Dov-ail 14
Iqyaq iqma aqnel nail laoljaol ceiv lai-a nail ganl
1 A bhai nee ngal-aq, Heeqphaq Miqyail Maolseiq bhai niail hai ge bhiq-a nail ngaol:
2 "Ilsaqleiqlav nail tsaol-aq juq gaoq kovq lai khi, Milgaqdaollav nail meenq dai khi, iqyaq iqma aqnel nail gaiq laq khe jiav nail Pilhahillol nail meenq aqjail bhai haqphal saiqgov juq cov khi gaq naq naq nail galduq, daoq bivq yaoq. Jaol duq al dao neq, Bhaqlal Seiqphoq nail meenq a phao bal-nvq bhai jiav nail ngaol.
3 Al hai nl haq neq, Phaqlaol, 'Ilsaqleiqlav nail tsaol-aq juq haqaiq mildai haqtsoiq haqyal bhai gailkhaol gail bheeq bheeq khi noeq-u maq dov ail, jaol nail ngaol' dai, dul nail ngaol.
4 Ngal Phaqlaol bhai neema aqgaol gaoq bhi gaol lal khi, nul juq nail haoqnao bhi the kovq lal nail ngaol. Ngal Phaqlaol dai khi aivq nail genl dev nail munl munl ma juq iqsanl bhai gaq lai nail bhaq da nee ngaq nail seiqleiq khaoqsail bhi dov lal nail ngaol. Aq-u phao, Iljiltuv nail tsaol-aq juq, ngal Heeqphaq Miqyail pevq nail ganl bhai heeq nia moel nia lal nail ngaol" dai, ge bhiq-a nail ngaol. Ilsaqleiqlav nail tsaol-aq juq gail Heeqphaq Miqyail-i mail khal ge nail khe-ai, nl-a nail ngaol.
5 Iljiltuv nail heeqphaq Phaqlaol neq, Ilsaqleiqlav nail tsaol-aq tsaoq dov gil-a nail ganl bhai ya gaiq-u phao, aivq dai khi aivq nail ganl nl nail aqivq aqtsu juq neq, neema phal lal bhiq khi, "Ngadao juq neq, ngadao juq nail yaqkav pevq nail Ilsaqleiqlav nail tsaol-aq juq bhai ya bhi tsaoq dov nail laiq" dai, ge bhiq-a nail ngaol.
6 Al heel ngel-i mail, Phaqlaol neq, aivq nail moeqphaq lavlaoq dai khi genl dev yaq juq bhai, khul-a nail ngaol.
7 Aivq neq, Iljiltuv nail milkhaoq khe moeqphaq lavlaoq nee genl dev nail khal nia jaiq nail, 600 lanl tsel dov khi, jail nail moeqphaq lavlaoq dai khi a bhai jeeq nail aqivq juq iqsanl mail khul jil-a nail nee ovqtavq, aivq nee teevq gaq khe-ai bhi lal-a nail ngaol.
8 Heeqphaq Miqyail neq, Iljiltuv nail heeqphaq Phaqlaol bhai neema aqgaol bhi gaol-a nail ngel-i mail, Ilsaqleiqlav nail tsaol-aq nail haoqnao thel laivq-a nail ngaol. Aq-u phao, Ilsaqleiqlav nail tsaol-aq juq neq, gee sil nail neema maq aol dai, dov lai thail thaiq nail ngaol.
9 Phaqlaol nail genl dev yaq juq maqkhaiq, moeqphaq lavlaoq dai khi a bhai jeenq thaq nail aqivq juq maqkhaiq, Ilsaqleiqlav nail tsaol-aq juq nail haoqnao thel laivq-u phao, Bhaqlal Seiqphoq meenq a phao bal-nvq dai khi Pilhahillol nail meenq aqjail bhai jiav nail iqyaq iqma aqnel nail daolbhaq bhai, haqphal saiqgov juq cov khi gaq naq naq nail Ilsaqleiqlav nail tsaol-aq juq nail haoqnao the kheel lai-a nail ngaol.
10 Phaqlaol nail genl dev yaq juq lal nail bhai Ilsaqleiqlav nail tsaol-aq juq ya moel-u phao, gee sil dee dee lal bhiq khi aqyu juq gul gul-ail, Heeqphaq Miqyail bhai hal dee dee-a nail ngaol.
11 Aq-u phao, aqyu juq neq, Maolseiq bhai ge nail: "Iljiltuv nail milkhaoq bha luqdaol maq jiav nail ngel-i mail, haqtsoiq haqyal bha bhi sil nail galduq nv juq bhai hevq dol leevq lavq-a nail laiq. Naol nv juq nail galduq khul nl lavq-a nail-aiq. Khul khi mail nv juq bhai Iljiltuv nail milkhaoq nee mail ya dov lal dai, nl lavq-a nail-aiq.
12 Nv juq maq dov lal-u nee mail, niail hai pevq lal nail dai, naoq bhai ge-a nail maq ngel-ail laiq. Nv juq naoq bhai, 'Thaq suq saq lal. Iljiltuv nail tsaol-aq juq bhai yaqkav jiovq khi jaol ga naol' dai, ge-a nail ngaol. 'Niil niai haqtsoiq haqyal bhai ya sil nail nee maq tsil, Iljiltuv milkhaoq bhai jaol khi yaqkav ya jiovq nail neq, gaoq meeq jaiq nail ngaol" dai, ge bhiq-a nail ngaol.
13 Aq-u phao, Maolseiq ge nail: "Thaq gee sil. Aqivq ivq dai thul phaol yaoq. Heeqphaq Miqyail yaq n n-gaol nul juq bhai khal hai hevq jel lavq nail bhai, nul juq ya moel nail ngaol. Yaq n n-gaol khe ya moel nail Iljiltuv nail tsaol-aq niil juq yaqhao teevq thal-iq gail, maq ya moel yaoq-aol.
14 Heeqphaq Miqyail neq, nul juq nail haqbhoil genl dev lavq nail ngaol. Neema aqsal sal dai, jaol yaoq" dai, ge bhiq-a nail ngaol.
15 Aq-u phao, Heeqphaq Miqyail neq, Maolseiq bhai ge bhiq-a nail: "Khul khi mail naol ngaq bhai gul nail-aiq. Ilsaqleiqlav nail tsaol-aq juq bhai, sivtavq phao bhi lai dav yaoq.
16 Naoq nail joiqniaoq bavq khi mail iqyaq iqma phao naoq nail aqlavq gaol tsaoq yaoq. Aq-u phao, iqyaq iqma neq, nvq pav pav-ail khi, Ilsaqleiqlav nail tsaol-aq juq, iqyaq iqma nail gaoltsi nee miltsaq aqgee bhai, naoq thaiq khi mail ya ceiv lai nail ngaol.
17 Ngal neq, Iljiltuv nail tsaol-aq juq bhai neema aqgaol bhi gaol nail ngel-i mail, aqyu juq neq, Ilsaqleiqlav nail tsaol-aq juq nail haoqnao the bhoel leevq nail ngaol. Phaqlaol dai khi aivq nail genl dev nail munl munl ma bhai maqkhaiq, lavlaoq nail munl dai khi moeqphaq jeenq thaq nail aqivq juq bhai maqkhaiq, ngal gaq lai nail bhaq da nee, ngaq nail seiqleiq khaoqsail dov lal nail ngaol.
18 Aqyu juq bhaq da nee ngaq nail seiqleiq khaoqsail dov lal nail bhai moel nia-u phao, Iljiltuv nail tsaol-aq yaoq gaq yaoq-ao nee mail, ngal Heeqphaq Miqyail pevq nail ganl bhai aqyu juq heeq nia lal nail ngaol" dai, ge bhiq-a nail ngaol.
19 Ilsaqleiqlav nail tsaol-aq juq nail sivtavq phao nee lai lao nail Miqyail nail nqtavq gaqkhoel neq, haoqnaol phao jaol duq phal-ail khi, tsao thel laivq-a nail ngaol. Aqyu juq nail sivtavq khe jiav nail nqdil ilkhel gail, haoqnaol phao jaol duq phal ail-a nail ngaol.
20 Nqdil ilkhel neq, Iljiltuv nail tsaol-aq dai khi mail Ilsaqleiqlav nail tsaol-aq juq-i mail gaq naq naq-a nail haqphal saiqgov nail gaoltsi bhai jiav lai-a nail ngaol. Nqkiv phao khe, nqdil ilkhel neq, Iljiltuv nail tsaol-aq juq-i mail jaol nail phao, aqnav bhi jaol nav lai khi, Ilsaqleiqlav nail tsaol-aq juq-i mail jaol nail phao neq, aqbhaq bhi jiav-a nail ngaol. Al heel ngel-i mail, teevq kivq kivq lao Iljiltuv nail tsaol-aq juq dai khi mail, Ilsaqleiqlav nail tsaol-aq juq teevq munl nee teevq munl aqjail bhai maq jiiv bal laivq nia dai, pevq ail-a nail ngaol.
21 Maolseiq neq, iqyaq iqma phao aivq nail aqlavq gaol tsaoq-u phao, Heeqphaq Miqyail neq, nlma dov khoeq phao khe lilmoel bhai phaiq-ai lavq khi, nqkiv teevq kivq kivq lao iqyaq iqma khe ulcuvq bhai bhi bhoe-a nail ngel-i mail, ulcuvq bhoe pal-aivq khi, miltsaq aqgee bhi dov lal-a nail ngaol.
22 Aq-u phao, Ilsaqleiqlav nail tsaol-aq juq neq, ilphail khe-ai jiav nail iqyaq iqma nail ulcuvq gaoltsi khe miltsaq aqgee bhai naoq thaiq khi, ya ceiv lai-a nail ngaol.
23 Phaqlaol nail moeqphaq nail munl juq maqkhaiq, lavlaoq dai khi a bhai jeenq thaq nail aqivq juq maqkhaiq, Ilsaqleiqlav nail tsaol-aq juq nail haoqnao iqyaq iqma nail gaoltsi bhai the bhoel leevq-a nail ngaol.
24 Nqhao navq mav phao, Heeqphaq Miqyail neq, ilkhel nee mail Iljiltuv nail genl dev yaq juq bhai hel daiq lee khi, aqyu juq bhai bhi bheeq bhi leel lai-a nail ngaol. Ilkhel al neq, n-gaol phao neq, nqdil ilkhel, nq kiv phao neq, miqjaq ilkhel pevq-ail nail ngaol.
25 Aivq neq, aqyu juq nail moeqphaq lavlaoq nail phuqtsuq bhi tev cov-ail khi, aqyu juq nail lavlaoq bhai the nail bhi yanvq lal-a nail ngaol. Al heel ngel-i mail, Iljiltuv nail tsaol-aq juq neq, "Heeqphaq Miqyail, Ilsaqleiqlav nail tsaol-aq juq phao jaol khi ngadao juq bhai genl dev lavq nail niil, lavqtsail mail tsaoq dov bhel" dai, gul-a nail ngaol.
26 Aq-u phao Heeqphaq Miqyail neq, Maolseiq bhai ge bhiq-a nail: "Naoq nail aqlavq iqyaq iqma nail kovtavq phao gaol tsaoq khi, Iljiltuv nail tsaol-aq juq bhai maqkhaiq, aqyu juq nail moeqphaq lavlaoq juq bhai maqkhaiq, a bhai jeenq thaq nail aqivq juq bhai maqkhaiq, ulcuvq gaoq bhi deq pheeq lai yaoq" dai, ge bhiq-a nail ngaol.
27 Al heel ngel-i mail, Maolseiq neq, aivq nail aqlavq iqyaq iqma nail kovtavq phao gaol tsaoq-a nail ngel-i mail, nqbhaq bhaq lal-u phao, ulcuvq neq, aqlil khe-ai gaoq deq bhee gil lal-a nail ngaol. Ulcuvq deq bhee lal thail thaiq-u phao, Iljiltuv nail tsaol-aq juq neq, tsaoq dov nail dai khi, lai jai khi ngaol-aoq, Heeqphaq Miqyail neq, aqyu juq bhai iqyaq iqma nail lavqkhoel bhai, bhi deeq nel laivq-a nail ngaol.
28 Ulcuvq neq, aqlil khe-ai gaoq il kovq lal-a nail ngel-i mail, iqyaq iqma nail lavqkhoel bhai the bhoel leevq-a nail, Iljiltuv nail genl dev munl munl ma iqsanl mail maqkhaiq, moeqphaq lavlaoq dai khi a bhai jeenq thaq nail aqivq juq iqsanl mail maqkhaiq, teevq gaq gail maq jail dai, ulcuvq-i mail bhi deq pheeq khi sil gil-a nail ngaol.
29 Thail hai ngaol-aoq, Ilsaqleiqlav nail tsaol-aq juq neq, ilphail khe-ai jiav nail iqyaq iqma nail ulcuvq gaoltsi khe miltsaq aqgee bhai naoq thaiq khi iqmoeq-u nee, ya tsao ceil laivq-a nail ngaol.
30 Aq-u n-gaol Heeqphaq Miqyail neq, Ilsaqleiqlav nail tsaol-aq juq bhai Iljiltuv nail tsaol-aq juq nail aqlavq nee mail hevq jel bhiq-a nail ngaol. Ilsaqleiqlav nail tsaol-aq juq neq, Iljiltuv nail tsaol-aq juq iqyaq iqma nail daolbhaq bhai sil khi ga nail aqmaol bhai, ya moel-a nail ngaol.
31 Ilsaqleiqlav nail tsaol-aq juq neq, Heeqphaq Miqyail aivq nail bhaqaoq eeq nail aqlavq-i mail, Iljiltuv nail tsaol-aq juq bhai nl bhiq-a nail ganl, ya moel-u phao, aivq bhai gee sil lal bhiq khi ev lal-a nail ngaol. Al ovqtavq, Heeqphaq Miqyail dai khi aivq nail yaqkav Maolseiq bhai iqsanl neema thaq tsaol lal-a nail ngaol.