Dov ail 19

Dov-ail 19

Ilsaqleiqlav nail tsaol-aq Silnaq gaoqjaoq bhai kev lai-a nail ganl

1 Ilsaqleiqlav nail tsaol-aq Iljiltuv milkhaoq nee mail dov lal khi, bhala hail heeq heeq teevq n n-gaol neq, Silnaq gaoqjaoq haqtsoiq haqyal bha kev lai-a nail ngaol.

2 Aqyu juq, Leiqphildinq dai khul nail aqduq nee mail dov lal-a nail nee ovqtavq, Silnaq gaoqjaoq daoqthaoq-ai jiav nail haqtsoiq haqyal bha kev lal-u phao, haqphal saiqgov juq cov khi gaq naq naq-a nail ngaol.

3 Maolseiq neq, Miqyail bhai moel lai nail galduq gaoqjaoq bha dav lai-a nail ngaol. Gaoqjaoq bha Heeqphaq Miqyail Maolseiq bhai khul khi, niail hai ge bhiq-a nail ngaol: "Yaqkov nail jeq-e jaq-a pevq nail Ilsaqleiqlav nail tsaol-aq juq bhai niail hai ge bhiq yaoq:

4 "Ngal-i mail Iljiltuv nail tsaol-aq juq bhai khal hai nl bhiq-a nail bhai maqkhaiq, joelma nail aqdaol kovtavq nee hel-aivq bhiq-a nail khe-ai, ngal nul juq bhai ngal jaol nail bha hevq kel lavq-a nail bhai maqkhaiq, nul juq ya moel-a nail ngaol.

5 Nul juq ngaq nail daoq nal daiq khi ngaq nail daoqma saljial bhai tsao the haq neq, miltsaq niil heeq khe tsaol jeq-e juq iqsanl nail lavqkhoel nee, nul juq neq, ngaq nail haqbhoil aqphoiq kav jaiq nail ildaoq maoqgaiq juq pevq nail ngaol. Miltsaq niil iqsanl mail ngaq nail pevq khi ngaol-aoq,

6 nul juq taivq-ail, philma nail milkhaoq khe-ai dul nail ngaq nail meeq nail haol nail tsaol jeq-e pevq nail ngaol' dai, Ilsaqleiqlav nail tsaol-aq juq bhai ge bhiq-ail yaoq" dai, ge bhiq-a nail ngaol.

7 Al heel ngel-i mail, Maolseiq neq, gaoqjaoq nee mail yavq kha lee khi, Ilsaqleiqlav nail aqivq aqtsu juq khul jil-a nail nee ovqtavq, Heeqphaq Miqyail-i mail daoq khal bivq-a nail iqsanl mail, ge bhiq gil-a nail ngaol.

8 Aq-u phao, tsaol-aq al juq iqsanl mail ge kovq bhiq-a nail: "Nv juq Heeqphaq Miqyail-i mail daoq khal bivq-ai lavq thaq nail khe-ai, tsao the naol" dai, ge gil nail ngaol. Maolseiq gail tsaol-aq al juq-i mail ge nail khe-ai, Heeqphaq Miqyail bhai gaoq ge kovq bhiq-a nail ngaol.

9 Heeqphaq Miqyail Maolseiq bhai ge bhiq-a nail: "Ngal naoq bhai ge tsaoq nail bhai tsaol-aq juq gaiq nia khi, naoq bhai khaq mao iqsanl mail neema thaq tsaol lal nail haqbhoil, aqthul thul nail nqdil nee naol jaol nail bha ngal lee naol" dai, ge bhiq-a nail ngaol. Maolseiq gail tsaol-aq al juq-i mail ge nail daoq Heeqphaq Miqyail bhai ge kovq bhiq-a nail ngaol.

10 Heeqphaq Miqyail Maolseiq bhai niail hai gaoq ge bhiq-a nail ngaol: "Tsaol-aq thoil juq jaol nail bha ail khi yaq n n-gaol dai khi niaohao aqyu juq nail aqmaol bhai aqmeeq aqhaol haol dai lav haol bhiq-ail yaoq. Aqyu juq nail aqgaq aqdoi iqsanl bhi laiq tsiq yaoq.

11 Hail n n-gaol bhee lal-u phao, ya lav dan gaq nail ngaol. Aq-u n-gaol, tsaol-aq iqsanl nail sivtavq bhai Heeqphaq Miqyail pevq nail ngal, Silnaq gaoqjaoq bha yavq kha lee nail ngaol.

12 Ilsaqleiqlav nail tsaol-aq juq bhai gaoqjaoq nail jaoq jaoq laol laol maq bhi jel lal dai, aqgevq gevq jaoq bhiq khi niail hai daoq bivq yaoq: "Aqmeeq-ai yaol phaol yaoq. Teevq gaq bhai iqsanl, gaoqjaoq bha maq ya bhi dav lal-ail. Naoq-ail iqsanl, thaq bhi naoq tuv lal. Gaoqjaoq al bhai naoq-ail taivq-ail naoq tuv lal khi ngaol-aoq, ya sil nail ngaol.

13 Al ovqtavq, teevq gaq ga nav naoq tuv lav tuv lai khi ngaol-aoq, aivq bhai maq ya lav tuv lai-ail. Naoq tuv lav tuv lal nail tsaol-aq juq dai khi jaiqyaq juq bhai neq, lovmav-i mail maqkhaiq, heeqnav-i mail maqkhaiq, ya lav heivq nail ngaol' dai, daoq bivq yaoq. Nqbho jiiv nail aqthel heelma ma dai teevq thel gaiq lal-u phao taivq-ail, tsaol-aq juq gaoqjaoq bha ya dav lal nail ngaol" dai, ge bhiq-a nail ngaol.

14 A bhai nee ngal-aq, Maolseiq neq, gaoqjaoq nee mail yavq kha lee khi, tsaol-aq al juq nail aqmaol bhai aqmeeq aqhaol haol dai, lav haol bhiq-a nail ngaol. Tsaol-aq al juq gail aqyu juq nail aqgaq aqdoi laiq tsiq-a nail ngaol.

15 Maolseiq tsaol-aq al juq bhai ge bhiq-a nail: "Hail n n-gaol bhee lal-u phao, lainq gaq gai yaoq. Niil nail gaiqlaq bhai thaq jaol tavq" dai, ge bhiq-a nail ngaol.

16 Hail n n-gaol bhee lal-u phao, nqhao navq mav-ail, gaoqjaoq bha nqjaiq jaiq khi nqmeivq meivq meivq-ail, nqdil aqthul thul dai, uv thaiq lee-a nail nee ovqtavq, nqbho aqkav kav dai jiiv nail aqthel gail meel dov-ai leevq-a nail ngaol. Aq-u phao, haqphal saiqgov juq nail lavqkhoel khe jaol nail tsaol-aq juq neq, gee sil dee dee nail lavqkhoel nee, aqjuq juq lal bhiq-a nail ngaol.

17 Miqyail bhai moel lai nail haqbhoil Maolseiq neq, tsaol-aq al juq bhai haqphal saiqgov juq nee mail khul dol lavq khi, gaoqjaoq nail daoqthaoq bhai bhi thul phaol gil lai-a nail ngaol.

18 Heeqphaq Miqyail neq, Silnaq gaoqjaoq bhai miqjaq miqlail khe-ai, yavq kha lee-a nail ngel-i mail, gaoqjaoq teevq jaoq jaoq lao miqkhoiq-i mail jaol pheeq gil-a nail ngaol. Miqjaq khaoltsil nee mail miqkhoiq dov lal nail khe-ai, dov lal khi miqkhoiq al neq, pultavq bha dav lai-a nail nee ovqtavq, gaoqjaoq teevq jaoq jaoq lao-ail, nqluv mil luv luv dee dee lal-a nail ngaol.

19 Nqbho jiiv nail aqthel gail, gaoq kav jaiq lal-a nail ngaol. Maolseiq-i mail daoq ge tsaoq-u phao, Miqyail neq, nqjaiq jaiq nail khe-ai dul nail, aivq nail aqthel-i mail, gaoq ge kovq bhiq-a nail ngaol.

20 Heeqphaq Miqyail Silnaq gaoqjaoq nail uqhuq bhai yavq kha lee khi, Maolseiq bhai gaoqjaoq uqhuq bha bhi dav lal nail galduq, khul-a nail ngel-i mail, Maolseiq gail dav lai-a nail ngaol.

21 Heeqphaq Miqyail Maolseiq bhai ge bhiq-a nail: "Gaoqjaoq daoqthaoq bhai yavq kha-ail khi tsaol-aq al juq bhai, Heeqphaq Miqyail-ai moel lal nail haqbhoil, aqgevq nee mail maq bhi jel lal nail galduq, savtivq bivq-ail yaoq. Jel lal haq neq, aqyu juq ya sil nail ngaol" dai, ge bhiq-a nail ngaol.

22 Heeqphaq Miqyail nail aqjail bha aol lal nail philma juq ngaol-aoq, yovqgav yovqgavq nail aqmaol aqmeeq aqhaol haol dai, ya lav haol nail ngaol. Thail hai maq nl haq neq, Heeqphaq Miqyail neq, aqyu juq bhai lav cov bhiq nail ngaol" dai, ge bhiq-a nail ngaol.

23 Aq-u phao Maolseiq neq, Heeqphaq Miqyail bhai ge bhiq-a nail: "Aqyu juq iqsanl mail Silnaq gaoqjaoq niil nia maq dav lal nia-ail. Khul khi mail dai ngal-aq, naol nv juq bhai niail hai daoq bivq ga lal-aoq nail ngaol: 'Gaoqjaoq nail teevq jaoq aqgevq gevq jaoq gai-aivq khi aivq teevq jaoq taivq-ail, meeq nail haol nail gaoqjaoq bhi pevq lal yaoq' dai daoq bivq gaq lal-ao nail ngaol" dai, ge bhiq-a nail ngaol.

24 Thail hai ngaol-aoq, Heeqphaq Miqyail Maolseiq bhai gaoq ge bhiq-a nail: "Naol yavq kha-ail khi Aqlonq bhai khul ail yaoq. Philma juq dai khi mail tsaol-aq al juq bhai neq, Heeqphaq Miqyail pevq nail ngal jaol nail bha lal nail haqbhoil aqgevq nee mail maq ya bhi jel lal-ail. Aqgevq nee jel lal haq neq, aqyu juq bhai lav cov nail ngaol" dai, ge bhiq-a nail ngaol.

25 Aq-u phao, Maolseiq neq, gaoqjaoq daoqthaoq bha yavq kha-ail khi Heeqphaq Miqyail-i mail khal ge bhiq-a nail khe-ai, tsaol-aq al juq bhai gaoq ge bhiq-a nail ngaol.