Dov-ail 22
Phul heel ildaoq maoqgaiq dai khi jaiqyaq juq nee tavq nail aolthaq kovqthaq
1 Heeqphaq Miqyail niail hai gaoq ge bhiq-a nail ngaol: "Tsaol-aq teevq gaq ga nav niaoqnel maq ngel haq neq, yaol teevq maol bhai khoiq khi mail heivq nail maqkhaiq, gaoq jaq nail maqkhaiq, nl haq neq, niaoqnel teevq maol nail haqbhoil ngaq maol, yaol teevq maol nail haqbhoil liq maol ya khaoq kovq bhiq nail ngaol.
2 Nqkiv liv mav phao khoiqbhaoq ilkhaol-ai aol lal nail bhai nieivq miv khi, deeq heivq haq neq, deeq heivq nail al gaq maq laiq-ail.
3 Thail hai ngaol-aoq, n-gaol laol ma phao, al hai deeq heivq haq neq, deeq heivq nail gaq laiq nail ngaol.
Khoiqbhaoq neq, aivq-i mail khoiq thaq nail phaq nail haqbhoil ya khaoq kovq bhiq nail ngaol. Aivq bhai khaoq kovq bhiq nail phul maq aol haq neq, aivq nail aqmaol gaoq khi mail yaqkav jiovq nail lavqkhoel nee ya khaoq kovq bhiq nail ngaol.
4 Aivq-i mail khoiq thaq nail niaoqnel maqkhaiq, moeqphaq laljieiv maqkhaiq, yaol maqkhaiq, aivq jaol nail bha aqdoevq jaol nail ya moel haq neq, nvq bhoil ya khaoq kovq nail ngaol.
5 Tsaol-aq teevq gaq ga nav yovqgavq nail jaiqyaq juq yovqgavq nail daiyal maq ngel haq neq, aqheeq tsilju nail gaoqkhail bhai lovq-u phao, yu teevq gaq nail daiyal bha, jaiqyaq al juq aol lai khi, yovqgavq nail daiyal maq ngel nail bhai jaq lai haq neq, aqheeq tsilju nail gaoqkhail khe khal meeq jaiq nail aqheeq allu juq-i mail, ya khaoq kovq bhiq nail ngaol.
6 Tsaol-aq teevq gaq ga nav yovqgavq nail daiyal bhai miqjaq kheq-u phao, aqgoi jiavbuv bhai poiv niaol laivq khi yu teevq gaq nail daiyal khe jiav nail gov bhoi dai khi, gov juq bhai poiv niaol laivq haq neq, miqjaq kheq thaq nail al gaq, miqjaq poiv thaq nail haqbhoil ya khaoq kovq bhiq nail ngaol.
7 Tsaol-aq teevq gaq ga nav, yu yaoq gaq yaoq bhai phul maq ngel haq neq, aqphoiq kav nail nlmaoq oil thaq gai ail-u phao, nlmaoq al laiq bhi khoiq jal-aivq khi khoiqbhaoq bhai nieivq miv haq neq, nvq bhoil ya bhi khaoq kovq nail ngaol.
8 Thail hai ngaol-aoq, khoiqbhaoq bhai maq nieivq miv haq neq, nlmaoq hav bhoel-a nail al gaq, aivq-i mail khoiq thaq nail maq khoiq thaq nail, ya heeq kivq dai, yalkhaq dal duq bha hel lavq khi mail, ya bhi tsao tsel nail ngaol.
9 Tsaol-aq nvq gaq, niaoqnel nee maqkhaiq, yaol nee maqkhaiq, moeqphaq laljieiv nee maqkhaiq, aqgaq aqdoi nee maqkhaiq, peivq-ail thaq nail ganl nee tavq lai khi maqkhaiq, nvq gaq nvq gaq-ail, 'Ngaq nail ngaol' dai, jil pheel jaq nail jiav haq neq, tsaol-aq al nvq gaq nvq gaq-ail, yalkhaq dal duq bha bhi lal khi, ya bhi tsao tsel nail ngaol. Sunq nail gaq neq, nvq bhoil gaoq ya khaoq kovq bhiq nail ngaol.
10 Tsaol-aq teevq gaq ga nav aivq nail yaol maqkhaiq, niaoqnel maqkhaiq, moeqphaq laljieiv maqkhaiq, jaiqyaq teevq maol ga nav, yu teevq gaq bhai bhi tsu lai-u phao, jaiqyaq al maol sil thaq nail maqkhaiq, malbavq daol khi nal nail maqkhaiq, yu-i mail tsai jal-aivq bhiq-a nail maqkhaiq, salkhil maq jiav haq neq,
11 jaiqyaq tsu-a nail gaq, aivq maq khoiq-a nail ganl Heeqphaq Miqyail nail sivtavq bhai ya khanq nail ngaol. Aivq-i mail khanq nail bhai ilheel gaq ya hav bhoel nail ngaol. Jaiqyaq tsu-a nail gaq iqsanl maq ya khaoq kovq bhiq-ail.
12 Thail hai ngaol-aoq, bhi khoiq jal-aivq thaq nail ngel lao haq neq, aivq gaoq ya khaoq kovq bhiq nail ngaol.
13 Haqtsoiq jaiqyaq-i mail bhi keivq heivq thaq nail jiav lao haq neq, sil thaq nail aqmaol bhai salkhil teevq laiq pevq dai, ya bhi moel nail ngaol. Jaiqyaq-i mail keivq heivq jaq thaq nail ngel lao haq neq, maq ya khaoq kovq bhiq-ail.
14 Tsaol-aq teevq gaq ga nav yu nail jaiqyaq ngaq khi ilheel gaq maq jaol-u phao, jaiqyaq al maol bhai bhi nal lai dai maqkhaiq, bhi sil dai maqkhaiq, nl haq neq, ya khaoq kovq bhiq nail ngaol.
15 Thail hai ngaol-aoq, ilheel gaq nail sivtavq nee nal lal bhiq khi mail sil haq neq, khaoq kovq bhiq nail maq loq-ail. Al ovqtavq, jaiqyaq bhai aqphoiq bivq khi ngaq thaq nail ngel lao haq neq, khaoq kovq bhiq nail maq loq-ail. Khul khi mail ngal-aq, ngaq-u phao, iqsanl mail aol gil nail ngaol.
Tsaol-aq teevq gaq-i mail yu nee jaol-u phao, ya nl nail aolthaq kovqthaq
16 Tsaol-aq teevq gaq ga nav khaqma maq nal dai, yaqmai-aq yaqnoil teevq gaq bhai jalmul mul khi jaol tavq haq neq, aqma nail aqtsil aqphoiq ya bivq nail nee ovqtavq, yaqmai-aq al gaq bhai ya hevq nail ngaol.
17 Thail hai ngaol-aoq, yaqmai-aq al gaq nail aqbhu aivq nail yaqmiq bhiq maol-ail nail neema maq tsaq haq neq, yaqmai-aq yaqnoil teevq gaq bhai hal nail khe-ai, phul bivq khi mail aivq nail aqbhu bhai ya khaoq kovq bhiq nail ngaol.
18 Neivq jiivq neivq cavq nee tavq lai khi thaol nail yaqmai-aq juq bhai aqdoevq maq ya bhi jaol-ail.
19 Jaiqyaq nee mail jaol tavq nail gaq bhai ya heivq nail ngaol.
20 Heeqphaq Miqyail nee mail jaiq-ail khi miqyail yaoq gaq yaoq bhai laol bhiq nail gaq bhai iqsanl, ya laq luv ya laq seil gil bhiq nail ngaol.
21 Nul juq nail lavqkhoel khe jaol nail daq-i juq bhai maq ya khoeq maq ya jiovq-ail. Khul khi mail dai ngal-aq, nul juq iqsanl, Iljiltuv nail milkhaoq bhai daq-i jiovq daiq-a nail ngaol.
22 Miqtsiq miqma dai khi aqbhu aqma maq bhao nail yaqnoil juq bhai maq ya kav jaq bhiq-ail.
23 Nul juq aqyu juq bhai kav jaq bhiq khi ngal jaol nail bha gul lal-u phao, ngal aqyu juq-i mail gul nail aqthel bhai mal dil nal daiq bhiq nail ngaol.
24 Al heel ngel-i mail, ngal nul juq bhai neema phail khi thaoma-i mail bhi heivq nail ngaol. Aq-u phao, nul juq nail khaqma bhai miqtsiq miqma bhi pevq-ail khi, nul juq nail yaq juq gail, aqbhu maq bhao nail yaq juq bhi pevq-ail nail ngaol.
25 Nul juq haq nail aoq nail ngaq nail tsaol-aq teevq gaq ga nav bhai phul phal bhiq-u phao, phul phal jaq nail tsaol-aq khe-ai, jailjeq maq ya oil-ail.
26 Nul juq nee ilkhaiq tavq nail tsaol-aq teevq gaq ga nav aivq-i mail doi nail phailkhaoq heelma nul juq bhai danl gai lal haq neq, nlma maq ga bhoel ail nail lavqkhoel, aivq bhai gaoq bivq kovq yaoq.
27 Khul khi mail dai ngal-aq, aivq nail aqmaol bhai doi nail al teevq keiv jiav-ail teevq-eel ngel lao haq neq, aivq maq doi mail khal hai khi iq thaiq nia nail-aiq. Nul juq maq bivq kovq dai, aivq ngaq bhai gul lal-u phao, ngal neq, gaoq haq gaiq-a nia nail gaq pevq nail ngel-i mail, aivq-i mail gul nail aqthel bhai nal daiq bhiq nail ngaol.
28 Nul juq Miqyail bhai khal ge movq-ail maq ya ge-ail. Nul juq bhai uv thaiq nail aqivq juq bhai iqsanl ivqkhail maq ya yavq-ail.
29 Nul juq nail iqmoeq khal moeq khe ya thaq nail aqheeq allu juq maqkhaiq, aqheeq tsilju nail ullul juq maqkhaiq, ngaq bhai iqmoeq ya bivq lavq nail ngaol. Al ovqtavq, nul juq nail uqbhao yaqyov juq gail ngaq bhai ya bivq lavq nail ngaol.
30 Al hai dul dai, nul juq nail yaol maqkhaiq, niaoqnel maqkhaiq, civqmeiv maqkhaiq, iqmoeq khal moeq khe phaoq thaq nail juq neq, ngaq bhai ya bivq lavq nail ngaol. Yaol yaol yaq juq dai khi niaoqnel niaoq yaq juq iqsanl aivq nail aqma nee mail sivq n jaol gaq haq neq, eivq n n-gaol, ngaq bhai ya bivq lavq nail ngaol.
31 Nul juq neq, meeq nail haol nail ngaq nail tsaol-aq juq pevq nail ngel-i mail, haqtsoiq jaiqyaq juq-i mail keivq heivq thaq nail haqjoil neq, maq ya jaq-ail. Haqjoil al juq neq, kheeq juq bhai ya bhi jaq nail ngaol" dai, ge bhiq-a nail ngaol.