Dov-ail 16
Maqnav khaqmul dai khi nqmaiq laiqma
1 A bhai nee ngal-aq, Ilsaqleiqlav nail tsaol-aq juq neq, Eiqlinq dai khul nail aqduq nee mail dov lal-a nail ngaol. Iljiltuv nail milkhaoq nee mail dov-a nail nvq heeq teevq heeq 15 n bhee lal-u phao, Eiqlinq dai khi Silnaq gaoqjaoq nail gaiqlaq bhai jiav nail Sinl dai khul nail haqaiq mildai haqtsoiq haqyal bhai, kev lai-a nail ngaol.
2 A bhai gail, Ilsaqleiqlav nail tsaol-aq juq iqsanl mail, Maolseiq dai khi Aqlonq bhai oeqbal thaq khi daoq govq niail hai dov-a nail ngaol:
3 "Heeqphaq Miqyail neq, aivq nail aqlavq-i mail nv juq bhai Iljiltuv milkhaoq-ai bhi sil lavq-al kheel nul-uq neq, gaoq meeq jaiq nail ngaol. Milkhaoq al khaoq bhai neq, nv juq, haqjoil iqlaoq nail teevq jaoq jaol khi ya jaq-a nail nee ovqtavq, khaqmul iqsanl teevq bov ya jaq-a nail ngaol. Niil aq-il neq, nv juq iqsanl mail, aqjal maq ya jaq dai, bhi sil nail galduq, haqaiq mildai niil niai hel leevq lavq thaq nail niil" dai, ge bhiq-a nail ngaol.
4 Aq-u phao, Heeqphaq Miqyail neq, Maolseiq bhai ge bhiq-a nail: "Hel daiq dei-eiq. Ngal nul juq nail galduq, nqtavq nee mail maoq-aol aol nail khe-ai, khaqmul bhi ga lee nail ngaol. Al heel ngel-i mail, nul juq yaoq n yaoq n nee teevq n nail galduq ya gov jil nail ngaol. Al hai nl nail lavqkhoel nee ngaq nail tsaol-aq juq ngaq nail daoq bhai, nal daiq-ail laiq, maq nal daiq-ail laiq dai, ngal laonq daiq nail ngaol.
5 Kovq n n-gaol kev lal-u phao, aqyu juq yaoq n yaoq n nee maq tsil nvq bhoil ya gov jil thaq gai nail ngaol" dai, ge bhiq-a nail ngaol.
6 Al heel ngel-i mail, Maolseiq khi mail Aqlonq neq, Ilsaqleiqlav nail tsaol-aq juq bhai niail hai ge bhiq-a nail ngaol: "Nul juq bhai Iljiltuv nail milkhaoq nee mail hevq dol lavq-a nail gaq neq, Heeqphaq Miqyail pevq lao thaq nail ngaol dai, nul juq yanq-nl kiv ya heeq kivq lal nail ngaol.
7 Niaohao nqbhaq bhaq lal-u phao iqsanl, Heeqphaq Miqyail nail seiqleiq khaoqsail bhai, ya moel nail ngaol. Aivq bhai nul juq oeqbal thaq khi daoq govq dov nail aqthel-ai, aivq ya gaiq-ao nail ngaol. Nul juq nv nvq gaq bhai, oeqbal thaq khi daoq govq dov heeq phaq-ail, nv nvq gaq neq, khul pevq nail-aiq" dai, ge bhiq-a nail ngaol.
8 Aq-u phao, Maolseiq gaoq ge nail: "Heeqphaq Miqyail neq, nul juq-i mail oeqbal thaq khi daoq govq dov nail bhai gaiq-ao nail ngel-i mail, nul juq jaq nail galduq nqkiv phao neq, haqjoil bivq khi nqhao phao neq, nul juq-i mail loq nail khe-ai, khaqmul bivq lavq nail ngaol. Nv nvq gaq khul pevq nail-aiq. Nul juq nv nvq gaq bhai oeqbal thaq khi daoq govq dov nail neq, mal dil Heeqphaq Miqyail bhai oeqbal thaq khi daoq govq dov nail phaq pevq nail ngaol" dai, ge bhiq-a nail ngaol.
9 A bhai nee ngal-aq, Maolseiq neq, Aqlonq bhai ge bhiq-a nail: "Ilsaqleiqlav nail tsaol-aq juq iqsanl bhai niail hai ge bhiq yaoq: 'Heeqphaq Miqyail bhai oeqbal thaq khi daoq govq dov nail aqthel aivq ya gaiq-ao nail ngel-i mail, aivq nail sivtavq bhai aol gil lal yaoq'" dai, ge bhiq-a nail ngaol.
10 Aqlonq gail Maolseiq-i mail ge bhiq-a nail khe-ai, Ilsaqleiqlav nail tsaol-aq juq iqsanl mail bhai ge bhiq thail thaiq nail bhai, aqyu juq haqaiq mildai bhai hel daiq gai-u phao, nqdil nail lavqkhoel nee mail, Heeqphaq Miqyail nail seiqleiq khaoqsail bhai ya moel-a nail ngaol.
11 Heeqphaq Miqyail Maolseiq bhai ge bhiq-a nail:
12 "Ilsaqleiqlav nail tsaol-aq juq-i mail oeqbal thaq khi daoq govq dov nail aqthel bhai ngal ya gaiq-ao nail ngaol. Al heel ngel-i mail, naol aqyu juq bhai niail hai ge bhiq lai yaoq: 'Nul juq nqkiv phao neq, haqjoil ya jaq khi nqhao phao neq, khaqmul teevq bov ya jaq nail ngaol. Aq-u phao, ngal neq, nul juq nail Heeqphaq Miqyail pevq nail ganl bhai nul juq ya heeq kivq nail ngaol'" dai, ge bhiq-a nail ngaol.
13 Aq-u nqkiv neq, haqphal saiqgov juq cov khi gaq naq naq-a nail aqduq doi dai, nqmaiq laiqma teevq bhee gav lee-a nail ngaol. Nqhao phao iqsanl, aqyu juq-i mail jaol nail teevq jaoq tsaiqbhaiq ga lee-a nail ngaol.
14 Tsaiqbhaiq al peivq-ail gil-u phao, haqaiq mildai nail miltsaq bhai aqbhaq bhaq deel teevq yav jiav-ail ceevq nail ngaol.
15 Ilsaqleiqlav nail tsaol-aq juq bal yav al bhai ya moel-u phao, khul pevq nail dai, maq heeq nia nail ngel-i mail, "Niil neq, khul" dai, teevq gaq nee teevq gaq nal daiq pheel jaq-a nail ngaol. Maolseiq aqyu juq bhai ge bhiq-a nail: "Niil neq, Heeqphaq Miqyail-i mail nul juq jaq nail galduq, bivq lavq-a nail khaqmul pevq nail ngaol.
16 Heeqphaq Miqyail daoq niail hai bivq lavq-a nail ngaol: 'Yaoq gaq yaoq-ao nee yovqgavq-i mail loq nail khe-ai, gov jil nail ya nail ngaol. Yovqgav yovqgavq nail ildaoq lavqkhoel khe jaol nail yaoq gaq yaoq-ao nee, teevq gaq bhai teevq bhanq, ya gov jil nail ngaol'" dai, ge bhiq-a nail ngaol.
17 Al heel ngel-i mail, Ilsaqleiqlav nail tsaol-aq juq bhai daoq bivq-ai thaq nail khe-ai, gov jil-u phao, teevq pav ga nav juq neq, mao dai gov jil khi, teevq pav ga nav juq neq, micil taivq-ail gov jil-a nail ngaol.
18 Thail hai ngaol-aoq, aqyu juq-i mail hav daiq-u phao, mao dai gov jil thaq nail juq gail al jaiq-ail maq mao jel, micil taivq-ail gov thaq nail juq gail al jaiq-ail maq theq jel dai, ya gil-a nail ngaol. Yaoq gaq yaoq-ao nee mail, yovqgav yovqgavq-i mail loq nail khe-ai, ya gil-a nail ngaol.
19 A bhai nee ngal-aq, Maolseiq neq, aqyu juq bhai, "Teevq gaq iqsanl mail niaohao nqhao phao kev dai, thaq oil thaq gai" dai, ge gaiq bhiq-a nail ngaol.
20 Thail hai ngaol-aoq, teevq gaq ga nav neq, Maolseiq-i mail ge nail daoq bhai, maq nal daiq dai, niaohao nqhao phao kev dai, jail nail khaqmul al oil thaq gai-a nail bhaq da nee, lovthaoq ul lai khi aqtsel aqnil nil lal bhiq-a nail ngaol. Al heel ngel-i mail, Maolseiq neq, aqyu juq bhai neema phail lal bhiq-a nail ngaol.
21 Nqhao yaoq haoq yaoq-ao nee, yovqgav yovqgavq-i mail loq nail ee dai, gov jil nail ngaol. N-gaol phao, aqlaol kav lee haq neq, miltsaq khe jiav nail khaqmul al, phaq gil lai nail ngaol.
22 Kovq n n-gaol bhai neq, yaoq gaq yaoq-ao nee mail teevq gaq bhai nvq bhoil, ya gov jil nail ngaol. Ganl niil ganl bhai, Ilsaqleiqlav nail aqivq aqtsu juq heeq kivq movq nail ngel-i mail, Maolseiq bha nal daiq lal-a nail ngaol.
23 Maolseiq aqyu juq bhai ge bhiq-a nail: "Heeqphaq Miqyail daoq niail hai bivq-ai thaq nail ngaol. Niaohao neq, gaq naq naq nail aq-n pevq nail ngaol. Al ovqtavq, Heeqphaq Miqyail nail galduq meeq nail haol nail jaol-n n-gaol iqsanl, pevq nail ngaol. Al heel ngel-i mail, khaqmul poiv nail phaq jiav haq neq, yaq n n-gaol poiv yaoq. Nl jaq nail phaq jiav haq neq, yaq n n-gaol nl jaq yaoq. Yaq n n-gaol jaq gaq khi mail jail lal nail juq neq, niaohao nail galduq bhi jail yaoq" dai, ge bhiq-a nail ngaol.
24 A bhai nee ngal-aq, aqyu juq Maolseiq-i mail daoq bivq-a nail khe-ai, niaohao nail galduq bhi jail-u phao, lovthaoq maq ul lai-a nail nee ovqtavq, aqtsel aqnil iqsanl maq nil-ail dai, jiav nail ngaol.
25 Maolseiq ge nail: "Yaq n n-gaol neq, nul juq ganl maq nl dai, gaq naq naq nail aq-n pevq nail ngaol. Heeqphaq Miqyail bhai av bhiq nail jaol-n n-gaol iqsanl pevq nail ngel-i mail, mil gaol khe jail nail jaq nail phaq jaq yaoq. Lavq niil phao hal pov jaq-ail gaoq neq, jaq nail phaq khul gail maq ya moel yaoq-aol.
26 Al heel ngel-i mail, nul juq kovq n n-gaol bhai kev dai, khaqmul ya gov jil nail ngaol. Thail hai ngaol-aoq, jaol-n n-gaol pevq nail sivq n n-gaol bhai neq, khul nail jaq nail phaq gov jil-ail nail gail maq jiav-ail" dai, ge bhiq-a nail ngaol.
27 Al hai ge bhiq khi ngaol-aoq, teevq gaq ga nav neq, sivq n n-gaol khaqmul hal pov ail-a nail ngaol. Thail hai ngaol-aoq neq, aqyu juq khul gail maq moel-al.
28 Aq-u phao, Heeqphaq Miqyail neq, Maolseiq bhai ge bhiq-a nail: "Nul juq ngaq-i mail bivq-ai thaq nail daoq juq dai khi, cavq bhiq cov bhiq nail phaq bhai maq nal daiq dai, khaq mao kev dai, jaol-ai haq nail-aiq.
29 Heeqphaq Miqyail pevq nail ngal neq, nul juq bhai gaq naq bhi naq nail galduq jaol-n n-gaol bivq-ao nail ngaol dai, noeq thaq gai yaoq. Al heel ngel-i mail, kovq n n-gaol neq, nvq n nail haqbhoil khaqmul, aivq nul juq bhai bivq lavq nail ngaol. Sivq n n-gaol neq, yaoq gaq yaoq-ao nee mail yovqgavq-i mail khal jaol nail bhai ya jaol nail ngaol. Yovqgav yovqgavq nail jaol duq lavqniil phao aqjal hal pov-ail nail dai, maq ya dov-ail" dai, ge bhiq-a nail ngaol.
30 Al heel ngel-i mail sivq n-gaol kev lal-u phao, aqyu juq iqsanl mail, gaq naq naq-a nail ngaol.
31 Ilsaqleiqlav nail tsaol-aq juq neq, khaqmul al bhai Maqnava khaqmul dai khul nail ngaol. Khaqmul al neq, yavsaol aqneev khe-ai, dul khi aqphul nail nee ovqtavq, jaq haq neq, bhaiqtsil bhaiqeel-i mail lav sav-ai thaq nail khaqmul aqbhaq khe-ai, dul nail ngaol.
32 Maolseiq ge nail: "Heeqphaq Miqyail daoq niail hai bivq lavq-a nail ngaol. Ngadao juq bhai Iljiltuv nail milkhaoq nee mail hevq dol lavq khi haqtsoiq-ai jaol-u phao, bhi jaq lavq-a nail Maqnav khaqmul niil, yaqhao khe doevq lee yaq juq moel nia dai, khaqmul teevq bhanq ya oil thaq gai nail ngaol" dai, ge bhiq-a nail ngaol.
33 A bhai nee ngal-aq, Maolseiq neq, Aqlonq bhai ge bhiq-a nail: "Maqnav khaqmul teevq bhanq iqlaoq bhai oil bhoel khi mail, yaqhao khe doevq lee nail yaq juq bhi heldaiq nail dai khi, Heeqphaq Miqyail nail sivtavq bhai ya thaq gai nail ngaol" dai, ge bhiq-a nail ngaol.
34 Heeqphaq Miqyail-i mail Maolseiq bhai daoq khal bivq-a nail khe-ai, Aqlonq neq, iqlaoq al heeq oil khi, daoqma saljial nail thunq sivtavq bhai tsiq thaq gai-a nail ngaol.
35 Ilsaqleiqlav nail tsaol-aq juq neq, aqyu juq-i mail ya jaol nail milkhaoq bha maq khal kev ail-u kev dai, 40 kovq bhee dai, Maqnav khaqmul ya jaq-a nail ngaol. Aqyu juq Khaqnanq milkhaoq bhai aol lai nail milkhaiq bhai kev ail-u kev dai, Maqnav khaqmul ya jaq-a nail ngaol.
36 (Teevq banq dai ge nail neq, Ilsaqleiqlav nail tsaol-aq-i mail Eilphaq dai khul nail hav nail phaq-i mail tsel bhoil bhoil khi teevq bhoil bhai ge nail ngaol.)