Dov-ail 13
Uqbhao yaqyov av bhiq nail ganl
1 Heeqphaq Miqyail Maolseiq bhai ge bhiq-a nail:
2 Iqmoeq ilmoeq doevq lee-a nail yaqyov juq ngaq bhai ya av lavq nail ngaol. Khul khi mail dai ngal-aq, Ilsaqleiqlav nail tsaol-aq nail lavqkhoel khe iqmoeq ilmoeq doevq lee-a nail yaqyov juq maqkhaiq, jaiqyaq aqphoil juq maqkhaiq, ngaq-ai nee tavq nail ngaol" dai, ge bhiq-a nail ngaol.
Deqtsiq maq aol nail khaqmul jaq nail aqbhee
3 Maolseiq Ilsaqleiqlav nail tsaol-aq juq bhai niail hai ge bhiq-a nail ngaol: "Nul juq yu nail yaqkav jiovq thail thaiq nail Iljiltuv milkhaoq lavqkhoel nee dov lee-a nail aq-n niil n bhai noeq kev yaoq. Aqn niil n bhai Heeqphaq Miqyail neq, bhaqaoq eeq nail aivq nail aqlavq-i mail, nul juq bhai hevq dov lavq-a nail ngaol. Deqtsiq aol nail khaqmul nul juq maq ya jaq-ail.
4 Bhala iqmoeq ilmoeq khe heeq pevq nail Aqbhilbhaq bhala, aq-n niil n bhai, Iljiltuv milkhaoq lavqkhoel nee mail nul juq ya dov lee nail ngaol.
5 Khaqnanq nail jeq-e, Hiltiv nail jeq-e, Aqmaolliv nail jeq-e, Hilwil nail jeq-e khi mail, Yeiqbhulsil nail jeq-e niil juq jaol nail milkhaoq al khaoq, nul juq bhai bivq nail haqbhoil, Heeqphaq Miqyail saljial jaq-ai thaq nail ngaol. Niaoqnel aqtsil dai khi bhaiqtsil bhaiqeel il nail milkhaoq al khaoq nail lavqkhoel-ai, nul juq bhai aivq hevq kev bhiq-u phao, aivq nail kovq aivq bhala iqmoeq khe heeq bhai, aqbhee niil laiq, nul juq ya lav sav nail ngaol.
6 Sivq n bhee dai, deqtsiq maq aol nail khaqmul taivq-ail nul juq ya jaq khi, sivq n teevq n bhai Heeqphaq Miqyail nail haqbhoil, aqbhee nul juq ya lav sav nail ngaol.
7 Sivq n bhee dai, deqtsiq maq oil bhoel dai lav sav-ai thaq nail khaqmul taivq-ail, nul juq ya jaq nail ngaol. Deqtsiq maqkhaiq, deqtsiq aol nail khaqmul maqkhaiq, nul juq jaol nail teevq jaoq, teevq peivq-ail maq ya bhi jiav-ail.
8 Sivq n-gaol bhee lal-u phao, yovqgavq nail yaq juq bhai niail hai ge bhiq yaoq: 'Niil aq il lav sav thail thaiq nail aqbhee neq, aq-u Iljiltuv milkhaoq lavqkhoel nee nv juq dov lee-u phao, Heeqphaq Miqyail-i mail nv juq bhai nl lavq-a nail geeqlaoq bhai noeq kev nail lavqkhoel, ya nl ya hal nail phaq pevq nail ngaol' dai, ge bhiq yaoq.
9 Aqbhee niil laiq neq, nul juq nail lavqneev bhai maqkhaiq, neeqthel bhai maqkhaiq, junq deeq-ai thaq nail phaq khe-ai, Heeqphaq Miqyail nail aolthaq kovqthaq bhai nul juq nail moeqthaoq nee ge pov nail bhai, maq ya nioil peivq nail haqbhoil ngaol. Khul khi mail dai ngal-aq, Heeqphaq Miqyail neq, aivq nail bhaqaoq eeq nail aqlavq-i mail, nul juq bhai Iljiltuv milkhaoq lavqkhoel nee hevq dov lavq-a nail ngaol.
10 Aivq nail kovq aivq yanq niil yanq kev lal haq neq, aqbhee niil laiq nul juq lav sav yaoq.
Iqmoeq ilmoeq doevq lee-a nail yaqyov
11 Nul juq bhai bivq nail haqbhoil, nul juq bhai maqkhaiq, nul juq nail aqphiq aqbhal juq bhai maqkhaiq, Heeqphaq Miqyail-i mail saljial jaq-ai thaq nail Khaqnanq milkhaoq bhai aivq hel-aivq lavq nail ngaol. Milkhaoq al khaoq aivq nul juq bhai bivq lavq-u phao,
12 iqmoeq ilmoeq doevq lee-a nail yaqyov juq Heeqphaq Miqyail bhai nul juq ya av bivq nail ngaol. Iqmoeq ilmoeq doevq lee-a nail jaiqyaq aqphoil juq iqsanl, Heeqphaq Miqyail nail pevq nail ngaol.
13 Iqmoeq ilmoeq doevq lee-a nail moeqphaq laljieiv bhai, yaol aqyaq teevq maol laol bhiq khi ya ul kovq nail ngaol. Maq ngel haq neq, moeqphaq laljieiv al maol nail leelkhaol ya ngaoq khoi nail ngaol. Thail hai ngaol-aoq, uqbhao aqivq juq bhai neq, yaoq gaq yaoq-ao nee ya ul kovq nail ngaol.
14 Siv tavq phao doevq dal laivq-u phao, "Al hai khul khi mail ya nl nail-aiq" dai, nul juq nail yaq juq nul juq bhai nal daiq lal haq neq, niail hai ge kovq bhiq yaoq: 'Iljiltuv milkhaoq lavqkhoel bhai nv juq yu nail yaqkav jiovq thail thaiq-u phao, Heeqphaq Miqyail neq, aivq nail bhaqaoq eeq nail aqlavq-i mail, nv juq bhai hevq dov lavq-a nail ngaol.
15 Phaqlaol neema gaol khi, nv juq bhai maq phaiq lavq dai, jaol-u phao, Iljiltuv milkhaoq lavqkhoel bhai, iqmoeq ilmoeq doevq lee-a nail yaqyov juq Miqyail-i mail bhi sil-a nail ngaol. Al ovqtavq, iqmoeq ilmoeq doevq lee-a nail jaiqyaq aqphoil juq bhai iqsanl, aivq bhi sil gil-a nail ngaol. Al heel ngel-i mail, iqmoeq ilmoeq doevq lee-a nail jaiqyaq aqphoil juq Miqyail bhai ngadao laol bhiq khi, iqmoeq ilmoeq doevq lee-a nail yaqyov juq bhai ngadao ul kovq nail ngaol.
16 Al hai nl nail phaq neq, ngadao nail neeqthel dai khi lavqneev bhai junq deeq-ai thaq nail phaq khe-ai, Heeqphaq Miqyail aivq nail bhaqaoq eeq nail aqlavq-i mail, Iljiltuv milkhaoq lavqkhoel nee hevq dov lavq-a nail ganl bhai ngadao ya noeq moel nail phaq pevq nail ngaol' dai, ge bhiq yaoq" dai, ge bhiq-a nail ngaol.
Nqdil nail ilkhel khi mail miqjaq nail ilkhel
17 Phaqlaol Ilsaqleiqlav nail tsaol-aq bhai phaiq khi bhi dov ail-u phao, Miqyail neq, Ilsaqleiqlav nail tsaol-aq juq bhai Pilliltiv nail milkhaoq phao teevq lao tsao daol nail gailkhaol al khaol daol dee dee khi ngaol-aoq, gailkhaol al khaol nee mail maq hevq dol laivq-al. Khul khi mail dai ngal-aq, "Sivtavq phao genl ya dev nail phaq jiav nail bhai Ilsaqleiqlav nail tsaol-aq juq moel haq neq, Iljiltuv milkhaoq bhai gaoq kovq-ail nail bhai ngal maq oil movq-il" dai, Miqyail ge nail ngaol.
18 Al heel ngel-i mail, aqyu juq bhai haqaiq mildai haqtsoiq haqyal doi dai, hevq jaoq bhiq khi, iqyaq iqma aqnela jiav nail phao hel-aivq-a nail ngaol. Ilsaqleiqlav nail tsaol-aq juq neq, genl dev nail khenkha-ao phi-nq thaq nail ngaol.
19 Yaolsai-i mail Ilsaqleiqlav nail tsaol-aq juq bhai ge bhiq khi saljial bhi jaq-ai thaq nail khe-ai, Maolseiq neq, Yaolsai nail haqeeq bhai aivq nee mail oil-aivq-a nail ngaol. "Miqyail nul juq jaol nail bha mal dil lee khi hevq kovq lee nail ngaol. Aivq lee-u phao, ngaq nail haqeeq bhai, milkhaoq niil khaoq nail lavqkhoel nee, nul juq ya oil dol-aivq lavq nail ngaol" dai, Yaolsai-i mail ge thaq-ail ceevq-a nail ngaol.
20 Aqyu juq Sulkov nail miltsaq nee mail dov lee khi haqaiq mildai haqtsoiq haqyal nail aqjail bhai jiav nail Eilthaq nail miltsaq bhai haqphal saiqgov juq covq khi gaq naq naq-a nail ngaol.
21 N-gaol dai khi mail nqkiv phao gailkhaol hevq daiq bhiq nail galduq, Heeqphaq Miqyail neq, n-gaol phao neq, nqdil ilkhel nee maqkhaiq, nqkiv phao neq, aqbhaq bivq nail miqjaq ilkhel nee mail maqkhaiq, aqyu juq nail sivtavq phao nee mail hevq daiq bhiq-a nail ngaol. Al heel ngel-i mail, aqyu juq nqkiv iqsanl, n-gaol iqsanl, gailkhaol dov nia nail ngaol.
22 N-gaol phao neq, nqdil ilkhel, nqkiv phao neq, miqjaq ilkhel, aqyu juq nail sivtavq nee mail maq ceiv lai dai, lai thail thaiq nail ngaol.