Dov-ail 23
Aqtsaq aqdaol daol dai yal khaq dal nail ganl
1 Heeqphaq Miqyail niail hai gaoq ge nail ngaol: "Nul juq maq tsaq nail naqgaiq thaq ge dov. Haqeiv nail tsaol-aq juq phao jaol khi maq tsaq nail salkhil thaq khanq.
2 Tsaol-aq munl nail haoqnao tsao the khi laiq nail tsa nail phaq thaq nl. Naol salkhil khanq nail gaq ya jiovq-u phao, tsaol-aq mao nail phao jaol khi, tsaq nail phaq bhai thaq lav phal.
3 Salkhil khanq-u phao, haq nail gaq bhai tsao jao-ai movq khi ngaol-aoq, maq tsaq nail salkhil thaq khanq.
4 Naoq bhai neejiav jiav nail gaq nail niaoqnel maq ngel haq neq, moeqphaq laljieiv gailbheeq bheeq-ail khi jaol nail bhai, naol ya moel-u phao, aivq nail ilheel gaq bhai ya the kovq gai lai bhiq nail ngaol.
5 Aivq nail moeqphaq laljieiv yalkav aqliq al jaiq-ail liq nail ngel-i mail, ga tsuq-ail khi jaol nail bhai ya moel-u phao, gail jao jao khi mail maq ya jel lai-ail. Jaol teev khi mail ya tsao jao-ai bhiq nail ngaol.
6 Haq nail aoq nail tsaol-aq juq bhai yalkhaq dal nail aqduq bha yalkhaq dal-u phao, tsaq nail daol nail lavqkhoel nee mail ya dal bhiq nail ngaol.
7 Yu nail ganl maq tsaq nail phaq ge nail bhai maq ya aol lai-ail. Al ovqtavq, oeqbal maq aol nail gaq dai khi aq see aqdaol daol dai doevq nail gaq bhai iqsanl, sil dai, maq ya dal bhiq-ail. Khul khi mail dai ngal-aq, ngal neq, nl laiq-a nail gaq bhai maq bhi tsaoq jel-ail.
8 Maq tsaq maq daol nail lavqkhoel nee, phul thaq oil. Al hai oil nail gaq neq, meiv peivq peivq-ai thaq nail khe-ai dul khi, tsaq nail phaq bhai maq moel nia nail nee ovqtavq, tsaq nail daol nail tsaol-aq nail daoq bhai iqsanl lav phal nia nail ngaol.
9 Nul juq neq, Iljiltuv nail milkhaoq bhai daq-i pevq khi jaol daiq-a nail ngel-i mail, daq-i pevq nail neq, khal heel dai heeq nia nail ngaol. Al heel ngel-i mail, daq-i juq bhai thaq khoeq thaq jiovq bhiq" dai, ge bhiq-a nail ngaol.
Gaq naq naq nail aqyanq nail ganl
10 Heeqphaq Miqyail niail hai gaoq ge bhiq-a nail ngaol: "Nul juq kovq kovq bhee dai tseq khi aqheeq allu juq ya kha jaq ya kha daol nail ngaol.
11 Thail hai ngaol-aoq, sivq kovq teevq kovq bhai neq, maq ya tseq jaq, maq ya kha jaq kha daol-ail, miltsaq bhai aqnieivq bhi jiav khi aqheivq doevq dol lavq nail juq bhai gail maq ya gaiq kovq oil kovq jaq-ail. Haq nail aoq nail juq bhi gov jaq lal khi jail lal thaq nail juq neq, haqtsoiq jaiqyaq nail galduq ya bhi pevq nail ngaol. Nul juq nail aqheeq tsilju nail gaoqkhail dai khi saqloq nail gaoqkhail juq gail thail hai ya nl nail ngaol.
12 Nul juq kovq n bhee dai ganl ya nl khi sivq n n-gaol neq, ya naq nail ngaol. Thail hai nl haq neq, naoq nail jaiqyaq juq maqkhaiq, naoq nail ilkhaol khe tsu-ai thaq nail yaqkav juq maqkhaiq, nul juq nail lavqkhoel khe jaol nail daq-i juq maqkhaiq gaq naq naq nail aqyanq ya nail ngaol.
13 Ngaq-i mail ge nail bhai aqmeeq dai nal daiq yaoq. Miqyail yaoq gaq yaoq nail aqmil bhai iqsanl maq ya khul-ail. Aqyu juq nail aqmil bhai naoq nail moeqthaoq-i mail gail thaq ge dov" dai, ge bhiq-a nail ngaol.
Yaoq kovq yaoq-ao nee lav sav nail aqbhee nail ganl
14 Heeqphaq Miqyail niail hai gaoq ge bhiq-a nail ngaol: "Nul juq ngaq nail haqbhoil, teevq kovq bhai aqbhee hail pov ya lav sav nail ngaol.
15 Iqmoeq khal moeq khe phaq neq, deqtsiq maq aol nail khaqmul jaq nail aqbhee ya lav sav nail ngaol. Ngaq-i mail nul juq bhai daoq bivq-a nail khe-ai, Iljiltuv milkhaoq nee mail dov lal-a nail Aqbhil dai khul nail bhala al heeq bhai, sivq n bhee dai, deqtsiq maq aol nail khaqmul ya jaq nail ngaol.
Tsaol-aq teevq gaq iqsanl ngaq nail sivtavq bha lal-u phao, laol bhiq nail phaq maq aol dai, ngaq nail sivtavq bha maq ya aol lal-ail.
16 Nvq phaq teevq phaq neq, nul juq nail daiyal khe gov juq gaiq kovq nail kev lee-u phao, nul juq-i mail iqmoeq khal moeq ya-ai thaq nail gov juq nee mail gaiq kovq oil kovq nail aqbhee ya lav sav nail ngaol. Hail phaq teevq phaq neq, aqkovq gil lai nail yanq bhai, nul juq nail gaoqkhail lavqkhoel khe, aqheeq allu juq oil jil nail kev lal-u phao, aqheeq allu nail aqbhee ya lav sav nail ngaol.
17 Yaoq kovq yaoq-ao nee teevq kovq hail pov bhee dai, yaqyov-aq juq yaoq gaq yaoq-ao nee mail Yawei dai khul nail, Heeqphaq Miqyail nail sivtavq bha ya lal gil nail ngaol.
18 Ngaq bhai jaiqyaq nail aqsivq laol lal-u phao, deqtsiq khe nail khaqmul nee mail maq ya laol lal-ail. Aqbhee khe ngaq bhai laol lavq-a nail jaiqyaq juq nail aqtseel juq bhai haoqnao nqhao bha kev dai, maq ya bhi jail lal-ail.
19 Yaoq kovq yaoq-ao khe nul juq-i mail nl ya nail iqmoeq khal moeq khe aqheeq allu juq bhai nul juq nail Heeqphaq Miqyail nail ilkhaol bha oil lavq khi ya danq lal nail ngaol. Civqmeiv civq yaq bhai aivq nail aqma nail aqtsil nee mail maq ya cavq kheq-ail" dai, ge bhiq-a nail ngaol.
Miqyail nail nqtavq gaqkhoel gailkhaol lainq lavq nail ganl
20 Heeqphaq Miqyail niail hai gaoq ge bhiq-a nail ngaol: "Hel daiq dei-eiq. Nul juq gailkhaol bhai ail-u phao, bhi hel daiq phail nail haqbhoil dai khi, ngaq-i mail lainq-ai thaq nail aqduq bha nul juq bhai bhi hel-aivq nail galduq, nul juq nail sivtavq bhai nqtavq gaqkhoel ngal phaiq kha-ai leevq nail ngaol.
21 Aivq nail daoq bhai neema kev khi nal daiq yaoq. Aivq bhai thaq lav tsoiq. Khul khi mail dai ngal-aq aivq neq, ngaq nail haqbhoil nl nail ngel-i mail, nul juq-i mail lav tsoiq-a nail oeqbal bhai, aivq maq phaiq lavq-ail.
22 Nul juq aivq nail daoq bhai nal daiq khi, ngaq-i mail khal ge-ai thaq nail khe-ai, tsao the haq neq, nul juq bhai neejiav jiav nail juq bhai ngal neejiav jiav khi nul juq bhai genl dev lal nail juq bhai ngal genl dev nail ngaol.
23 Ngaq nail nqtavq gaqkhoel neq, nul juq nail sivtavq nee mail ail khi, Aqmaolliv nail tsaol-aq, Hiltiv nail tsaol-aq, Pheiqliqsil nail tsaol-aq, Khaqnanq nail tsaol-aq, Hilwil nail tsaol-aq, Yeiqbhulsil nail tsaol-aq juq jaol nail milkhaoq bha hel laivq lavq nail ngaol. Tsaol-aq al juq bhai ngal iqsanl mail lav cov gil nail ngaol.
24 Nul juq aqyu juq nail miqyail juq bhai uqhuq thaq thaoq. Aqyu juq nail aolsaolkovq khal jiav nail khe-ai, thaq tsao the. Aqyu juq nail miqyail juq bhai deeq peiv gil khi aqyu juq-i mail uqhuq thaoq nail lovmav ilkhel juq bhai iqsanl, deeq peiv gil yaoq.
25 Nul juq neq, nul juq nail Heeqphaq Miqyail bhai uqhuq thaoq yaoq. Al hai nl haq neq, ngal nul juq bhai geeqlaoq bivq khi, teevq bov bhi jaq bhi daol bov nail ngaol. Nal nail goel nail nalgoel nee iqsanl, bhi jel-ail nail ngaol.
26 Al ovqtavq, nul juq nail milkhaoq bhai yaq ga thaq nail aqma dai khi maq bhao aqma dai maq bhi jaol-ail. Nul juq bhai doevqyeel bhi heel nail ngaol.
27 Nul juq gailkhaol dov thail thaiq-u phao, ngal iqmoeq ail khi, a bhai khe jaol nail jeq-e jaq-a juq iqsanl bhai, lav gee sil ail bhiq nail ngaol. Nul juq bhai neejiav jiav nail tsaol-aq juq iqsanl mail, haoqnao naol kovq kovq khi tsaoq kovq gil-aivq dai iqsanl, ngal nl nail ngaol.
28 Ngal nuljuq nail sivtavq nee mail bhaiqtsil khe-ai dul munl bhai iqmoeq bhi lai khi, Hilwil nail tsaol-aq, Khaqnanq nail tsaol-aq dai khi Hiltiv nail tsaol-aq juq bhai lav gee sil bhiq nail nee ovqtavq, the dov gil nail ngaol.
29 Thail hai ngaol-aoq, ngal tsaol-aq al juq bhai teevq kovq nail lavqkhoel maq the dov-ail. Al hai nl haq neq, tsaol-aq maq jaol nail ngel-i mail, khaonq ha nail miltsaq pevq-ail nail nee ovqtavq, haqtsoiq jaiqyaq juq mao lal khi, nul juq maq hel daiq tsoiq nia dai, pevq lal nail ngaol.
30 Nul juq milkhaoq al khaoq bhai uv thaiq nia lal dai, nul juq bhai tsaol-aq bhi mao lal nail ngel-i mail, tsaol-aq al juq bhai teevq pov micil micil dai, the dov nail ngaol.
31 Ngal nul juq nail milkhaoq nail milkhaiq lav sav-u phao, iqyaq iqma aqnel nee mail daq-n khi Meildiqthiqla iqyaq iqma bha kev dai maqkhaiq, nlma dov khoeq phao khe jiav nail haqtsoiq haqyal nee daq-n khi Pheqlaqtaq laoljaol bhai kev dai maqkhaiq, bhi gaoq-an nail ngaol. Niil aq-il khe milkhaoq al khaoq bhai jaol thail thaiq nail tsaol-aq juq bhai ngal nul juq nail aqlavq bhai av bhiq nail ngel-i mail, al juq bhai nul juq nail sivtavq nee the dov kivq lal nail ngaol.
32 Aqyu juq nee mail maqkhaiq, aqyu juq nail miqyail juq nee mail maqkhaiq, nul juq khul nail daoqma saljial maq ya jaq tavq-ail.
33 Nul juq nail milkhaoq bhai aqyu juq thaq bhi jaol. Aqyu juq bhai bhi jaol haq neq, nul juq ngaq bhai bhi nl laiq dai, oeqbal nl lal nail ngaol. Nul juq aqyu juq nail miqyail juq bhai uqhuq thaoq haq neq, lavq phee bhai phee lai nail khe-ai dul nail ngaol" dai, ge bhiq-a nail ngaol.