Dov-ail 18
Yeiqdaqlaol Maolseiq jaol nail bha nal ga lal-a nail ganl
1 Mildeiqanq nail milkhaoq khe philma pevq nail Maolseiq nail tsaolmaoq Yeiqdaqlaol neq, Maolseiq dai khi Ilsaqleiqlav nail tsaol-aq juq bhai Heeqphaq Miqyail-i mail khal nl bhiq-a nail ganl bhai maqkhaiq, Ilsaqleiqlav nail tsaol-aq juq Iljiltuv milkhaoq nee mail hevq dol laivq-a nail ganl bhai maqkhaiq, ya gaiq-a nail ngaol.
2-3 Jel lal-a nail iqmoeq-u bhai, Maolseiq neq, aivq nail khaqma Siqphaollav dai khi aivq nail yaqyov nvq gaq bhai aivq nail tsaolmaoq jaol nail bha bhi hevq kol laivq-u phao, hav bhoel bhiq-a nail ngaol. Maolseiq neq, "Ngal yu nail milkhaoq bha daq-i pevq nail ngaol" dai, ge khi yaqyov aqivq gaq bhai Geiqlaqsonqa dai mil bhiq-a nail ngaol.
4 Haoqnao teevq pov, "Ngaq nail aqbhu nail Miqyail neq, ngaq bhai tsao jao-ai lavq nail gaq pevq khi, Phaqlaol nail thaoma nee bhi jel-ail lavq-a nail gaq iqsanl, pevq nail ngaol" dai, ge khi yaqyov nvq gaq teevq gaq bhai neq, Eilliqseiqlaqb dai mil bhiq-a nail ngaol.
5 Yeiqdaqlaol neq, Maolseiq nail khaqma dai khi aivq nail yaqyov nvq gaq bhai haqtsoiq haqyal bha jiav nail Miqyail nail gaoqjaoq aqjail bhai haqphal saiqgov cov khi gaq naq naq thail thaiq nail Maolseiq jaol nail bha hel lavq bhiq khi, nal ga lal-a nail ngaol.
6 Aivq maq lal nail iqmoeq, Maolseiq bhai daoq cavq niail hai cavq bhoel-ai laivq bhiq-a nail ngaol: "Naoq nail tsaolmaoq pevq nail ngal Yeiqdaqlaol neq, naoq nail khaqma dai khi naoq nail yaqyov nvq gaq hevq khi naol jaol nail bha moel lal nail ngaol" dai, cavq bhoel-ai laivq-a nail ngaol.
7 Al heel ngel-i mail, Maolseiq neq, hav lavq-ail nail dai khi, dov ail-a nail nee ovqtavq, ya moel-u phao, aivq nail tsaolmaoq bhai peevqceevq kovdoiq doiq nail lavqkhoel nee moeq saol saol bhiq-a nail ngaol. Aqyu juq teevq gaq nee teevq gaq daoq tsaoq phuq khi haqphal saiqgov bhai aol lai-a nail ngaol.
8 Maolseiq neq, Heeqphaq Miqyail-i mail Ilsaqleiqlav nail tsaol-aq juq bhai bhi jel-ail nail galduq, Phaqlaol dai khi Iljiltuv nail tsaol-aq juq bhai nl bhiq-a nail ganl aivq nail tsaolmaoq Yeiqdaqlaol bhai ge bhiq-a nail ngaol. Al ovqtavq, Ilsaqleiqlav nail tsaol-aq juq-i mail gailkhaol dov thail thaiq-u phao, ya thaoq phuq-a nail haq nail aoq nail phaq iqsanl nee mail daq-n khi, Heeqphaq Miqyail-i mail hevq jel lavq-a nail ganl ge bhiq-a nail ngaol.
9 Ilsaqleiqlav nail tsaol-aq juq, Iljiltuv nail tsaol-aq juq nail aqlavq lavqkhoel nee Heeqphaq Miqyail-i mail hevq jel bhiq-a nail ganl aqmeeq bhai, Yeiqdaqlaol ya gaiq-u phao, aivq lavqkhiq tsail dee dee nail ngaol.
10 Aq-u phao, aivq ge nail: "Heeqphaq Miqyail bhai tsiq eeq bhel. Aivq neq, Ilsaqleiqlav nail tsaol-aq pevq nail nul juq bhai, Iljiltuv nail tsaol-aq juq-i mail uv thaiq nail nee bhi jel-ail lavq-a nail nee ovqtavq, Phaqlaol dai khi Iljiltuv nail tsaol-aq juq nail aqlavq nee iqsanl bhi jel-ail lavq-a gaq pevq nail ngel-i mail, aivq bhai tsiq eeq yaoq.
11 Heeqphaq Miqyail neq, miqyail yaoq juq yaoq nee maq tsil bhaqaoq eeq jaiq nail dai, yaq n n-gaol ngal heeq kivq-ao nail ngaol. Khul khi mail dai ngal-aq neq, aivq nail tsaol-aq juq bhai aivq hevq kovq khi, aqyu bhai hel daiq theq bhiq-a nail Iljiltuv nail tsaol-aq juq bhai nl kovq bhiq-a nail ngaol" dai, ge bhiq-a nail ngaol.
12 A bhai nee ngal-aq, Yeiqdaqlaol neq, Miqyail bhai laol bhiq nail galduq, miqjaq kheq poiv khi laol bhiq nail phaq dai khi laol bhiq nail yaoq phaq yaoq iqsanl, oil lavq-a nail ngaol. Aqlonq dai khi Ilsaqleiqlav nail aqivq aqtsu juq yaoq gaq yaoq-ao nee mail Yeiqdaqlaol nee teevq gaq khe-ai, Miqyail nail sivtavq bhai jaq nail galduq lal-a nail ngaol.
Yalkhaq dal nail juq bhi jaol-a nail ganl
13 Haoqnao n n-gaol, Maolseiq neq, tsaol-aq al juq nail ganl bhai yalkhaq dal nail haqbhoil, doiqbev bhai jaol deel-ai thaq nail ngaol. Tsaol-aq al juq, nqhao nee mail daq-n khi nqkivq kivq lai-u kev dai, Maolseiq nail teevq jaoq jaol jaoq-ai thaq nail ngaol.
14 Tsaol-aq al juq nail galduq Maolseiq yalkhaq ya dal ga bhiq nail bhai, aivq nail tsaolmaoq ya moel-u phao, aivq ge nail: "Naol tsaol-aq niil juq nail galduq khul nl bhiq thail thaiq nail-aiq. Khul khi mail naol teevq gaq taivq-ail nl nail-aiq. Tsaol-aq yaoq gaq yaoq-ao nee nqhao lao ma nee mail daq-n khi nqkivq kivq lai-u kev dai, naoq nail teevq jaoq jaol jaoq-ai thaq-il thoq" dai, ge bhiq-a nail gaol.
15 Maolseiq ge kovq bhiq-a nail: "Tsaol-aq niil juq neq, Miqyail neema tsaq nail phaq heeq nia dai, ngal jaol nail bha lal nail niil.
16 Tsaol-aq nvq gaq jil pheel jaq haq neq, ngaq-i mail noeq ceiv nail bhai oil nail haqbhoil, ngal jaol nail bha lal nail ngaol. Ngal neq, aqyu juq bhai Miqyail nail ya tsao the nail ganl juq dai khi, aolthaq kovqthaq bhai ya ge bhiq nail ngaol" dai, ge bhiq-a nail ngaol.
17 Aq-u phao, Maolseiq nail tsaolmaoq ge bhiq-a nail: "Naoq-i mail nl nail maq meeq-il.
18 Naol dai khi tsaol-aq niil juq iqsanl mail gaqdoil doil lal nail ngaol. Ganl niil ganl neq, naoq nail galduq al jaiq-ail aqliq liq nail ngaol. Naol teevq gaq taivq-ail nl gil nail neq, maq pevq lai nia-ail.
19 Ngaq-i mail ge nail bhai nal daiq yaoq. Miqyail neq, naoq-ai nee mail teevq gaq khe-ai jaol dei-eiq. Naoq nail ganl neq, tsaol-aq thoil juq jil pheel jaq-u phao, thoil juq nail haqbhoil, Miqyail nail sivtavq bhai oil lavq khi aivq bhai ge bhiq nail neq, aqmeeq ngaol.
20 Aqyu juq bhai, Miqyail nail ya tsao the nail ganl juq dai khi aolthaq kovqthaq juq bhai cavq bhiq cov bhiq khi doevqyeel lavqkhoel bhai khal hai ya tsao the nail ganl dai khi, aqyu juq-i mail ya nl nail ganl bhai cavq bhiq cov bhiq yaoq.
21 Thail hai ngaol-aoq, aqyu juq nail lavqkhoel khe, tsaol-aq 1000 gaq, 100 gaq, 50 gaq, 10 gaq bhai hel daiq phail nia nail juq bhai tsel dov khi ya bhi hel daiq phail nail ngaol. Aqyu juq neq, Miqyail bhai gee sil khi ev nail gaq, sal jiav ivq nail gaq dai khi, maq tsaq maq daol nail lavqkhoel nee oil nail phaq bhai bhe nail gaq ya pevq nail ngaol.
22 Aqyu juq neq, khaq mao gail yalkhaq dal nail juq pevq khi tsaol-aq al juq nail ganl bhai ya dal tsaq bhiq nail ngaol. Ganl ganl yaq juq neq, aqyu juq bhai aqyu juq ya bhi ge tsaq nail ngaol. Thail hai ngaol-aoq, aqyu juq ganl ganl ma juq neq, naoq bhai ya ge gaiq lal nail ngaol. Aqyu juq naoq bhai thail hai tsao jao-ai lavq nail bhaq da nee, naol naoq nail galduq aqphai phai lal nail ngaol.
23 Naol al hai nl khi, Miqyail iqsanl naoq bhai al hai bhi nl lavq haq neq, naol gail daq tsaol nail nee ovqtavq, tsaol-aq niil juq iqsanl mail ganl gaq gil lai khi neekhaol sil nail lavqkhoel nee, yovqgavq nail ilkhaol yovqgavq ya kovq gil-ail nail ngaol" dai, ge bhiq-a nail gaol.
24 Maolseiq gail aivq nail tsaolmaoq-i mail ge nail khe-ai, nal daiq khi nl-a nail ngaol.
25 Aivq, Ilsaqleiqlav nail tsaol-aq juq iqsanl nail lavqkhoel khe nl nia hal nia nail juq bhai tsel dov khi aqivq bhi jiovq-a nail ngaol. Aqivq al juq neq, 1000 gaq, 100 gaq, 50 gaq, 10 gaq bhai bhi hel daiq phail-a nail ngaol.
26 Tsaol-aq al juq neq, khaq mao gail, tsaol-aq munl munl ma juq nail ganl bhai ya dal tsaq bhiq nail ngaol. Aqyu juq ganl ganl ma juq bhai Maolseiq jaol nail bha oil lavq nail ngaol. Thail hai ngaol-aoq, ganl ganl yaq juq bhai neq, aqyu juq bhai aqyu juq nl gil-a nail ngaol.
27 A bhai nee ngal-aq, maq maoq maq heel lal mail, Maolseiq aivq nail tsaolmaoq Yeiqdaqlaol bhai aqmeeq-ai aivq nail miltsaq bha bhi kovq lai-a nail ngaol.