Dov-ail 21
1 Heeqphaq Miqyail gaoq ge nail: "Niil neq, Ilsaqleiqlav nail tsaol-aq juq bhai ya ge bhiq nail aolthaq kovqthaq juq ngaol.
Heiqbhail tsaol-aq juq nail yaqkav nee tavq nail aolthaq kovqthaq
2 'Heiqbhail nail tsaol-aq yaqkav teevq gaq ul-u phao, aivq neq, kovq kovq bhee dai, yaqkav ya jiovq nail ngaol. Thail hai ngaol-aoq, sivq kovq teevq kovq bhai, aqphoiq maq oil dai, ya phaiq ha bhiq nail ngaol.
3 Yaqkav jiovq lal-u phao, aivq teevq gaq taivq-ail yaqkav jiovq lal haq neq, yaqkav nee mail jel ail-u phao, aivq teevq gaq taivq-ail ya jel-ail nail ngaol. Thail hai ngaol-aoq, yaqkav teevq gaq ga nav yaqkav maq jiovq lal-u nee mail, ildaoq bhao nail ngel haq neq, aivq yaqkav nee mail jel ail-u phao, aivq nail khaqma gail ya phaiq bhiq nail ngaol.
4 Aivq nail ilheel gaq, aivq nail yaqkav bhai khaqma bhi hevq khi yaqmiq yaqyov jaol lee haq neq, yaqmiq yaqyov dai khi yaqmai-aq al gaq neq, ilheel gaq nail pevq nail ngaol. Al heel ngel-i mail, yaqkav teevq gaq taivq-ail ya phaiq bhiq nail ngaol.
5 Thail hai ngaol-aoq, yaqkav al gaq, "Ngal ilheel gaq bhai gaiq-a khi, ngaq nail yaqmiq yaqyov khaqma bhai gaiq-a nail bhaq da nee, khaq bhai iqsanl, maq dov ail" dai, ge lavq haq neq,
6 aivq nail ilheel gaq gail, yaqkav al gaq bhai yalkhaq dal duq bhai ya hel lavq nail ngaol. A bhai nee ngal-aq, aivq bhai lolgov-ai maq ngel haq neq, lolgov nail gov bhaq bhai hevq kel lavq-u phao, aivq nail naq kov bhai hail tsoe-i mail ya coev bhaoq bhiq nail ngaol. Al hai coev bhaoq bhiq gaq haq neq, yaqkav al gaq aivq nail ilheel gaq nail yaqkav teevq yeel gil dai, ya jiovq nail ngaol.
7 Teevq gaq ga nav yovqgavq nail yaqmiq bhai yaqkav dan khi gaoq jaq gai lai haq neq, yaqmiq al gaq, yaqyov-aq yaqkav juq khe-ai, sivq kovq teevq kovq bhai ngaol-aoq, maq ya phaiq bhiq-ail.
8 Ilheel gaq, yaqmiq al gaq bhai aivq nail maniil bivq jiov nail haqbhoil maq ya lai haq neq, yaqmiq al gaq nail aqbhu bhai gaoq ya bhi ul kovq lal nail ngaol. Khul khi mail dai ngal-aq, ilheel gaq saljial iqmoeq pheeq-a nail ngel-i mail, yu nail tsaol-aq bhai gaoq bhiq nail maq ya-ail.
9 Thail hai ngaol-aoq, ilheel gaq, yovqgavq-i mail ul nail yaqkav yaqmiq bhai yovqgavq nail yaqyov bhi hevq movq haq neq, yovqgavq nail yaqmiq khe-ai, ya tsu bhiq nail ngaol.
10 Teevq gaq ga nav yaqkav nail lavqkhoel khe khaqma jaol khi ngaol-aoq, yaoq gaq yaoq gaoq hevq movq haq neq, iqmoeq-u khe khaqma gaq bhai jaq nail daol nail maqkhaiq, aqgaq aqdoi maqkhaiq, khaqma teevq gaq-i mail ya geel-nvq nail phaq maqkhaiq, aqlil khe-ai ya bivq nail ngaol.
11 Thail hai maq nl bhiq haq neq, yaqmai-aq al gaq bhai phul maq oil dai, yaqkav nee mail ya bhi jel-ail nail ngaol'" dai, ge bhiq-a nail ngaol.
Lav nal lav goel bhiq nail nee tavq lai khi aolthaq kovqthaq juq
12 Heeqphaq Miqyail gaoq ge nail:
Yu teevq gaq bhai deeq khi mail deeq heivq haq neq, aivq iqsanl sil nail bhai ya daq nail ngaol.
13 Thail hai ngaol-aoq bhi sil nail dai, maq noeq mail maq il maq lal-ail deeq-a nail bhai, Miqyail-i mail bhi sil haq neq, aivq-i mail ge bhiq nail jaol juq bhai tsaol-aivq khi mail ya jaol phaol-ail nail ngaol.
14 Thail hai ngaol-aoq, tsaol-aq bhai heivq movq nail neema nee mail deeq heivq haq neq, ngaq nail laolduq bhai tsaoq-uvq khi ngaol-aoq, aivq bhai he dol-aivq khi ya heivq nail ngaol.
15 Aqbhu aqma bhai deeq nail gaq neq, ya sil nail ngaol.
16 Teevq gaq ga nav tsaol-aq khoiq khi, gaoq jaq nail maqkhaiq, aivq nail aqlavq bhai nieivq thaiq-ai thaq nail maqkhaiq, tsaol-aq al gaq bhai ya heivq nail ngaol.
17 Aqbhu aqma bhai ivqkhail yavq nail gaq neq, ya sil nail ngaol.
18 Teevq gaq nee teevq gaq khaq pheel jaq khi mail teevq gaq neq, teevq gaq bhai lovmav-i mail maqkhaiq, aqlavq bhaoq cuv-i mail maqkhaiq, liv bhiq deeq bhiq khi nal lai khi mail ngaol-aoq, maq sil dai deeq yao bhiq thaq nail gaq neq, iqjial kovtavq bhai iq thaiq nail nee ovqtavq,
19 thul khi, joiqniaoq tov khi gailkhaol tsao nia haq neq, deeq thaq nail al gaq bhai yalkhaq maq ya dal-ail. Thail hai ngaol-aoq, deeq yao bhiq thaq nail al gaq ganl nl nail maq ya nail ngel-i mail aivq bhai ya khaoq kovq bhiq nail ngaol. Al ovqtavq, nal nail al gaq meeq lai-u kev dai, ya tsao jao-ai bhiq nail ngaol.
20 Teevq gaq ga nav aivq nail yaqkav yaqyov-aq bhai maqkhaiq, yaqkav yaqmai-aq bhai maqkhaiq, dailkheq-i mail deeq khi yaqkav al gaq sil haq neq, ilheel gaq bhai ya dal bhiq nail ngaol.
21 Thail hai ngaol-aoq, yaqkav al gaq teevq n nvq n nal khi maq sil haq neq, ilheel al gaq bhai maq ya dal bhiq-ail. Khul khi mail dai ngal-aq, yaqkav dai ge nail neq, ilheel gaq nail pevq nail ngel-i mail ngaol.
22 Yaqyov-aq nvq gaq deeq pheel jaq thail thaiq-u phao, yaq phi-nq thaq nail yaqmai-aq bhai deeq yao lai khi yaq ga khi mail ngaol-aoq, aivq bhai malbavq daol dai maq lav nal haq neq, deeq yao bhiq thaq nail yaqyov-aq al gaq, yalkhaq dal duq bha lai khi, yaqmai-aq al gaq nail yovjil khal hal nail khe-ai, yalkhaq dal nail juq neema tsaq nail lavqkhoel, ya khaoq bhiq nail ngaol.
23 Thail hai ngaol-aoq, malbavq lav daol haq neq, niail hai ya daq nail ngaol: Doevqyeel nail haqbhoil doevqyeel,
24 maivneev nail haqbhoil maivneev, aqlavq nail haqbhoil aqlavq, aqhaoq nail haqbhoil aqhaoq, aqkhil nail haqbhoil aqkhil,
25 miqjaq poiv thaq nail haqbhoil miqjaq poiv khi, malbavq nail haqbhoil malbavq, lavqkhoel phao yao lai thaq nail haqbhoil lavqkhoel phao maqkhaiq, ya daq nail ngaol.
26 Ilheel gaq neq, yovqgavq nail yaqkav yaqyov-aq bhai maqkhaiq, yaqkav yaqmai-aq bhai maqkhaiq, maivneev bhai deeq khi maiv peivq peivq-ail haq neq, al nail haqbhoil yaqkav al gaq bhai ya phaiq bhiq nail ngaol.
27 Ilheel gaq, yovqgavq nail yaqkav bhai deeq khi aqhaoq deeq ga haq neq, al nail haqbhoil yaqkav al gaq bhai ya phaiq bhiq nail ngaol.
Jaiqyaq jaol nail ilheel juq-i mail ya nl nail aolthaq kovqthaq
28 Niaoqnel teevq maol tsaol-aq teevq gaq bhai uqkheel-i mail thaoq bhiq khi sil haq neq, niaoqnel al maol bhai lovmav-i mail ya liv heivq nail ngaol. Niaoqnel al maol nail haqjoil maq ya jaq-ail. Thail hai ngaol-aoq, niaoqnel nail ilheel gaq bhai maq ya dal bhiq-ail.
29 Niaoqnel thaoq lal nail ganl ilheel gaq bhai ge bhiq khi ngaol-aoq, maq phee thaiq dai, tsaol-aq teevq gaq bhai thaoq bhiq khi sil haq neq, niaoqnel al maol bhai lovmav-i mail ya liv heivq nail ngaol. Al ovqtavq, ilheel gaq bhai gail ya heivq nail ngaol.
30 Thail hai ngaol-aoq, niaoqnel nail ilheel gaq neq, sil thaq nail al gaq nail haqbhoil, "Khaoq kovq lavq yaoq" dai, hal lal haq neq, aivq nail doevqyeel ya jel-ail dai, khal hal nail khe-ai, ya khaoq kovq bhiq nail ngaol.
31 Niaoqnel-i mail yaqyov maq ngel haq neq, yaqmiq teevq gaq ga nav bhai thaoq bhiq khi sil haq neq, pultavq khe aolthaq kovqthaq jiav nail khe-ai, ya nl bhiq nail ngaol.
32 Thail hai ngaol-aoq, niaoqnel-i mail yaqkav yaqyov-aq maq ngel haq neq, yaqkav yaqmai-aq bhai thaoq heivq haq neq, niaoqnel nail ilheel gaq, yaqkav nail ilheel gaq bhai phul 30 bavq ya khaoq bhiq nail ngaol. Niaoqnel bhai gail lovmav-i mail ya liv heivq nail ngaol.
33 Tsaol-aq teevq gaq ga nav khaq duq duq khi mail, maq heq pheeq dai, bhi jiav-u phao, niaoqnel maq ngel haq neq, moeqphaq laljieiv teevq maol ga nav ga heivq-ail haq neq,
34 sil thaq nail jaiqyaq al maol nail haqbhoil ilheel gaq bhai ya khaoq kovq bhiq nail ngaol. Thail hai ngaol-aoq, jaiqyaq aqsil al maol neq, aivq ya nail ngaol.
35 Niaoqnel nvq maol thaoq pheel jaq khi mail, teevq maol thaoq heivq haq neq, aqdoevq jaol nail niaoqnel al maol gaoq khi mail phul neq, teevq gaq khe-ai, ya bhoil pav jaq nail ngaol. Sil thaq nail niaoqnel al maol nail haqjoil iqsanl mail teevq gaq khe-ai, ya bhoil pav jaq nail ngaol.
36 Thail hai ngaol-aoq, niaoqnel nail ilheel gaq neq, aivq nail niaoqnel-i mail thaoq bhiq thaq nail heeq nia-ai thaq khi ngaol-aoq, maq phee thaiq dai bhi jaol haq neq, sil thaq nail niaoqnel nail haqbhoil niaoqnel aqdoevq teevq maol khaoq bhiq khi sil thaq nail niaoqnel al maol bhai ya oil nail ngaol"dai, ge bhiq-a nail ngaol.