Dov-ail 24
Heeqphaq Miqyail nail daoqma saljial bhai Ilsaqleiqlav nail tsaol-aq hav bhoel-a nail ganl
1 Heeqphaq Miqyail Maolseiq bhai niail hai gaoq ge bhiq-a nail ngaol: "Naol Aqlonq, Naqdal, Aqbhilhuv dai khi Ilsaqleiqlav nail tsaol-aq aqivq aqtsu juq 70 gaq bhee dai khul khi, ngal jaol nail gaoqjaoq bha dav lal yaoq. Al ovqtavq, micil eqyal nee ngaq bhai uqhuq thaoq yaoq.
2 Heeqphaq Miqyail pevq nail ngaq nail aqjail bha, naol teevq gaq taivq-ail ya jiiv bal lavq nail ngaol. Jail nail juq neq, ngaq nail aqjail bha maq ya bhi jiiv bal lavq-ail. Tsaol-aq munl juq neq, teevq gaq iqsanl mail gaoqjaoq bha maq ya dav lal-ail" dai, ge bhiq-a nail ngaol.
3 Maolseiq neq, Ilsaqleiqlav nail tsaol-aq jaol nail bha kovq lee khi, Heeqphaq Miqyail nail aolthaq kovqthaq dai khi aivq-i mail bivq-a nail daoq juq iqsanl mail gaoq ge bhiq gil-a nail ngaol. Tsaol-aq munl juq gail, "Nv juq neq, Heeqphaq Miqyail-i mail khal ge lavq-a nail iqsanl bhai tsao the naol" dai, teevq gaq khe-ai, ge kovq gil bhiq-a nail ngaol.
4 A bhai nee ngal-aq, Maolseiq neq, Heeqphaq Miqyail-i mail khal ge bhiq-a nail khe-ai, gevq thaq gai-a nail ngaol. Haoqnao nqhao naq mav-ail, gaoqjaoq daoqthaoq bha ail kha khi, laolduq bhai maqkhaiq, Ilsaqleiqlav nail jeq-e12 jeq-e nail haqbhoil lovmav ilkhel 12 khel bhai maqkhaiq, lav sav-a nail ngaol.
5 A bhai nee ngal-aq, aivq Ilsaqleiqlav nail yaqyov-aq yaqnoil juq bhai khoel bhiq-a nail khe-ai, aqyu juq Heeqphaq Miqyail nail sivtavq bhai miqjaq kheq poiv khi laol bhiq-a nail nee ovqtavq, niaoqnel teevq maol tseel lavq khi aqtsaoq tsaoq tavq nail laol bhiq nail phaq iqsanl, laol bhiq-a nail ngaol.
6 Maolseiq neq, jaiqyaq nail aqsivq teevq gaol pav oil khi, thailphail juq bhai oil bhoel-a nail nee ovqtavq, jail nail teevq gaol pav neq, laolduq kovtavq bhai jiivq dav bhiq-a nail ngaol.
7 A bhai nee ngal-aq, aivq neq, Heeqphaq Miqyail nail daoqma saljial gevq-ai thaq nail phaldoiq oil khi mail, tsaol-aq yaoq gaq yaoq-ao nee gaiq nia dai, ge bhiq-a nail ngaol. Tsaol-aq munl juq gail, "Nv juq neq, Heeqphaq Miqyail-i mail khal ge nail iqsanl bhai nal daiq naol" dai, ge kovq bhiq-a nail ngaol.
8 A bhai nee ngal-aq, Maolseiq neq, thailphail juq khe aol nail aqsivq bhai oil khi tsaol-aq munl nail kovtavq bhai jiivq dav bhiq-a nail ngaol. Aivq ge nail: "Heeqphaq Miqyail neq, nul juq bhai aivq nail daoq niil bivq khi nul juq nee mail jaq-a nail daoqma saljial neq, aqsivq niil bhaq da nee ge ceiv nail phaq pevq nail ngaol" dai, ge bhiq-a nail ngaol.
9 Maolseiq, Aqlonq, Naqdal, Aqbhilhuv dai khi Ilsaqleiqlav nail aqivq aqtsu juq 70 gaq neq, gaoqjaoq bha dav lai-a nail ngaol.
10 Aq-u phao, aqyu juq Ilsaqleiqlav nail Miqyail bhai ya moel-a nail ngaol. Aivq nail aqkhil neq, nqtavq khe-ai maqkhaiq, sainl nieq leq nieq leq-ai tsaoq nail khe-ai maqkhaiq, didaiq deel aqduq bhai thul phaol-nq thaq nail ngaol.
11 Ilsaqleiqlav nail aqivq aqtsu juq, Miqyail bhai ya moel khi ngaol-aoq, Miqyail neq, aqyu juq bhai maq lav cov bhiq-al. Al ovqtavq, aqyu yu miqyail nail sivtavq bhai teevq gaq khe-ai, jaq tavq daol tavq-a nail ngaol.
12 Heeqphaq Miqyail Maolseiq bhai ge bhiq-a nail: "Ngal jaol nail gaoqjaoq kovtavq bha dav lal khi al bhai daonq yaoq. Tsaol-aq yaq juq bhai bhi cavq bhi cov nail galduq, ngaq-i mail gevq-ai thaq nail aolthaq kovqthaq dai khi bivq-ai thaq nail aoldaoq kovqdaoq iqsanl mail aol nail lovmav dailpav nvq pav ngal naoq bhai bivq naol" dai, ge bhiq-a nail ngaol.
13 Al heel ngel-i mail, Maolseiq neq, aivq bhai tsao jao-ai nail gaq pevq nail Yaolsuv bhai khul khi mail, gaoqjaoq kovtavq bha dav lai-a nail ngaol.
14 Maolseiq neq, Ilsaqleiqlav nail aqivq aqtsu juq bhai, "Nv nvq gaq kovq kev lee-u kev dai, niai daonq yaoq. Nul juq nail lavqkhoel teevq phaq ga nav maq tsaq lai nail ganl jiav lal-u phao, Aqlonq dai khi Hullav jaol nail bha lai khi bhi ge ceiv lai yaoq" dai, ge bhiq-a nail ngaol.
15 Maolseiq gaoqjaoq kovtavq bha lai dav-u phao, nqdil neq, gaoqjaoq teevq jaoq jaoq lao jaol pheeq gil lee-a nail ngaol.
16 Heeqphaq Miqyail nail seiqleiq khaoqsail neq, Silnaq gaoqjaoq kovtavq bhai yavq kha lee-a nail ngaol. Kovq n bhee dai, gaoqjaoq teevq jaoq jaoq lao nqdil-i mail, jaol pheeq gil-a nail ngaol. Sivq n bhee lal-u phao, Heeqphaq Miqyail neq, nqdil nee mail Maolseiq bhai khul-a nail ngaol.
17 Gaoqjaoq daoqthaoq bhai jaol nail Ilsaqleiqlav nail tsaol-aq juq neq, Heeqphaq Miqyail nail seiqleiq khaoqsail bhai ya moel-u phao, gaoqjaoq uqhuq khe tovq-ai thaq nail miqjaq khe-ai, ya moel-a nail ngaol.
18 Aq-u phao, Maolseiq neq, nqdil-i mail jaol pheeq-ai thaq nail gaoqjaoq uqhuq bha dav lai-a nail ngaol. Aivq gaoqjaoq uqhuq bha 40 n 40 kivq bhee dai jaol-a nail ngaol.