeqphaq Miqyail neq, Ilsaqleiqlav nail tsaol-aq juq nail galduq, khaoq laol khi aqyu juq-i mail ya daq thail thaiq nail haq nail aoq nail phaq bhai, moel-aoq naol dai, aqyu juq ya gaiq-u phao, peevqceevq kovdoiq doiq nail lavqkhoel nee, gaol beiv khi uqhuq thaoq-a nail ngaol.