Dov-ail 10
Noelbhoel bhi dov lal-a nail ganl
1 A bhai nee ngal-aq, Heeqphaq Miqyail neq, Maolseiq bhai niail hai ge bhiq-a nail: "Phaqlaol jaol nail bha kovq lai yaoq. Ngaq-i mail bhi heeq bhi moel nail phaq bhai aqyu juq ya moel dai, ngal aivq dai khi aivq nail ganl nl nail aqivq aqtsu juq bhai neema aqgaol bhi gaol lal nail ngaol.
2 Phaqlaol dai khi aivq nail ganl nl nail aqivq aqtsu juq bhai, ngaq-i mail nl bhiq-a nail bhi heeq bhi moel nail phaq dai khi khal nl movq-ail nl bhiq-a nail bhai phaq neq, nul juq nail aqjievq liqdee juq bhai bhi ge bhiq nail haqbhoil ngaol. Ngal neq, Heeqphaq Miqyail pevq nail bhai, nul juq ya heeq kivq nail ngaol" dai, ge bhiq-a nail ngaol.
3 Al heel ngel-i mail, Maolseiq khi mail Aqlonq neq, Phaqlaol jaol nail bha aol lai khi, "Heiqbhail tsaol-aq nail Miqyail pevq nail Heeqphaq Miqyail ge nail: 'Naol neq, khaq mao kev dai, ngaq nail sivtavq bhai maq thaq theq dai, jaol-ai haq nail-aiq. Ngaq nail tsaol-aq juq ngaq bhai uqhuq thaoq nia dai, bhi dov lai yaoq.
4 Naol ngaq nail tsaol-aq juq bhai maq bhi dov lai haq neq, niaohao naoq nail milkhaoq bhai noelbhoel bhi kev lal nail ngaol.
5 Noelbhoel al juq neq, miltsaq maq moel lal dai, iqsanl mail bhai bhi bhee lal nail ngaol. Ollov-i mail ga khi maq sil thaq nail juq bhai, noelbhoel-i mail bhi lav cov gil nail ngaol. Daiyal khe aqbhaol khal doevq nail gail, bhi keivq jaq gil nail ngaol.
6 Naoq nail haol bhai maqkhaiq, naoq nail ganl nl nail aqivq aqtsu juq nail ilkhaol bhai maqkhaiq, Iljiltuv nail tsaol-aq juq nail ilkhaol bhai maqkhaiq, noelbhoel juq teevq bhee aol lai nail ngaol. Iljiltuv nail milkhaoq daq-n-u nee, teevq pov iqsanl mail maq ya thaoq phuq daiq haq-al' dai, Heeqphaq Miqyail ge nail ngaol" dai, ge bhiq-a nail ngaol. A bhai nee ngal-aq, Maolseiq neq, Phaqlaol nail sivtavq nee, dov ail-a nail ngaol.
7 Phaqlaol nail ganl nl nail aqivq aqtsu juq neq, aivq bhai niail hai ge bhiq-a nail ngaol: "Tsaol-aq niil gaq khaq mao kev dai, ngadao juq bhai nl lavq-ai haq nail meeq. Aqyu juq nail Heeqphaq Miqyail bhai uqhuq thaoq lai nia dai, aqyu juq bhai bhi dov lai yaoq. Iljiltuv nail milkhaoq gail luq ail seil ail-aoq nail ngaol dai, naol maq heeq kivq-ail laiq" dai, ge bhiq-a nail ngaol.
8 Al heel ngel-i mail, Phaqlaol neq, Maolseiq khi mail Aqlonq bhai gaoq khul khi ge bhiq-a nail: "Nul juq nail Heeqphaq Miqyail bhai uqhuq thaoq lai kivq dai, dov lai yaoq. Thail hai ngaol-aoq, naoq-ai nee mail mal dil khaq sil gaq tsao thel lavq nail-aiq" dai, nal daiq bhiq-a nail ngaol.
9 Aq-u phao, Maolseiq neq, "Heeqphaq Miqyail bhai aqbhee lav sav nail ngel-i mail, nv juq nail yovkav joiqmaoq juq, yaqnoil juq, yaqmiq yaqyov juq, yaol juq dai khi niaoqnel juq iqsanl mail, khul gil laivq nail ngaol" dai, ge bhiq-a nail ngaol.
10 Phaqlaol ge nail: "A dei-eiq. Ngal yaqmai-aq juq khi yaqnoil juq bhai phaiq bhiq nail khe-ai, Heeqphaq Miqyail nul juq nee mail teevq gaq khe-ai jaol dei-eiq. Hel daiq, nul juq maq meeq nail ganl nl-aiq nail ngaol dai, moel lal nail ngaol.
11 Maq ya-ail. Aq-u khe nul juq-i mail hal-a nail khe-ai, yaqyov-aq yovkav juq taivq-ail lai khi mail Heeqphaq Miqyail bhai uqhuq thaoq lai yaoq" dai, ge bhiq khi, Maolseiq khi mail Aqlonq bhai aivq nail sivtavq nee mail bhi he dol-aivq-a nail ngaol.
12 A bhai nee ngal-aq, Heeqphaq Miqyail neq, Maolseiq bhai ge bhiq-a nail: "Iljiltuv nail milkhaoq bhai noelbhoel bhi kev lal nail haqbhoil naoq nail aqlavq bavq dil yaoq. Noelbhoel al juq miltsaq teevq bhee bhee lal khi ollov-i mail maq ga heivq gil thaq nail aqbhaol khal doevq nail juq bhai jaq gil nail ngaol" dai, ge bhiq-a nail ngaol.
13 Al heel ngel-i mail, Maolseiq neq, aivq nail joiqniaoq Iljiltuv nail milkhaoq phao bavq dil-ai laivq-a nail ngaol. Aq-u phao, Heeqphaq Miqyail neq, teevq n teevq kivq kivq lao, nlma dov khoeq phao khe lilmoel bhi bhoe lal-a nail ngaol. Nqhao kev lal-u phao, nlma dov khoeq phao khe lilmoel nee mail teevq gaq khe-ai, noelbhoel juq kev lal-a nail ngaol.
14 Noelbhoel juq neq, munl munl lao-ail kev lal khi Iljiltuv nail miltsaq iqsanl mail bhai jaol bhee gil-a nail ngaol. Thoi dai mao nail noelbhoel juq, Iljiltuv nail milkhaoq maq phuq maq moel daiq-a nail khe-ai, yaqhao gail, thail hai teevq pov iqsanl, maq dov lal yaoq-aol.
15 Noelbhoel juq neq, Iljiltuv nail miltsaq teevq heeq heeq lao jaol bhee gil khi nav tsee dai, jiav nail ngaol. Aqyu juq neq, ollov-i mail ga khi maq sil gil mail jail lai thaq nail aqheeq allu juq dai khi aqbhaol juq bhai, jaq nail ngaol. Iljiltuv nail milkhaoq teevq khaoq khaoq lao khe jiav nail aqbhaol bhaol ma bhaol yaq juq nail aqpavq aqmeeq teevq pavq gail maq pavq dai, pevq ail-a nail ngaol.
16 Aq-u phao, Phaqlaol neq, Maolseiq dai khi Aqlonq bhai lavqtsail mail khul khi ge bhiq-a nail: "Ngal neq, nul juq nail Miqyail pevq nail Heeqphaq Miqyail dai khi nul juq bhai nl laiq-ao nail ngaol.
17 Niil aq-il teevq pov ngaq nail oeqbal bhai phaiq lavq khi sil nail phaq niil laiq, ngaq-ai nee mail dov-ail dai, naoq nail Heeqphaq Miqyail bhai thaoq hal lavq yaoq" dai, ge bhiq-a nail ngaol.
18 Maolseiq neq, Phaqlaol jaol nail nee mail dov-ail khi, Heeqphaq Miqyail bhai geeqlaoq hal-a nail ngaol.
19 Heeqphaq Miqyail neq, lilmoel lil ma bhai, nlma ga khoeq phao lav phal bhiq-a nail ngel-i mail, lilmoel al, noelbhoel al juq bhai iqyaq iqma aqnel bha bhi bhoe pul-aivq khi bhi sil gil-a nail ngaol. Iljiltuv nail milkhaoq teevq khaoq khaoq lao, noelbhoel teevq maol gail maq bhi jail lai-al.
20 Thail hai ngaol-aoq, Heeqphaq Miqyail neq, Phaqlaol nail neema gaoq bhi gaol-a nail ngel-i mail, Ilsaqleiqlav nail tsaol-aq bhai maq bhi dov lai dai bhi jaol-a nail ngaol.
Nq nav mil nav nav lai-a nail ganl
21 A bhai nee ngal-aq, Heeqphaq Miqyail Maolseiq-ai, "Iljiltuv nail milkhaoq bhai al jaiq-ail nav nail nq nav mil nav bhi nav lai nail galduq, naoq nail aqlavq nqtavq phao bavq dil yaoq" dai, ge bhiq-a nail ngaol.
22 Al heel ngel-i mail, Maolseiq neq, aivq nail aqlavq nqtavq phao bavq dil-ai laivq-u phao, Iljiltuv nail milkhaoq lavqkhoel bhai khul maq moel lal dai, nav dee dee nail nq nav mil nav hail n bhee dai, deeq nal laivq-a nail ngaol.
23 Iljiltuv nail tsaol-aq juq neq, teevq gaq nee teevq gaq maq moel nia nail ngel-i mail, hail n bhee dai teevq gaq gail ilkhaol nee lavqniil phao maq dov-ail dai, jaol-a nail ngaol. Thail hai ngaol-aoq, Ilsaqleiqlav nail tsaol-aq jaol nail phao neq, aqbhaq jiav nail ngaol.
24 Aq-u phao, Phaqlaol neq, Maolseiq bhai khul khi ge bhiq-a nail: "Heeqphaq Miqyail bhai uqhuq thaoq lai nail galduq, dov lai yaoq. Nul juq nail yaqmai-aq juq dai khi yaqnoil juq gail, nul juq nee mail teevq gaq khe-ai dov lal yaoq. Thail hai ngaol-aoq, nul juq nail yaol, civqmeiv dai khi niaoqnel juq neq, bhi jaol-ail ceevq yaoq" dai, ge bhiq-a nail ngaol.
25 Maolseiq ge nail: "Nv juq nail Heeqphaq Miqyail bhai miqjaq kheq poiv khi laol bhiq lai nail galduq laol bhiq nail jaiqyaq naol ya bhi hel laivq lavq nail ngaol.
26 Al heel ngel-i mail, nv juq nail jaiqyaq juq iqsanl mail teevq maol maq jail dai, ya hevq gil laivq nail ngaol. Nv juq neq, jaiqyaq juq bhai tsel dov khi Heeqphaq Miqyail bhai ya laol bhiq nail ngaol. Nv juq maq kev lai-u phao, jaiqyaq khul maol-i mail Heeqphaq Miqyail bhai ya laol bhiq nail-aiq dai, maq heeq kivq-ai haq-al" dai, ge bhiq-a nail ngaol.
27 Thail hai ngaol-aoq, Heeqphaq Miqyail neq, Phaqlaol nail neema gaoq bhi gaol lal-a nail ngel-i mail, Ilsaqleiqlav nail tsaol-aq juq bhai maq bhi dov lai dai, bhi jaol-a nail ngaol.
28 Phaqlaol Maolseiq bhai niail hai gul bhiq-a nail ngaol: "Ngaq nail sivtavq nee dov-ail yaoq. Teevq pov iqsanl mail, ngaq-ai nee thaq gaoq moel lal dai, ngal naoq bhai daoq bivq nail ngaol. Naol ngaq nail maivphaoq bhai gaoq moel lal-u n-gaol, naol ya sil nail ngaol" dai, ge bhiq-a nail ngaol.
29 Maolseiq ge kovq bhiq-a nail: "Naol ge nail khe-ai, yaqhao teevq pov naoq-ai nee mail ngal maq moel lal yaoq-aol" dai, ge bhiq-a nail ngaol.