Dov-ail 17
Lovphail nee mail ulcuvq dov lee-a nail ganl
1 Ilsaqleiqlav nail tsaol-aq juq neq, Heeqphaq Miqyail-i mail daoq bivq-a nail khe-ai, Sinl dai khul nail haqaiq mildai nee dov-ail khi, teevq dao nee teevq dao naq naq-ail gailkhaol dov-a nail ngaol. Aqyu juq Leiqphildinq dai khul nail aqduq bhai kev lai-u phao, haqphal saiqgov juq cov khi gaq naq naq-a nail ngaol. Thail hai ngaol-aoq, jaol duq al duq bhai ulcuvq maq jiav-ail.
2 Aq-u phao, aqyu juq Maolseiq bhai oeqbal thaq khi daoq govq dov-ail, "Nv juq daol nail haqbhoil ulcuvq bivq lavq yaoq" dai, hal nail ngaol. Maolseiq-i sanl, "Nul juq ngaq bhai khul khi mail daoq govq dov nail-aiq. Khul khi mail Heeqphaq Miqyail bhai laonq daiq nail-aiq" dai, ge bhiq-a nail ngaol.
3 Thail hai ngaol-aoq, aqyu juq ulcuvq al jaiq-ail moevq-ai bhiq nail bhaq da nee, Maolseiq bhai niail hai daoq govq gaoq dov bhiq-a nail ngaol: "Nv juq dai khi nv juq nail yaq juq bhai maqkhaiq, jaiqyaq juq bhai maqkhaiq, ulcuvq moevq khi mail bhi sil nail dai khi, Iljiltuv nail milkhaoq nee mail nv juq bhai hevq dol leevq lavq-a nail laiq" dai, ge bhiq-a nail ngaol.
4 Aq-u phao, Maolseiq neq, Heeqphaq Miqyail bhai gul khi niail hai hal-a nail ngaol: "Tsaol-aq niil juq nail galduq, ngal khal hai ya khi bhiq nail-aiq. Aqyu juq neq, ngaq bhai lovmav-i mail liv heivq nail dai khi, lainq-ai thaq nail ngaol" dai, hal-a nail ngaol.
5 Heeqphaq Miqyail Maolseiq bhai ge bhiq-a nail: "Naol Ilsaqleiqlav nail tsaol-aq juq nail sivtavq phao nee ail khi, aqyu juq nail lavqkhoel khe, aqivq aqtsu teevq pav ga nav juq bhai hel laivq nail nee ovqtavq, tsaol-aq thoil juq bhai iqsanl, hevq khi mail dov lai yaoq. Nal-eil nail laoljaol khe ulcuvq bhai deeq-a nail joiqniaoq gail, bavq khi lai yaoq.
6 Silnaq gaoqjaoq nail daoqthaoq bhai jiav nail lovphail aqjail bhai nul juq nail sivtavq-ai, ngal jaol nail ngaol. Naol lovphail bhai deeq-u phao, tsaol-aq thoil juq daol nail haqbhoil ulcuvq dov lee nail ngaol" dai, ge bhiq-a nail ngaol. A bhai nee ngal-aq, Maolseiq neq, Ilsaqleiqlav nail tsaol-aq aqivq aqtsu juq nail sivtavq nee mail lovphail bhai deeq-a nail ngaol.
7 Ilsaqleiqlav nail tsaol-aq juq neq, "Heeqphaq Miqyail ngadao juq nee mail teevq gaq khe-ai jaol-ail meeq" dai, ge khi aivq bhai laonq daiq-a nail nee ovqtavq, oeqbal thaq khi daoq govq dov-a nail ngel-i mail, jaol duq al duq bhai "Maqsaq"a dai maqkhaiq, "Meiqlilbha"b dai maqkhaiq, Maolseiq-i mail mil bhiq-a nail ngaol.
Aqmaqlail nail tsaol-aq juq nee genl dev-a nail ganl
8 A bhai nee ngal-aq, Aqmaqlail nail tsaol-aq juq neq, Leiqphildinq dai khul nail aqduq bhai lal kev khi, Ilsaqleiqlav nail tsaol-aq juq nee mail genl dev-a nail ngaol.
9 Aq-u phao Maolseiq neq, Yaolsuv bhai ge bhiq-a nail: "Aqmaqlail nail tsaol-aq juq nee mail genl dev nail haqbhoil, tsaol-aq teevq pav ga nav juq tsel dov yaoq. Niaohao ngal neq, Heeqphaq Miqyail-i mail bivq-ai lavq thaq nail joiqniaoq bavq khi, gaoqjaoq uqhuq bha thul phaol khi jaol lai nail ngaol" dai, ge bhiq-a nail ngaol.
10 Yaolsuv neq, Maolseiq-i mail ge bhiq-a nail khe-ai, Aqmaqlail nail tsaol-aq juq nee mail genl dev nail dai khi lai thail thaiq-u phao, Maolseiq, Aqlonq dai khi Hullav neq, gaoqjaoq bha dav lai-a nail ngaol.
11 Maolseiq neq, aivq nail aqlavq bavq dil-u phao, Ilsaqleiqlav nail tsaol-aq juq gaq lai nail ngaol. Thail hai ngaol-aoq, aivq nail aqlavq bavq kha-u phao, Aqmaqlail nail tsaol-aq juq gaq lai nail ngaol.
12 Maolseiq nail aqlavq gaon lal bhiq-u phao, Aqlonq khi mail Hullav neq, Maolseiq bhai lovmav teevq heeq nail kovtavq-ai, bhi jaol deel khi aivq nail aqlavq bhai teevq phao teevq gaq nioiv thaiq bhiq-a nail ngel-i mail, Maolseiq nail aqlavq nlma ga ail-u phao kev dai, bav dil ivq nia-a nail ngaol.
13 Al hai khi, Yaolsuv neq, Aqmaqlail nail tsaol-aq juq bhai aivq nail thaoma-i mail genl dev gaq-a nail ngaol.
14 Heeqphaq Miqyail neq, Maolseiq bhai ge bhiq-a nail: "Niil aq-il khe, genl dev gaq-a nail niil, khaq mao gail noeq kev noeq moel nail galduq, haoqgavq pavqyov bhai gevq thaq gai khi, Yaolsuv bhai bhi ge daiq yaoq. Ngal Aqmaqlail nail tsaol-aq bhai miltsaq nee mail siv peivq gil nail ngaol" dai, ge bhiq-a nail ngaol.
15 Aq-u phao, Maolseiq neq, laolduq lav sav khi "Heeqphaq Miqyail neq, "Yawei Nilsiqc" dai, aqmil mil bhiq-a nail ngaol.
16 A bhai nee ngal-aq, Maolseiq ge nail: "Heeqphaq Miqyail nail joiq jaq doiqbev nail sivtavq bhai, Aqmaqlail nail tsaol-aq aqlavq bav dil khi genl dev-a nail ngel-i mail, Heeqphaq Miqyail neq, aqyu juq bhai khaq mao iqsanl mail genl dev nail ngaol" dai, ge nail ngaol.