Dov-ail 7
Aqlonq nail joiqniaoq eellel pevq ail-a nail ganl
1 Heeqphaq Miqyail neq, Maolseiq bhai ge bhiq-a nail: "Naol Phaqlaol nail sivtavq bha kev lai-u phao, ngal naoq bhai, Miqyail khe-ai maqkhaiq, naoq nail algao Aqlonq bhai neq, Miqyail nail haqbhoil ge dan nail gaq khe-ai maqkhaiq, nl bhiq nail ngaol.
2 Ngaq-i mail naoq bhai khal ge bhiq-a nail daoq juq iqsanl mail, Aqlonq bhai ya ge bhiq nail ngaol. Ilsaqleiqlav nail tsaol-aq juq Iljiltuv milkhaoq nee mail dov-ail kivq nail galduq, aivq neq, Phaqlaol bhai ya ge bhiq nail ngaol.
3 Thail hai ngaol-aoq, ngal Phaqlaol nail neema bhi gaol nail ngaol. Al ovqtavq, bhi heeq bhi moel nail phaq dai khi, noeq-u maq dov nail mee nia phaq, Iljiltuv nail milkhaoq bhai bhi kev lee khi ngaol-aoq,
4 aivq naoq nail daoq maq nal daiq mail jaol nail ngaol. Aq-u phao, Iljiltuv milkhaoq bhai ngaq nail aqlavq-i mail aqyu juq bhai khoeq bhiq jiovq bhiq dee dee khi, ngaq nail tsaol-aq pevq nail Ilsaqleiqlav nail tsaol-aq munl munl ma bhai, Iljiltuv milkhaoq nee mail ngal hevq dov nail ngaol.
5 Iljiltuv nail tsaol-aq juq bhai, ngaq nail aqlavq bavq dil khi, Ilsaqleiqlav nail tsaol-aq bhai hevq dov-u phao, ngal neq, Heeqphaq Miqyail pevq nail ganl, Iljiltuv nail tsaol-aq juq heeq nia lal nail ngaol" dai, ge bhiq-a nail ngaol.
6 Maolseiq khi mail Aqlonq neq, Heeqphaq Miqyail-i mail ge bhiq-a nail khe-ai, Phaqlaol bhai ge bhiq lai-a nail ngaol.
7 Aqyu nvq gaq, Phaqlaol jaol nail bha aol lai khi ge bhiq-u phao, Maolseiq neq, aqkovq 80 kovq bhee khi Aqlonq neq, 83 kovq bhee-aiq nail ngaol.
8 Heeqphaq Miqyail neq, Maolseiq khi mail Aqlonq bhai ge bhiq-a nail:
9 "Phaqlaol naoq bhai, 'Noeq-u maq dov nail phaq nl daiq lavq yaoq' dai, ge lal-u phao, naol neq, Aqlonq bhai: 'Phaqlaol nail sivtavq-ai naoq nail joiqniaoq liv kha gai-aivq yaoq' dai, ge bhiq yaoq. Joiqniaoq neq, eellel pevq-ail nail ngaol" dai, ge bhiq-a nail ngaol.
10 Maolseiq dai khi Aqlonq neq, Heeqphaq Miqyail-i ge bhiq-a nail khe-ai, Phaqlaol nail sivtavq bhai aol lai khi nl-a nail ngaol. Aqlonq neq, aivq nail joiqniaoq bhai Phaqlaol dai khi aivq nail ganl nl nail aqivq aqtsu juq nail sivtavq bhai liv kha gai aivq-u phao, joiqniaoq al khaoq neq, eellel pevq ail-a nail ngaol.
11 Aq-u phao, Phaqlaol neq, aivq nail neenoeq neekha aol nail tsaol-aq juq dai khi bhoilmaoq juq bhai khul khi, aqyu juq nail gailkovq daoq-i mail Aqlonq-i mail nl-a nail khe-ai, bhi nl dov-ai leevq-a nail ngaol.
12 Tsaol-aq al juq aqyu juq nail joiqniaoq iqsanl, liv kha gai aivq-u phao, eellel pevq ail-a nail ngaol. Thail hai ngaol-aoq, Aqlonq nail eellel-i mail tsaol-aq al juq nail eellel bhai moevq bhoel gai aivq-a nail ngaol.
13 Thail hai ngaol-aoq, Phaqlaol neq, Heeqphaq Miqyail-i mail ge nail khe-ai, Maolseiq dai khi Aqlonq-i mail ge nail daoq bhai maq nal daiq dai, neema aqgaol gaol khi jaol-a nail ngaol.
Ulcuvq nee mail aqsivq pevq ail-a nail ganl
14 A bhai nee ngal-aq, Heeqphaq Miqyail Maolseiq bhai ge bhiq-a nail: "Phaqlaol nail neema neq, al jaiq-ail gaol nail ngaol. Aivq neq, Ilsaqleiqlav nail tsaol-aq bhai maq phaiq bhiq dai, jaol-a nail ngaol.
15 Al heel ngel-i mail, nqhao naq mav-ail, Phaqlaol Nal-eil ulcuvq laoljaol bha yavq kha ail-u phao, aivq jaol nail bha lai yaoq. Eellel pevq ail-a nail joiqniaoq al khaoq bavq khi mail, laoljaol nail daolbhaq bhai thul phaol khi aivq nee mail moel lai yaoq.
16 Aivq bhai niail hai ge bhiq yaoq: 'Heiqbhail nail tsaol-aq juq nail Miqyail pevq nail Heeqphaq Miqyail neq, ngaq bhai niail hai bhi ge lee lavq-a nail ngaol: "Ngaq nail tsaol-aq juq haqtsoiq haqyal bha dov lai khi, ngaq bhai uqhuq thaoq nia dai, bhi dov lai yaoq" dai, ge khi ngaol-aoq, niil aq-il kev dai, naol neq, Miqyail nail daoq bhai maq nal daiq mail jaol nail ngaol.
17 Al heel ngel-i mail, Heeqphaq Miqyail niail hai ge nail ngaol: 'Ngal Heeqphaq Miqyail pevq nail ganl naoq bhai bhi moel naol. Hel daiq dei-eiq, naoq nail aqlavq khe banvq thaq nail joiqniaoq thoil khaoq-i mail Nal-eil laoljaol bhai deeq-u phao, ulcuvq neq, aqsivq pevq-ail nail ngaol.
18 Laoljaol khe delgil juq sil gil khi, ulcuvq aqnil nil lal nail bhaq da nee Iljiltuv nail tsaol-aq juq neq, ulcuvq daol nail maq jiav dai, pevq-ail nail ngaol' dai, Phaqlaol bhai ge bhiq yaoq" dai, Maolseiq bhai ge bhiq-a nail ngaol.
19 A bhai nee ngal-aq, Heeqphaq Miqyail Maolseiq bhai gaoq ge bhiq-a nail: "Aqlonq bhai niail hai ge bhiq yaoq: 'Joiqniaoq bavq khi, Iljiltuv nail milkhaoq khe khal jiav nail laoljaol laol ma, laoljaol laol yaq, eelkhoeq haon dai khi, ulcuvq eelteev iqsanl nail kovtavq bhai aqsivq bhi pevq-ail nail haqbhoil, joiqniaoq al bavq dil yaoq. Milkhaoq teevq khaoq khaoq lao khe jiav nail ulcuvq iqsanl mail, aqsivq pevq gil-ail khi, aqbhaol nail khaoqanq khe aol nail ulcuvq bha kev dai maqkhaiq, lovmav nail khaoqanq khe aol nail ulcuvq bha kev dai maqkhaiq, aqsivq pevq-ail nail ngaol' dai, ge bhiq yaoq" dai, Maolseiq bhai ge bhiq-a nail ngaol.
20 Maolseiq dai khi Aqlonq neq, Heeqphaq Miqyail-i mail ge bhiq-a nail khe-ai, nl-a nail ngaol. Aqlonq neq, Phaqlaol dai khi aivq nail ganl nl nail aqivq aqtsu juq nail sivtavq nee joiqniaoq bavq dil khi laoljaol bhai deeq-u phao, laoljaol khe ulcuvq neq, aqsivq pevq ail-a nail ngaol.
21 Al ovqtavq, laoljaol khe jaol nail delgil juq sil gil-a nail ngaol. Ulcuvq, aqnil al jaiq-ail nil nail bhaq da nee, Iljiltuv nail milkhaoq khe jaol nail tsaol-aq juq neq, ulcuvq al bhai maq daol nia-ail. Iljiltuv nail milkhaoq khaoq lao doi dai, khaq bhai gail aqsivq-i mail bhee lal-a nail ngaol.
22 Thail hai ngaol-aoq, Iljiltuv nail bhoilmaoq juq iqsanl, aqyu juq nail gailkovq daoq-i mail aqyu nvq gaq khe-ai nl nia nail bhaq da nee Phaqlaol neq, neema aqgaol gaol-ai haq nail ngaol. Heeqphaq Miqyail-i mail ge bhiq-a nail khe-ai, Phaqlaol neq, Maolseiq dai khi Aqlonq nail daoq maq nal daiq mail, jaol-a nail ngaol.
23 Aivq neq, pevq lal-a nail ganl al laiq bhai, khul nail eeq nail ganl teevq laiq dai, maq noeq mail, aivq nail haol bha kovq lai-a nail ngaol.
24 Iljiltuv nail tsaol-aq juq neq, laoljaol khe ulcuvq maq daol nia nail ngel-i mail, laoljaol daolbhaq teevq hel bhai, ulcuvq lovduq duq-a nail ngaol.
Phaqyaq bhi dov lal-a nail ganl
25 Heeqphaq Miqyail-i mail ulcuvq bhai aqsivq bhi pevq ail-a nail sivq n jel ail-a nail ngaol.