Dov-ail 20
Bivq-ai thaq nail aoldaoq kovqdaoq 10 daoq nail ganl
1 Miqyail neq, tsaol-aq al juq bhai niail hai ge bhiq-a nail ngaol:
2 "Ngal neq, nul juq bhai yu nail yaqkav jiovq thail thaiq nail Iljiltuv milkhaoq nee mail hevq dol lavq-a nail, nul juq nail Heeqphaq Miqyail pevq nail ngaol.
3 "Ngaq-ai nee jaiq-ail haq neq, nul juq miqyail yaoq gaq yaoq bhai uqhuq thaq thaoq.
4 Nqtavq khe khal jaol khal jiav nail juq khe-ai dul lai dai maqkhaiq, miltsaq khe khal doevq khal jaol nail juq khe-ai dul lai dai maqkhaiq, ulcuvq khe khal doevq khal jaol nail juq khe-ai dul lai dai maqkhaiq, nul juq nail galduq thaoqphaoq aqma maolkhoel maq ya teivq-ail.
5 Ngal neq, nul juq nail Heeqphaq Miqyail pevq nail nee ovqtavq, miqyail yaoq gaq yaoq-ai uqhuq thaoq nail bhai, neekhaol maq sil nail Miqyail ngel-i mail, al juq bhai peevqceevq kovq doiq doiq khi uqhuq thaq thaoq. Ngaq bhai bhe nail gaq bhai neq, aqyu juq nail yaq juq, aqjievq lilheel hail ceevq liq ceevq bha kev ail-u kev dai, ngal nl kovq bhiq nail ngaol.
6 Thail hai ngaol-aoq, ngaq bhai gaiq-a khi ngaq-i mail bivq-ai thaq nail aoldaoq kovqdaoq bhai tsao the nail juq neq, aqyu juq nee mail yavq kha lee thaq nail yaq juq aqhinl ceevq bha kev dai, ngaq nail gaoq haq goil gaiq-a nail phaq bhi moel nail ngaol.
7 Nul juq nail Heeqphaq Miqyail pevq nail ngaq nail aqmil bhai yuq khi goiqbhaoq bhaoq nail lavqkhoel nee khal ge movq-ail thaq ge. Heeqphaq Miqyail nail aqmil bhai al hai yuq nail tsaol-aq bhai neq, maq nl kovq bhiq dai, maq bhi jel-ail.
8 Jaol n n-gaol bhai noeq kev noeq moel nail lavqkhoel nee, aq-u n-gaol neq, ngaq bhai av lavq nail aq-n bhi pevq yaoq.
9 Nul juq kovq n n-gaol bhai kev dai, ganl lai jai khi nl kivq nail ngaol.
10 Thail hai ngaol-aoq, sivq n n-gaol neq, nul juq nail Heeqphaq Miqyail nail galduq oil dov-ai thaq nail jaol-n n-gaol pevq nail ngaol. Aq-u n-gaol neq, nul juq dai khi nul juq nail yaqmiq yaqyov juq maqkhaiq, yaqkav yaqyov-aq yaqmai-aq juq maqkhaiq, jaiqyaq juq maqkhaiq, daq-i juq maqkhaiq, ganl thaq nl.
11 Khul khi mail dai ngal-aq, Heeqphaq Miqyail iqsanl, kovq n n-gaol bhai kev dai, nqtavq, miltsaq, iqyaq iqma dai khi a bhai khe khal doevq khal jaol nail iqsanl mail bhai teivq gil khi sivq n n-gaol neq, gaq naq naq-a nail ngaol. Al heel ngel-i mail, Heeqphaq Miqyail neq, jaol-n n-gaol geeqlaoq bivq khi, meeq nail haol nail aq-n dai, saol-nvq thaq nail ngaol.
12 Nul juq nail aqbhu aqma bhai ev yaoq. Al hai nl haq neq, nul juq nail Heeqphaq Miqyail-i mail bivq lavq nail miltsaq bhai doevqyeel heelma ma dai, teevq bhee teevq lovq jaol kivq nail ngaol.
13 Tsaol-aq yaq bhai thaq lav heivq.
14 Yu nee thaq bheeq thaq leel.
15 Yu nail nlmaoq thaq khoiq.
16 Yovqgavq nail ilkhaiq tavq nail juq bhai, maq tsaq nail salkhil thaq khanq.
17 Yovqgavq nee ilkhaiq tavq nail juq nail ilkhaol bhai, neekhaol maq sil nail neema thaq jiav. Aqyu juq nail khaqma bhai maqkhaiq, yaqkav yaqyov-aq yaqmai-aq juq bhai maqkhaiq, niaoqnel laqsil juq dai khi moeqphaq laljieiv juq bhai maqkhaiq, khal jiav nail phaq bhai neekhaol maq sil-ail thaq jiav" dai, ge bhiq-a nail ngaol.
18 A bhai jaol nail tsaol-aq juq neq, nqjaiq jaiq nail aqthel, nqbho jiiv nail aqthel, nqmeivq meivq khi gaoqjaoq nee mail miqkhoiq dov lal nail bhai ya gaiq ya moel-u phao, gee sil nail lavqkhoel aqjuq juq lal bhiq nail nee ovqtavq, eqyal nee mail thul phaol khi hel daiq nail ngaol.
19 Aqyu juq Maolseiq bhai, "Naol nv juq bhai ge lavq yaoq. Nv juq nal daiq nail ngaol. Thail hai ngaol-aoq, nv juq nee mail Miqyail daol coev dai, daoq thaq bhi ge tsaoq lee lavq. Maq ngel haq neq, nv juq sil lee nail ngaol" dai, ge bhiq-a nail ngaol.
20 Aq-u phao, Maolseiq ge kovq bhiq-a nail: "Thaq gee sil. Nul juq bhai laonq daiq nail dai khi maqkhaiq, nul juq aivq bhai gee sil khi ev nail lavqkhoel nee, oeqbal maq bhi nl nail dai khi maqkhaiq, Miqyail lee-a nail teevq-eel ngaol" dai, ge bhiq-a nail ngaol.
21 Thail hai ngaol-aoq, tsaol-aq al juq neq, eqyal bha thul phaol khi jaol nail ngaol. Maolseiq teevq gaq taivq-ail nav tseeq dai jiav nail Miqyail jaol nail aqduq bhai jiiv bhoel laivq-a nail ngaol.
Laolduq nee tavq nail aolthaq kovqthaq juq
22 Heeqphaq Miqyail Maolseiq bhai niail hai gaoq ge bhiq-a nail ngaol: "Ilsaqleiqlav nail tsaol-aq juq bhai niail hai ge bhiq yaoq: 'Ngal nqtavq nee mail daoq ge kha-ai leevq-a nail bhai mal dil nul juq ya moel-aoq nail ngaol.
23 Nul juq thaoqphaoq aqma maolkhoel juq teivq khi, ngaq-ai nee teevq di dai, thaq saol-nvq lal. Al ovqtavq, phul heel nail thaoqphaoq aqma maolkhoel juq bhai iqsanl thaq lav sav.
24 Nul juq ngaq nail galduq miltsaq-i mail laolduq ya lav sav nail ngaol. Laolduq al nail kovtavq bhai miqjaq kheq poiv khi laol bhiq nail phaq dai khi, aqtsaoq tsaoq tavq nail laol bhiq nail phaq bhai yuq khi, nul juq nail yaol, niaoqnel dai khi civqmeiv juq laol bhiq yaoq. Ngaq-i mail ngaq nail aqmil bhai bhi ev nail dai khi, bhi lav sav-ai thaq nail aqduq khul dao bhai maqkhaiq, ngal yavq kha lee khi nul juq bhai geeqlaoq bivq nail ngaol.
25 Nul juq ngaq nail galduq laolduq lav sav-u phao, lovmav-i mail lav sav haq neq, lovmav aqceiv juq maq ya bhi aol lai-ail. Khul khi mail dai ngal-aq, nlmaoq yalkav bhai yuq khi oev ceiv-ai thaq nail lovmav neq, maq haol dai, bhi pevq-ail nail ngaol.
26 Nul juq laolduq kovtavq bha dav lai-u phao, thaoqjoe nee thaq dav lai. Khul khi mail dai ngal-aq, yu teevq gaq ga nav hel daiq-u phao, nul juq nail aqmaol khe maq moel khaoq nail phaq bhai moel nia nail ngaol" dai, ge bhiq-a nail ngaol.