Dov-ail 6
Heeqphaq Miqyail saljial gaoq jaq-a nail ganl
1 Aq-u phao, Heeqphaq Miqyail neq, Maolseiq bhai ge bhiq-a nail: "Ngal Phaqlaol bhai khal hai nl bhiq nail dai, naol ya moel nail ngaol. Ngaq nail bhaqaoq eeq nail aqlavq-i mail, ngaq nail tsaol-aq al juq bhai bhi ail dov nail galduq, ngal nl bhiq khi tsaol-aq al juq bhai aivq nail milkhaoq nee mail bhi the dov nail ngaol" dai, ge bhiq-a nail ngaol.
2 Miqyail neq, Maolseiq bhai gaoq ge bhiq-a nail: "Ngal neq, Yawei dai khul nail, Heeqphaq Miqyail pevq nail ngaol.
3 Aqbhaqlaqhaq, Ilcav dai khi Yaqkov bhai ngal neq, iqsanl nail kovtavq bhai uv thaiq nail bhaqaoq eeq nail Miqyaila ngaol dai, bhi moel khi ngaol-aoq, ngaq nail aqmil neq, Yawei dai khul nail ngaol dai, aqyu juq bhai maq phao daiq bhiq-al.
4 Al ovqtavq, aqyu juq daq-i pevq khi jaol-ail ceevq-a nail Khaqnanq milkhaoq neq, aqyu juq bhai bivq naol dai, ngal saljial jaq gaq-ao nail ngaol.
5 Niil aq-il, ngal Iljiltuv nail milkhaoq lavqkhoel khe yaqkav ya jiovq nail Ilsaqleiqlav nail tsaol-aq juq-i mail meel nail aqthel bhai, ya gaiq-a nail ngel-i mail, ngaq nail saljial bhai gaoq saol-nvq dov lal-aoq nail ngaol.
6 Al heel ngel-i mail, naol neq, Ilsaqleiqlav nail tsaol-aq juq jaol nail bha ail khi niail hai ge bhiq ail yaoq. Ngal neq, Heeqphaq Miqyail pevq nail ganl bhai maqkhaiq, Iljiltuv nail milkhaoq bhai yaqkav jiovq nail nee, nul juq bhai bhi jel-ail nail ganl bhai maqkhaiq, ngaq nail aqlavq gaol tsaoq khi, bhaqaoq eeq nail lavqkhoel, Iljiltuv milkhaoq bhai yalkhaq dal nail phaq nee mail, ngal nul juq bhai ul kovq nail ganl bhai maqkhaiq, ge bhiq ail yaoq.
7 Ngal neq, nul juq nail Miqyail pevq khi, ya hao nul juq bhai ngaq nail tsaol-aq pevq lal dai, tsel dov nail ngaol. Aq-u phao, ngal nul juq bhai Iljiltuv tsaol-aq nail aqlavq nee mail hevq jel lavq-a nail Heeqphaq Miqyail pevq laoq thaq nail ganl bhai, nul juq heeq nia lal nail ngaol.
8 Aqbhaqlaqhaq, Ilcav khi mail Yaqkov bhai ngal bivq naol dai, saljial jaq-ai thaq nail milkhaoq bhai, ngal nul juq-ai hevq bhoel laivq bhiq khi milkhaoq al khaoq nul juq bhai bivq naol. Ngal neq, Heeqphaq Miqyail pevq nail ngaol' dai, ge bhiq ail yaoq" dai, Maolseiq bhai ge bhiq-a nail ngaol.
9 Maolseiq neq, Miqyail-i mail ge bhiq-a nail khe-ai, Ilsaqleiqlav nail tsaol-aq juq bhai ge gaiq bhiq khi mail ngaol-aoq neq, tsaol-aq al juq yaqkav jiovq nail ngel-i mail, ganl aqkav kav dai ya nl khi, al jaiq-ail gaqdoil doil nail bhaq da nee, maq nal daiq-ail.
10 Al heel ngel-i mail, Heeqphaq Miqyail neq, Maolseiq bhai ge bhiq-a nail:
11 "Iljiltuv nail heeqphaq Phaqlaol jaol nail bha aol lai khi, 'Ilsaqleiqlav nail tsaol-aq naoq nail milkhaoq nee mail bhi dov-ail yaoq' dai, ge bhiq yaoq" dai, ge bhiq-a nail ngaol.
12 Thail hai ngaol-aoq, Maolseiq neq, Miqyail bhai, "Ngaq nail tsaol-aq pevq nail Ilsaqleiqlav nail tsaol-aq juq gail, ngaq nail daoq maq nal daiq lavq nail bhai neq, daoq aqsaov saov dai, maq ge kivq nail ngaq nail daoq bhai Phaqlaol neq, khal hai khi gaoq nal daiq lavq nail-aiq" dai, ge kovq bhiq-a nail ngaol.
13 Heeqphaq Miqyail neq, Maolseiq khi mail Aqlonq bhai daoq niail hai bivq-a nail ngaol: "Nul nvq gaq, Iljiltuv nail heeqphaq Phaqlaol jaol nail bha dai khi Ilsaqleiqlav nail tsaol-aq juq jaol nail bha, ail yaoq. Al ovqtavq, Iljiltuv nail milkhaoq khe jaol nail Ilsaqleiqlav nail tsaol-aq juq bhai iqsanl, hevq dol lavq yaoq" dai, daoq bivq-a nail ngaol.
Maolseiq dai khi Aqlonq nail jeq-e jaq-a nail aqceevq
14 Niil neq, Ilsaqleiqlav nail jeq-e jaq-a juq nail phaqyaq mayaq juq ngaol. Yaqkov nail yaqyov iqmoeq khal moeq khe gaq pevq nail Lulbheiq nail yaqyov juq neq, Haqnol, Phaqlul, Heiqsaqlonq dai khi Khaqmil niil liq gaq ngaol. Niil juq neq, Lulbheiq nail jeq-e juq ngaol.
15 Silmiqonq nail yaqyov juq neq, Yiqmuqlal, Yaqminq, Aolhav, Yaqkhinq, Saolhaq dai khi Khaqnanq nail yaqmai-aq nee mail bhao-a nail Saollav, niil kovq gaq ngaol. Niil juq neq, Silmiqonq nail jeq-e pevq nail juq ngaol.
16 Leiqbhil nail jeq-e nail haoqgavq lavqkhoel khe ge-ai thaq nail, aivq nail yaqyov juq neq, Geiqlaqsonq, Kaolhav dai khi Meiqlaqlil niil hail gaq ngaol. Leiqbhil neq, 137 kovq bhee dai, doevq-a nail ngaol.
17 Geiqlaqsonq nail yaqyov nvq gaq neq, Lilbhaqnil dai khi Siqmeil ngaol. Aqyu nvq gaq neq, yovqgavq nail jeq-e yovqgavq bhao nail ngaol.
18 Khaolhav nail yaqyov juq neq, Aqmaqlanq, Ilsaqhaq, Heiqbhonq dai khi Ulsiqlal niil liq gaq ngaol. Khaolhav neq, 133 kovq bhee dai doevq-a nail ngaol.
19 Meiqlaqlil nail yaqyov nvq gaq neq, Maqhaqliq dai khi Mulsil ngaol.
Niil juq iqsanl mail neq, Leiqbhil nail jeq-e nail haoqgavq lavqkhoel khe gevq-ai thaq nail Leiqbhil nail jeq-e juq nail daoq thaoq pevq nail ngaol.
20 Aqmaqlanq neq, aivq nail aqbhu nail jaqbheq Yaolkheiqbhail bhai hevq khi yaqyov Aqlonq dai khi Maolseiq bhai bhao-a nail ngaol. Aqmaqlanq neq, 137 kovq bhee dai, doevq-a nail ngaol.
21 Ilsaqhaqlav nail yaqyov juq neq, Khaollav, Neiqphaiq dai khi Silkhaqlil niil hail gaq ngaol.
22 Ulsiqlav nail yaqyov juq neq, Milseiqlav, Eillaqsaqphaq dai khi Siltaqlil, niil hail gaq ngaol.
23 Aqlonq neq, Aqmilnaqdal nail yaqmiq Naqsonq nail jaqbheq Eillilseiqbha nee hevq khi, bhao-a nail yaqyov juq neq, Naqdal, Aqbhilhuv, Eilleiqaqsaq dai khi Iltaqmaqlav, niil liq gaq ngaol.
24 Khaollav nail yaqyov juq neq, Aqsiq, Eillaqkaqnav dai khi Aqbhiqaqsa, nii hail gaq ngaol. Niil juq neq, Khaollav nail jeq-e khe daoqthaoq pevq nail ngaol.
25 Aqlonq nail yaqyov Eilleiqaqsaq neq, Pultillal nail yaqmiq bhai hevq khi yaqmai-aq al gaq neq, Philneiqhav dai, khul nail yaqyov teevq gaq bhao-a nail ngaol.
Tsaol-aq niil juq neq, Leiqbhil nail jeq-e nail haoqgavq lavqkhoel khe gevq-ai thaq nail aqivq juq pevq nail ngaol.
26 "Ilsaqleiqlav nail tsaol-aq juq bhai Iljiltuv nail milkhaoq nee mail hevq dov-ail yaoq" dai, Heeqphaq Miqyail-i mail daoq bivq-a nail bhai ya daq-a nail gaq neq, Maolseiq khi mail Aqlonq al nvq gaq pevq nail ngaol.
27 Ilsaqleiqlav nail tsaol-aq juq bhai, Iljiltuv nail milkhaoq nee mail hevq dol-aivq yaoq" dai, , Iljiltuv nail heeqphaq Phaqlaol bhai bhi hal lai-a nail gaq iqsanl, Maolseiq khi mail Aqlonq al nvq gaq pevq nail ngaol.
Maolseiq khi mail Aqlonq bhai Heeqphaq Miqyail daoq bivq-a nail ganl
28 Maolseiq Iljiltuv nail milkhaoq bha jaol-u phao, Heeqphaq Miqyail aivq bhai daoq niail hai bivq-a nail ngaol.
29 Aivq ge nail: "Ngal neq, Heeqphaq Miqyail pevq nail ngaol. Ngal naoq bhai daoq khal bivq nail khe-ai, Iljiltuv nail heeqphaq Phaqlaol bhai ge bhiq ail yaoq" dai, daoq bivq-a nail ngaol.
30 Thail hai ngaol-aoq, Maolseiq ge nail: "Ngal neq, daoq aq saov saov dai, maq ge kivq-ail dai, naol heeq nia nail ngaol. Phaqlaol neq, ngaq-i mail ge nail daoq bhai, khal hai khi gaoq nal daiq lavq nail-aiq" dai, Heeqphaq Miqyail bhai ge kovq bhiq-a nail ngaol.