Dov-ail 9
Jaiqyaq juq bhi sil-a nail ganl
1 A bhai nee ngal-aq, Heeqphaq Miqyail neq, Maolseiq bhai niail hai gaoq ge bhiq-a nail ngaol: "Phaqlaol jaol nail bha kovq lai khi, aivq bhai niail hai ge bhiq yaoq: 'Heiqbhail tsaol-aq juq nail Miqyail pevq nail Heeqphaq Miqyail neq, daoq niail hai bivq-ai leevq-a nail ngaol: Ngaq nail tsaol-aq juq ngaq bhai uqhuq thaoq nia dai, aqyu juq bhai bhi dov lai yaoq.
2 Naol aqyu juq bhai maq bhi dov lai mail gaoq bhi jaol haq neq,
3 ngal nul juq nail moeqphaq, moeqphaq laljieiv, laol thao, yaol dai khi niaoqnel juq bhai Heeqphaq Miqyail nail aqlavq-i mail kav dee dee nail nalgoel nee bhi sil nail ngaol.
4 Thail hai ngaol-aoq, Heeqphaq Miqyail neq, Ilsaqleiqlav nail jaiqyaq juq dai khi Iljiltuv nail jaiqyaq juq bhai maq bhi dul lai dai, tsel pav nail lavqkhoel nee, Ilsaqleiqlav nail jaiqyaq juq teevq maol iqsanl mail maq ya sil ail'" dai, ge bhiq-a nail ngaol.
5 "Ngal niaohao al hai nl nail ngaol" dai, Heeqphaq Miqyail neq, aqyanq thaq bhao gaq-ao nail ganl Maolseiq bhai ge bhiq-a nail ngaol.
6 A bhai nee ngal-aq, haoqnao n n-gaol neq, Heeqphaq Miqyail-i mail ge-ai thaq nail khe-ai, nl bhiq-a nail bhaq da nee, Iljiltuv milkhaoq khe tsu nail jaiqyaq juq iqsanl mail sil gil-a nail ngaol. Thail hai ngaol-aoq, Ilsaqleiqlav nail jaiqyaq juq neq, teevq maol gail maq sil-al.
7 Phaqlaol neq, aivq nail ganl nl nail aqivq aqtsu juq bhai phaiq-ai laivq khi Ilsaqleiqlav nail jaiqyaq juq bhai bhi tsao daiq lai-u phao, jaiqyaq juq teevq maol gail maq sil thaq nail bhai, ya heeq nia-a nail ngaol. Thail hai ngaol-aoq, Phaqlaol nail neema neq, aqgaol gaoq gaol lal bhiq khi, Ilsaqleiqlav nail tsaol-aq juq bhai maq bhi dov lai dai, jaol thaq nail ngaol.
Heeqtsuq malyal bhi daol lal thaq nail ganl
8 A bhai nee ngal-aq, Heeqphaq Miqyail neq, Maolseiq khi mail Aqlonq bhai gaoq ge bhiq-a nail: "Khaoltsil khe jiav nail civqbaol khaqlail bhai lavq cuv teevq cuv dai, bheq yaoq. Al hai khi, Maolseiq neq, Phaqlaol nail sivtavq bhai civqbaol khaqlail al ya haiq dil nail ngaol.
9 Civqbaol khaqlail al neq, Iljiltuv nail milkhaoq teevq khaoq khaoq lao khaq pheeq khaqlail khe-ai, doi ail khi, tsaol-aq dai khi mail jaiqyaq juq nail aqmaol bhai heeqtsuq bhi tsuq lal nail ngaol" dai, ge bhiq-a nail ngaol.
10 Al heel ngel-i mail, aqyu nvq gaq neq, civqbaol khaqlail bheq khi mail. Phaqlaol nail sivtavq bhai thul phaol lai-a nail ngaol. Maolseiq neq, civqbaol khaqlail haiq dil-ai laivq-u phao, tsaol-aq dai khi jaiqyaq juq bhai heeqtsuq malyal daol lal bhiq-a nail ngaol.
11 Iljiltuv nail tsaol-aq juq bhai heeqtsuq malyal daol lal bhiq-u khe-ai, bhoilmaoq juq bhai gail heeqtsuq malyal daol lal bhiq-a nail ngel-i mail, aqyu juq Maolseiq nail sivtavq bhai maq jaol nia dai, pevq ail-a nail ngaol.
12 Thail hai ngaol-aoq, Heeqphaq Miqyail neq, Phaqlaol nail neema bhi gaol-a nail bhaq da nee, Heeqphaq Miqyail-i mail Maolseiq bhai ge bhiq-ai thaq nail khe-ai, Ilsaqleiqlav nail tsaol-aq juq bhai maq bhi dov-ail dai, bhi jaol-a nail ngaol.
Ollov bhi ga lee-a nail ganl
13 A bhai nee ngal-aq, Heeqphaq Miqyail Maolseiq bhai gaoq ge bhiq-a nail: "Nqhao naq mav-ail thul khi Phaqlaol nail sivtavq bhai jaol lai khi, aivq bhai niail hai ge bhiq yaoq: 'Heiqbhail tsaol-aq juq nail Miqyail pevq nail Heeqphaq Miqyail ge nail: "Ngaq nail tsaol-aq juq ngaq bhai uqhuq thaoq lal nia dai, bhi dov lai yaoq.
14 Maq bhi dov lai haq neq, miltsaq niil nail kovtavq bhai ngaq-ai kheel maq jaol-ail dai, naol ya heeq kivq nail haqbhoil, niil aq-il, naoq bhai maqkhaiq, naoq nail ganl nl nail aqivq aqtsu juq bhai maqkhaiq, naoq nail tsaol-aq juq bhai maqkhaiq, ngal haq dee aoq dee dee nail phaq phaiq-ai leevq nail ngaol.
15 Niil aq-il, ngaq nail aqlavq-i mail naol dai khi naoq nail tsaol-aq juq nail kovtavq bhai nalgoel bhi kev lee nail kheel nul-uq neq, nul juq iqsanl mail miltsaq niil nail kovtavq nee, luq-ail seil-ail gil nail ngaol.
16 Thail hai ngaol-aoq, miltsaq yaq juq iqsanl mail ngaq nail bhaqaoq bhai moel nia lal dai maqkhaiq, ngaq nail aqmil milkhaoq doi dai, gaiq doi ail dai maqkhaiq, ngal nul juq bhai al hai maq nl-ai haq-al.
17 Ngal nul juq bhai al hai maq nl khi ngaol-aoq, naol neq, ngaq nail tsaol-aq juq nail kovtavq bhai eeq nail heel nail dai noeq khi, aqyu juq bhai maq bhi dov lai dai bhi jaol-ai haq nail ngaol.
18 Al heel ngel-i mail, niaohao aqyanq niil yanq bhai Iljiltuv nail milkhaoq daq-n-u nee mail, teevq thal-iq gail maq aol lee daiq-a nail ollov aol nail maoq-aol thaol ma bhi aol lee nail ngaol.
19 Lavq tsail mail naoq nail jaiqyaq juq dai khi mail, naoq nail yaqkav juq bhai, daiyal nee dov lee khi, miltsaq phao cov pheeq-ai thaq nail jaol duq bha tsaoq bhoel laivq nail haqbhoil daoq bivq yaoq. Lavqniil phao khal jaol nail tsaol-aq juq dai khi jaiqyaq juq nail kovtavq bhai, ollov aol nail maoq-aol aol lee-u phao, ya sil gil nail ngaol" dai, ge bhiq-a nail ngaol.
20 Phaqlaol nail ganl nl nail aqivq aqtsu teevq pav ga nav juq neq, Heeqphaq Miqyail-i mail ge nail daoq bhai gee sil nail bhaq da nee, aqyu juq nail yaqkav dai khi jaiqyaq juq bhai cov pheeq-ai thaq nail aqduq bha bhi aol gil lai-a nail ngaol.
21 Thail hai ngaol-aoq, Heeqphaq Miqyail-i mail ge nail daoq bhai maq nal daiq nail aqivq aqtsu teevq pav ga nav juq neq, aqyu juq nail yaqkav dai khi jaiqyaq juq bhai daiyal doi dai, phaiq ha khi bhi jaol-a nail ngaol.
22 Aq-u phao, Heeqphaq Miqyail neq, Maolseiq bhai, "Iljiltuv milkhaoq teevq khaoq khaoq lao khe khal jaol nail tsaol-aq juq, jaiqyaq juq dai khi daiyal khe khal jiav nail aqbhaol juq nail kovtavq bhai ollov aol nail maoq-aol bhi aol lee nail galduq, naoq nail aqlavq nqtavq phao bavq dil yaoq" dai, ge bhiq-a nail ngaol.
23 Maolseiq aivq nail joiqniaoq nqtavq phao bavq dil-u phao, Heeqphaq Miqyail neq, nqjaiq, ollov dai khi nqmeivq juq miltsaq bha phaiq-ai leevq-a nail ngaol. Al heel ngel-i mail, ollov aol nail maoq-aol Iljiltuv nail milkhaoq bhai aol lee-a nail ngaol.
24 Ollov ga lee khi, nqmeivq nqjaiq jaiq lal-a nail ngaol. Niil khao khe lilmoel lil ma neq, Iljiltuv nail milkhaoq daq-n-u nee mail, teevq thal-iq maq thaoq phuq daiq-a nail phaq pevq nail ngaol.
25 Iljiltuv milkhaoq khaoq lao khe, khal jaol khal jiav nail miltsaq phao cov pheeq-ai thaq nail lavqkhoel bhai, maq jaol nail tsaol-aq dai khi jaiqyaq juq iqsanl mail, ollov aol nail maoq-aol bhaq da nee sil gil-a nail ngaol. Al ovqtavq, daiyal bhai kha-ai thaq nail aqheeq allu juq dai khi aqbhaol juq gail, luq-ail seil-ail gil-a nail ngaol.
26 Thail hai ngaol-aoq, Ilsaqleiqlav nail tsaol-aq juq-i mail jaol nail Gaolsinq miltsaq teevq dao taivq-ail, ollov aol nail maoq-aol nee, ya jel ail-a nail ngaol.
27 A bhai nee ngal-aq, Phaqlaol neq, Maolseiq dai khi Aqlonq bhai khul khi, niail hai ge bhiq-a nail ngaol: "Niil teevq pov neq, ngal nl laiq-ao nail ngaol. Heeqphaq Miqyail neq, tsaq nail daol nail teevq gaq ngaol. Thail hai ngaol-aoq, ngal dai khi ngaq nail tsaol-aq juq neq, maq tsaq nail juq ngaol.
28 Nv juq neq, ollov dai khi nqjaiq jaiq nail bhai maq daq tsaol-aoq nail bhaq da nee, Heeqphaq Miqyail bhai thaoq hal lavq yaoq. Ngal nul juq bhai teevq pov taivq-ail bhi dov lai naol" dai, ge bhiq-a nail ngaol.
29 Maolseiq ge kovq bhiq-a nail: "Ngal meenq nee mail dov ail-u phao, Heeqphaq Miqyail bhai ngaq nail aqlavq bavq dil khi mail geeqlaoq hal bhiq nail ngaol. Aq-u phao, nqjaiq dai khi ollov ga nail tsil lai nail ngaol. Heeqphaq Miqyail neq, miltsaq niil nail kovtavq bhai uv thaiq nail gaq pevq nail bhai, naol ya heeq kivq lal nail ngaol.
30 Thail hai ngaol-aoq, naol dai khi naoq nail ganl nl nail aqivq aqtsu juq neq, Heeqphaq Miqyail bhai maq gee sil-ai haq-al dai, ngal heeq kivq nail ngaol" dai, ge bhiq-a nail ngaol.
31 (Gov mi lal khi, haqphal lav sav nail aqbhaol teevq phaq neq, daqtsuq tsuq nail aqyanq ngel-i mail, luq-ail seil-ail gil-a nail ngaol.
32 Thail hai ngaol-aoq, khaqmul lav sav nail gov gov bhaol nvq phaq neq, haoqnao nao-ail khi, mi lal nail ngel-i mail, maq luq maq seil-ail mail jiav nail ngaol.)
33 A bhai nee ngal-aq neq, Maolseiq neq, Phaqlaol nail sivtavq nee mail dov ail-a nail nee ovqtavq, Heeqphaq Miqyail bhai aqlavq bavq dil khi geeqlaoq hal-u phao, nqjaiq jaiq nail aqthel dai khi, ollov tsil lai-a nail ngaol. Maoq-aol gail, tsil lai-a nail ngaol.
34 Nqjaiq jaiq nail aqthel, ollov dai khi maoq-aol aol nail tsil lai thaq nail bhai, Phaqlaol ya moel-u phao, aivq dai khi aivq nail ganl nl nail aqivq aqtsu juq neq, neema aqgaol gaoq gaol lal bhiq khi, gaol nl laiq-a nail ngaol.
35 Heeqphaq Miqyail-i mail Maolseiq bhai ge bhiq-a nail khe-ai, Phaqlaol neq, neema aqgaol gaoq gaol lal khi Ilsaqleiqlav nail tsaol-aq juq bhai maq bhi dov-ail dai, bhi jaol-a nail ngaol.