Dov-ail 12
Bhaqsaqkhaqa nail aqbhee
1 Iljiltuv nail milkhaoq bhai jaol-ai haq-u phao, Heeqphaq Miqyail neq, Maolseiq khi mail Aqlonq bhai niail hai ge bhiq-a nail ngaol:
2 "Bhala niil heeq neq, nul juq nail galduq, yaoq kovq yaoq-ao nee iqmoeq ilmoeq khe heeq ya bhi pevq nail ngaol.
3 Ilsaqleiqlav nail tsaol-aq juq iqsanl bhai niail hai ge bhiq yaoq: 'Bhala niil heeq 10 n n-gaol teevq ildaoq bhai yaol yaq teevq maol maq ngel haq neq, civqmeiv civq yaq teevq maol, laol bhiq nail galduq ya tsel dov nail ngaol.
4 Ildaoq teevq ildaoq ga nav neq, tsaol-aq micil teevq-eel ngel-i mail, yaol yaq teevq maol maq jaq gil tsaol-ail. Al heel ngel-i mail, yovqgavq nail ilkhaiq tavq tsaoq nee jaq nail tsaol-aq ge daiq khi, jaiqyaq teevq maol ya jaq gil nail ngaol.
5 Nul juq yaol khi civqmeiv teevq phaq phaq bhai tsel kivq nail ngaol. Thail hai ngaol-aoq, jaiqyaq al juq neq, malbavq maq daol nail teevq kovq bhee lal thaq nail aqphoil ya pevq nail ngaol.
6 Jaiqyaq al juq bhai iqmoeq khal moeq khe bhala 14 n n-gaol kev dai, aqmeeq-ai ya tsu nail ngaol. 14 n bhee lal haq neq, kivqhail laiv ma phao, Ilsaqleiqlav nail tsaol-aq juq yovqgav yovqgavq nail jaiqyaq al juq, ya heivq bhiq nail ngaol.
7 A bhai nee ngal-aq, aqyu juq aqsivq oil khi, aqyu juq-i mail yaol nail haqjoil jaq nail ilkhaol nail lolgov govbhaq nvq phao dai khi pultavq bhai, ya leivq nail ngaol.
8 Aq-u nqkiv, haqjoil al juq poiv khi, deqtsiq maq aol nail khaqmul khi mail aqkhaq khaq nail jaltsoiq jal phai nee mail ya jaq nail ngaol.
9 Haqjoil al juq bhai aqjiq maqkhaiq, cavq jiavq khi maqkhaiq, maq ya jaq-ail. Thail hai ngaol-aoq, uqhuq, aqkhil, aqlavq khi mail aqtseeq aq-ul juq iqsanl mail aol nail lavqkhoel nee mail, maol lao lao-ail poiv khi ya jaq nail ngaol.
10 Nqbhaq maq bhaq lal-u nee, iqsanl mail ya jaq gil khi, maq jaq gil dai, khal jail lal nail iqsanl mail, miqjaq ya kheq ha gil nail ngaol.
11 Nul juq neq, gailkhaol dov-ail nail dai khi lainq-ai thaq nail tsaol-aq khe-ai, jiovqpavq pavq, saiqnaov tsaoq khi, joiqniaoq nieivq thaiq-ai thaq nail lavqkhoel nee, aqjal al juq ya jaq nail ngaol. Niil neq, Heeqphaq Miqyail nail Bhaqsaqkhaq nail aqbhee pevq nail ngaol.
12 Aq-u nqkiv, Iljiltuv milkhaoq bhai, ngal ail pav khi, uqbhao yaqyov aqivq juq khi mail, jaiqyaq juq nail lavqkhoel khe iqmoeq ilmoeq phaoq-a nail aqphoil juq iqsanl bhai bhi sil nail nee ovqtavq, Iljiltuv tsaol-aq juq nail miqyail juq bhai ngal yalkhaq dal bhiq naol. Ngal neq, Heeqphaq Miqyail pevq nail ngaol.
13 Lolgov govbhaq bhai leivq-ai thaq nail aqsivq al neq, nul juq jaol nail ilkhaol juq bhai tsel pav khi, hel daiq heeq kivq nail haqbhoil, bhi heeq bhiq moel nail phaq pevq nail ngaol. Iljiltuv tsaol-aq bhai ngal khoeq bhiq jiovq bhiq thail thaiq-u phao, aqsivq al bhai ngal ya moel haq neq, nul juq bhai maq bhi sil dai, bhi jel-ail naol.
14 Aq n niil n bhai Heeqphaq Miqyail-i mail nl-a nail ganl bhai noeq kev khi, n lao lao nail lavqkhoel, aivq bhai uqhuq thaoq nail phaq bhai tavq lai nail aqbhee, nul juq ya lav sav naol. Aqbhee niil laiq neq, nqmaq maqluv halyeel ivq nail aoldaoq kovqdaoq pevq khi teevq yeel nee teevq yeel, nul juq ya lav sav dal laivq nail ngaol' dai, aqyu juq bhai ge bhiq yaoq" dai, Heeqphaq Miqyail-i mail ge bhiq-a nail ngaol.
Deqtsiq maq aol nail khaqmul jaq nail aqbhee
15 Heeqphaq Miqyail gaoq ge nail: "Nul juq sivq n bhee dai, deqtsiq aol nail khaqmul maq ya jaq-ail. Deqtsiq maq aol nail khaqmul ya jaq-ail teevq-eel ngaol. Iqmoeq ilmoeq n-gaol neq, nul juq nail ilkhaol khe deqtsiq ya bheq ha gil nail ngaol. Sivq n nail lavqkhoel teevq gaq ga nav deqtsiq aol nail khaqmul jaq haq neq, tsaol-aq thoil gaq Ilsaqleiqlav nail tsaol-aq nee mail ya saol-nvq dov nail ngaol.
16 Iqmoeq khe n khi sivq n teevq n nail lavqkhoel, nul juq teevq dao bhai taivq-ail jil lai khi, uqhuq ya thaoq nail ngaol. Aq n al sivq n nail lavqkhoel, nul juq ganl maq ya nl-ail. Thail hai ngaol-aoq, yovqgavq jaq nail haqbhoil aqjal nl jaq kivq nail ngaol.
17 Deqtsiq maq aol nail khaqmul jaq nail aqbhee niil laiq maq khaonq ha dai, khaq mao iqsanl ya lav sav nail ngaol. Khul khi mail dai ngal-aq neq, aq-n al n bhai, Iljiltuv milkhaoq lavqkhoel nee, ngal nul juq bhai hevq dol leevq-a nail ngaol. Teevq yeel nee teevq yeel, aq-n al n bhai nul juq, aqbhee al ya lav sav dal laivq nail naol.
18 Bhala iqmoeq khe heeq 14 n n-gaol kivqhail lail ma phao nee, 21 n n-gaol kivqhail lail ma phao kev dai, deqtsiq aol nail khaqmul maq jaq dai, nul juq ya jaol nail ngaol.
19 Sivq n kev dai nul juq nail ilkhaol lavqkhoel bhai deqtsiq maq ya bhi jiav-ail. Yu nail jeq-e jaq-a juq maqkhaiq, doevq lee-u nee mail Ilsaqleiqlav nail tsaol-aq pevq nail juq maqkhaiq, tsaol-aq teevq gaq ga nav deqtsiq aol nail khaqmul jaq haq neq, tsaol-aq al gaq bhai Ilsaqleiqlav nail jeq-e jaq-a nee ya saol-nvq dov nail ngaol.
20 Nul juq khal jaol thail thaiq nail jaol duq bhai deqtsiq aol nail phaq maq jaq dai, deqtsiq maq aol nail phaq taivq-ail ya jaq nail ngaol.
Bhaqsaqkhaq iqmoeq ilmoeq lav sav-a nail ganl
21 Maolseiq Ilsaqleiqlav nail tsaol-aq nail aqivq aqtsu juq iqsanl bhai khul jil khi, niail hai ge bhiq-a nail ngaol: "Yovqgavq nail ildaoq Bhaqsaqkhaq aqbhee lav sav kivq dai, nul juq iqsanl mail, yaol yaq teevq maol tsel dov khi heivq yaoq.
22 Lunl aqkhaoq ngaoq keivq khi, jaiqyaq nail aqsivq deq nail khaoqanq bhai bavq deev nail nee ovqtavq, nul juq nail lolgov a phao nia phao jiav nail lolgov govbhaq khi mail, lolgov nail pultavq phao aqsivq al leivq yaoq. Nqhao phao kev dai, nul juq teevq gaq iqsanl ilkhaol lavqniil phao thaq dov-ail.
23 Iljiltuv tsaol-aq juq bhai heivq nail dai khi, Heeqphaq Miqyail Iljiltuv milkhaoq bhai lee pav-u phao, lolgov govbhaq khi mail lolgov pultavq phao leivq-ai thaq nail aqsivq bhai ya moel haq neq, sil nail phaq nail nqtavq gaqkhoel, nul juq bhai lav heivq nail haqbhoil, nul juq nail ilkhaol bha maq bhi aol lal-ail.
24 Niil neq, nul juq khi mail nul juq nee mail yavq kha lee thaq nail yaq juq bhai bivq-ai thaq nail nqmaq maqluv halyeel ivq nail aoldaoq kovqdaoq pevq khi, nul juq khaq mao iqsanl ya tsao the nail ngaol.
25 Heeqphaq Miqyail-i mail nul juq bhai saljial jaq-ai thaq nail milkhaoq bhai aol lai-u phao iqsanl, aqbhee niil laiq ya lav sav dal laivq nail ngaol.
26 'Aqbhee niil laiq nail daoq ceevq khul dai ge movq nail-aiq' dai, nul juq nail yaq juq nal daiq lal-u phao,
27 nul juq niail hai ya ge bhiq nail ngaol: 'Aqbhee niil laiq nail daoq ceevq neq, Heeqphaq Miqyail bhai laol bhiq nail Bhaqsaqkhaq dai khul nail aqbhee pevq nail ngaol. Khul khi mail dai ngal-aq neq, Iljiltuv milkhaoq lavqkhoel-ai jaol-u phao, Heeqphaq Miqyail neq, Ilsaqleiqlav nail ilkhaol juq bhai bhi jel ail-a nail ngaol. Aivq Iljiltuv nail tsaol-aq juq bhai heivq khi, ngadao juq bhai bhi jel-ail lavq-a nail ngaol' dai, nul juq ya ge bhiq nail ngaol" dai, ge bhiq-a nail ngaol. Aq-u phao, Ilsaqleiqlav nail tsaol-aq juq peevqceevq kovdoiq doiq khi uqhuq thaoq-a nail ngaol.
28 A bhai nee ngal-aq, aqyu juq ail khi, Maolseiq khi mail Aqlonq bhai Heeqphaq Miqyail-i mail daoq bivq-a nail khe-ai, nl-a nail ngaol.
Uqbhao aqivq juq sil-a nail ganl
29 Hul-iq tsil lee-u phao, Iljiltuv milkhaoq bhai uv thaiq nail Phaqlaol nail yaqyov nee mail daq-n khi, thaonq bhai aol nail tsaol-aq nail yaqyov bha kev dai, Iljiltuv milkhaoq lavqkhoel bhai khal jaol nail uqbhao aqivq juq iqsanl mail bhai, Heeqphaq Miqyail-i mail bhi sil gil-a nail ngaol. Al ovqtavq, jaiqyaq juq nail lavqkhoel iqmoeq ilmoeq phaoq lee-a nail juq iqsanl bhi sil gil-a nail ngaol.
30 Aq-u nqkiv, Phaqlaol maqkhaiq, aivq nail ganl nl nail aqivq aqtsu juq maqkhaiq, Iljiltuv nail tsaol-aq juq iqsanl maqkhaiq, noeq lal gil-a nail ngaol. Aq-u phao, Iljiltuv milkhaoq lavqkhoel, gul gul-ail nioil nail aqthel bhee gil ail-a nail ngaol. Khul khi mail dai ngal-aq neq, yaqyov teevq gaq iqsanl maq sil dai bhi jel ail-a nail, teevq il iqsanl maq jiav-ail.
31 Aq-u nqkiv nee mail Phaqlaol neq, Maolseiq khi mail Aqlonq bhai bhi khul-ail khi, "Ail yaoq. Nul nvq gaq khi mail Ilsaqleiqlav nail tsaol-aq juq dov-ail yaoq. Nv juq nail milkhaoq lavqkhoel nee dov-ail khi, nul juq hal nail khe-ai, nul juq nail Heeqphaq Miqyail bhai uqhuq thaoq ail yaoq.
32 Nul juq nail yaol, civqmeiv khi mail niaoqnel juq the khi dov-ail yaoq. Ngaq bhai iqsanl, geeqlaoq bivq lavq yaoq.
33 Iljiltuv nail tsaol-aq juq Ilsaqleiqlav nail tsaol-aq juq bhai, "Nul juq maq dov-ail haq neq, nv juq ya sil gil nail kev lal-aoq nial" dai, ge bhiq khi, aqyu juq lavqtsail mail dov-ail dai, ge bhiq dee dee-a nail ngaol.
34 Al heel ngel-i mail, Ilsaqleiqlav nail tsaol-aq juq neq, aqyu juq nail khaqmul lav sav nail iqlaoq juq nail lavqkhoel bhai deqtsiq maq oil bhoel haq nail khaqmul aqjiq oil bhoel-a nail nee ovqtavq, iqlaoq al juq bhai haqphal-i mail toev cuvq khi, bal-aivq-a nail ngaol.
35 Maolseiq khi mail Aqlonq-i mail ge bhiq-a nail khe-ai, Ilsaqleiqlav nail tsaol-aq juq neq, Iljiltuv nail tsaol-aq juq bhai phul, heel juq-i mail lav sav-ai thaq nail phaq khi mail aqgaq aqdoi hal-a nail ngaol.
36 Iljiltuv nail tsaol-aq juq Ilsaqleiqlav nail tsaol-aq juq bhai neema tsaq dai, Heeqphaq Miqyail-i nl bhiq-a nail ngel-i mail, aqyu juq khal hal nail phaq bivq-a nail ngaol. Al hai nl khi, Ilsaqleiqlav nail tsaol-aq juq, Iljiltuv nail tsaol-aq juq nail ildaoq maoqgaiq bhai ya-a nail ngaol.
Ilsaqleiqlav nail tsaol-aq juq Iljiltuv milkhaoq nee mail dov ail-a nail ganl
37 Laqmaqsail meenq nee mail Sulkov dai khul nail aqduq bhai Ilsaqleiqlav nail tsaol-aq juq aqkhil tsao tsao ail ail-a nail ngaol. Aqyu juq neq, yaqmai-aq juq khi mail yaq juq maq ge dai, yaqyov-aq juq taivq-ail 600,000 gaq bhee nail ngaol.
38 Yu nail jeq-e jaq-a mao dai maqkhaiq, yaol, civqmeiv khi mail niaoqnel munl munl ma juq maqkhaiq, aqyu juq nee mail ail-a nail ngaol.
39 Aqyu juq Iljiltuv milkhaoq lavqkhoel nee mail oil leevq-a nail khaqmul aqjiq al oil khi, deqtsiq maq aol nail khaqmul lav sav-a nail ngaol. Khul khi mail dai ngal-aq, Iljiltuv milkhaoq lavqkhoel nee lavqtsail mail aqyu juq bhai the dov bhiq-a nail ngel-i mail, jaq jaq daol daol lainq nail aqyanq maq ya-al.
40 Ilsaqleiqlav nail tsaol-aq juq Iljiltuv milkhaoq lavqkhoel bhai 430 kovq jaol bhee-a nail ngaol.
41 430 kovq bhee lal-u n-gaol, Heeqphaq Miqyail nail tsaol-aq juq yaoq munl yaoq-aol nee, Iljiltuv milkhaoq lavqkhoel nee dov ail-a nail ngaol.
42 Aq-u nqkiv neq, Iljiltuv milkhaoq lavqkhoel nee hevq dov nail haqbhoil Heeqphaq Miqyail aqyu juq bhai lovq phail bhiq-a nail nqkiv pevq nail ngaol. Al heel ngel-i mail, aq-u nqkiv neq Heeqphaq Miqyail nail nqkiv pevq khi, aqyu juq teevq yeel nee teevq yeel, ganl al ganl bhai ya noeq kev nail ngaol.
Bhaqsaqkhaq aqbhee bhai tavq nail aol juq
43 Heeqphaq Miqyail Maolseiq khi mail Aqlonq bhai niail hai ge bhiq-a nail ngaol: "Niil neq, Bhaqsaqkhaq aqbhee lav sav nail bhai tavq lai nail aol juq pevq nail ngaol. Bhaqsaqkhaq aqbhee jaq nail bhai yu nail jeq-e jaq-a maq ya aol lai-ail.
44 Thail hai ngaol-aoq, nul juq-i mail ul ceiv khi, bavkov uqjaq oev gaq-ai thaq nail yaqkav juq neq, aqbhee niil laiq lav sav nail bhai aol lai kivq naol.
45 Yu nail milkhaoq nee mail teevq yanq jaol lee-a nail tsaol-aq juq khi mail, gaq maol maol jaq thail thaiq nail yaqkav juq neq, aqbhee niil laiq lav sav nail bhai maq ya aol lai-ail.
46 Aqbhee niil laiq lav sav nail haqbhoil lav sav-ai thaq nail yaol yaq bhai, ilkhaol lavqkhoel nee taivq-ail ya jaq gil nail ngaol. Lavq niil phao oil dol leevq khi maq ya jaq-ail. Al ovqtavq, yaol yaq nail haqeeq iqsanl maq ya lav khoi-ail.
47 Ilsaqleiqlav nail tsaol-aq juq iqsanl mail, aqbhee niil laiq ya lav sav nail ngaol.
48 Yu nail jeq-e jaq-a teevq gaq ga nav nul juq nee mail jaol nail maoq lal khi, Heeqphaq Miqyail bhai thaq eeq thaq heel nail haqbhoil, Bhaqsaqkhaq aqbhee lav sav nail bhai aol lal movq haq neq, aivq nail lavqkhoel khe khal jaol nail yaqyov-aq juq iqsanl bhai, bavkov uqjaq iqmoeq oev bhiq yaoq. Al hai nl bhiq gaq haq neq, nul juq nee doevq lee-a nail Ilsaqleiqlav nail tsaol-aq teevq gaq khe-ai, aivq bhai saol-nvq bhiq khi, Bhaqsaqkhaq aqbhee lav sav nail bhai aol lai kivq naol. Thail hai ngaol-aoq, bavkov uqjaq maq oev nail tsaol-aq khul gaq maqkhaiq, aqbhee niil laiq lav sav nail bhai maq ya aol lai-ail.
49 Aqbhee niil laiq bhai tavq lai nail aol niil laiq neq, doevq lee-u nee mail Ilsaqleiqlav nail tsaol-aq juq bhai maqkhaiq, nul juq nee mail jaol leevq-a nail yu nail jeq-e juq bhai maqkhaiq, tavq lai nail aolthaq kovqthaq pevq nail ngaol" dai, ge bhiq-a nail ngaol.
50 Maolseiq khi mail Aqlonq bhai Heeqphaq Miqyail-i mail daoq bivq-a nail khe-ai, Ilsaqleiqlav nail tsaol-aq juq iqsanl mail nal daiq khi nl-a nail ngaol.
51 Aq-u n-gaol, Iljiltuv milkhaoq lavqkhoel nee mail hevq dov bhiq-a nail ngaol.