Dov-ail 5
Heeqphaq Phaqlaol jaol nail bha Maolseiq khi mail Aqlonq ail kev-a nail ganl
1 A bhai nee ngal-aq, Maolseiq dai khi Aqlonq neq, Phaqlaol jaol nail bha aol lai khi "Ilsaqleiqlav nail Heeqphaq Miqyail niail hai ge nail ngaol: 'Ngaq nail tsaol-aq juq haqtsoiq bha dov lai khi, ngaq bhai tsiq eeq nail aqbhee lav sav nia nail galduq, bhi dov lai yaoq' dai, daoq bivq lavq-a nail ngaol" dai, aivq bhai ge bhiq-a nail ngaol.
2 Phaqlaol neq, "Heeqphaq Miqyail dai, ge nail al gaq neq, khaq sil gaq. Ngal khul khi mail Miqyail al gaq nail daoq nal daiq khi, Ilsaqleiqlav nail tsaol-aq bhai ya phaiq bhiq nail-aiq. Miqyail al gaq bhai, ngal maq heeq kivq nail ngel-i mail, Ilsaqleiqlav nail tsaol-aq bhai ngal maq phaiq bhiq-ail" dai, ge kovq bhiq-a nail ngaol.
3 Aqyu nvq gaq ge bhiq-a nail: "Heiqbhail nail tsaol-aq nail Miqyail neq, nv juq bhai moel lavq-a nail ngaol. Al heel ngel-i mail, nv juq nail Heeqphaq Miqyail bhai laol bhiq kivq nail galduq haqtsoiq bha hail n bhee dai bhi dov-ail lavq yaoq. Nv juq al hai dov-ail khi, maq ya laol bhiq ail haq neq, Heeqphaq Miqyail neq, nv juq bhai nalgoel teevq phaq phaq nee maqkhaiq, maq ngel haq neq, thaoma-i mail maqkhaiq, ya bhi heivq nail ngaol" dai, hal lai-a nail ngaol.
4 Thail hai ngaol-aoq, Phaqlaol ge nail: "Maolseiq khi Aqlonq-ol, khul khi mail nul nvq gaq, tsaol-aq niil juq bhai ganl naq lai dai, nl nail-aiq. Yovqgavq nail ganl yovqgavq, gaoq nl kovq-ail yaoq.
5 Hel daiq yaoq. Nul nvq gaq neq, milkhaoq niil khaoq khe jaol nail, nul juq nail tsaol-aq niil dai, mao nail bhai ganl naq lai dai, nl il" dai, ge bhiq-a nail ngaol.
6 Aq-u n-gaol, Phaqlaol neq, yaqkav juq bhai bhi hel daiq phail thaq nail Iljiltuv nail aqivq aqtsu juq dai khi, al nail kov-uvq khe bhi hel daiq phail thaq nail Ilsaqleiqlav nail aqivq aqtsu juq bhai iqsanl, daoq niail hai bhi bivq ail-a nail ngaol:
7 "Ilsaqleiqlav nail tsaol-aq maqov teivq nail galduq govheeq maq ya bivq-ail. Aqyu juq bhai aqyu juq bhi hal pov yaoq.
8 Thail hai ngaol-aoq, maqov aqheeq neq, gaq-u phao khe nee, maq ya bhi theq jaiq-ail. Khul nail ganl kev lee gaoq maq ya bhi theq jaiq-ail. Aqyu juq neq, ganl maq nl nul nail aqdoil juq pevq nail ngel-i mail, 'Nv juq nail Miqyail bhai laol lai nail haqbhoil, bhi lai lavq yaoq' dai, hal nail ngaol.
9 Aqyu juq bhai ganl mao dai bhi nl yaoq. Al hai bhi nl haq neq, aqyu juq-ai goiqbhaoq bhaoq lal nail daoq bhai maq nal daiq yaoq-aol. Ganl nl nail gail, maq ceiv lai dai, nl lal nail ngaol" dai, ge bhiq-a nail ngaol.
10 Yaqkav juq bhai bhi hel daiq phail thaq nail Iljiltuv nail aqivq aqtsu juq dai khi al nail kov-uvq khe bhi hel daiq phail thaq nail Ilsaqleiqlav nail aqivq aqtsu juq ail khi, aqyu juq nail tsaol-aq juq bhai niail hai ge bhiq-a nail: "Phaqlaol ge nail: 'Ngal neq, nul juq bhai govheeq maq bivq yaoq-aol.
11 Nul juq yovqgavq bhai yovqgavq govheeq khal ya lal nail khe, ya hal pov jil nail ngaol. Thail hai ngaol-aoq, maqov aqheeq neq, gaq-u phao khe nee maq ya bhi theq jaiq-ail' dai, daoq bivq-ai leevq-a nail ngaol'" dai, ge gaiq bhiq-a nail ngaol.
12 Al heel ngel-i mail, Ilsaqleiqlav nail tsaol-aq juq neq, Iljiltuv nail milkhaoq doi doi dai ail khi, govheeq hal pov ail-a nail ngaol.
13 Yaqkav juq bhai bhi hel daiq phail thaq nail Iljiltuv nail aqivq aqtsu juq ge nail: "Nul juq aq-u govheeq ya khi, yaoq n yaoq n nee mail, maqov aqheeq teivq dov lao-ao nail khe-ai, niil aq-il gail, ya teivq dov nail ngaol" dai, ge bhiq khi, Ilsaqleiqlav nail tsaol-aq juq bhai aqkav kav dai, khoel bhiq-a nail ngaol.
14 Al ovqtavq, Iljiltuv nail tsaol-aq aqivq aqtsu juq-i mail, aqyu nail kov-uvq khe bhi hel daiq phail thaq nail Ilsaqleiqlav nail aqivq aqtsu juq bhai, deeq deeq-ail khi, niail hai ge bhiq-a nail ngaol: "Milgaol khi yaq n n-gaol neq, nul juq khul khi mail yaoq n yaoq n khe dai, maqov maq teivq dov kivq-a nail-aiq" dai, nal daiq bhiq-a nail ngaol.
15 Aq-u phao, Ilsaqleiqlav nail aqivq aqtsu juq, Phaqlaol jaol nail bha aol lai khi, niail hai ge bhiq lai-a nail ngaol: "Naoq nail yaqkav juq bhai khul khi mail thail hai bhi nl-a nail-aiq.
16 Naoq nail yaqkav juq bhai govheeq maq bivq lavq nail nee ovqtavq, yaqkav bhai bhi hel daiq phail thaq nail aqivq aqtsu juq neq, 'Maqov teivq-o' dai, khoel thail thaiq khi, nv juq bhai iqsanl ya bhi deeq-a nail ngaol. Thail hai ngaol-aoq, niil neq, nv juq laiq nail maq ngel-ail, naoq nail tsaol-aq juq laiq nail teevq-eel ngaol" dai, ge bhiq-a nail ngaol.
17 Thail hai ngaol-aoq, Phaqlaol neq, "Nul juq, ganl maq nl nul dai, aqdoil aqjaiq-ail doil nail ngel-i mail, 'Nv juq nail Heeqphaq Miqyail bhai bhi laol lai lavq yaoq' dai, ge thail thaiq nail ngaol.
18 Niil aq-il, ganl nl duq bha kovq-ail yaoq. Nul juq bhai govheeq maq bivq-ail. Thail hai ngaol-aoq, maqov aqheeq neq, maq ya bhi the-ail dai, ya teivq dov nail ngaol" dai, ge bhiq-a nail ngaol.
19 Ilsaqleiqlav nail tsaol-aq phao khe bhi hel daiq phail thaq nail aqivq aqtsu juq, maqov aqheeq neq, maq theq-ail dai, ya teivq dov naol dai, ge nail bhai ya gaiq-u phao, aqyu juq bhai mal dil haq nail aoq nail thel lee nail bhai, hel daiq moel-a nail ngaol.
20 Aqyu juq Phaqlaol jaol nail nee mail dov lee-u phao, aqyu juq bhai daonq thail thaiq nail Maolseiq khi mail Aqlonq bhai ya moel-a nail ngaol.
21 Aqyu juq ge nail: "Phaqlaol dai khi, aivq nail ganl nl nail aqivq aqtsu juq nv juq bhai bhe lal heeq phaq-ail, nul nvq gaq nl-a nail ngel-i mail, Heeqphaq Miqyail neq, nul nvq gaq bhai yalkhaq dal bhiq dei-eiq. Nv juq bhai bhi heivq nail galduq nul nvq gaq neq, yu nail aqlavq lavqkhoel bhai thaoma bavq bhiq-a nail ngaol" dai, ge bhiq-a nail ngaol.
Maolseiq Miqyail bhai nal daiq-a nail ganl
22 A bhai nee ngal-aq, Maolseiq neq, Heeqphaq Miqyail jaol nail bha kovq lal khi ge nail: "Heeqphaq-ol, naol khul khi mail tsaol-aq niil juq bhai haq nail aoq nail phaq bhi kev lee nail-aiq. Naol khul khi mail ngaq bhai khoel gai-aivq lavq-a nail-aiq.
23 Naoq nail aqmil bhai juq nail lavqkhoel, Phaqlaol jaol nail bha aol lai-u n-gaol nee daq-n khi, aivq neq, naoq nail tsaol-aq juq bhai khal nl movq ail nl bhiq-a nail ngaol. Thail hai ngaol-aoq, naol neq, aqyu juq bhai khul gail maq tsao jao-ai bhiq-al" dai, geeqlaoq hal lai-a nail ngaol.