Dov ail 11

Dov-ail 11

Maolseiq neq, uqbhao aqivq ya sil nail ganl ge bhiq-a nail

1 A bhai nee ngal-aq, Heeqphaq Miqyail Maolseiq bhai niail hai gaoq ge bhiq-a nail ngaol: "Ngal Phaqlaol dai khi aivq nail Iljiltuv nail milkhaoq yaq juq bhai haoqnao nao saq khe pov khoeq bhiq jiov bhiq-ai haq nail ngaol. Thail hai nl haq neq, aivq nul juq bhai bhi dov lai lavq nail ngaol. Nul juq iqsanl mail bhai, milkhaoq niil khaoq nee mail mal dil aivq the dov lavq nail ngaol.

2 Ilsaqleiqlav nail tsaol-aq yaqmai-aq maqkhaiq, yaqyov-aq maqkhaiq, aqyu juq nail ilkhaiq tavq tsaoq juq bhai phul, heel juq-i mail lav sav-ai thaq nail phaq hal-oq dai, aqyu juq bhai ge bhiq yaoq" dai, ge bhiq-a nail ngaol.

3 Iljiltuv nail tsaol-aq juq, Ilsaqleiqlav nail tsaol-aq juq bhai neema tsaq dai, Heeqphaq Miqyail nl bhiq-a nail ngaol. Phaqlaol nail ganl nl nail aqivq aqtsu juq dai khi aivq nail tsaol-aq juq iqsanl, Maolseiq bhai al jaiq-ail eeq nail heel nail gaq dai, hav bhoel-ai thaq nail ngaol.

4 A bhai nee ngal-aq, Maolseiq neq, Phaqlaol bhai ge bhiq-a nail: "Heeqphaq Miqyail ge nail: 'Hul-iq tsil ma ngal neq, Iljiltuv nail milkhaoq yaq juq jaol nail bha ail khi,

5 Doiqbev bev ma bhai jaol deel nail Phaqlaol nail uqbhao yaqyov nee mail daq-n khi gov thaoq nail yaqmai-aq yaqkav juq nail uqbhao yaqyov bha kev dai, uqbhao yaqyov iqsanl mail bhi sil gil nail ngaol. Jaiqyaq juq nail lavqkhoel khe iqmoeq khal moeq phaoq thaq nail aqyaq juq gail bhi sil gil nail ngaol.

6 Aq-u phao gail, maq phuq maq moel daiq, yaqhao iqsanl mail maq ya phuq maq ya moel nail aqthel aqkav kav dai, gul gul-ail nioil nail bhai, Iljiltuv milkhaoq doi dai, ya gaiq nail ngaol.

7 Thail hai ngaol-aoq, Ilsaqleiqlav nail tsaol-aq juq nail lavqkhoel bhai, khul nail aqthel iqsanl, maq ya gaiq-ail. Tsaol-aq dai khi jaiqyaq juq bhai iqsanl, kheeq laol nail aqthel bha kev dai, maq ya gaiq-ail. Al hai nl nail lavqkhoel nee, Heeqphaq Miqyail pevq nail ngal neq, Iljiltuv dai khi Ilsaqleiqlav nail tsaol-aq maq bhi dul lai dai, tsel pav nail ganl bhi heeq nia nail ngaol.

8 Al hai pevq lal-u phao, naoq nail ganl nl nail aqivq aqtsu juq iqsanl mail, ngal jaol nail bha lal khi, peevqceevq kovdoiq doiq nail lavqkhoel nee miltsaq bhai gaol beiv khi, 'Naol dai khi naoq nail haoqnao tsao the nail tsaol-aq juq, lavqtsail mail dov lai yaoq' dai, ngaq bhai thaoq hal lal nail ngaol. Al hai nl khi pultavq, ngal dov lai nail ngaol" dai, Maolseiq Phaqlaol bhai ge bhiq-a nail ngaol. A bhai nee ngal-aq, neema phail dee dee nail lavqkhoel, Phaqlaol nail sivtavq nee dov ail-a nail ngaol.

9 A bhai nee ngal-aq, Heeqphaq Miqyail Maolseiq bhai gaoq ge bhiq-a nail: "Ngal Iljiltuv nail milkhaoq bhai noeq-u maq dov nail phaq mao dai nl nail galduq Phaqlaol neq, naoq nail daoq maq nal daiq dai, jaol nail ngaol" dai, ge bhiq-a nail ngaol.

10 Maolseiq khi mail Aqlonq neq, Phaqlaol nail sivtavq bhai noeq-u maq dov nail phaq nl khi mail ngaol-aoq, Heeqphaq Miqyail neq, aivq bhai neema aqgaol bhi gaol thaq nail bhaq da nee Ilsaqleiqlav nail tsaol-aq bhai aivq nail milkhaoq nee maq bhi dov-ail dai, bhi jaol-a nail ngaol.