Dov-ail 8
Phaqyaq bhi dov lal-a nail ganl
1 A bhai nee ngal-aq, Heeqphaq Miqyail neq, Maolseiq bhai ge bhiq-a nail: "Phaqlaol jaol nail bha kovq lai khi, aivq bhai niail hai ge bhiq yaoq: 'Heeqphaq Miqyail niail hai ge nail ngaol: 'Ngaq bhai uqhuq thaoq nia dai, ngaq nail tsaol-aq bhai bhi dov lai yaoq.
2 Naol aqyu juq bhai maq phaiq bhiq haq neq, ngal naoq nail milkhaoq teevq khaoq khaoq lao bhai phaqyaq bhi dov lal khi, bhi suq saq lal nail ngaol.
3 Nal-eil laoljaol bhai gail, phaqyaq-i mail bhi bhee lal nail ngaol. Phaqyaq al juq neq, laoljaol nee mail dav lal khi, naoq nail haol lavqkhoel sunq dai khi iq thaiq duq bha kev dai maqkhaiq, dai khi, naoq nail ganl nl nail aqivq aqtsu juq dai khi milkhaoq yaq juq nail ilkhaol bhai maqkhaiq, naoq nail aoq jal nl jaq duq dai khi, khaqmul lav sav nail aqduq bhai maqkhaiq, dav lal nail ngaol.
4 Naol dai khi naoq nail ganl nl nail aqivq aqtsu juq nail kovtavq bhai iqsanl, phaqyaq juq dav dal lavq nail ngaol' dai, Phaqlaol bhai ge bhiq lai yaoq" dai, Maolseiq bhai ge bhiq-a nail ngaol.
5 A bhai nee ngal-aq, Heeqphaq Miqyail Maolseiq bhai gaoq ge bhiq-a nail: "Aqlonq bhai niail hai ge bhiq yaoq: 'Naoq nail joiqniaoq bavq dil khi, Iljiltuv milkhaoq khe jiav nail laoljaol juq nail kovtavq bhai maqkhaiq, eelkhoeq haon juq nail kovtavq bhai maqkhaiq, ngaqkha juq nail kovtavq bhai maqkhaiq, bavq dav khi phaqyaq juq-i mail bhi bhee lal yaoq'" dai, ge bhiq-a nail ngaol.
6 Al heel ngel-i mail, Aqlonq neq, aivq nail aqlavq bavq dil khi, Iljiltuv milkhaoq bhai jiav nail ulcuvq kovtavq bhai bavq dav-a nail ngel-i mail, phaqyaq mao dai dov lal khi, Iljiltuv nail milkhaoq teevq khaoq khaoq lao, phaqyaq-i mail bhee gil lal-a nail ngaol.
7 Thail hai ngaol-aoq, bhoilmaoq juq iqsanl, aqyu juq nail gailkovq daoq-i mail phaqyaq bhi dov lal khi, Iljiltuv nail milkhaoq bha bhi dav lal-a nail ngaol.
8 Aq-u phao, Phaqlaol neq, Maolseiq khi mail Aqlonq bhai khul khi, "Ngaq nail jaol duq dai khi ngaq nail milkhaoq nee mail phaqyaq niil juq dov-ail dai, Heeqphaq Miqyail bhai geeqlaoq hal lavq yaoq. Thail hai nl lavq haq neq, naoq nail tsaol-aq juq, Heeqphaq Miqyail bhai laol bhiq lai nia dai, ngal bhi dov-ail naol" dai, ge bhiq-a nail ngaol.
9 Maolseiq ge kovq bhiq-a nail: "Naol dai khi naoq nail ganl nl nail aqivq aqtsu juq jaol nail nee maqkhaiq, naoq nail tsaol-aq juq jaol nail ilkhaol nee maqkhaiq, phaqyaq dov-ail khi Nal-eil laoljaol bha taivq-ail bhi jaol-ail nail haqbhoil, ngal geeqlaoq khaq mao ya hal lavq nail-aiq dai, naol aqyanq ge movq haq neq, ge lavq yaoq" dai, ge bhiq-a nail ngaol.
10 Phaqlaol ge nail: "Niaohao hal lavq yaoq" dai, ge bhiq-a nail ngaol. Aq-u phao, Maolseiq ge nail: "Naol ge nail khe-ai, geeqlaoq hal bhiq nail ngaol. Nv juq nail Heeqphaq Miqyail khe-ai dul nail yaoq gaq yaoq maq jaol-ail dai, naol ya heeq kivq nail ngaol.
11 Phaqyaq thoil juq naol dai khi naoq nail ganl nl nail aqivq aqtsu juq jaol nail nee maqkhaiq, naoq nail tsaol-aq juq jaol nail ilkhaol nee maqkhaiq, dov-ail khi laoljaol bhai taivq-ail bhi jaol-ail nail ngaol" dai, ge bhiq-a nail ngaol.
12 A bhai nee ngal-aq, Maolseiq dai khi Aqlonq neq, Phaqlaol nail sivtavq nee mail dov ail-a nail ngaol. Maolseiq neq, phaqyaq al juq Phaqlaol jaol nail nee dov-ail nail haqbhoil, Heeqphaq Miqyail bhai gul khi geeqlaoq hal-a nail ngaol.
13 Heeqphaq Miqyail neq, Maolseiq-i mail hal nail khe-ai, nl bhiq-a nail ngel-i mail, ilkhaol khe jaol nail phaqyaq, gaoqkhail khe jaol nail phaqyaq dai khi, daiyal khe jaol nail phaqyaq juq bhai bhi sil gil-a nail ngaol.
14 Aq-u phao, Iljiltuv nail tsaol-aq juq neq, phaqyaq aqsil bhai gov bhoi-a nail ngaol. Phaqyaq aqsil al bhaq da nee, milkhaoq teevq khaoq khaoq lao-ail, aqbuvq aqnil nil dee dee nail ngaol.
15 Thail hai ngaol-aoq, milkhaoq micil jaol meeq nail bhai Phaqlaol moel-u phao, Heeqphaq Miqyail-i mail ge nail khe-ai, neema aqgaol gaoq gaol lal khi Maolseiq khi mail Aqlonq nail daoq maq nal daiq dai, jaol-a nail ngaol.
Haqtsoiq nail yaolthaol bhi dov lal-a nail ganl
16 A bhai nee ngal-aq, Heeqphaq Miqyail Maolseiq bhai gaoq ge bhiq-a nail: "Aqlonq bhai niail hai ge bhiq yaoq: 'Naoq nail joiqniaoq miltsaq bhai deeq yaoq. Iljiltuv nail miltsaq khe khal jiav nail khaqpheeq khaqlail neq, haqtsoiq nail yaolthaol pevq lal naol' dai, ge bhiq yaoq" dai, ge bhiq-a nail ngaol.
17 Al heel ngel-i mail, Aqlonq neq, aivq nail joiqniaoq-i mail, miltsaq bhai deeq-a nail ngaol. Aq-u phao, Iljiltuv nail miltsaq khe khal jiav nail khaq pheeq khaqlail juq iqsanl mail haqtsoiq nail yaolthaol pevq lal khi, tsaol-aq juq khi mail jaiqyaq juq bhai toe cul laivq-a nail ngaol.
18 Iljiltuv nail milkhaoq khe jaol nail bhoilmaoq juq neq, aqyu juq nail gailkovq daoq-i mail haqtsoiq nail yaolthaol bhi pevq lal nail galduq lav sav khi ngaol-aoq, maq pevq lal-al. Haqtsoiq nail yaolthaol juq neq, tsaol-aq dai khi jaiqyaq juq bhai toe cul laivq-a nail ngaol.
19 Aq-u phao, bhoilmaoq juq neq, Phaqlaol bhai, "Ganl niil ganl neq, Heeqphaq Miqyail-i mail nl thaq nail ganl pevq nail niil" dai, ge bhiq-a nail ngaol. Thail hai ngaol-aoq, Heeqphaq Miqyail-i mail ge bhiq-a nail khe-ai, Phaqlaol nail neema neq, aqgaol gaoq gaol lal khi Maolseiq khi mail Aqlonq nail daoq maq nal daiq mail, jaol nail ngaol.
Yaolheel bhi dov lal-a nail ganl
20 A bhai nee ngal-aq, Heeqphaq Miqyail Maolseiq bhai gaoq ge bhiq-a nail: "Nqhao naq mav-ail, laoljaol bha Phaqlaol bhai moel lai khi aivq bhai niail hai ge bhiq lai yaoq: 'Heeqphaq Miqyail ge nail: Ngaq nail tsaol-aq juq ngaq bhai uqhuq thaoq nia dai, bhi dov-ail yaoq.
21 Maq bhi dov-ail haq neq, naoq nail kovtavq bhai maqkhaiq, naoq nail ganl nl nail aqivq aqtsu juq nail kovtavq bhai maqkhaiq, naoq nail tsaol-aq juq nail kovtavq bhai maqkhaiq nul juq nail ilkhaol juq bhai maqkhaiq, ngal yaolheel munl munl ma phaiq-ai lavq nail ngaol. Iljiltuv nail tsaol-aq juq nail ilkhaol dai khi miltsaq teevq bhee bhai, yaolheel-i mail bhi bhee lal nail ngaol.
22 Thail hai ngaol-aoq, aqyanq al yanq bhai ngaq nail tsaol-aq juq jaol nail Gaolsinq nail miltsaq bhai ngal thaq-ail ceevq nail ngel-i mail, jaol duq al duq bhai yaolheel teevq maol gail, maq bhi moel-ail. Thail hai nl nail bhaq da nee, Heeqphaq Miqyail pevq nail ngal neq, milkhaoq niil khaoq nail gaoltsi bhai jaol nail dai, nul juq ya heeq kivq nail ngaol.
23 Naoq nail tsaol-aq dai khi, ngaq nail tsaol-aq juq maq bhi dul lai dai, ngal tsel pav nail ngaol. Bhi heeq bhi moel nail niil laiq, niaohao ngal bhi moel nail ngaol dai, Heeqphaq Miqyail ge nail' dai, ge bhiq lai yaoq" dai, Maolseiq bhai ge bhiq-a nail ngaol.
24 A bhai nee ngal-aq, Heeqphaq Miqyail neq, aivq-i mail ge nail khe-ai, yaolheel nail munl munl ma bhai Phaqlaol nail haol bhai maqkhaiq, aivq nail ganl nl nail aqivq aqtsu juq nail ilkhaol bhai maqkhaiq, Iljiltuv milkhaoq khaoq lao bhai maqkhaiq, phaiq-ai lavq-a nail ngaol. Yaolheel al bhaq da nee miltsaq iqsanl mail neq, luq ail seil ail-a nail ngaol.
25 Aq-u phao, Phaqlaol neq, Maolseiq khi mail Aqlonq bhai khul khi: "Nul juq nail Miqyail bhai milkhaoq niil khaoq nail lavqkhoel bhai taivq-ail, laol bhiq yaoq" dai, ge bhiq-a nail ngaol.
26 Thail hai ngaol-aoq, Maolseiq ge kovq bhiq-a nail: "Thail hai maq nl kivq-ail. Nv juq nail Heeqphaq Miqyail-ai laol bhiq nail phaq bhai, Iljiltuv nail tsaol-aq juq neq, bhe-ai bhiq nail ngel-i mail, thail hai nl nail neq, maq tsaq-ail. Nv juq aqyu juq-i mail bhe nail phaq oil khi laol bhiq nail bhai, aqyu juq ya moel-u phao, nv juq bhai lovmav-i mail maq liv heivq lal-ail laiq.
27 Nv juq neq, nv juq nail Heeqphaq Miqyail-i mail daoq bivq-ai lavq thaq nail khe-ai, haqtsoiq bha hail n yaoqyal eq nail bha lai khi mail laol bhiq lai naol" dai, ge bhiq-a nail ngaol.
28 Phaqlaol ge nail: "Nul juq nail Heeqphaq Miqyail bhai haqtsoiq bha laol lai bhiq nia nail haqbhoil ngal bhi lai naol. Thail hai ngaol-aoq, eqyal bha maq ya dov lai-ail. Niil aq-il, ngaq nail haqbhoil geeqlaoq hal lavq yaoq" dai, ge bhiq-a nail ngaol.
29 Maolseiq ge kovq bhiq-a nail: "Niaohao kev lal-u phao, naoq-ai nee maqkhaiq, naoq nail ganl nl nail aqivq aqtsu juq nee maqkhaiq, naoq nail tsaol-aq juq nee maqkhaiq, yaolheel niil juq bhi dov-ail nail haqbhoil, ngal naoq nail sivtavq nee dov ail-u phao, teevq pov taivq-ail, Heeqphaq Miqyail bhai geeqlaoq hal bhiq nail ngaol. Thail hai ngaol-aoq, ngal naoq bhai savtivq niail hai bivq nail ngaol. Heeqphaq Miqyail bhai laol bhiq nail haqbhoil, Ilsaqleiqlav nail tsaol-aq juq bhai, bhi dov lai naol dai, ge khi ngaol-aoq, aq-il teevq pov maq bhi dov lai-ail dai, goiqbhaoq thaq gaoq bhaoq dei-eiq" dai, ge bhiq-a nail ngaol.
30 A bhai nee ngal-aq, Maolseiq neq, Phaqlaol jaol nail nee dov-ail khi Heeqphaq Miqyail bhai geeqlaoq hal-a nail ngaol.
31 Heeqphaq Miqyail neq, Maolseiq-i mail geeqlaoq hal-a nail khe-ai, Phaqlaol jaol nail nee maqkhaiq, aivq nail ganl nl nail aqivq aqtsu juq jaol nail nee maqkhaiq, aivq nail tsaol-aq juq jaol nail nee maqkhaiq, yaolheel teevq maol iqsanl, maq jail dai, bhi dov-ail gil-a nail ngaol.
32 Thail hai ngaol-aoq, Phaqlaol neq, neema gaoq gaol lal bhiq khi Ilsaqleiqlav nail tsaol-aq juq bhai maq bhi ail dov-al.