Dov-ail 15
Maolseiq dai khi Milliqanq-i mail daoqsel gul-a nail ganl
1 A bhai nee ngal-aq, Maolseiq dai khi Ilsaqleiqlav nail tsaol-aq juq neq, Heeqphaq Miqyail bhai daoqsel gul khi niail hai tsiq eeq-a nail ngaol:
"Heeqphaq Miqyail neq
eeq dee heel dee dee nail gaq pevq nail ngel-i mail,
ngal aivq bhai daoqsel gul khi tsiq eeq nail ngaol.
Moeqphaq dai khi moeqphaq jeeq-nvq thaq nail aqivq juq bhai
aivq ulcuvq lavqkhoel bhai liv bhoel gil bhiq-a nail ngaol.
2 Heeqphaq Miqyail neq,
ngaq nail gaq dai khi
ngaq nail daoqsel gul duq pevq nail ngaol.
Aivq ngaq bhai gaq lai nail phaq
bivq lavq-a nail ngaol.
Ngaq nail Miqyail bhai
ngal tsiq eeq nail ngaol.
Ngaq nail aqbhu nail Miqyail bhai
tsiq eeq tsiq heel bhiq nail ngaol.
3 Heeqphaq Miqyail neq,
genl dev nail aqnia
teevq gaq pevq nail ngaol.
Aivq nail aqmil neq,
Yawei dai khul nail ngaol.
4 Aivq neq,
Phaqlaol nail moeqphaq lavlaoq nail munl juq dai khi
genl dev nail munl juq
iqyaq iqma nail lavqkhoel bhai
liv bhoel gil bhiq-a nail ngaol.
Phaqlaol-i mail tsel dov-ai thaq nail
genl dev nail aqivq aqnia juq iqsanl neq,
iqyaq iqma aqnel nail lavqkhoel bhai
ga nevq heivq gil-ail khi sil gil-a nail ngaol.
5 Ulcuvq nail aqnavq neq,
aqyu juq bhai deq pheeq lai khi,
aqyu juq neq, lovmav khe-ai,
daoqthaoq bha ga nevq gil ail-a nail ngaol.
6 "Heeqphaq Miqyail-ol,
naoq nail lavqmal lavq nail bhaqaoq neq,
noeq-u maq dov dai pevq nail ngaol.
Heeqphaq Miqyail-ol,
naoq nail lavqmal lavq neq,
neejiav jiav nail gaq bhai
deeq peiv deeq leiv gil bhiq-a nail ngaol.
7 Naoq-i mail eeq dee dee nail
uv thaiq nail bhaqaoq-i mail
naoq bhai neejiav jiav nail juq bhai
gaq lai-aoq nail ngaol.
Naoq nail neema phail nail phaq neq,
miqjaq khe-ai tovq khi,
aqyu juq bhai govheeq jialmuv khe-ai,
bhi poiv jaq gil laivq-a nail ngaol.
8 Naoq nail aqhaq-i mail
ulcuvq bhai jiiv-a nail bhaq da nee
ulcuvq neq, thul lal khi
ilphail khe-ai, pevq lal-a nail ngaol.
Ulcuvq nail daoqthaoq gail aqgaol gaol lal khi ivq lal-a nail ngaol.
9 Nee jiav jiav nail gaq khaoqsail he he-ail,
'Ngal neq, aqyu juq bhai the kheel
khi nieivq miv nail ngaol.
Al ovqtavq
aqyu juq-i mail khal oil laivq-a nail
ildaoq maoqgaiq juq bhoil khi
ngal khal oil movq nail khe-ai, oil nail ngaol.
Ngaq nail thaoma gaol dov khi
ngaq nail aqlavq-i mail
aqyu juq bhai lav cov nail ngaol' dai, ge nail ngaol.
10 Thail hai ngaol-aoq,
naoq nail aqhaq-i mail
Iljiltuv nail tsaol-aq juq bhai jiiv bhiq khi
iqyaq iqma nail ulcuvq neq,
aqyu juq bhai deq pheeq gil lai-a nail ngaol.
Aqyu juq neq,
ulcuvq eel haq thaoq nail gaoltsi bhai
lovmav khe-ai ga nevq gil ail-a nail ngaol.
11 Heeqphaq Miqyail-ol,
naoq-ai khe-ai dul nail miqyail
khul gaq jaol nail-aiq.
Naoq-ai khe-ai eeq dee heel dee dee khi
meeq nail haol nail gaq khul gaq jaol nail-aiq.
Naoq-ai khe-ai, noeq-u maq dov nail
seiqleiq khaoqsail teevq bhee aol khi
bhi heeq bhi moel nail phaq nl nia nail gaq
khul gaq jaol nail-aiq.
12 Naoq nail lavqmal lavq bavq dil-u phao,
miltsaq neq, nv juq-ai neejiav jiav nail juq bhai
moevq bhoel-a nail ngaol.
13 Naoq-i mail gaoq haq goil gaiq-a nail phaq-i mail
naoq-i ul kovq-ai thaq nail tsaol-aq juq bhai
hevq daiq bhiq-a nail ngaol.
Al ovqtavq, naoq nail
meeq nail haol nail jaol juq bhai iqsanl
hevq bhoel laivq bhiq nail ngaol.
14 Tsaol jeq-e iqsanl mail
ganl niil ganl ya gaiq-u phao,
gee sil khi aqjuq juq-ai bhiq nail ngaol.
Philliltiv nail tsaol-aq juq iqsanl
gee sil dee dee-ai bhiq nail ngaol.
15 Eiqdonq milkhaoq khe jaol nail
aqivq aqtsu juq gail, gee sil lal bhiq khi
Maolbav milkhaoq khe uv thaiq nail juq gail,
aqjuq juq gil lal bhiq-a nail ngaol.
Al ovqtavq,
Khaqnanq milkhaoq bhai khal jaol nail
yaoq gaq yaoq-ao nee mail
neema ga juq gil ail bhiq-a nail ngaol.
16 Aqyu juq iqsanl mail
gee sil dee dee lal bhiq-a nail ngaol.
Heeqphaq Miqyail-ol,
ul kovq lavq-a nail naoq nail tsaol-aq juq
maq ceiv gil lai-u kev dai,
naoq nail aqlavq nail bhaqaoq-i mail
neejiav jiav nail al juq bhai
aqdoevq maq doevq-aoq thaq nail lovmav khe-ai
naol nl bhiq-a nail ngaol.
17 Heeqphaq Miqyail-ol,
naol aqyu juq bhai hevq khi
mal dil naoq nail gaoqjaoq pevq nail bha
hevq thaq-ai lai nail ngaol.
Heeqphaq-ol, jaol duq al dao bhai neq,
naol jaol nail aqduq pevq khi,
naoq nail aqlavq-i mail cov-ai thaq nail
meeq nail haol nail aqduq pevq nail ngaol.
naoq-i mail cov-a nail jaol duq bhai bhi jaol nail ngaol.
18 Heeqphaq Miqyail neq,
nqmaq maqluv halyeel uv thaiq nail ngaol.
19 Phaqlaol nail moeqphaq juq maqkhaiq
moeqphaq lavlaoq dai khi
a bhai jeenq thaq nail aqivq juq maqkhaiq,
iqyaq iqma aqnel bha aol ail-u phao,
Heeqphaq Miqyail neq,
ulcuvq gaoq bhi deq pheeq lal khi
aqyu juq bhai pheeq gil lai-a nail ngaol.
Thail hai ngaol-aoq,
Ilsaqleiqlav nail tsaol-aq juq neq,
miltsaq aqgee bhai naoq thaiq khi
iqyaq iqma laoljaol bhai ya ceiv ail-a nail ngaol" dai, gul-a nail ngaol.
20 Aq-u phao, Aqlonq nail al-ivq pevq nail Milliqanq dai khul nail Miqyail nail haqbhoil ge dan nail gaq neq, tsaillail tsiq-a nail ngaol. Jail nail yaqmai-aq juq gail, tsaillainl tsiq khi mail aivq nail haoqnaol phao tsao tsao-ail khi bhoeloe niu nail ngaol.
21 Milliqanq daoqsel niail hai gul-a nail ngaol:
"Heeqphaq Miqyail neq, eeq dee heel dee dee nail gaq pevq nail ngel-i mail,
aivq bhai daoqsel gul khi tsiq eeq bhel.
Moeqphaq dai khi moeqphaq jeeq-nvq thaq nail aqivq juq bhai
aivq ulcuvq-i mail bhi deq pheeq gil-a nail ngaol" dai, daoqsel gul-a nail ngaol.
Ulcuvq aqkhaq nail ganl
22 A bhai nee ngal-aq, Maolseiq neq, Ilsaqleiqlav nail tsaol-aq juq bhai iqyaq iqma aqnel nee mail Sullav dai khul nail haqaiq mildai haqtsoiq haqyal phao hel laivq-a nail ngaol. Aqyu juq haqaiq mildai bhai hail n bhee dai, gailkhaol tsao khi mail ngaol-aoq, ulcuvq maq ya moel-al.
23 A bhai nee ngal-aq, Maqlal dai khul nail aqduq bha kev lai-u phao, ulcuvq neq, aqkhaq ngel-i mail, maq daol nia-ail. Ulcuvq aqkhaq dov nail aqduq ngel-i mail, jaol duq al duq bhai Maqlala dai khul nail ngaol.
24 Tsaol-aq al juq Maolseiq bhai, "Ngadao juq ulcuvq khul daol heeq" dai, oeqbal thaq khi daoq govq dov bhiq-a nail ngaol
25 Al heel ngel-i mail, Maolseiq Heeqphaq Miqyail bhai bhi tsao jao-ai nail galduq gul-u phao, Heeqphaq Miqyail gail, aivq bhai aqbhaol doiq le teevq le bhi moel-a nail ngaol. Maolseiq aqbhaol doiqle al le ulcuvq bhai liv puvq gai aivq-u phao, ulcuvq aqkhaq nee mail ulcuvq aqtsil pevq lal-a nail ngaol.
Heeqphaq Miqyail neq, Maqlal dai khul nail aqduq al dao bhai, bivq-ai thaq nail aoldaoq kovqdaoq dai khi bhi tsao the nail phaq, aqyu juq nail haqbhoil a bhai oil thaq khi, laonq daiq bhiq-a nail ngaol.
26 Aivq ge nail: "Nul juq ngaq nail aqthel bhai aqmeeq-ai nal daiq khi ngal neema tsaq nail phaq nl nail nee ovqtavq, bivq-ai thaq nail aoldaoq kovqdaoq dai khi ya tsao the nail ganl juq bhai tsao the haq neq, Iljiltuv nail tsaol-aq nail kovtavq bhai bhi kev lee-a nail khoeq bhiq jiovq bhiq nail phaq, nul juq nail kovtavq bhai teevq thal-iq maq bhi kev lee-ail. Ngal neq, nul juq nail nalgoel bhai bhi meeq lai nia nail Heeqphaq Miqyail pevq nail ngaol" dai, ge bhiq-a nail ngaol.
27 A bhai nee ngal-aq, aqyu juq neq, Maqlal dai khul nail aqduq nee dov lal khi ulcuvq eelbev 12 dao dov nail nee ovqtavq malbhaq-ao aqbhaol khe-ai dul nail aqbhaol 70 bhaol doevq nail Eiqlinq dai khul nail aqduq bhai kev lal-a nail nee ovqtavq, ulcuvq jiav nail aqjail bhai haqphal saiqgov juq cov khi naq-a nail ngaol.