Dov-ail 25
Uqhuq thaoq nail haqphal saiqgov nail galduq danq nail phaq
1 Heeqphaq Miqyail neq, Maolseiq bhai niail hai gaoq ge bhiq-a nail ngaol:
2 "Ilsaqleiqlav nail tsaol-aq juq neq, ngaq bhai laol lavq nail yalkav ya oil lavq nail ngaol dai, ge bhiq yaoq. Aq-u phao naol neq, neema kev nail tsaol-aq juq-i mail danq lal thaq nail yalkav iqsanl mail bhai, ya hav bhoel gil nail ngaol.
3 Niil neq, naoq-i mail ya hav bhoel nail yalkav juq pevq nail ngaol: Heel, phul, giqheel,
4 lenl nail kheeljoe, govnav lavmav nail kheeljoe, kheeljoe aqnel, haqphal aqjeel, civqmeiv nail aqmevq
5 aqnel leivq-ai thaq nail yaol yaol bhuq nail bavkov, civqmeiv nail bavkov aqjeel, aqkaqsal aqbhaol nail dailpav,
6 Phalmanq juq tovq nail saqloq aqtseel, hoel dav bhiq nail aqtseel dai khi, huqbhiq nil nail phaq tovq khi danq bhiq nail haqbhoil goe nail phaq,
7 Philma juq nail Eipho dai khul nail pultavq phao doi dav nail phailkhaoq dai khi neema bhai doi pheeq nail phaq nail haqbhoil sainl aqnav dai khi sainl yaoq phaq yaoq niil juq pevq nail ngaol.
8 Ngal Ilsaqleiqlav nail tsaol-aq juq nee mail jaol kivq dai ngaq nail galduq, uqhuq thaoq nail haqphal saiqgov ya cov nail ngaol.
9 Haqphal saiqgov al dai khi a bhai yuq nail yalkav juq neq, ngaq-i mail khal ge nail khe-ai, aqmeeq-ai ya cov nail ngaol" dai, ge bhiq-a nail ngaol.
Daoqma saljial nail thunq
10 Heeqphaq Miqyail gaoq ge nail:
"Heel ma phao nvq cav ovqtavq teevq pav, eeq nail phao dai khi daqmoe phao neq, teevq cav ovqtavq teevq pav bhee nail thunq teevq heeq bhai, aqkaqsal nail aqbhaol-i mail lav sav yaoq.
11 Thunq nail lavqniil lavqkhoel haol nail heel heel leivq leivq khi jaoq jaoq laol laol teevq jaoq bhai, heel-i mail aqgevq gaoq gevq dav gil bhiq yaoq.
12 Al ovqtavq, heel nail lavqceiv liq khaoq dai lav sav khi thunq nail aqkhil liq khil bhai neq, iqmoeq phao nvq khaoq, haoqnaol phao nvq khaoq dai, lav sav covq gai yaoq.
13 Bavqkhaoq iqsanl, aqkaqsal nail aqbhaol-i mail lav sav khi heel heel leivq ya leivq gai nail ngaol.
14 Al ovqtavq, thunq bavq nail galduq bavqkhaoq neq, thunq nail teevq phao teevq bal-nvq bhai jiav nail lavqceiv-ai ya tsaoq bhoel gai nail ngaol.
15 Bavqkhaoq al neq, lavqceiv al bhai nee maq he dov dai, khaq mao gail ya tsaoq bhoel gai nail ngaol.
16 Ngaq-i mail bivq nail daoqma saljial gevq-ai thaq nail lovmav dailpav nvq pav iqsanl, thunq al nail lavqkhoel bhai ya bavq bhoel gai nail ngaol.
17 Al ovqtavq, heelma phao nvq cav ovqtavq teevq pav dai khi eeq nail phao teevq cav ovqtavq teevq pav bhee nail 'Oeqbal pheeq thaiq nail' dai khul nail thunq nail khaoqpheeq bhai neq, haol nail heel-i mail ya lav sav nail ngaol.
18 Khal dov-ai thaq nail heel-i mail teivq-ai thaq nail Kheiqlulbhinqa nail maolkhoel nvq maol neq, thunq nail khaoqpheeq nail heelma phao teevq phao teevq maol ya lav sav nail ngaol.
19 Al ovqtavq, Kheiqlulbhinq al nvq maol bhai, thunq nail khaoqpheeq lavqkhoel nee mail oil dov khi khaoqpheeq nail kovtavq bhai teevq gaq khe-ai, teevq phao teevq maol ya lav sav covq nail ngaol.
20 Kheiqlulbhinq-i mail gaol phai-ai thaq nail aqdaol al neq, thunq nail khaoqpheeq bhai ya bhi joe pheeq gai nail ngaol. Aqyu nvq maol nail maivphaoq iqsanl, teevq gaq khe-ai ya bhi tsiq phaoq-ai thaq khi, thunq nail khaoqpheeq bhai ya bhi hel daiq gai nail ngaol.
21 Al ovqtavq, thunq nail lavqkhoel bhai daoqma saljial gevq-ai thaq nail lovmav dailpav nvq pav oil bhoel khi, thunq nail khaoqpheeq-i mail ya laol pheeq gai nail ngaol.
22 Jaol duq al duq bhai, ngal naoq-ai nee mail moel tavq lee nail ngaol. Ngal neq, daoqma saljial nail thunq kovtavq bhai jiav nail Kheiqlulbhinq nvq maol nail gaiqlaq khe 'Gaoq haq gaiq-a nail doiqbev' dai, khul nail khaoqpheeq nail kovtavq bhai jaol khi, Ilsaqleiqlav nail tsaol-aq juq bhai daoq ya bivq nail phaq ya jiav nail iqsanl mail naoq bhai ngal ge bhiq naol" dai, ge bhiq-a nail ngaol.
Kovqkhail nail ganl
23 Heeqphaq Miqyail gaoq ge nail: "Heel ma phao nvq cav, eeq nail phao teevq cav dai khi daqmoe phao teevq cav ovqtavq teevq pav bhee nail kovqkhail teevq khail bhai aqkaqsal nail aqbhaol-i mail lav sav yaoq.
24 Kovqkhail bhai haol nail heel heel leivq leivq bhiq khi teevq jaoq heel-i mail aqgevq gaoq gevq dav bhiq yaoq.
25 Al ovqtavq, kovqkhail teevq jaoq bhai hail nioil bhee nail aqjaq lav sav khi, aqjaq al bhai, heel-i mail aqgevq gaoq gevq dav gil bhiq yaoq.
26 Kovqkhail nail liq phao liq khoel bhai jiav nail aqkhil liq khil nail aqjail bhai heel nail lavqceiv liq khaoq ya lav sav covq gai nail ngaol.
27 Lavqceiv al neq, bavqkhaoq-i mail bavq nail galduq, kovqkhail teevq jaoq jiav nail aqjaq bhai ya lav sav covq gai nail ngaol.
28 Al ovqtavq, bavqkhaoq iqsanl, aqkaqsal nail aqbhaol-i mail lav sav khi heel heel leivq ya leivq gai nail ngaol.
29 Kovqkhail nee tavq nail thailphail juq, maiqgaoq juq, khaoqanq juq, lavqcovq juq, niil juq neq, ullul laol bhiq-u phao, yuq nail galduq haol nail heel-i mail ya lav sav nail ngaol.
30 Khaq mao iqsanl ngaq nail sivtavq bhai bhi jiav dai, ngaq bhai danq nail khaqmul neq, kovqkhail al nail kovtavq-ai ya bhi jiav nail ngaol" dai, ge bhiq-a nail ngaol.
Phalmanq tovq dav duq nail ganl
31 Heeqphaq Miqyail gaoq ge nail: "Phalmanq tovq dav duq bhai kha dov-ai thaq nail heel aqhaol-i mail lav sav yaoq. Lav sav-u phao, phalmanq nail aqkhaoq dai khi aqkhil maqkhaiq, aqeiv khe-ai dul nail maiqgaoq maqkhaiq, niil juq iqsanl mail teevq dao bhai taivq-ail, ya lav sav covq gil nail ngaol. Aqeiv al neq, daqtsuq daqphai dai iqsanl, ya bhi jiav nail ngaol.
32 Al ovqtavq, phalmanq aqkhaoq nee mail lavqmeiv kovq meiv ya lav sav dov nail ngaol. Lavqmeiv al juq neq, teevq phao hail meiv ya bhi covq nail ngaol.
33 Lavqmeiv al kovq meiv bhai neq, teevq meiv bhai bhaqtanq aqeiv khe-ai dul nail maiqgaoq hail gaoq dai khi, aqeiv daqtsuq daqphai ya bhi aol nail ngaol.
34 Phalmanq aqkhaoq bhai gail, bhaqtanq aqeiv khe-ai dul nail maiqgaoq liq gaoq, ya lav sav covq gai nail ngaol. Aqeiv al neq, daqtsuq daqphai dai, ya lav sav nail ngaol.
35 Al ovqtavq, phalmanq aqkhaoq nee cavq nail lavqmeiv al yaoq meiv yaoq-ao nee nail daoqthaoq bhai neq, yaoq meiv yaoq-ao nee, bhaqtanq aqeiv al, teevq eiv, ya lav sav covq nail ngaol.
36 Bhaqdanq aqeiv juq maqkhaiq, lavqmeiv juq dai khi phalmanq aqkhaoq maqkhaiq, kha dov-ai thaq nail haol nail heel-i mail lav sav khi, teevq dao bhai ya lav sav covq gil nail ngaol.
37 Phalmanq sivq heeq iqsanl ya lav sav nail nee ovqtavq, maiqgaoq bhai tsiq bhoel khi phalmanq tsiq dav duq nail sivtavq bhai aqbhaq bhaq lal dai, phalmanq ya lav tovq nail ngaol.
38 Phalmanq nee tavq nail, civmeiv dai khi miqjaq lail mevq civ dav duq gail, haol nail heel-i mail ya lav sav nail ngaol.
39 Phalmanq tsiq dav duq dai khi a bhai nee tavq nail nlmaoq juq bhai haol nail heel 34 kiqloq bhee nail heel yuq khi mail ya lav sav nail ngaol.
40 Al juq iqsanl mail, gaoqjaoq bha ngaq-i mail naoq bhai bhi moel-a nail khe-ai dul dai, aqmeeq-ai lav sav yaoq" dai, ge bhiq-a nail ngaol.